¹ Mendadi suminulat ami mekatag dini Isukristu. Kini si Isukristu, iini gelalen Taluˈ nu Megbebayaˈ. Duun pa sala gelal diniin, su Ketubuˈ, puˈ su ndaˈ pa mbaali gekleb langit buˈ lupaˈ, daan na tetubuˈ iin. Midengeg nami su taluˈen, mukaˈ minitaˈ nami gupia iin. Mipuleg pa nami padun, puˈ suminala dinami megbenwa. ² Sug bekna, ditu pa Gamaˈ ta si Isus, su gilal Ketubuˈ ndaˈi tamanen. Nandaw, pinitaˈ gupia dinami, kaas pegukit nami dema diniu. ³ Pegukit nami diniu su minitaˈ nami mukaˈ su midengeg nami, adun mpeduma amu di keksalabuuk nami tu Gamaˈ ta mukaˈ tug Bataˈen, si Isukristu. ⁴ Sinulat nami ini, adun megelaˈ sug leliag nami.

⁵ Iini pitenday dinami nug Bataˈ kini nu Megbebayaˈ, mukaˈ petenday nami dadema diniu, su Megbebayaˈ, iin su tiag, ndaˈiduni medelem diniin.^{a 6} Kaas ita, saˈ teluˈen ta puˈ suminalabuuk ita tu Megbebayaˈ, asa pegbenwa ita di medelem puˈ melaati gulaula ta, migbalus ita. Balusi teluˈen ta mukaˈ gulaula ta. ⁷ Dagid saˈ megbenwa ita tu medelag, maaˈ dadema nug betad nu Megbebayaˈ, meksalabuuk ita di ginaa. Mukaˈ ugasan ita niin dig launan salaˈ ta, puˈ iini gugas dun, sug duguˈ ni Isus, sug Bataˈ nu Megbebayaˈ minatay guminantiˈ di nga salaˈ ta.

⁸ Naa saˈ teluˈen ta puˈ ndaˈiduni salaˈ ta, piglimbungan tai ginaa ta, ndaˈ ta medawat su metuud. ⁹ Dagid saˈ pegukit ta tu Megbebayaˈ su nga salaˈ ta, penuudeneni pasaden puˈ mekpedasun dinita, mukaˈ ugasan ita niin dig launan salaˈ ta, puˈ su Megbebayaˈ, kanaˈ meksulamig. ¹⁰ Laak dagid saˈ teluˈen ta puˈ ndaˈ ita mekesalaˈ, pibalus ta su Megbebayaˈ, ndaˈ ta medawati taluˈen.