¹ Diniu nga Mingumpated petailen ku,

Naan si Judas, sesuguˈen ni Isukristu mukaˈ pated ni Santiago. Piwitan ku amu sulat, yamu nga ginggat nu Gamaˈ ta Megbebayaˈ sumakup diniin, petailenen gupia mukaˈ pegingaten ni Isukristu gebii gendaw.

² Penenebiin ku tu Megbebayaˈ puˈ ndaˈi gikteben sug lelaaten mbianan niu mukaˈ su petailanen sampay pianan ginaa.

³ Mingumpated petailen ku, gangutu dun sumulatu sia diniu mekatag di kegawen mpeduma ta mbianay, laak dagid tumuˈ subay sumulatu diniu ganam, adun penengiin ku diniu tugaling, ndiˈ niu begay mpalin su kekpetuud pitenday na di nga piglegetawan nu Megbebayaˈ. Puˈ iini mimuun dun su Megbebayaˈ, ndiˈen begay pelinen. ⁴ Puˈ duun masiˈi nga getaw luminamug di pikumpungan ta, mpauk ilan megbasa tu Megbebayaˈ, laak iglud nilan sug delendeman nilan kia. Pinalin nilan su pituˈun mekatag di tulung nu Megbebayaˈ, adun mekegdusa ilan. Pemelaun nilan pa pagid puˈ kanaˈ daal dai Gegalen ta mukaˈ Kaunutan ta, si Isukristu. Asa daan na misulat dengantu puˈ pelebuˈan ilan ginukuman nu Megbebayaˈ.

⁵ Naa, pia daan na niu misuunan su mipenggulaula nu nga miuna memilas tu Megbebayaˈ, duuni tegyungen ku diniu. Tegyungen ku diniu puˈ sikna pibeluy nu Kaunutan ta su nga getaw Israel ditug benwa Ehipto, su nga ndaˈ pekpetuud diniin, pinatayen ilan, pia getaw Israel mailan. ⁶ Mukaˈ ndiˈ niu selingaway puˈ duun dademai nga sesuguˈen nu Megbebayaˈ getaw langit, luminaad ilan tu gikteb nu pegbayaˈ nilan mukaˈ migbeleng ilan tu gempia pegbenwanan nilan. Sabaˈ nu kemilas nilan, pinikutan pailan nu Megbebayaˈ ditu tigdu medelem benwa sampay matengi gendaw ukumenen ilan. Binalud ilan kadina ndaˈi kegetusen. ⁷ Mukaˈ padun, ki nga getaw ditu ngag lunsud Sodoma mukaˈ Gomora sampay su ngag lunsud dig lumibut benwa, delendem niu deliˈ su mibianan nilan. Pinggulaula nilan dadema su mekepiidpiid, su maaˈ nu pinggulaula nu nga getaw langit kiin, pinulay ilan gupia. Kaas gukuman dinilan, melegenan ilan gusay di gapuy ndaˈi kepalengen. Kia, mibaal na lendasan pegad di nga tibaˈan getaw puˈ ndiˈ mpia penunggilinganig betad nilan.

⁸ Naa maˈantu, ki nga getaw mekpepalin sia di kekpetuud niu, maˈantu dadema. Puun tu teginepen nilan menggulaula ilan melaat gupia dig lawas nilan, mekepiidpiid, pemilasen nilan su pegbayaˈ nu Megbebayaˈ mukaˈ penampalaksaan nilan su mekesalebuˈ getaw langit. ⁹ Laak pia si Miguel, sala di nga tampusan getaw langit, ndaˈen makuˈ tampalaksaay su samanen getaw langit. Puˈ su sualan nilan duaˈ nug duma ndiˈ maitaˈ, si Satanas, saˈ pikegawan nilan sug bangkay ni Moises, ndaˈ ni Miguel pebeluˈay su Palin kia. Kaliˈ pektaluˈ, “Pemaagen ka nu Kaunutan!” ¹⁰ Sinangkaliˈ pa tanan ki nga mekpepalin sia di kekpetuud niu, adin su ndiˈ nilan mesabut, peksudiˈan nilan pelum. Penggulaulaan nilan laak su mauyaˈan nug lawas nilan, maaˈ da nug betad nu malig metetubuˈ. Deksuˈanen ia, tipuun ilan nu gulaula nilan. ¹¹ Mekelelaatlelaat ilan gupia, puˈ pelebuˈan pailan! Mipenunggilingan nilan sug betad ni Cain, sug bataˈ ni Adan. Midunutan nilan dadema su keglimbung ni Balaam su tautau pimuunan nu Megbebayaˈ, puˈ peglimbungan nilan su nga getaw, adun menelapiˈ ilan. Mimilas ilan maaˈ dani Core dengantu, su mimilas di pegbayaˈ ni nga Moises bigay nu Megbebayaˈ, kaas mpeglaatan dailan dema maaˈ dani Core. ¹² Saˈ megduma ilan diniu meglumpuk, ndaˈi piid nilan, puˈ adin su gayak nug lawas nilan, iini baalen nilan. Daal dai tagikulen nilan, su laak lawas nilan. Petanggiˈu ilan di megdelem mpalid nu genus laak ndaˈig dupiˈ dun, pia setegduˈ, puˈ kanaˈ ilani meguit tug delendeman nilan. Gempia dadema petanggiˈu ilan di gayu ndiˈ memunga, pia basanen na, mukaˈ binakut na sampay pinatay nai gangeten, puˈ ndaˈi gatag nilan. ¹³ Maaˈ ilan nu mekebagel nabek diag dagat saˈ salindapak, puˈ maitaˈ su mekepiidpiid baalen nilan maaˈ nug bulaˈ mpiglak nu nabek. Petanggiˈu dailan dema di ngag bitun mpalin lelayunig biananen, puˈ kanaˈ ilan mpia dunutan. Kaas gasal nilan tinduˈ nu Megbebayaˈ, mekauliˈ ilan ditu tantu medelem benwa, ndiˈ ilan dayun mekawaˈ dia.

