¹ Yamu nu ngag lepeng bataˈu petailen ku, suminulatu diniu, puˈ adun ndiˈ amu mekesalaˈ. Laak dagid, pia duun dinitai mekesalaˈ, duun dademai menengi pekilelaat ditu Gamaˈ ta mekatag dinita. Si Isukristu, su mekesuun, iini menengi dun. ² Mukaˈ iin dademaig bian nug lelaat dinita nu Gamaˈ ta, puˈ minatay, bayad di nga salaˈ ta. Mukaˈ kanaˈ su laak danita salaˈ, puˈ su nga salaˈ dadema nug launan getaw dinig lumbang.

³ Naa, saˈ mekpetuud ita tu pinalinta nu Megbebayaˈ, mesuunan ta gupia puˈ suminambat ita tu Megbebayaˈ. ⁴ Puˈ saˈ duuni getaw teluˈenen puˈ sumambat tu Megbebayaˈ, asa ndaˈen petuudayi pinalintanen, belusen. Ndaˈ pengganget dig delendemanen su metuud. ⁵ Laak dagid, adin su mekpetuud tu taluˈ nu Megbebayaˈ, mingganget di ginaanen su kepetailen tu Megbebayaˈ. Puˈ iini misuunan ta dun puˈ suminalabuuk ita tu Megbebayaˈ, ⁶ saˈ teluˈen ta puˈ suminalabuuk ita tu Megbebayaˈ, subay penunggilingan ta sug betad ni Isukristu.

⁷ Yamu nu nga sambatu petailen ku, iini palintau diniu, sug daan midengeg niu kanugdiin sampay nandaw, kanaˈ nug begu palinta. Puˈ su pitenday na diniu, iin dademai palintau diniu. ⁸ Laak pia daan nai palinta kini, mesuˈat paingalan ta dun begu, puˈ iin pa paitaˈ di nga getaw su metuud. Puˈ su metuud, minitaˈ ditu pinggulaula ni Kristu, mukaˈ maitaˈ dadema ditu gulaula niu nu nga sakupen. Saˈ maˈantu, pegawaˈ na su medelem, midelagan naita nu tantu Tiag.

⁹ Adin su getaw miktaluˈ puˈ midelagan iin, asa kanaˈ mekesuun tug dumanen, mideleman pa. ¹⁰ Laak dagid su getaw mekpetail tug dumanen, iini midelagan, ndiˈ megdaang tu samatawen. ¹¹ Laak dagid su kanaˈ mekpetail dig dumanen, pekpanaw di medelem. Maˈniin buta, puˈ ndiˈen maitaˈi pegengayanen, sabaˈ medelem.

¹² Yamu nu ngag lepeng bataˈu, sumulatu diniu puˈ pidasun namu nu Megbebayaˈ di salaˈ niu sabaˈ nu pinggulaula ni Kristu. ¹³ Yamu nu nga megulang, sumulatu diniu, puˈ suminambat amu dini Kristu, su gandang na tetubuˈ, su ndaˈ pa mbaali gekleb langit buˈ lupaˈ. Yamu pelum nu ngag begu getaw, suminulatu dema diniu, puˈ mikedaag amu tu Palin.

¹⁴ Yamu ngag lepeng bataˈu, suminulatu daan diniu, puˈ suminambat namu tu Gamaˈ ta. Yamu nu nga megulang, suminulatu diniu, puˈ suminambat amu tug daan tetubuˈ, saˈ ndaˈ pa mbaali gekleb langit buˈ lupaˈ. Yamu pelum nu ngag begu getaw, suminulatu diniu, puˈ gempageni ginaa niu. Mingganget na dig delendeman niu su taluˈ nu Megbebayaˈ, kaas dinaag niu su Palin.

¹⁵ Naa kig lumbang kini, ndiˈ niu petailay, sampay sug launan betaden kinilawan. Puˈ adin su getaw mekpetail dun, iini ndiˈ mekpetail tu Gamaˈ ta. ¹⁶ Puˈ sug launan betaden kinilawan, su melaat gayak ta, mukaˈ sug launan maitaˈ ta dayun mayak ita dun, sampay su kangyaˈ ta tug duma ta, kig launanen kia, kanaˈ genat tu Gamaˈ ta, puˈ genat dini da lumbang. ¹⁷ Mukaˈ kig lumbang kini, sungu na mawaˈ, sampay su kelaun mayak dun su kilawan. Laak dagid adin su getaw mekpetuud tu mauyaˈan nu Megbebayaˈ, ndaˈi gikteb nu ketubuˈen.

¹⁸ Yamu nu ngag lepeng bataˈu, iini teluˈen ku diniu, sungu na melengkebig benwa! Tinaluˈ daan diniu puˈ duuni metuaˈ kuntra ni Kristu. Nandaw, melaun na tuˈui kumuntra dini Kristu, kaas misuunan ta puˈ sungu na melengkebig benwa. ¹⁹ Su nga kumuntra diniin, duma ta sia, laak ndaˈ ilan salabuuk dinita, kaas minawaˈ ilan. Saˈ maˈantu, mipantek na puˈ pia sala tawan dinilan, ndaˈiduni suminalabuuk dinita. Puˈ saˈ suminalabuuk dailan dinita, ndaˈ ilan sia megawaˈ.

²⁰ Laak yamu, bigayan amu ni Kristu Balakat nu Megbebayaˈ, kaas mesabut niu su metuud, launan niu. ²¹ Kaas kanaˈ iini suminulatu dun diniu puˈ ndaˈ niu mesuunay su metuud, puˈ misuunan na niu gupia, mukaˈ misuunan niu pa pagid puˈ ndiˈ meglamug su metuud mukaˈ balus.

²² Naa saˈ saaken ta, “Taˈ taway dunig belusen?” iinig belusen, su memalaw puˈ si Isus, kanaˈ iini Kristu, ki Mitenduˈ nu Megbebayaˈ Meglekaunutan. Puˈ adin su mektaluˈ maˈantu, iini kuminuntra dini Kristu. Pimilasen su Gamaˈ ta sampay sug Bataˈen, si Isus. ²³ Puˈ adin su memilas tug Bataˈen, pimilasen dadema su Gamaˈen. Adin su menembaˈ tug Bataˈen, pinembaˈen dadema su Gamaˈen.

²⁴ Laak yamu, pektalentenay niu gupia su pituˈun diniu kanugdiin, sampay nandaw. Puˈ saˈ talentenan niu, meksalabuuk amu gusay tu Gamaˈ ta, sampay tug Bataˈen. ²⁵ Mukaˈ iini pinasad ni Kristu dinita, su ketubuˈ ta ndaˈi tamanen.

²⁶ Iini sinulatu kini mekatag di nga meglimbung kia diniu. ²⁷ Yamu pasiˈ, bigayan amu ni Kristu Balakaten. Kagina megduma diniu sug Balakaten, ndiˈ namu kambat pektuˈunan nug lain getaw. Puˈ sug Balakaten, mekpetuˈun diniu dig launanen. Metuudig daniin, ndaˈidunig balus dun. Saˈ maˈantu, petuud niu su petuˈunen diniu, peksalabuuk amu gusay dini Kristu.

²⁸ Yamu nu ngag lepeng bataˈu, peksalabuuk amu gusay dini Kristu, puˈ adun saˈ lumusad iin puliˈ, ndiˈ amu mendek mukaˈ ndiˈ amu dema mpiid madap diniin, di gendaw nu kepuliˈen. ²⁹ Misuunan niu puˈ mekesuun si Kristu, misuunan dadema niu puˈ adin su getaw mekesuun, iinig bataˈ nu Megbebayaˈ.