¹ Yamu nu nga sambatu petailen ku, ndiˈ niu petuuday sug launan getaw inangken nilan puˈ bigayan ilan daw Balakat nu Megbebayaˈ. Segaga peksimaˈ niu su pituˈun nilan, saˈ puun ba tu Megbebayaˈ, saˈ kanaˈ. Puˈ misigwag na dinig lumbang su melaun mikpetuˈun dig balus. ² Iini tuˈusan niu su pituˈun nug Balakat nu Megbebayaˈ, adin su getaw mekpetuˈun puˈ miksibaluy getaw si Isukristu, iinig bigayan Balakat nu Megbebayaˈ. Kaas su pituˈunen, genat tu Megbebayaˈ. ³ Laak dagid adin su getaw pemelaunen puˈ kanaˈ laung kilawan si Isukristu, iini ndaˈ begayay Balakat nu Megbebayaˈ. Kaas iini puun nu pituˈunen, su Kuntra ni Kristu, su midengeg niu sungu mateng, mukaˈ minateng na dinig lumbang.

⁴ Laak yamu nu ngag lepeng bataˈu, suminakup amu tu Megbebayaˈ, kaas dinaag na niu su nga mekpetuˈun dig balus. Puˈ sug Balakat nu Megbebayaˈ, dumuma diniu, mukaˈ su pegbayaˈen, metaas pa di pegbayaˈ nu Palin, sug dumuma tu nga sakup dig betad kinilawan. ⁵ Puˈ su nga mekpetuˈun dig balus, iini pituˈun nilan sug betad kinilawan, su genat dinig lumbang, kaas iini mekineeg dinilan su samasakup nilan. ⁶ Dagid ita, sakup ita nu Megbebayaˈ, kaas iini mektalenten dinita su suminambat diniin. Su ndaˈ sakup diniin, ndiˈ mektalenten dinita. Puˈ kiai tuˈus ta tu mikpetuˈun, su mektalenten dun. Maˈantu, mailala ta su getaw pituˈunan nug Balakat nu Megbebayaˈ, puˈ miglegintuud, mukaˈ mailala ta dema su pituˈun nu Palin, puˈ megbalus.

⁷ Yamu nu nga sambatu petailen ku! Iini teluˈen ku diniu, subay mekpinetailay ita, puˈ su kekpetail, mikpuun tu Megbebayaˈ. Adin su mekpetail tug dumanen, iinig bataˈ nu Megbebayaˈ, mukaˈ suminambat tu Megbebayaˈ. ⁸ Laak su ndiˈ mekpetail tug dumanen, ndaˈ sambat tu Megbebayaˈ, puˈ su gasal nu Megbebayaˈ, gempetail tu getaw. ⁹ Pinitaˈ dinita nu Megbebayaˈ su kepetailen, puˈ sinuguˈen sug buntung Bataˈen medinig lumbang, adun begayen dinita su ketubuˈ ndaˈi tamanen. ¹⁰ Puˈ iini tantu kepetail, kanaˈ nu kepetail ta tu Megbebayaˈ, puˈ su kepetailen dinita, sinuguˈen sug Bataˈen matay gumantiˈ tu salaˈ ta, adun pedesunen ita niin di nga salaˈ ta.

¹¹ Yamu nu nga sambatu petailen ku, saˈ maˈantui kepetail nu Megbebayaˈ dinita, subay mekpinetailay daita dema. ¹² Pia sala tawan, ndaˈi mikaitaˈ tu Megbebayaˈ. Laak saˈ mekpinetailay ita, sumalabuuk gusay dinita su Megbebayaˈ, mukaˈ mengganget dig delendeman ta su petailanen. ¹³ Misuunan ta na puˈ suminalabuuk ita tu Megbebayaˈ, mukaˈ iin, suminalabuuk dadema dinita, puˈ iini tuˈus ta dun, bigayan ita niin Balakaten. ¹⁴ Mukaˈ yami, iini pegukit nami ki minitaˈ nami gupia, kig Bataˈ nu Megbebayaˈ sinuguˈ nu Gamaˈen medinig lumbang, adun meglegawen dig launan getaw. ¹⁵ Adin su getaw teluˈenen puˈ si Isus sug Bataˈ nu Megbebayaˈ, sumalabuuk gusay diniin su Megbebayaˈ. Mukaˈ iin, sumalabuuk dadema tu Megbebayaˈ. ¹⁶ Puˈ ita, misindanan ta na su kepetail nu Megbebayaˈ dinita, kaas suminalig ita dun.

Su Megbebayaˈ, gempetail, kaas adin su gempetail, iini sumalabuuk gusay tu Megbebayaˈ. Mukaˈ sumalabuuk dadema su Megbebayaˈ diniin. ¹⁷ Saˈ maˈantu, mingganget na di ginaa ta su petailanen, adun ndiˈ naita mendek di Gendaw nu Kengukumen dig launan getaw, puˈ sug betad ta dinig lumbang, maaˈ dadema nug betad ni Kristu. ¹⁸ Puˈ su gendek mukaˈ su kepetail, ndiˈ mekpungun. Puˈ su mekpetail gupia dinita, ndiˈ ita mendek dun. Saˈ duuni getaw mendek pa, ndaˈ pengganget di ginaanen su kepetail nu Megbebayaˈ, maˈniin ginukuman nain, puˈ milegenan di gendeken.

¹⁹ Naa kagina pitail ita nu Megbebayaˈ, metau ita dema mekpetail diniin, sampay su nga samataw ta. ²⁰ Saˈ duuni getaw teluˈenen puˈ pitailen su Megbebayaˈ, asa kanaˈ mekesuun tug dumanen, belusen. Puˈ saˈ ndiˈen petailen sug dumanen su tatapen maitaˈ, labi pa su Megbebayaˈ, ndiˈen petailen, puˈ su Megbebayaˈ, ndaˈen mainsan maitaˈ. ²¹ Kaas maˈniini pinalinta ni Kristu dinita, su mekpetail tu Megbebayaˈ, subay mekpetail dadema tug dumanen.