15
Subay Peleliagen ta su ngag Duma ta
1 Naa, ita nu nga meligeni kesaligen, subay ebangan ta su nga samasakup ta ndaˈ pa mpanteki kekpetuuden. Subay ndiˈ ta baalen sug leliagen dun sug lawas ta. 2 Tumuˈ penggulaulaan nug launan ta sug leliagen dun su nga samasakup ta, adun megiseg dai kesalig nilan. 3 Puˈ bisan si Kristu, ndaˈ metubuˈ adun pepiananenig lawasen. Ndaˈ ba mesulat kanugdiin, “Uu Megbebayaˈ, sug badas diniˈa, libaneg dinaan.” Kaas maˈantu midawat ni Kristu su sudiˈ nu getaw tu Megbebayaˈ. 4 Naa, iini sinulat dun kanugdiin sug launan Misulat Taluˈ nu Megbebayaˈ, puˈ adun metituluˈ ita. Pektituluˈ dinita, adun metau daita dema mektigel tu mbianan ta, mukaˈ adun mengulikseg ita mekpedateng tu kepia dinita gusay. 5 Kagina su Megbebayaˈi pikpuunan nu kektigel mukaˈ nu kegulikseg, penenebiin ku diniin, begayen diniu baalen niu lendasan niu su pigbetad ni Kristu Isus, adun meksalabuuk amu, launan niu. 6 Iini penenebian ku amu dun, peksalabuukan niu penalay su Megbebayaˈ, su Gamaˈ nu Kaunutan ta si Isukristu mukaˈ su pektemuyenen.
Pitendayan dadema su nga Kanaˈ Getaw Judea mekatag dini Kristu
7 Kaas subay penembaˈen niu su nga samasakup niu, maaˈ nu kenembaˈ diniu ni Kristu, adun mpenalan su Megbebayaˈ mukaˈ mpegbesaan dadema. 8 Puˈ taluˈu diniu, kini si Kristu, iini ibanganen dun su nga getaw Judea, adun paitaˈen dinilan puˈ meseligan su Megbebayaˈ, puˈ pinuud nu Megbebayaˈ su pinasaden kanugdiin tu nga ginepuˈay nilan. 9 Mukaˈ iin dademai ibanganen ilan dun, adun su nga kanaˈ getaw Judea, penalan nilan mukaˈ pegbesaan nilan su Megbebayaˈ meksekat dig lelaaten dinilan. Ndaˈ ba mesulat kanugdiin,
“Kaas, uu Kaunutan, enalen nami yaˈa, naan sampay su nga kanaˈ getaw Judea.
Enalen nami mukaˈ pegbesaan nami yaˈa dig bebat.”
10 Mukaˈ misulat da pagid, laungen,
“Yamu nga kanaˈ getaw Judea, subay leliagen amu, sampay su piglegetawan nu Megbebayaˈ!”
11 Mukaˈ misulat pa pagid, laungen,
“Yamu, launan niu kanaˈ getaw Judea, enal niu su Megbebayaˈ.
Yamu nug launan getaw, enal niu iin!”
12 Duun pagidi sinulat ni Isaias dengantu, laungen,
“Duuni sapuˈ ni Isai metuaˈ pa.
Metuaˈ adun meglekaunutan tu nga kanaˈ getaw Judea.
Pekpedetengen nilan puˈ iin dayuni Meglegawen dinilan.”
13 Naa penenebiin ku tu Megbebayaˈ, su pigenatan nu pedetengen ta, puˈ begayen diniuig leliag niu di ndaˈi tamanen mukaˈ pianan ginaa sabaˈ nu kesalig niu diniin. Iini menenabiu dun, adun megiseg pai pedetengen niu puun di ginuung nug Balakat nu Megbebayaˈ.
