Mendadi, ki syudad Roma kini, iin su kapital di sala nasud begudiin megbayaˈ di melaun benwa. Sug benwa Europa, sug benwa Asia (piningalan dun nemun nasud Turkey), sug benwa Siria (piningalan dun nemun su Middle East) sampay sug benwa Africa dapit gilidan gendaw dig dibaluy, iini miguit dun su getaw Roma. Ki syudad Roma kini, iin su pegbenwanan nu tampusan metaas gadiˈ mukaˈ nu ngag duma kaunutan. Tatap meditui melaun getaw, maˈniin nug betad Pilipino meditu syudad Menilaˈ.

Su suminulat dig libru kini, si Pablo, iini peneligan ni Isus migukit Gempia Petenday tu nga kanaˈ getaw Judea. Saˈ sinulaten ini, ndaˈ siben mekeditug Roma si Pablo, laak taginaanen dun meditu, kaas piwitanen sulat su nga suminakup dini Isus dia, adun mekepepenembaˈ dinilan. Delendeman ni Pablo, meguliug ditug Roma, adun mektinebangay ilan nu nga sakup ni Isus dia mekatag di kekpetuud nilan.

Iini gembagel pantagen di sinulat kini, kig bian nu keglegawen nu Megbebayaˈ di nga getaw. Kagina mimilas si Adan ditu Megbebayaˈ begudiin, iini kebetang nug launan getaw sapuˈ ni Adan, mekesesalaˈ. Laak ki gasal nu Megbebayaˈ, ndaˈiduni melamug dun melaat, bisan maikaˈ. Saˈ maˈantu, kendutaˈ dun nu getaw makuˈ madap diniin? Mukaˈ mekendutaˈ mai kebantang nu getaw mekauliˈ ditug langit, su pegbenwanan nu Megbebayaˈ? Naa, pinenggiˈ duun siai getaw mekpetuud gupia ditu Misulat Palinta nu Megbebayaˈ, mabuˈ iini mbantang madap diniin. Kaas mekelelaatlelaat su nga getaw, puˈ ndaˈiduni kilawan mekegdunut gupia tu tibuuk Palinta nu Megbebayaˈ. Kaas, su ndaˈ pa mbaali gekleb langit buˈ lupaˈ, daan na pigdelendem nu Megbebayaˈ, lumusad dinig lumbang kini, megigetaw maaˈ nu kilawan, adun gumantiˈ di kelegenay nu getaw sampay su kepatay nu getaw, saˈitada, iin na gupiai megbayad tu salaˈ nu getaw. Saˈ maˈantu, minuud su Megbebayaˈ tug delendemanen kia, luminusad tuˈu. Iin si Isukristu.

Mendadi, sinulat dini ni Pablo sug bian nu kepeduma nu getaw di keglegawen ni Kristu kini di nga kilawan. Inukiten puˈ kanaˈ nu tegel nu getaw dumunut tu Palinta nu Megbebayaˈ, kanaˈ dadema nu tegel nu getaw menggulaula melengas. Pisuunen tuˈu puˈ iini medawat nu Megbebayaˈ adun mpeduma ita di keglegawenen, su laak kesalig ta diniin.