Mendadi kig lunsud Colosas kini, mibetang diag buid nu syudad Efeso, su gempantag syudad nu getaw Roma tu prubinsya Asia begudiin. (Sug Asia begudiin, nandaw iin su nasud Turkey.) Naa, su gendawan pa ni Pablo duuni pikumpungan nu nga sakup ni Kristu diag lunsud Colosas, laak kanaˈ ni Pabloi miditu megukit di Gempia Petenday tu nga getaw. Bisan kanaˈen mikpetindeg di pikumpungan dia, delendeman ni Pablo, daniin ketendanan megabang dinilan.

Naa si Epafras, iin su kaunutan nu pikumpungan dini Kristu dia Colosas. Duuni gendaw minateng si Epafras ditu syudad Roma tandaˈ pinikutan si Pablo. Inukiten dini Pablo su mipenggulaula nu nga mikpetuud dini Kristu dia pikumpungan ditu Colosas. Iini inukiten puˈ duuni mikpetuˈun dig balus dia Colosas. Piktuˈun nilan tu nga sakup dia puˈ melaun dawig diwata megdapitdapit dawi ketaas nilan, metaas pa di kilawan laak gembabaˈ pa di Megbebayaˈ. Subay ilani pektemuyen daw. Salabuuk di ngag diwata kia si Kristu daw. Kagina maˈantu daw, kanaˈ ni Kristu dawi Megbebayaˈ. Di sinulaten kini, paingalan dun ni Pablo su ngag diwata kia, “su ngag diwata megbayaˈ di ngag duma mukaˈ meglekaunutan dun.”

Su keduaˈ sayep nu nga mikpetuˈun dig balus kia, subay dunutan nu nga sakup daw su palinta nu nga mekpetuˈun kiin, adun puluˈ megawen. Paingalan dun ni Pablo su sagya palinta “betad nu kilawan.”

Di sinulaten kini piktuˈun sungkin ni Pablo puˈ si Kristu, iin su tantu palas nu Megbebayaˈ maitaˈ nu getaw. Iin dademai penganay Bataˈ nu Megbebayaˈ, metaas pa dig launan binaalen. Piktuˈunen dadema puˈ su gasal nu Megbebayaˈ mukaˈ sug dani Kristu, iin da tanan. Keduaˈen, ndaˈi pantagen su kedunut sia dig betad kilawan. Subay si Kristu laaki pegbesaan ta, sumalig ita diniin adun megawen ita, sampay peksibaˈan ta su pegbetaden ta tu samataw ta.