¹ Mendadi selian ni Isus mekpanaw, duuni mipekitaˈen buta, mibuta sikna mbataˈen. ² Sinaak nu nga sakup ni Isus, “Sir, taˈ mai mikesalaˈ di maˈnia kia, migigetaw, daan ma na buta? Iin, atawaka su nga mekegulangen?”

³ Kaliˈ sembag si Isus, “Kanaˈ iini mikesabaˈ dun butai kegigetawen, puun di salaˈen, sampay salaˈ nu mekegulangen. Ki getaw kini, migigetaw dun buta, adun mpaitaˈ nu Megbebayaˈ su ginuungen pebian di penggulaulaanen diniin. ⁴ Naa selian gendaw pa, subay penggulaulaan ta su pipenggulaula dinita nu suminuguˈ dinaan. Puˈ ndiˈ maiben, meglegebii na, dayun ndaˈidun nai mekenggulaula dun. ⁵ Selian ku dinig lumbang, naani tiag tu tibaˈan getaw.”

⁶ Selian ni Isus mektaluˈ, migdulaˈ dig lupaˈ, binasaˈen dun sug lawayen. Inugidanen dun dayun ki mata nug buta kia, ⁷ dunut miktaluˈ diniin, “Naa, angaya tug Bulenaw Siloe, pengulamusa ditu.” (Su gulugan nu ngalan kia Siloe, “Sinuguˈ.”) Mipanaw dayun kig buta kia diag bulenaw, mingulamus, dayun mipuliˈ, mikengitaˈ na.

⁸ Naa su nga sumbalay nug buta kia kampuˈ nu getaw mikaitaˈ diniin mekpenengi limus, sinaak nilan, “Kanaˈ ba iinen ini su pegingkudingkud mekpenengi limus?”

⁹ Simbag nu ngag duma, “Iin main.” Laak laung nug duma getaw, “Kanaˈen, ganggiden laak.”

Kaliˈ dayun pektaluˈ ki miuliˈan kia, “Naan laˈ lai.”

¹⁰ “Naa saˈ maˈantu,” sinaak nilan, “taˈ mai mikengitaˈa dun nandaw?”

¹¹ Kaliˈ sembag, “Ki getaw pegingelanan si Isus, migbasaˈ lupaˈ, binasaˈen dun lawayen, inugiden dayun di matau. Tinaluˈen dayun dinaan mangayu ditug Bulenaw Siloe, mengulamusu. Minangayu dayun mengulamus, iin dayuni kengitaˈu.”

¹² Sinaak nilan, “Naa ki getaw kiin, adin ma dun?”

Kaliˈ sembag su minayan buta, “Taˈ dun.”

¹³ Naa ki minayan buta kia, iwit nu getaw tu gedapan nu nga Pariseo. ¹⁴ Naa su kegbasaˈ ni Isus lupaˈ mukaˈ kepauliˈayen tug buta kia, mitaang di Gendaw Pelali. ¹⁵ Mendadi, sinaakan pelum nu nga Pariseo ki getaw kia, saˈ taˈig bian nu kengitaˈen. Kaliˈ sembag, “Ki getaw kiin, inugidanen ki matau basak. Benaˈ mingulamusu, mikengitaˈ nau dayun.”

¹⁶ Naa ki nga Pariseo kini, kaliˈ pektaluˈ sug duma, “Ki getaw kiin mineguliˈ dun, kanaˈ genat tu Megbebayaˈ, puˈ ndiˈen pektalentenani Gendaw Pelali.”

Laak sug duma pelum, laung nilan, “Naa saˈ pinenggiˈ mikesalaˈ tuˈui getaw kiin, mekendutaˈ bai kenggulaulanen di nga mekesalebuˈ kia?” Saˈ maˈnia, miksumpakiˈ ilan dun.

¹⁷ Naa saˈ maˈnia, sinaakan puliˈ nu nga Pariseo su miuliˈan kia, laung nilan, “Kagina yaˈai pipengitaˈ nu getaw kitu, taˈ mai ketaluˈ mu mekatag diniin?”

Kaliˈ sembag, “Mituudanu dun puˈ pimuunan iin nu Megbebayaˈ.”

¹⁸ Naa ki nga kaunutan nu nga getaw Judea kini, beknanen, ndaˈ ilan metuuday dun puˈ ki getaw kia, daan buta, dayun mikengitaˈ na. Saˈ maˈnia, pinsabi nilan su nga mekegulangen, ¹⁹ suminaak ilan dayun dinilan, “Bataˈ niu maini? Naa, pekteluˈen niu mibuta sikna mbataˈen. Saˈ maˈantu, taˈ mai mikengitaˈ dun ia nandaw?”

