¹ Diniˈa Timoteo,

Naan si Pablo, peneligan ni Kristu Isus, pigwekilan nu Megbebayaˈ su Meglegawen dinita mukaˈ ni Isukristu su pedetengen ta mpuliˈ dini. ² Puitan ku yaˈa sulat, puˈ maˈniin ka tantu bataˈu, puun di kesalig ta. Penenebiin ku tu Gamaˈ ta Megbebayaˈ mukaˈ tu Kaunutan ta si Isukristu, mbianan mu su tulungen, sug lelaaten sampay pianan ginaa.

³ Naa, su saanan ku mangay ditu Macedonia, pinengiu diniˈa bilin ka diag lunsud Efeso. Nemun duun nai mektituluˈ dig lain tituluˈan dia, kaas puliˈan ku na penengiay diniˈa, diaan ka da dun, puˈ adun pemeek mu ilan. ⁴ Belibaday mu ilan mektalenten tu sagya gukiten, mukaˈ tug listaan nu gesalan ndaˈi tamanen, puˈ puunan ia nu pekpelawan, mukaˈ kanaˈ mekegabang di kektalenten ta tug delendeman nu Megbebayaˈ. Iin laaki mekegabang dun, su kesalig ta. ⁵ Pinengiu diniˈa, pemaag mu ilan, puˈ adun meglinelaatay su nga getaw mekpuun di gempia delendeman mukaˈ di tantu kesalig. ⁶ Puˈ duunig duma, misuay ilan di gempia delendeman mukaˈ di kesalig sampay mitalin ilan. Puˈ pegyegaan nilan su ndaˈi gatagen, ⁷ puˈ mauyaˈan nilan mekpetuˈun ilan sia tu Palinta nu Megbebayaˈ, laak ndaˈ nilan mesabut tantu su pinulingkasan nilan tituluˈay, mukaˈ su piglegintuud nilan gupia.

⁸ Naa, su Palinta nu Megbebayaˈ, suunan ta gupia puˈ melengas Palinta, saˈ melengasi pebianan ta dun. ⁹ Puˈ suunan ta dadema ndaˈ palintaay tu nga mekesuun getaw. Pinalinta tu nga ndiˈ mektalenten tu palinta, tu nga mimilas, tu nga ndiˈ megbasa tu Megbebayaˈ, tu nga mikesalaˈ, tu nga medupang, tu nga mektalenten laak tu kinilawan, tu nga mekpatay mekegulangen, tu nga memunuˈan, ¹⁰ tu nga medusa, tu ngag laki megunay tu samalakinen, tu ngag libun megunay tu samalibunen, tu nga mengulipen, tu ngag belusen, tu nga membaalbaal takesiˈ, sampay tu nga getaw pemelaunen pia taˈ alandun pai gempia tituluˈan. ¹¹ Puˈ ki tituluˈan kia, mpeduma di Gempia Petenday mekatag di Megbebayaˈ su gempia penalan, su megdedengeg gupia Diwata, puˈ iini puun nu pianan ginaa. Ki Gempia Petenday kia, iin su pisalig dinaan nu Megbebayaˈ.

¹² Naa naan, mekpaladpaladu dini Kristu Isus su Kaunutan ta, puˈ bigayanu niin sekegu mbantang tu pisaligen dinaan. Mekpaladpalad dau dema diniin puˈ mipemilangu niin meseliganu, kaas tinduˈu niin sesuguˈenen, ¹³ asa su ndaˈ pau tenduˈay, piksudiˈan ku iin. Pilegetan ku dadema su nga sakupen mukaˈ sininau iin. Laak dagid ndaˈu pa mesuunay su gempia penggulaulaan ku mukaˈ ndaˈ pau pekpetuud, kaas lilaatanu nu Megbebayaˈ. ¹⁴ Tinulungu gupia nu Kaunutan ta, maˈniin milebiananu niin tulungay, puˈ bigayanu niin kekpetuudu diniin mukaˈ lelaatu di nga samatawu puun tu kesalabuuk ta dini Kristu Isus. ¹⁵ Meseligan gupiai taluˈ kini mukaˈ mpia telimaˈen, si Isukristu, iini midini dun lumbang kini, guunenen su nga mikesalaˈ. Tampusan mikesalaˈ mau di nga mikesalaˈ, ¹⁶ laak lilaatanu nu Megbebayaˈ, adun paitaˈen di nga getaw puˈ metau si Kristu Isus mektigel di mikesalaˈ getaw. Kaas binaalu tenggiˈan tu nga mekpetuud ditug binayaˈ gebii buˈ gendaw, su nga begayan ketubuˈ ndaˈi tamanen. ¹⁷ Maˈantu, penalan ta di ndaˈi tamanen su Meglekaunutan, su ndaˈi gumulen mukaˈ ndiˈ maitaˈ, sug buntung Megbebayaˈ, pegbesaan mukaˈ penalan lelayun. Amen.

¹⁸ Naa, ki mbataˈ Timoteo, pegwakilu na diniˈa, tituluˈ mu ini tu nga samasakup mu, maaˈ nu tinaluˈ pedaan nu pimuunan nu Megbebayaˈ mekatag diniˈa. Kaas delendem mu su tinaluˈ nilan, adun penemalan mu ukitay su melegdeng tituluˈan. Mukaˈ penemalan mu dema pektalentenay ¹⁹ su kekpetuud mu di gempia delendeman. Puˈ duuni nga mimilas tu gempia delendeman nilan sia, kaas mibeleng nai kekpetuud nilan. ²⁰ Ngag duma nilan si Himeneo mukaˈ si Alejandro, su ngag bigayu dini Satanas, adun mektuˈun ilan puˈ subay ndiˈ na nilan peksudiˈan su Megbebayaˈ.