¹ Naa, ki nga gulipen suminakup na dini Isus, subay pegbesaan nilan gupia su nga gegalen nilan, adun ndiˈ mpelaatanig dengegan nu Megbebayaˈ mukaˈ su tituluˈan ta mekatag di kekpetuud. ² Subay pegbesaan nilan su nga gegalen nilan saˈ mekpetuud dailan dema, pia samasakup ilan. Labi na nilan penemalan ebangay, puˈ su pigebangan nilan, pated na di kekpetuud mukaˈ petailen na.

Naa, subay petuˈun mu ini tu nga mekpetuud mukaˈ penengiin mu dinilan penggulaulaan nilan ini. ³ Saˈ duuni mekpetuˈun ngag lain tituluˈan, mukaˈ ndiˈen senguˈen su gempagen taluˈ mekatag di Kaunutan ta si Isukristu mukaˈ su tituluˈan megagak di kegbasa tu Megbebayaˈ, ⁴ pemilangu iin mangyaˈ, ndaˈi misabuten di metuud. Melaat gupiai ginaanen saˈ ndiˈ mekeglekis mukaˈ saˈ ndiˈ mekesual mekatag di nga peneluˈenen. Deksuˈanen, mengimbegu su nga mekineeg dun, meksual ilan, meksinudiˈay ilan mukaˈ megegintapay ilan, ⁵ sampay ndiˈ mekaubus su nga getaw meksual. Pesemaan ku ilan di mipenulay mukaˈ miwaˈan ilan di metuud, puˈ sabaˈ laung nilan dun saˈ, pegbesaan nilan su Megbebayaˈ, dumatuˈ ilan. ⁶ Tumuˈ su megbasa gupia tu Megbebayaˈ, saˈ pesukaleni kebetangen, maaˈ medatuˈ daan. ⁷ Ndiˈ ba metuud, su kauliˈ ta dinig lumbang, ndaˈi miwit ta mukaˈ saˈ mawaˈ ita dini, ndaˈidun na pelumi muit ta? ⁸ Subay sukal da dinita saˈ mekenapet ita mukaˈ mekaˈaan ita. ⁹ Laak su nga getaw mauyaˈan nilan dumatuˈ ilan, naa melemu ilan mpenulay. Maaˈ ilan nu metetubuˈ mitaban di giman, puˈ mayak ilan di ndaˈi pantagen sampay mekedupang ilan, kaas malap nilan kelaatan sampay mbeleng ilan ditug linaw gapuy. ¹⁰ Puˈ su gayak nu getaw tu selapiˈ, iini puun ditu melaun ginis melaat gulaula. Sabaˈ nu gayak tu selapiˈ, melauni mikpetuud sia, sumiway di kekpetuud, kaas milegenan ilan maˈniin ilan midugi tu tebenan dugi.

¹¹ Laak yaˈa, pigwekilan ka nu Megbebayaˈ, pegliaw mu sug launan maˈnia. Iini penemalan mu penggulaulaay ki kekesuun, pegbesaay mu su Megbebayaˈ, saliga diniin, petail mu su samataw mu, pektigela di kelegenay mu puun tu kekpetuud ta, sampay mesumayaˈa. ¹² Pesemaan ku dig lumbaˈ. Gebeka gupia adun dumaaga ditu gengayan mu, saˈitada penemalay mu dunutay su kekpetuud pimuun dinita sampay melaam mu su ketubuˈ ndaˈi tamanen. Puˈ kiai migenggat diniˈa dun su Megbebayaˈ, su saanan mu miglegintuud di gedapan nu melaun miketakesiˈ dun puˈ mikpetuuda na. ^13-14 Penengiin ku diniˈa, ndiˈa mesayep mektalenten tug launan sinuguˈ dinita sampay lumusad puliˈ su Kaunutan ta si Isukristu. Mukaˈ iini takesiˈ di suguˈan ku diniˈa kini, su Megbebayaˈ, su mimegay ketubuˈ dig launan mukaˈ si Isukristu, su tuminakesiˈ tu metuud di gedapan ni Poncio Pilato. ¹⁵ Ki ketuaˈ puliˈ dini nu Kaunutan ta kini, pepenggulaula nu Megbebayaˈ di pinasad gendaw, puˈ iini megdedengeg Megbebayaˈ, sug buntung meglekaunutan. Meglegadiˈ di nga gadiˈ, meglekaunutan di nga kaunutan, ¹⁶ su mipeduunan ketubuˈ ndaˈi tamanen, su megbenwa di tiag ndiˈ mesempelan nug duma, su ndaˈiduni mikaitaˈ dun mukaˈ ndaˈi mekaitaˈ dun.

Naa, penalan tain mukaˈ sumakup ita diniin di ndaˈi tamanen. Amen.

¹⁷ Su nga medatuˈ di kinilawan mekpetuud na, subay tituluˈ mu ilan ndiˈ ilan megangyaˈ mukaˈ ndiˈ ilan sumalig di kedatuˈ nilan, puˈ kanaˈ meseligani gimu. Subay seligan nilan su Megbebayaˈ, puˈ begayen dinita su kulang dinita, adun leliagen ita dun. ¹⁸ Suguˈen mu ilan penemalan nilan penggulaulaay su melengas, mengingabang ilan mukaˈ metawal ilan, ¹⁹ kaas metaguˈ nilan maˈniin gaˈus puun tu seligan nilan ditug binayaˈ gebii buˈ gendaw, adun malap nilan su ketubuˈ, puˈ iini ketubuˈan tantu, puˈ ndaˈi tamanen.

²⁰ Naa, Timoteo, pektalentenay mu su sinaligu diniˈa. Pegliaw mu su nga kiteluˈay laak, mukaˈ su kekpalawpalaw laung dun nu getaw sinuunan. ²¹ Puˈ duuni getaw laung nilan dun duuni sinuunan nilan, laak ndaˈ nilan mesugatay su tantu kekpetuud.

Naa, penenebiin ku tu Megbebayaˈ, mbianan niu su tulungen diniu, launan niu.

Daal daitu. Pablo