¹ Naa yamu, daansamaˈ pimilang nu Megbebayaˈ minatay naig delendeman niu, puˈ sabaˈ mimilas amu diniin, mukaˈ mikesalaˈ amu gupia. ² Timpu kitu, dinunutan niu su melaat betad nu kilawan dinig lumbang kini, piktalentenan niu su kaunutan nu nga megbayaˈ di gawanawan, su Palin. Iin pa gusayi megbayaˈ nemun di ngag launan memilas tu Megbebayaˈ. ³ Kampuˈ ami, maˈnia dademaig launan ta, puˈ sug daan pigbetad ta, iini megbayaˈ dig delendeman ta mukaˈ dig lawas ta, su laak gayak ta kinilawan. Ki gasal ta, miksama di gasal nu samataw ta, puˈ subay melabuˈ ita tu ginukuman nu Megbebayaˈ.

⁴ Pia maˈantu, su Megbebayaˈ, kagina lilaatan ita niin tuˈu mukaˈ ndaˈi tamanen su petailanen dinita, ⁵ pia pimilangen su kepatay nu ginaa ta sabaˈ nu kemilas ta diniin, pidumanen ita di ketubuˈ puliˈ ni Kristu. Kaas mialap na nug delendeman ta su ketubuˈ ndaˈi tamanen. Ginawen amu, mikpuun tu tulung nu Megbebayaˈ. ⁶ Mukaˈ pa pagid, su kepetubuˈen puliˈ dini Kristu Isus, piduma ita niin dini Kristu, adun megabang ita di keglekaunutanen ditug langit mukaˈ dia kediwetaan. ⁷ Iini pimaˈantunen dun, puˈ adun paitaˈen nandaw sampay ditug binayaˈ gebii buˈ gendaw ki mekesalebuˈ tulungen dinita nu nga miksalabuuk dini Kristu Isus, puˈ milelaat gupia dinita. ⁸ Puˈ iini guminawen diniu su tulung nu Megbebayaˈ diniu tilimaˈ niu pibian di kekpetuud niu. Kanaˈ nu tegel niu, puˈ bigay laak nu Megbebayaˈ. ⁹ Kaas ndiˈ ta pegangyaˈ su kegawen dinita, puˈ kanaˈ danita tegel. ¹⁰ Puˈ pigbaal ita nu Megbebayaˈ. Su kesalabuuk ta dini Kristu Isus, biwat ita niin puliˈ, adun melengasi pegbetaden ta, puˈ kiaig daansamaˈ tinduˈen baalen ta.

¹¹ Naa, yamu nu nga kanaˈ getaw Judea, pegdelendem niu deliˈ sug daan kebetang niu. Piningalan diniu nu nga getaw Judea nga kanaˈ menirkunsisu, puˈ ilani menirkunsisu, tuˈus laak dig lawas pingumbilin dinilan ni Moises. Judea. Su gembataˈ laki, saˈ walu endaw genat di kegigetawen, tebiaˈ tuliˈen, puˈ guluganen, tuˈus puˈ getaw Judea, saˈitada getaw mektamuy tu Megbebayaˈ. ^{a 12} Kanugdiin, metuud, melayuˈ amu dini Kristu. Lain bansa amu, lain getaw amu, puˈ kanaˈ amu getaw Judea tinduˈ nu Megbebayaˈ piglegetawanen. Ndaˈ paig labet niu tu nga sabut nilan nu Megbebayaˈ puun tu pinasaden dinilan, kaas ndaˈi pedetengen niu gabangen diniu. Mukaˈ dema ndaˈ dig delendeman niu su Megbebayaˈ, saanan niu suminala megbenwa di nga melaat kilawan dig lumbang kini. ¹³ Laak nandaw, kagina miksalabuuk namu dini Kristu Isus, pia melayuˈ pamu tu Megbebayaˈ kanugdiin, pisempel namu ni Kristu Isus, puˈ minatay iin, ginantiˈen su kepatay niu.

¹⁴ Naa si Kristu kini, iin su mikpegeksud dinita di ginaa, su nga getaw Judea mukaˈ su nga kanaˈ getaw Judea, puˈ sinalabuuk ita niin. Su keksibaluyen getaw mukaˈ su kepatayen, piawaˈen su kegegimbeguay ta dig betad ta, maˈniin gibaˈen sug dending migbelet dinita. ¹⁵ Maˈantu pingawaˈ dadema ni Kristu su nga pinalinta di Palinta nu nga getaw Judea, puˈ mikpain di ngag bansa ta su Palinta. Pimaˈantunen, adun baalenen salabuuk begu bansa ki nga getaw Judea sampay su nga kanaˈ getaw Judea suminalabuuk diniin, kaas ndaˈ na mbelet. ¹⁶ Pingawaˈen su keksesinaay ta pibian di kepatayen di kurus. Maˈnia, piksalabuuken sug duaˈ bansa, kaas maˈniin mibaal salabuuk lawas. Mukaˈ pisambat ita niin dayun tu Megbebayaˈ. ¹⁷ Sinangkaliˈ pa tanan, luminusad dini si Kristu, mukaˈ inukiten su Gempia Petenday mekatag di keksalabuuk kia. Inukitanen sug launan getaw, yamu nu nga kanaˈ getaw Judea melayuˈ tu niin, mukaˈ su nga getaw Judea mesempelsempel diniin. ¹⁸ Kaas mekeksalabuuk naita mekpesempel tu Gamaˈ ta Megbebayaˈ ditug langit, su nga getaw Judea buˈ su nga kanaˈ, puˈ ebangan ita nug Balakat nu Megbebayaˈ.

¹⁹ Mendadi yamu nu nga kanaˈ getaw Judea, kanaˈ namu lain bansa mukaˈ nug lain getaw, puˈ samasakup namu nu nga piglegetawan nu Megbebayaˈ, mukaˈ miampuˈ namu tu nga gapenen. ²⁰ Maaˈ amu nug baalan balay pegbaalen nu Megbebayaˈ. Su nga piktuˈun nu nga peneligan ni Kristu mukaˈ nu nga megwali taluˈ nu Megbebayaˈ, iin su nga paseken. Mukaˈ si Kristu, iin sug batu gintudan nu paseken. ²¹ Iin dademai pemagen mukaˈ gektuban nu tibuuk balay, kaas kig balay kini, mbaluy dayun sala pengedapan metelimaˈ nu Megbebayaˈ mukaˈ tandaˈ pegbenwanan nu Kaunutan ta. ²² Yamu nu nga kanaˈ getaw Judea laak salabuuk na diniin, miampuˈ namu pelum dig baalan balay pegbaalen na nu Megbebayaˈ mukaˈ pegbenwananen pibian tug Balakaten.