¹ Naa ki pegbetaden ta, taˈ alandun dayuni gempia ta teluˈen? Metaluˈ ta ba menamal ita mekesalaˈ, adun meksibagelig lelaat nu Megbebayaˈ dinita, puˈ adun melaun pai pedesunenen? ² Ndiˈ lai mesuˈat! Puˈ ndaˈ naig labet ta di salaˈ, maaˈ nu getaw minatay na, ndiˈ na mekesalaˈ. Ndiˈ naita mekenamal mekesalaˈ. ³ Misuunan da niu gupia, saˈ mibunagan naita tubig, tuˈus puˈ suminalabuuk ita dini Kristu Isus, mipeduma ita di kepatayen. ⁴ Kaas saˈ mikpebunag ita tubig, lepeng mipeduma ita di kepatay ni Kristu dayun libeng ita, adun metubuˈ ita begu ketubuˈ, maaˈ ni Kristu pitubuˈ puliˈ nu Gamaˈ ta mikpuun di melengas gupia pegbayaˈen.

⁵ Naa ita, kagina mipeduma ita di kepatay ni Kristu saˈ mibunagan ita tubig, mituudan ita dun puˈ sumalabuuk daita dema di ketubuˈen puliˈ, puˈ begayan ita begu ketubuˈ. ⁶ Misuunan ta dadema puˈ maˈniin mipeduma dini Kristu petayay dia kurus sug daan delendeman ta, adun ndaˈ nai pegbayaˈen su gayak ta tug betad mekesalaˈ, mukaˈ adun kanaˈ naita gulipen nug betad ta mekesalaˈ. ⁷ Puˈ saˈ mipedumai getaw di kepatay ni Kristu, pemilangen na nu Megbebayaˈ kanaˈ na mekesalaˈ. ⁸ Mukaˈ kagina miksalabuuk ita di kepatay ni Kristu, mituudan ita dun puˈ mpeduma daita dema di ketubuˈen. ⁹ Puˈ misuunan ta mitubuˈ puliˈ si Kristu, mukaˈ ndiˈ na mesuˈat matay puliˈ. Su gumul, ndaˈ nai pegbayaˈen diniin. ¹⁰ Su kepatay ni Kristu, minatay di salaˈ mainsan, ndiˈ na mpuliˈan. Nandaw mitubuˈ si Kristu, adun sumalabuuk tu Megbebayaˈ. ¹¹ Maˈnia damu dema, gempia niu pemilangen niuig lawas niu minatay na, ndaˈ naig labet niu tu salaˈ, mukaˈ mitubuˈ namu, sumalabuuk namu tu Megbebayaˈ pebian dini Kristu Isus.

¹² Kaas, ndiˈ niu begay sug betad niu mekesesalaˈ megbayaˈ pa dig lawas niu, adun dunutan niu su da melaat gayaken. ¹³ Subay ndiˈ dadema niu begay pia tandaˈ dun dig lawas niu mekesalaˈ. Gempia pegwakil niui tibuuk lawas niu tu Megbebayaˈ, adun pepenggulaulaanen diniu su kekesuun. Puˈ pia daansamaˈ maˈniin amu minatay, nandaw mitubuˈ amu puliˈ. ¹⁴ Ndiˈ na mpia megbayaˈ dig delendeman niu sug betad mekesalaˈ, puˈ kanaˈ niu siligani kektalenten niu tu palinta, puˈ siligan niu pasiˈ su tulung nu Megbebayaˈ diniu.

¹⁵ Naa, taˈ maig baalan ta dun dayun? Kagina kanaˈ na seligan tai kektalenten ta tu palinta, puˈ seligan ta na ki tulung dinita nu Megbebayaˈ, mekesalaˈ baita? Ndiˈ da pagid mpia! ¹⁶ Yamu, misuunan niu tantu puˈ saˈ upama pegwakil niuig lawas niu gulipen nu getaw, adun mekpetuud amu gupia di getaw kia, gulipen amu niin tantu! Naa, saˈ pinenggiˈ, mekpetuud amu tug betad niu mekesalaˈ, gulipenen amu dayun. Mukaˈ deksuˈanen ia, matay damu. Laak dagid, saˈ mekpetuud amu tu Megbebayaˈ, pemilangen amu niin mekesuun. ¹⁷ Laak mekpaladpaladu tu Megbebayaˈ, puˈ pia daansamaˈ gulipen amu nug betad mekesalaˈ, nandaw, pituud niu di ndaˈ pegduaˈduaˈig delendeman niu su metuud tituluˈan piktuˈun diniu. ¹⁸ Likat namu nu Megbebayaˈ, kaas mikegawaˈ namu di salaˈ mukaˈ mibaluy namu sesuguˈen nu Megbebayaˈ, kaas mekesuun namu dema. ¹⁹ Naa ki sinulatu kini, kinilawan betad laak, puˈ ndiˈ pa niu megaga dig diniwata. Daansamaˈ bigay niuig lawas niu mbaal gulipen nu kegdusa mukaˈ nug limbung, adun mekesalaˈ. Maˈnia dema nemun, subay pegwakil niuig lawas niu sesuguˈen namu nu kekesuun, adun meksikesuun amu, mukaˈ medawat namu nug Megbebayaˈ maˈniin ndaˈi salaˈ niu.

²⁰ Mendadi, saˈ gulipen pamu nug betad niu mekesalaˈ, ndaˈig labet niu dun su kekesuun. ²¹ Mukaˈ ndaˈi gatagen tantu sug daan pinggulaula niu, su mpiid namu dun, puˈ deksuˈanen ia, kepetayan niu ndaˈi tamanen. ²² Laak tumuˈ nemun, likat namu nu Megbebayaˈ di salaˈ, mukaˈ mibaluy namu sesuguˈen nu kekesuun. Kaas gembagel nai sugda dun puˈ gilaˈ na niu pegwakil diniin su pegbetaden niu, mukaˈ deksuˈanen ia, ketubuˈ ndaˈi tamanen. ²³ Mendadi, saˈ begay nu getawig lawasen mekesalaˈ, iini sugda dun, kepatay di ndaˈi gikteben. Laak dagid iini begay nu Megbebayaˈ tu nga sumalabuuk dini Kristu Isus su Kaunutan ta, ki ketubuˈ ndaˈ dademai tamanen. Mukaˈ kiin, begayen di ndaˈi sugda dun.