¹ Naa yamu nga gembataˈ suminalabuuk na tu Kaunutan ta, subay pekpetuud amu tu mekegulang niu, puˈ kiai gempia betad. ² Puˈ su pinalinta nu Megbebayaˈ, “Pegbesaay mu su ginaˈ mu mukaˈ su gamaˈ mu,” iin sug bekna palintanen sugdaan nu Megbebayaˈ di melengas su mekpetuud dun. Iin su pinasaden sugdanen dun, ³ “Pegbasaa dun, adun metaasi gumul mu dinig dibabaw lumbang kini, mukaˈ gempiai kebetang mu dini.”

⁴ Yamu nga mekegulang, ndiˈ niu pelegetay su ngag bataˈ niu, puˈ melayuˈ dayuni ginaa nilan dun. Subay pebegelen niu ilan di gempia tituluˈan mukaˈ pemaag, mbantang tu nga suminalabuuk tu Kaunutan ta.

⁵ Yamu nga sesuguˈen nu getaw, subay pekpetuud amu tu gegalen niu dinig dibabaw lumbang. Pegbesaay niu ilan gupia di ndiˈ megduaˈduaˈig delendeman niu, maˈniin nu kekpetuud niu dini Kristu. ⁶ Ndiˈ amu pekpaitaˈitaˈ laak dinilan, puˈ adun enalen amu nilan. Segaga pepengganget niu dig delendeman niu su mauyaˈan nu Megbebayaˈ, adun penggulaulaan niu dayun, puˈ maˈniin amu gupia sesuguˈen ni Kristu. ⁷ Mendadi, adin su mauyaˈan nu gegalen niu, penemalay niu penggulaulaay di gempia ginaa niu, puˈ kanaˈ samataw niu laaki pengimbaalan niu, su padun Kaunutan ta. ⁸ Puˈ suunan niu saˈ sesuguˈen, saˈ su kanaˈ, su melengas gulaula ta, sugdaan ita dun nu Megbebayaˈ.

⁹ Naa yamu nu ngag duuni sesuguˈenen, pepianay niu dadema su nga sesuguˈen niu. Ndiˈ niu ilan pengendekay, puˈ misuunan niu su gegalen nilan tantu mukaˈ gegalen niu ditug langit, iin da tanan, mukaˈ ndaˈidunig lingken ukumenen.

¹⁰ Taman taluˈu diniu, launan niu, pepagen niui kekpetuud niu miksekat di keksalabuuk niu di Kaunutan ta puun tu ketaas ginuungen. ¹¹ Subay sangkap niuig delendeman niu dig launan begay diniu nu Megbebayaˈ, maaˈ danu sundalu misangkap na lumumpak, adun mekengatu amu tu tawakal nu Palin. ¹² Puˈ su kuminuntra dinita, kanaˈ kilawan. Iini pengetuan ta tantu, su menenulay dia kediwetaan, su nga megbayaˈ, meglegadiˈ, mukaˈ meglekaunutan di nga getaw mukaˈ di nga kanaˈ getaw dinig lumbang kini, saˈ maitaˈ, saˈ su ndiˈ, puˈ nemun, mideleman gupia su nga kilawan dig lumbang kini. ¹³ Kaas, subay sangkap niuig delendeman niu dig launan gabang dinita nu Megbebayaˈ, adun saˈ melaat na mpenggulaula, mekengatu amu tu kekpelaat sia diniu nu Palin. Saˈ maˈantu, ndiˈ amu niin daagen saˈ mengikteb na.

¹⁴ Mendadi, pengandam amu mengatu dun maˈniniˈ, subay teluˈen niu laak su metuud, puˈ kiai maaˈ nu telaked nu sundalu, betangan nug besinen. Subay mekesuun amu gupia, puˈ kiai maaˈ nu penending tug lawas niu. ¹⁵ Iini maaˈ nu sepatus nu sundalu, ki kesangkap niu megukit amu di Gempia Petenday mekatag di kelinaw, su kesambat nu Megbebayaˈ di nga kilawan. ¹⁶ Labi pa saˈ pektalentenan niu ini, pepengganget niu su kesalig niu, puˈ kiai maaˈ nug lasag, puˈ mekepenagang dig launan pegligaˈ gugyung pinanaˈ diniu nu Palin, su pengindanen diniu. ¹⁷ Dawat niu su kegawen diniu nu Megbebayaˈ, puˈ kiai maaˈ nu penending tu gulu niu, puˈ pepegenenig delendeman niu. Mukaˈ subay pepengganget niu dig delendeman niu su taluˈ nu Megbebayaˈ pisuun diniu nug Balakaten. Kiai maaˈ danu sundang nu sundalu. ¹⁸ Sug launanen, subay dunutan nu kenenabi niu. Tatap amu pekpaingabang tu Megbebayaˈ, saanan pedelendem diniu nug Balakaten. Subay tatap niu pektalentenay su kenenabi niu, adun ndiˈ amu lumukas dun. Gebii gendaw penenebiay niu sug launan piglegetawan nu Megbebayaˈ. ¹⁹ Naan dema, penenebiay niau, adun saˈ megwali nau, begayanu nu Megbebayaˈ teluˈen ku, adun ndiˈu mekalangalang megwali tu nga getaw delendeman nu Megbebayaˈ pigbuninen kanugdiin mukaˈ mibuasan na. Kiai teluˈen Gempia Petenday. ²⁰ Puˈ iini pigwekilanu dun nu Megbebayaˈ, puˈ adun megukitu Gempia Petenday, pia pinikutanu. Kaas penenebiay niau adun ndiˈu mekalangalang megukit dun, puˈ subay ukiten ku gusay.

²¹ Naa si Tiquico kini, petailen mimated dinaan mukaˈ meseligan sesuguˈen ku dig baalen sinalig dinaan nu Kaunutan ta, pegukiten diniu su mipenggulaula dinaan mukaˈ su kebetangu, adun mesuunan niu gupia. ²² Iini sinuguˈu dun mangay ditu niu, puˈ adun ukitanen amu mekatag di mipenggulaula nami, launan nami dini, mukaˈ adun pengemuˈenen amu.

²³ Naa, penenebiin ku tu Gamaˈ ta Megbebayaˈ mukaˈ tu Kaunutan ta si Isukristu, begayen diniu ngag launan kepetedan nami di kekpetuud, gempia ginaa mukaˈ pinetailay, mpeduma nu gempagen kesalig. ²⁴ Pepianan amu nu Megbebayaˈ, launan niu nga mekpetail diniin di ndaˈi tamanen.

Daal daitu. Pablo