¹⁴ Naa, duuni pimuunan nu Megbebayaˈ begudiin, si Enoc, di kepitu sumpaten genat dini Adan. Si Enoc, miktaluˈ pedaan mekatag di nga getaw mekpepalin sia di kekpetuud niu nemun, “Bentayay pa daan! Su Kaunutan, pegdateng nain ilan nu nga sesuguˈenen getaw langit leliagen dun su Megbebayaˈ, kanaˈ laak santaˈ laksaˈ tawan ilan. ¹⁵ Lumusad adun ukumenen su tibaˈan kilawan. Mukaˈ iini kitab dun, sug launan ndiˈ megbasa tu Megbebayaˈ, pelebuˈanen, sabaˈ nu tibaˈan melaat gulaula nilan puun tu kemilas nilan tu Megbebayaˈ, sabaˈ dadema nug lumaun ketampalaksa nilan ditu Megbebayaˈ.” ¹⁶ Naa ki nga getaw kia, misugat taluˈ ni Enoc. Tatap ilan meglengetlenget mukaˈ menamal dailan dema mengaleg di ngag duma getaw. Dumunut ilan tu melaat gayak nilan, menakabul ilan, sampay mekpeˈenalenal ilan tu ngag duma, adun mbuklus sug danilan mauyaˈan.

¹⁷ Pia maˈantu, petailen ku mimated, ndiˈ niu selingaway sug daansamaˈ tinaluˈ diniu nu nga peneligan nu Kaunutan ta si Isukristu. ¹⁸ Iini tinaluˈ nilan diniu, laung, “Saˈ sungu melengkebig benwa, duuni nga getaw metuaˈ meksudiˈ diniu nga suminakup tu Megbebayaˈ, dumunut ilan tu gayak nilan memilas tu Megbebayaˈ.” ¹⁹ Naa, mekpesuay dailan dema di ngag duma. Su gayak kinilawan laaki megbayaˈ di ginaa nilan, ndaˈ ilan begayay Balakat nu Megbebayaˈ.

²⁰ Laak yamu pasiˈ, nga petailen ku Mingumpated, pektinebangay amu gusay, adun megiseg pai kesalig niu, kig leliagen dun su Kaunutan. Penenabi amu pebian di ginuung nug Balakat nu Megbebayaˈ. ²¹ Mukaˈ penggengeten niu lelayun dig delendeman niu su petailan nu Megbebayaˈ diniu, selian niu mekpedateng dun su gendaw begayan namu nu Kaunutan si Isukristu ketubuˈ ndaˈi tamanen, puun tug lelaaten dinita.

²² Naa su ngag duma megduaˈduaˈ pai kesalig nilan, lelaatay niu ilan. ²³ Su ngag duma pa pagid, pengmetuuday niu ilan, adun megawen ilan di gapuy ndaˈi kepalengen. Su ngag duma pelum, lelaatay niu dailan dema, laak petubuday niu adun ndiˈ amu mpeduma mpenulay. Laak su penepeten nilan milemuˈan nug dupangan nilan kekinilawan, subay pelayuˈ amu dun, saˈitada, pegliaun niu su melaat gulaula nilan.

²⁴ Naa, metau su Megbebayaˈ megingat diniu, adun ndiˈ amu mpedaangan. Megaga dadema nu Megbebayaˈ paindegen amu di ndaˈi salaˈ niu mukaˈ di gembagel leliag niu ditu gedapanen, tandaˈ maitaˈ su kelengas nu pegbayaˈen. ²⁵ Kaas, melengas penalan tain, puˈ ndaˈig lain Megbebayaˈ, su Meglegawen dinita. Penalan tain pibian di Kaunutan ta si Isukristu, puˈ genat tu kebaalen di gekleb langit buˈ lupaˈ, pia nandaw mukaˈ di ndaˈi tamanen, iini tampusan megdedengeg mukaˈ daniini tampusan pegbayaˈ mukaˈ ginuung, su Megbebayaˈ! Amen.

Daal daitu. Judas