¹ Adin su getaw metuudan dun puˈ si Isusi Tinduˈ nu Megbebayaˈ Meglekaunutan, iinig bataˈ nu Megbebayaˈ. Mukaˈ adini mekpetail di gamaˈen, mekpetail dadema dig bataˈen. ² Puˈ suunan ta puˈ su gikteb nu kepetail ta tu Megbebayaˈ, mukaˈ su gikteb nu kekpetuud ta tu pinalintanen, iin dademai gikteb nu kepetail ta tu samasakup ta. ³ Puˈ saˈ petailen ta su Megbebayaˈ, petuuden ta su pinalintanen. Mukaˈ su pinalintanen, ndaˈiduni ndiˈ ta megaga dun, ⁴ puˈ su ngag bataˈ nu Megbebayaˈ, ndiˈ mpegdaangan nug betad kinilawan. Puˈ iini ndiˈ ita mpegdaangan dun, su kesalig ta dini Isus. ⁵ Saˈ saaken, “Taˈ taway duni ndiˈ mpegdaangan nug betad kinilawan?” iin dai ndiˈ mpegdaangan dun, su mituudan puˈ si Isus sug Bataˈ nu Megbebayaˈ.

⁶ Puˈ si Isukristu kini, iin su mituaˈ, mikpebunag tubig, mukaˈ minatay, adun sug duguˈen, ugas tu salaˈ nga getaw. Kanaˈ laak tubigi mibiananen, segaga mibiananen su tubig mukaˈ sug duguˈ, saˈitada minatay. Iini miketakesiˈ dun, sug Balakat nu Megbebayaˈ, mukaˈ iin, kanaˈ megbalus. ⁷ Maˈantu, telu buuki tuˈus ta dini Kristu, ⁸ sug Balakat nu Megbebayaˈ mukaˈ su tubig sampay sug duguˈ. Telu buuki tuˈus, dagid salabuuk dai maˈananen. ⁹ Su Megbebayaˈi tuminakesiˈ tug Bataˈen. Saˈ tumakesiˈ su getaw, petuuden ta. Labi pa su Megbebayaˈ, puˈ metaas pa gupiai ketakesiˈen. ¹⁰ Maˈantu, adin su getaw mikpetuud na tug Bataˈ nu Megbebayaˈ, mingganget na dig delendemanen su takesiˈ nu Megbebayaˈ. Adin dema su memalaw dun, pibalusen su Megbebayaˈ, puˈ ndaˈen petuuday su tinakesiˈ nu Megbebayaˈ mekatag tug Bataˈen. ¹¹ Saˈ maˈantu, iini tinakesiˈan dun, bigayan naita nu Megbebayaˈ ketubuˈ ndaˈi tamanen, mukaˈ iinig bian ketubuˈ, sug Bataˈen. ¹² Adin su suminakup tug Bataˈ nu Megbebayaˈ, iini mikalap di ketubuˈ kini. Su ndaˈ sakup diniin, ndiˈen malap su ketubuˈ ndaˈi tamanen.

¹³ Mendadi yamu nu nga mikpetuud tug Bataˈ nu Megbebayaˈ, suminulatu diniu, adun gempantek di ginaa niu puˈ mialap na niu su ketubuˈ ndaˈi tamanen. ¹⁴ Kanaˈ ita mpiid menenabi tu Megbebayaˈ, puˈ mipantek na di ginaa ta puˈ kineegan ita niin, saˈ pebayaˈ ta diniin sug launan penenebiin ta. ¹⁵ Kumalenged metelimaˈ nu Megbebayaˈ sug launan kenenabi ta, begayen dadema dinita sug launan penenebiin ta diniin.

¹⁶ Naa saˈ duuni maitaˈ niu samasakup ta mikesalaˈ, subay penenebian niu, adun begayan nu Megbebayaˈ ketubuˈ, saˈ su salaˈen, kanaˈ pa mbantang di kepatay ndaˈi tamanen. Puˈ duuni salaˈ mbantang dun. Kanaˈ kiai tinaluˈu penenebian niu. ¹⁷ Sug launan melaat gulaula nu nga getaw, mekesalaˈ dun su getaw tu Megbebayaˈ, laak sug duma salaˈ, kanaˈ pa mbantang ditu kepatay ndaˈi tamanen.

¹⁸ Naa, suunan ta puˈ su ngag bataˈ nu Megbebayaˈ, ndiˈ nailan menamal mekesalaˈ, puˈ penendingan ilan nug Bataˈ nu Megbebayaˈ, adun ndiˈ nailan mpenulay nu Palin. ¹⁹ Suunan ta dadema puˈ sakup naita nu Megbebayaˈ, pia pigbiaˈan nu Palin sug launan getaw dinig lumbang. ²⁰ Suunan ta pa pagid puˈ kig Bataˈ nu Megbebayaˈ, kuminilawan adun pesabuten dinita sug bian sumakup tu tantu Megbebayaˈ. Kaas miksalabuuk ita diniin di ginaa, puˈ suminalabuuk ita tug Bataˈen, si Isukristu. Puˈ iini tantu Megbebayaˈ, mukaˈ iin dademai puun nu ketubuˈ ndaˈi tamanen.

²¹ Yamu nu ngag lepeng bataˈu, pegliaway niu sug launan sagya diwata!