Mendadi, kini si Timoteo, sala tawan di ngag limbang ni Pablo mukaˈ mibaal dadema lepeng bataˈ ni Pablo. Getaw Judea su ginaˈ ni Timoteo, laak su gamaˈen, kanaˈ getaw Judea. Mikitaˈ si Timoteo mukaˈ si Pablo su saanan ni Pablo megukit di Gempia Petenday tug lunsud Listra, sakup Asia (su nasud Turkey nemun). Dayun genat nitu, tatap migdunut dini Pablo si Timoteo.

Naa, ki sulat kini ni Pablo, tigyungen dini Timoteo puˈ subay petubudanen baalay su pibaal diniin nu Megbebayaˈ. Puˈ si Timoteo, sala di nga kaunutan nu pikumpungan nu nga sakup ni Isus tug lunsud Efeso mukaˈ dig lumibut benwa. Tinituluˈ ni Pablo di sinulat kini puˈ subay pemaagen su nga mekpetuˈun dig balus. Tinituluˈen dadema sug betad memiliˈ tu kaunutan nu nga sakup, mektenduˈ tu megabang dun sampay sug betad menembaˈ dig balulibun. Tinikuk pa pagid ni Pablo dini Timoteo ki peksibaˈanen pegbetaday, adun mbaalig lawasen gempia lendasan tu nga samasakupen.

Duun pagidi gempia besaan mekatag dini Timoteo dia sala libru mpeduma dig Begu Pasad kini, Ki nga Pinggulaula nu nga Peneligan ni Isukristu 16.1-3, mukaˈ di 17.14-15.