Mendadi, kini su Gempia Petenday sinulat ni Lucas mekatag dini Isukristu, ki Meglegawen di tibaˈan getaw. Suminulat dun si Lucas, getaw memulung. Metau gupia sumulat si Lucas, kaas pinungunen su kelaun gukiten di pinggulaula ni Isus genat di keksibaluy ni Isus kilawan sampay di kelentunen ditu gekbus langit. Pimantek ni Lucas dini sinulaten ki gembagel lelaat ni Isus tu nga getaw, pia su pubri, saˈ su melubay, piaˈ taˈ alanduni kelegenayen. Maitaˈ pa pagid dini sinulat kini su gembagel keliag nu getaw ditu kegigetaw ni Isus, labi na su keleliag nilan ditu ketubuˈen puliˈ genat matay.

Su suminulat dig libru kini si Lucas, iinig duma nu sala peneligan ni Isus si Pablo saˈ mikpanaw si Pablo meksigwag di Gempia Petenday di kegawen ni Isus tu getaw. Asa si Lucas, kanaˈ getaw Judea. Kaas pisuun ni Lucas dinig librunen kini sug lelaat ni Isus tu tibaˈan bansa nu getaw, pisuun ni Lucas puˈ si Isus su Meglegawen di salaˈ nu kelaun bansa dinig dibabaw lumbang. Duuni metaas getaw si Teofilo, kanaˈ dadema getaw Judea, iini piwitan ni Lucas sinulat kini. Mukaˈ duun pa sala libru piwit ni Lucas dini Teopilo, Ki nga Pinggulaula nu nga Peneligan ni Isukristu, sala pa di ngag libru mipungun dinig libru Kig Begu Pasad. Miukit dia sala libru kia su mibianan nu nga sakup ni Isus dekag na pilentu ditu gekbus langit si Isus.