¹ Naa si Abraham, su ginepuˈay nug bansa nami, alandun dayuni teluˈen ta mekatag diniin? Taˈ mai mibiananen? ² Saˈ upama iin siai pimilang dun nu Megbebayaˈ mekesuun si Abraham, puˈ sabaˈ nu pinggulaulanen, duun siai pengangyaˈen. Laak ndiˈ mesuˈat di pegitaˈen nu Megbebayaˈ. ³ Alanduni tinaluˈ di Misulat Taluˈ nu Megbebayaˈ mekatag dini Abraham kini? “Mikpetuud si Abraham ditu Megbebayaˈ, kaas pimilang nu Megbebayaˈ mekesuun, sabaˈ nu kesaligen diniin.” ⁴ Naa, pinenggiˈ duuni tinindanan, su tinindan dun, ndiˈ mpemilang bigay, puˈ piglesayanen. ⁵ Naa, kanaˈ maˈniai kemilang nu Megbebayaˈ mekesuun su getaw, puˈ saˈ seligan nu getawi kesaligen ditu Megbebayaˈ sabayaˈ su gulaulanen, pemilangen nu Megbebayaˈ kekesuuneni kesaligen. Puˈ su Megbebayaˈi memilang mekesuun tu getaw mimilas saˈ sumalig na diniin. ⁶ Maˈnia dademai maˈanan nu tinaluˈ kini ni David kanugdiin, puˈ leliagen su getaw pemilangen nu Megbebayaˈ mekesuun di ndaˈi tegelen dun. Ndaˈ ba mesulat,

⁹ Naa, kig leliag kia tinaluˈ ni David, danu nga getaw Judea ba laak? Kanaˈ lai, puˈ leliagen dadema su nga kanaˈ getaw Judea, puˈ mialapu kamun ditu sinulat ni Moises, laungen, “Pimilang nu Megbebayaˈ mekesuun si Abraham, sabaˈ nu kesaligen diniin.” ¹⁰ Mendadi si Abraham, nanunen maia mibianan? Su ndaˈ pain sirkunsisuay, saˈ mitubus na? Su kemilang dun nu Megbebayaˈ mekesuun, mibiananen na, su ndaˈ pa sirkunsisuay. ¹¹ Sikna mikpetuud si Abraham ditu pinasad nu Megbebayaˈ diniin, sinirkunsisu dayun, puˈ tuˈus tu gandang kemilang nu Megbebayaˈ diniin mekesuun. Iini pimilang dun, puˈ sabaˈ nu kesaligen. Kaas si Abraham, mibaluy maˈniin gamaˈ di ginaa nug launan getaw sumalig ditu Megbebayaˈ mukaˈ pemilangenen mekesuun. Kiin, bisan ndaˈ ilan mesirkunsisu. ¹² Iin dademai gamaˈ nu nga getaw misirkunsisu, saˈ minunggiling dailan dema tu kesalig ni Abraham, su ndaˈ pain mesirkunsisu.

¹³ Naa su Megbebayaˈ, kanugdiin minasad iin dini Abraham sampay tu nga sapuˈen puˈ begayen dinilanig lumbang kini. Iini pinasaden dun puˈ suminalig si Abraham diniin, kanaˈ nu kedunut ni Abraham tu Palintanen. Pimilangen dayun si Abraham mekesuun. ¹⁴ Puˈ saˈ upama begayan pinasaden su nga dumunut tu Palintanen, ndaˈ siai gatagen su kesalig nu getaw. Mikulaˈulaˈ dadema sia su pinasad nu Megbebayaˈ, puˈ ndaˈiduni mekedunut gupia tu Palintanen. ¹⁵ Kaas pebiananeni nga getaw ginukumanen mikpuun tu Palintanen. Laak saˈ ndaˈidun siai palinta, ndaˈidun dadema siai memilas dun.

¹⁶ Mendadi ki pinasad kini nu Megbebayaˈ, malap ta meksekat di kesalig ta, adun mpantek puˈ su tulung nu Megbebayaˈi tantu puunen. Kiin, adun mpantek dadema puˈ mekalap dun sug launan sapuˈ ni Abraham, saˈ su ngag dumunut tu Palintanen, saˈ su nga mpeduunan kesalig maaˈ dadema nu kesalig ni Abraham. Puˈ si Abraham, mibaluy na ginepuˈay nug launan ta, ita nu nga suminalig tu Megbebayaˈ. ¹⁷ Puˈ ndaˈ ba mesulat kanugdiin di Misulat Taluˈ nu Megbebayaˈ, “Binaalu yaˈa gamaˈ nu getaw di melaun bansa.” Kaas di pegitaˈen nu Megbebayaˈ, mikpalas su pinasaden. Iini minasad dun, su Megbebayaˈ, su seligan ni Abraham mukaˈ su mekpetubuˈ di minatay na, sampay su maal tug launanen, pibian laak di taluˈen.

¹⁸ Naa si Abraham, mituudan dun su tinaluˈ nu Megbebayaˈ puˈ mbaluy melaun bansa su sapuˈen, kaas mikpedateng dun. Pia ndaˈidun siai pedetengenen, puˈ megulang na gupiai sawanen, mikpedateng gusay. Kaas mibaluy ginepuˈay nu melaun getaw, maaˈ da nu tinaluˈ nu Megbebayaˈ diniin, laungen, “Su kelaun nu nga sapuˈ mu, maaˈ danug bitun.” ¹⁹ Benaˈ midelendemen sug lawasen, mipemilangen maˈniin minatay na, puˈ pekpanaw na di megatus taun. Ndiˈ na mapet bataˈen su sawanen si Sara. Pia maˈantu, mituudan da dun gusay. ²⁰ Ndaˈ melukaˈi kesaligen tu Megbebayaˈ, puˈ ndaˈ pegduaˈduaˈig delendemanen mekatag di pinasaden. Migiseg dademai kesaligen, saananen menamal mekpededengeg tu Megbebayaˈ. ²¹ Mekpedateng da gusay puˈ megaga nu Megbebayaˈ penggulaulaanen su pinasaden diniin. ²² Sabaˈ nu kesaligen, misulat dayun kanugdiin puˈ pimilang nu Megbebayaˈ mekesuun. ²³ Su sinulat ditu Misulat Taluˈ nu Megbebayaˈ, laung, “Pimilang nu Megbebayaˈ mekesuun,” kanaˈ laak mekatag dini Abraham. ²⁴ Mekatag dadema dinita, ita nu nga pemilangen nu Megbebayaˈ mekesuun saˈ mekpetuud ita tu Megbebayaˈ, su mikpetubuˈ puliˈ dini Isus su Kaunutan ta. ²⁵ Si Isus kini, iini bigay nu Megbebayaˈ matay puun tu kemilas ta. Pitubuˈen dayun puliˈ, adun mpemilang ita niin mekesuun, maˈniin ndaˈi salaˈ ta.