¹ Naa midengeg nu nga peneligan ni Isus mukaˈ nu ngag duma mimated ditu Judea puˈ ki nga kanaˈ getaw Judea, mitelimaˈ nilan dadema su taluˈ nu Megbebayaˈ. ² Mendadi benaˈ midengeg nilan, sug duma sakup, teluˈen nilan dayun puˈ ki nga kanaˈ getaw Judea kia suminakup na, subay sirkunsisuun dailan dema. Saˈ maˈantu, ilan kini, benaˈ minateng puliˈ si Pedro ditu Jerusalem, pigbensi nilan si Pedro, laung nilan diniin, ³ “Mauma dema mingumbelayan ka ma ditu nga kanaˈ getaw Judea, su ndaˈ mesirkunsisu? Mauma dema dumingan ka padun maan dinilan?” ⁴ Saˈ maˈnia, gilaˈ dayun ni Pedro pegukit dinilan su kelaun mipenggulaula genat tu pikpuunanen.

⁵ Kaliˈ pektaluˈ si Pedro, “Mendadi, su ditu pau lunsud Jope, minenabiu, mitekaw duun masiˈi pinitaˈ nu Megbebayaˈ dinaan. Minitaˈu duuni mitentun genat tug langit maˈniin palas gumut miketan di paat buuk sunguten, mitenaˈ dia gedapan ku. ⁶ Saˈ pigipusu diag dialem, minitaˈu ki nga gininisan metetubuˈ medengen saˈ malig, nga mamak sampay manukmanuk. ⁷ Midengegu dayuni taluˈ, laungen, ‘Naa, Pedro, pegbuata, titiˈ mu ki sedaˈan mu, aan ka dayun!’ ⁸ Dagid simbagu, ‘Plai, uu Kaunutan! Ndaˈu mainsan aan dun, su melemuˈan ami dun sampay su ndiˈ nami maˈaan nga getaw Judea.’

⁹ “Midengegu pa puliˈ su miktaluˈ,” maaˈ laung padun ni Pedro. “Laung nu miktaluˈ, ‘Adin su tinaluˈ nu Megbebayaˈ maˈaan, ndiˈ mu teluˈay ndiˈ mu maˈaan.’ ¹⁰ Mendadi ki mipenggulaula kia, telu deksuˈ pa pauliˈay, dekag pa mibatun na puliˈ ditug langit sug launanen kia. ¹¹ Mendadi su kebatun dun puliˈ tug langit, iin dademai kedateng nu telu tawan diag balay pektulugan ku. Sinuguˈ ilan nu sala tawan kaunutan sundalu dia Cesarea, meditu ilan naan. ¹² Mukaˈ tiluˈanu nug Balakat nu Megbebayaˈ, ndiˈu mekalangalang megdunut dinilan. Saˈ maˈantu, tumindug dadema dinaan meditu Cesareai nga genem tawan kepetedan ta kini, miditu ami balay nu getaw suminuguˈ dinilan, si Cornelio. ¹³ Benaˈ minateng ami ditu, tinaluˈ ni Cornelio dinami puˈ duun masiˈi minitaˈen getaw langit pegindeg diag dialem balayen. Miktaluˈ daw diniin su getaw langit, ‘Suguˈ mui getaw mangay ditu Jope, ditu ni Simon sala ngalanen si Pedro. ¹⁴ Iin nai mekpetenday diniˈa dig bian nu kegawen mu, kampuˈ nu kelaun gapen mu.’” ¹⁵ Laung pa ni Pedro, “Naa mendadi, benaˈ mikpuunu mekpetenday dinilan, ilan kiin, pingepuˈan ilan dayun nug Balakat nu Megbebayaˈ, maaˈ dadema gupia dinita sug diin kiin. ¹⁶ Midelendemu dayun su tinaluˈ begudiin nu Kaunutan si Isus, laungen, ‘Si Juan, migbunag laak tubig di nga getaw. Dagid yamu, bunagen diniu kig Balakat nu Megbebayaˈ.’ ¹⁷ Naa mendadi gempantek,” maaˈ laung padun ni Pedro, “ki nga kanaˈ getaw Judea, pisama nu Megbebayaˈ sug bigayen dinilan ditug bigayen dinita sug diin kiin, su mikpetuud ita tu Kaunutan ta si Isukristu. Naa kagina maˈantu, naan, kanaˈu memaag ditu Megbebayaˈ!”

