Mendadi, ki pikumpungan kini nu nga sakup ni Kristu ditug lunsud Tesalonica, mikpetindeg dun si Pablo. Puˈ ndaˈ maiben dia si Pablo, pinungun nu Megbebayaˈi melaun getaw suminakup tu Kaunutan si Isus miksekat di ginukit ni Pablo. Ndaˈ maiben pelum, mikegawaˈ dia si Pablo, sabaˈ nu kesina diniin nu nga samanen getaw Judea. Minundas dayun ditug lain lunsud. Su saanan ni Pablo dia sala lunsud, misebuˈan dun si Pablo saˈ taˈ alanduni kebetang nu nga sakup ni Kristu tu Tesalonica, kaas delendeman nug duma getaw, mabuˈ sinuguˈen daw sug limbangen si Timoteo meditu, adun pegipusipusenen su mipenggulaula dia. Benaˈ mipuliˈ si Timoteo ditu ni Pablo, iin pai kesulat ni Pablo di sulat kini.

Maˈantu, ki sulat kini, piwit ni Pablo di nga samasakupen ditu Tesalonica adun pengulikseganen ilan sumalig pailan gusay dini Kristu. Mukaˈ pigwalinen dinilan su gempenggulaula pa ditug binayaˈ gebii buˈ gendaw. Kini sug bekna gupia sinulat ni Pablo ndaˈ mbeleng, ki tinaguˈ nu nga sakup ni Kristu miuna dinita. Su Tesalonica, gembagel lunsud ditug benwa Macedonia begudiin (nemun piningalan dun Salonika, sakup Macedonia pa gusay).