Mendadi, begudiin duunig lunsud nu getaw Roma ditug benwa Macedonia, piningalan dun Filipos. Si Pablo, su kepalusen diag benwa Asia, minundas ditug lunsud Filipos, puˈ adun ukitanen su nga getaw dia mekatag di kegawen nu getaw puun dini Isukristu. Naa, duunig libun dia mendedagang penepeten tininaˈ gempula, ngalanen si Lydia, iin saan su miguna mekpetuud dini Isus dia Filipos. Samataw dadema iin ni Pablo getaw Judea. Duun dademai kanaˈ getaw Judea mikpetuud dini Isus. Si Pablo, saˈ minibeniben na dia, duuni kuminuntra dun. Su kuminuntra dun, inalegen ditu nga begelal puˈ si nga Pablo daw, mikpesasak di nga getaw. Mipirisu dayun si nga Pablo. Dekag miglinug, mibeluy si nga Pablo, kaas su megingat dia pirisuan, mikpetuud gupia dini Isus sampay su gapenen.

Naa, sikna migawaˈ si nga Pablo ditu Filipos, minundas ilan di ngag lain benwa megukit tu Gempia Petenday sampay di gendaw mipirisu na pelum si Pablo ditu syudad Jerusalem, dayun iwit ditu syudad Roma, adun mbisala ditu. Su saanan ni Pablo mipirisu diag Roma, piwitanen sinulat su pikumpungan nu nga sakup ni Kristu dia Filipos, puˈ adun mekpaladpalad dinilan puun tu kesuguˈ nilan dini Epafrodito mangay megabang dini Pablo. Mikpaladpalad si Pablo puˈ sabaˈ nu suguˈan nilan mukaˈ nu kepuit nilan diniin gamut.

Su kepuit dun ni Pablo ki sulat kini, iini gembagel di ginaanen su kepetail diniin nu nga samasakupen dia Filipos mukaˈ su kepetailen dinilan pelum. Pinguliksegen ilan adun megisegi kesalig nilan dini Kristu. Tinituluˈen ilan subay leliagen ilan pia melegenan ilan puun tu kesakup nilan dini Kristu. Tinituluˈen ilan pa pagid subay pegliaun nilan su nga mekpetuˈun dig balus.

Duuni mpia besaan mekatag di pikumpungan nga sakup ni Kristu dia Filipos dia sala libru mpeduma dig Begu Pasadkini, Ki nga Pinggulaula nu nga Peneligan ni Isukristu16.1-40.