¹⁸ Naa, su nga getaw migbensi dini Pedro kia, benaˈ midengeg nilan su tinaluˈen kia, misikpaˈ ilan dayun mektaluˈ. Inal nilan su Megbebayaˈ, laung nilan, “Mendadi saˈ maˈantu, masiˈ ki nga kanaˈ getaw Judea, bigay pagid nu Megbebayaˈ dinilan keksikesuun nilan mukaˈ kepeduma nilan tu ketubuˈ ndaˈi tamanen!”

¹⁹ Naa genat tu kepatay kiin ni Esteban, pinemalan peglegetay su nga sakup ni Isus. Saˈ maˈantu, mipelak ilan, duuni midepet tu Fenicia, duuni midepet tu puluˈ Cipre, mukaˈ duun dademai midepet tug Antioquia. Adin su midepetan nilan, migukit ilan taluˈ nu Megbebayaˈ dia, iin laaki inukitan nilan dun su nga getaw Judea. ²⁰ Laak diag Antioquia, duuni nga ginukitan nilan dun kanaˈ getaw Judea. Inukit dinilan nu nga sakup ni Isus genat ditu Cipre mukaˈ ditu Cirene su Gempia Petenday mekatag di Kaunutan si Isus. ²¹ Kagina bigayan nu Kaunutan Megbebayaˈ ginuung su migukit dun, melaun gupia getaw mikpetuud mukaˈ luminingay tu Megbebayaˈ.

²² Naa su pikumpungan nu nga sakup ni Isus ditu Jerusalem, saˈ midengeg nilan puˈ mikpetuud na su nga kanaˈ getaw Judea, sinuguˈ nilan si Bernabe mangay ditug Antioquia. ²³ Benaˈ minateng ditu si Bernabe mukaˈ misimaˈen puˈ tinulung tuˈu nu Megbebayaˈ su nga sakup ni Isus kanaˈ getaw Judea, liliag dayun gupia si Bernabe. Tinituluˈ ni Bernabe dinilan, launan nilan, gelaˈen nilani ginaa nilan tu kesalig nilan tu Kaunutan. ²⁴ Puˈ si Bernabe kia, mekesuun getaw, pingepuˈan gupia nug Balakat nu Megbebayaˈ, sampay suminalig gupia tu Megbebayaˈ. Saˈ maˈnia, melaun getaw Antioquia miagak sumakup tu Kaunutan si Isus.

²⁵ Mendadi si Bernabe, mipanaw ditu Tarso, penengaunen si Saulo kiin. ²⁶ Benaˈ mibaanganen, iwiten puliˈ ditug Antioquia. Setaun ilan dayun mekpungun dia pikumpungan nu sakup ni Isus, minamal ilan mekpetuˈun di nga melaun gupia getaw ditu. Mukaˈ iini puunanen, piningalan dun nu nga getaw su nga sakup ni Isus, nga Kristianu.

²⁷ Naa saanan nilan diag Antioquia, duuni nga pimuunan nu Megbebayaˈ minateng genat tu Jerusalem. ²⁸ Mendadi sala tawan dinilan, ngalanen si Agabo, migindeg adun megyaga. Bigayan nug Balakat nu Megbebayaˈ ginuung, kaas pisuunen pedaan puˈ duuni gendaw, mateng pai meliget gutem di tibuuk lumbang. (Kia, minuud di timpu ni Claudio su tampusan gadiˈ nu getaw Roma.) ²⁹ Benaˈ midengeg nu nga sakup ni Isus diag Antioquia, delendeman nilan dayun, puitan nilan pemegay su nga kepetedan nilan ditu Judea, diadia begayen su gikteb mesukaten. ³⁰ Saˈ maˈantu, piwit nilan dayun su pemegay nilan tu nga kaunutan nu pikumpungan nu sakup ni Isus ditu Judea, iini migated dun si Bernabe mukaˈ si Saulo.