¹ Naa ki nga megulang laki, ndiˈ mu ilan pegbeluˈay. Pengmiaˈmiaˈay mu ilan tituluˈay maˈniin laak gamaˈ mu. Su ngag laki ngudan pa diniˈa, pemilang mu ilan maaˈ ngudan mu gupia. ² Su nga megulang libun, maaˈ ilan nu ginaˈ mu, mukaˈ su ngag libun ngudan pa diniˈa, maaˈ ilan nu ngudan mu gupia, subay gempia daig delendeman mu dun.

³ Naa ki ngag balulibun, pegbesaay mu ilan saˈ ndaˈig duma nilan mektagikul dun. ⁴ Laak adin sug duunig bataˈen atawaka gapuˈen, naa sug bataˈen, atawaka gapuˈen, subay ilani metau mekpetubuˈ dun. Puˈ mekpuun su getaw meglegintau mektamuy tu Megbebayaˈ meksekat di kegbasanen tu samatawen diag balay, sampay suliˈanen su mekegulangen di kegleketubuˈ. Kiaig leliagen dun su Megbebayaˈ. ⁵ Laak su tantu balulibun, su mitelauy gupia, subay petubuˈen nu nga sesuku suminakup dini Isus. Puˈ iin laaki seliganen su Megbebayaˈ, kaas minamal mekpaingabang tu Megbebayaˈ mukaˈ menenabi diniin gebii gendaw. ⁶ Naa sug balulibun mektalenten tu gayaken, mpemilangu maˈniin minatay saananen tetubuˈ pa. ⁷ Kaas sinuguˈu yaˈa tituluˈ mu ia tu nga suminakup, adun ndiˈ mbasul nu ngag lain getaw su ngag balulibun. ⁸ Saˈ duuni samasakup ndiˈen petubuˈenig betaˈanen, labi na su gapenen, sama da pimalawen su kekpetuud, mukaˈ melaat pai pigbetaden batul nu pigbetad nu nga kanaˈ mekpetuud.

⁹ Naa, kig balulibun mauyaˈanen mpeduma di penunan nu ngag balulibun, ndiˈ mu duatay saˈ ndaˈ pai genem puluˈ taunen, mukaˈ subay mainsan laak mesuay. ¹⁰ Medawat sug libun megdedengeg na puˈ metau megabang tug dumanen, melengasi kegibaˈen dig bataˈen, metau menembaˈ tu nga menaikan, metau dadema mekpebabaˈ dig lawasen di gabangen tu nga piglegetawan nu Megbebayaˈ, migabang tu nga milegenan, kaas minamal menggulaula melengas.

¹¹ Laak su ngag balulibun begu getaw pa, ndiˈ nailan deliˈ duaten. Puˈ saˈ duuni gayak nilan lemaˈ denlag, dayun mauyaˈan nilan mesuay puliˈ, naa teliudan nilan si Kristu. ¹² Kaas ginukuman dinilan, ndaˈ nilan pemetutay su pinasad nilan diniin. ¹³ Mukaˈ dema, kagina mekpanaw mekpanaw ilan, naa lulaˈ ilan laak. Labi na meglibak ilan mukaˈ menginampen ilan tu ndaˈig labet nilan dun, pegyegaan nilan su gempia pegbuniin. ¹⁴ Mendadi mauyaˈan ku, penginsuaan su ngag balulibun begu getaw pa, megbataˈ ilan, mukaˈ megingat ilan tu nga gapen nilan, kaas ita nga sakup, ndiˈ ita mekalan nu kuntra ta. ¹⁵ Tinaluˈu ia, puˈ duun nai ngag balulibun mitalin, dinunutan nilan si Satanas. ¹⁶ Naa, sug libun mekpetuud na, saˈ duunig betaˈanen balulibun, subay iini mekpetubuˈ dun, adun ndiˈ melebiani gastu nu pikumpungan nga sakup, kaas mekegabang ilan tu ngag balulibun ndaˈ nai kengayanen.

¹⁷ Naa, su kaunutan metau meguit tu nga samasakupen, subay pemilangen mbantang peduaˈ piluˈeni tindan dun, mukaˈ subay pegbesaan gupia. Labi na su nga menamal megukit Gempia Petenday mukaˈ mekpetuˈun. ¹⁸ Ndaˈ ba sulat di Misulat Taluˈ nu Megbebayaˈ, “Ndiˈ mpia egbeden sug babaˈ nug baka mu saananen meglegiik.” Mukaˈ, “Bantang tindanan su mengimbaal.” ¹⁹ Ndiˈ dadema mpematutig dangat tu kaunutan nu nga mekpetuud, subay duunig duaˈ tawan atawaka telui takesiˈ dun. ²⁰ Su kaunutan lelayun mikesalaˈ, subay tituluˈen di gedapan nug launan mekpetuud, adun mendek su ngag duma.

²¹ Penengiin ku diniˈa, pektalentenay mu gupia ki tituluˈu kini, puˈ misuunan nu Megbebayaˈ mukaˈ si Isukristu sampay su nga mitenduˈ sesuguˈenen getaw langit puˈ gempiai tituluˈ kini. Ndiˈa meksulamig dumunut dun, peglepeng mu mukaˈ ndiˈ mu unaay bentangay ginukuman, pia taˈ biselaay dun.

²² Mukaˈ su nga kaunutan di pikumpungan nu nga sakup, ndiˈ mu ilan dedeliˈay tenduˈay dayun depenay, tekaw buus medelaˈiga dinilan. Subay megliawa di salaˈ.

²³ Mukaˈ yaˈa, kanaˈ na laak tubigi inumen mu. Peginuma maikaˈ, bulung di tian mu, adun ndiˈa tatap megladu.

²⁴ Naa, duuni nga getaw medayag na gupiai salaˈ nilan, mauna di ginukuman dinilan. Sug duma, iglud pa, laak medayag da ditug binayaˈ gebii buˈ gendaw. ²⁵ Sama dai nga getaw gempiai gulaulanen, duuni medayag gupia mukaˈ duuni medayagdayag da. Laak su medayagdayag, medayag gupia ditug binayaˈ gebii buˈ gendaw.