¹ Iin nai ketelu deksuˈen meguliugu dia niu. Naa saˈ duuni getaw mauyaˈanen dumangat, tegyungen ku diniu su sinulat di Misulat Taluˈ nu Megbebayaˈ. Ndaˈ ba mesulat, “Saˈ duunig dangat, subay pegintuuden nu telu tawan takesiˈ. Saˈ ndiˈ mesuˈat telu, sukal da duaˈ tawan.” ² Maˈantuˈ, su keduaˈ deksuˈu meditu niu, pigadan ku puliˈ su nga mikesalaˈ sampay su ngag launan duma niu. Mukaˈ su ndaˈ nau dia, pegadan ku nailan puliˈ, puˈ saˈ mateng nau pelum, ndaˈiduni getaw mekegliaw dig badas! ³ Kagina mauyaˈan niu peksimaˈen niau saˈ pitaluˈu ni Kristu saˈ ndaˈ, taluˈu diniu, mekpepantek pau gupia diniu. Saˈ si Kristui metau diniu, ndaˈiduni ndiˈen megaga, sinangkaliˈ pa tanan, ginuungan gupiai penggulaulaanen diniu. ⁴ Metuud, maˈniin ndaˈ megaga ni Kristu su kelansang dun di kurus adun matay. Laak dagid pia maˈantu, tetubuˈ main nemun miksekat di ginuung nu Megbebayaˈ. Yami nga peneliganen, kagina miksalabuuk ami diniin, maˈniin ndiˈ nami dema megaga, laak saˈ meditu ami niu, mektituluˈ ami diniu meksekat di ginuung dadema nu Megbebayaˈ.

⁵ Saˈ maˈantu, iin nai gempia niu peksimaˈen mukaˈ pemilangen, su laak lawas niu, adun mesuunan niu saˈ suminalig amu gupia dini Kristu, saˈ kanaˈ. Ndaˈ ba niu mesuunay puˈ migbebenwa na si Kristu di ginaa niu? Puˈ saˈ penensili ndiˈ amu sumalig diniin, guluganen, ndiˈ megbebenwa di ginaa niu. ⁶ Laak pedetengen ku mesuunan pa niu puˈ piksimaˈ nami mukaˈ gempantek pigwekilan ami ni Kristu. ⁷ Penenebiin nami tu Megbebayaˈ, ndaˈi melaat gulaula niu. Kanaˈ iini penenebiin nami dun, adun mpaitaˈ di getaw puˈ tantu peneligan ami ni Kristu, segaga iini penenebiin nami dun, adun penggulaulaan niu su gempia, bisan laung dun nu getaw ndiˈ ami metau. ⁸ Puˈ daal da laaki penggulaulaan ku su mekpesigwag di Gempia Petenday, kanaˈ nu megbelabag dun. ⁹ Leliagen ami saˈ laung dun nu getaw puˈ ndiˈ nami megaga, basta laak gempageni kesalig niu. Maˈantu penenebiin nami, penggengeten gupia dig delendeman niu su kesalig niu. ¹⁰ Iini sinulatu dun ini su saanan ku melayuˈ diniu, adun saˈ mateng nau, ndiˈu na kambat petegasen su kausayu diniu miksekat di pegbayaˈ bigay dinaan nu Kaunutan. Puˈ ki pegbayaˈu, kanaˈ mekepeglaat di kesalig niu, mekaiseg dun sungkin.

¹¹ Naa, Mingumpated, daal daitu.

Penemalay niu penggengetay dig delendeman niu su kesalig niu.

Pektalentenay niu su pinengiu diniu kini.

Penamal amu peksinenguˈay.

Peksalabuuk amu gupia.

Mukaˈ su Megbebayaˈ, su pigenatan nu kepetail mukaˈ nu pianan ginaa, megduma iin diniu.

¹² Pegdedialay amu, maaˈ nug dedial niu di gapen niu.

¹³ Kig launan dumau piglegetawan nu Megbebayaˈ dini, sinembayan amu nilan gelaˈ.

¹⁴ Penenebiin ku, tulungen amu lelayun nu Kaunutan si Isukristu, petailen amu nu Megbebayaˈ gebii gendaw, mukaˈ penamalan amu peksalabuukay nug Balakat nu Megbebayaˈ diniin.

Daal daitu. Pablo