Su Kenluksad dun su Sinulat ni Pablo
14 Yamu nga Mingumpated, mituudanu dun gupia puˈ mekesuun amu getaw, metaas nai sinuunan niu mekatag di Megbebayaˈ, mukaˈ metau namu mektinikukay. 15 Pia maˈantu, naan, duuni pinluksadu sulatay diniu adun mektegyungu diniu. Maˈniin minibeluˈu sumulat dun diniu, puˈ bigayanu nu Megbebayaˈ pegbayaˈ, 16 adun mbaalu sesuguˈen ni Kristu Isus, ebangan ku su nga kanaˈ getaw Judea. Maaˈ da nug baalen nug belian ki gabangu dinilan, puˈ ukiten ku dinilan su Gempia Petenday genat tu Megbebayaˈ, adun saˈ metuudan ilan dun, mbaalu ilan maaˈ nug betang gilaku tu Megbebayaˈ, telimaˈenen mukaˈ pigwakil diniin nug Balakaten. 17 Kagina suminalabuuku dini Kristu Isus, saˈ penggulaulaan ku su pebaal dinaan nu Megbebayaˈ, leliagenu dun sug baalen ku. 18 Pebeluˈen kui ginau puˈ ukiten ku diniu su pipenggulaula laak dinaan ni Kristu, egaken ku su nga kanaˈ getaw Judea mekpetuud tu Megbebayaˈ. Pipenggulaulanen dinaan pebian di tinaluˈu mukaˈ di pinggulaulau. 19 Kia, pipenggulaula di pegbayaˈ nug Balakat nu Megbebayaˈ, puˈ bigayanu niin ginuung mukaˈ pibaalen dinaani mekesalebuˈ tuˈus. Kaas, genat tu Jerusalem sampay ditug Ilirico, mipanawu, gilaˈu pegukit su Gempia Petenday mekatag dini Kristu. 20 Mauyaˈan ku gusay pengukitay su nga getaw di Gempia Petenday ditu ngag benwa ndaˈ pai mekedengeg mekatag dini Kristu, adun ndiˈu maukitan su ngag daan minayan ukitay nug duma. 21 Ndaˈ ba mesulat kanugdiin,
“Maitaˈ nu nga ndaˈ siben ukitay mekatag diniin,
mukaˈ mesabut nu nga ndaˈ mainsan mekedengeg dun.”
Sug Delendeman ni Pablo Tumukaw diag Roma
22 Naa kia mai tatap mekebelabag dun dinaan pangay ditu niu. 23 Nandaw, kagina mitubus sug baalen ku di ngag benwa kini, mukaˈ miniben nai taun mauyaˈan ku tumukaw ditu niu, 24 pedetengen ku mekitaˈ ita. Mauyaˈan ku, saˈ mesuˈat, tumukawu dia niu nga santaˈ gebii, saˈ mekangayu ditug España. Dayun saˈ mekeksalabuuk ita sampay mawaˈig bugaˈan ku diniu, saˈ mesuˈat, ebangan niau pelum di kebundasu ditug España. 25 Laak megunau meditu Jerusalem nandaw, adun eteden kui gamut ditu nga piglegetawan nu Megbebayaˈ dia. 26 Puˈ su nga pikumpungan nu nga sakup dini Macedonia mukaˈ Grecia, delendeman nilan, melengas pegemutan su nga gempusuk getaw di nga piglegetawan nu Megbebayaˈ ditu Jerusalem, kaas piwit nilan dinaan. 27 Laak kia, danilan da delendeman. Maˈniin duuni gutang nilan ebangan su nga samasakup nilan nga getaw Judea ditu Jerusalem, puˈ mipeduma ilan di kekpepia nu Megbebayaˈ di nga getaw Judea, benaˈ duuni nga getaw Judea migukit dinilan mekatag dini Kristu. 28 Naa, saˈ metubus nai tuyuˈu ditu, saˈ metulun ku gelaˈ su ginamut tu nga samasakup ta ditu, sukatu dayun mpanaw, pangay ditug España. Mapitu dayun dia niu. 29 Saˈ matengu ditu niu, naa mesuunan ku pepianan ita gupia ni Kristu di ndaˈi kulangen.
30 Naa, Mingumpated, kagina suminalabuuk ita di Kaunutan ta si Isukristu, mukaˈ bigay dinita nug Balakaten ki keglinelaatay ta, penengiin ku diniu, peksalabuukay niau penenebiay tu Megbebayaˈ, 31 adun megawenu di kegleget sia dinaan nu nga ndiˈ mekpetuud dini Kristu ditu Judea. Penenabi damu dema, metelimaˈ nu nga piglegetawan nu Megbebayaˈ ditu su gabangu dinilan. 32 Penenabi amu padun, matengu dia niu saˈ mauyaˈan nu Megbebayaˈ, mukaˈ leliagenu sampay mpiananu di keguliugu dia.
33 Naa, penenebiin ku tu Megbebayaˈ, su puun gupia nu pianan ginaa, megduma iin diniu, launan niu. Amen.