Naa ki sulat kini, iin sug bekna piwit ni Pablo ditu nga getaw Corinto pingumbilin di nga sakup ni Kristu. Laak su Corinto, iini ngalan nu gembagel lunsud tug benwa Grecia begudiin, melengas denggu'an sekayan. Melaun gupia getaw migbenwa dia, melaun mendagang muka' panday, melaun dadema sagya diwata pektemuyen nu nga getaw dia. Si Pablo, migbebenwa dia Corinto taman setaun bu' ginenga', pu' adun pegweliinen di nga getaw dia su Gempia Petenday mekatag dini Kristu muka' pektu'unanen su nga suminakup dun.

Naa su kepalus ni Pablo dia Corinto, minundas iin tu ngag lain benwa. Mendadi su saananen diag lain benwa, duuni midengegen mekatag di nga sakup ni Kristu diag lunsud Corinto. Midengegen laung pu' miksilaun ilan, laak dagid duun na laungi sualan nilan, duun laungi mikesala' sampay duun laungi migdusa gupia. Muka' mikpuit su nga sakup dia Corinto sulat dini Pablo, pu' duuni sinaak nilan diniin mekatag di kekpetuud dini Kristu.

Naa ki sulat kini, iini piwit dun ni Pablo tu nga sakup ni Kristu dia Corinto, pu' adun mausay ilan, pepegeksuden su nga miksual, titulu'en ilan adun mpemaag su nga mekesala', sampay sembagen su nga sinaak kia nu nga sakup dia Corinto.

Naa mekatag dig duma mibianan ni Pablo kiin, duuni mbasa dia sala libru mpeduma dig Begu Pasad kini, Ki nga Pinggulaula nu nga Peneligan ni Isukristu 9.1-30. Mekatag di pikumpungan nga sakup ni Kristu diag lunsud Corinto, duuni mbasa dia Nga Pinggulaula 18.1-11.