²⁰ Kaliˈ sembag su nga mekegulangen, “Kini, misuunan nami puˈ bataˈ nami tantu, mukaˈ misuunan nami, daan buta iin sikna mbataˈen. ²¹ Laak tumuˈ ndaˈ nami suunay saˈ taˈ mai mikengitaˈ dun nandaw, mukaˈ ndaˈ nami dadema suunay saˈ taˈ taway duni mineguliˈ dun. Tumuˈ iin nai saakay niu, gembagel nain, metau na sumbag!” ²² Kaas maˈniai simbag dun nu nga mekegulangen, puˈ mindek ilan di nga kaunutan kia. Puˈ duuni sabut nu nga kaunutan, adin su meglegintuud dun puˈ si Isus su Tinduˈ nu Megbebayaˈ Meglekaunutan, subay utidan di simbaan nu getaw Judea. ²³ Kaas maˈniai mitaluˈ dun nu nga mekegulangen, laung nilan, “Gembagel ma na, iini saakay niu!”

²⁴ Mendadi, keduaˈ deksuˈ na sebiay ki minayan buta kini. Kaliˈ ilan pektaluˈ diniin, “Naa sapaa tu gedapan nu Megbebayaˈ puˈ teluˈen mui metuud! Ki getaw kiin, suunan nami puˈ mikesalaˈ getaw iin.”

²⁵ “Taˈ dun,” simbagen, “saˈ mikesalaˈ bain, saˈ kanaˈ. Iin laaki misuunan ku, butau, dagid nandaw, mekengitaˈ nau.”

²⁶ Sinaak nilan diniin, “Taˈ maig binaalen diniˈa? Pikendutaˈen ma kauliˈayi mata mu?”

²⁷ Kaliˈ sembag, “Naa, daan ku na tinaluˈ diniu, laak ndaˈ niu pekineegay. Naa mauma dema mauyaˈan ma niu medengeg niu puliˈ? Mauyaˈan niu ba, sumakup damu dema diniin?”

²⁸ Pinampalaksaan nilan dayun kig buta kia, laung nilan, “Paa, yaˈa kiin, sakupa niin. Yami, sakup mami ni Moises. ²⁹ Naa si Moises, misuunan nami puˈ ginukitan tuˈu iin nu Megbebayaˈ. Laak ki getaw kiin, ndaˈ nami suunay saˈ adini pigenatanen!”

³⁰ Kaliˈ pektaluˈ su miuliˈan buta, “Misebuˈanu gupia diniu! Ndaˈ niu suunay saˈ adini pigenatanen, asa piuliˈaneni matau! ³¹ Suunan ta puˈ su nga mekesesalaˈ getaw, ndiˈ penembaˈen nu Megbebayaˈ su kenengi nilan. Penembaˈen laak nu Megbebayaˈ su kenengi nu megbasa gupia diniin mukaˈ menggulaula tu mauyaˈanen. ³² Puˈ genat pa dengantu, iin pa pegdedengeg duuni meneguliˈ dig buta, mibuta sikna mbataˈen. ³³ Naa saˈ kanaˈ genat tu Megbebayaˈ ki getaw kiin, ndaˈen sia mpenggulaula.”

³⁴ “Apelai, yaˈa kiin,” simbag nilan. “Genat tu kaikaˈay mu, mekesesalaˈa getaw. Dayun yaˈa bai mekpetuˈun dinami?” Dayun nilan puaˈay tu simbaan nilan su miuliˈan buta.

³⁵ Mendadi si Isus, benaˈ midengegen puˈ ki piuliˈanen kia, piawaˈ tu simbaan nu getaw Judea, pinengawen. Benaˈ mibaanganen, sinaaken diniin, “Mikpetuuda ma dig Bataˈ nu Kilawan?”

³⁶ Kaliˈ sembag su miuliˈan kia, “Naa saˈ mesuˈat, Sir, pesuun mu dinaan saˈ taˈ taway dun iin, adun mekpetuudu diniin!”

³⁷ “Minitaˈ mu na,” simbag ni Isus. “Iinig duma mu megabitabit.”

³⁸ “Sir,” laungen, “mekpetuudu!” Minginlulud dayun di gedapan ni Isus.

³⁹ Kaliˈ pektaluˈ si Isus, “Iini luminusadu dun dinig lumbang, puˈ adun pekpainen ku ki ngag buta mukaˈ ki nga getaw mangken puˈ mekengitaˈ ilan daw. Mekengitaˈ dayun sug buta kia, mukaˈ buta na sug laung nilan dun mekengitaˈ.”^a

⁴⁰ Dekag midengeg nu nga Pariseo pegindeg dia, sinaak nilan dini Isus, “Taˈi ketaluˈ mu dun? Yami, buta bami dema?”

⁴¹ Kaliˈ sembag si Isus, “Saˈ upama buta amu tantu, naa ndaˈi salaˈ niu. Dagid kagina engkenen niu puˈ mekengitaˈ amu, gempantek, mikesalaˈ amu.”