Mendadi ki sinulat kini, iin su pinitaˈ ni Isukristu ditu sala tawan sakupen, ngalanen si Juan. Su ndaˈ pa paitaˈ diniin ni Isus, si Juan, inutidan dig daan benwanen dayun piated nu gubirnu ditu sala maikaˈ puluˈ. Su gendawan kiin, sug launan benwa ditu dapit, daansamaˈ linumpakan nu nga getaw Roma. Mikedaag su nga getaw Roma, kaas su gadiˈ nilan ditu syudad Roma, miglegadiˈ dig liwenagan benwa. Naa, duuni gendaw mibaal nu gadiˈig begu balaˈud, subay daw iin laaki pektemuyen, su da laak gadiˈ kiin. Naa, su nga sakup ni Kristu, kagina mituudan ilan dun si Kristu laaki Tampusan Diwata, mimilas ilan ditug balaˈud kia. Melaun dayun dinilani piglegetan. Iini mibianan nu pitu buuk pikumpungan nu nga sakup ni Kristu ditug benwa Asia. Ki sinulat kini, piwitan dun su pitu buuk pikumpungan kia, adun mpengamuˈ ilan sampay mpenguliksegan ilan dumunut dini Kristu. Si Juan kiin, su saananen ditu maikaˈ puluˈ, iini pinitaˈ diniin ni Isus.

Dini sinulat kini, sinulat ni Juan sug launan pinitaˈ diniin ni Isus. Minitaˈ ni Juani melaun mekesalebuˈ pinggulaula ditug langit sampay dinig lumbang. Melaun meliget pelabuˈ. Melaun dademai suminakup dini Kristu gempagen gupiai kesalig nilan. Katapusanen, pinitaˈ ni Isus dini Juan sug Begu Syudad Jerusalem, luminusad dig begu lumbang genat ditug begu langit. Naa diag begu syudad, ndaˈiduni melegenan, ndaˈiduni melaat, sampay ndaˈiduni gebii, puˈ dia lelayun su Megbebayaˈ.