22
1 Mendadi pinitaˈ pagid dinaan nu sesuguˈen nu Megbebayaˈ getaw langit kig lawas tubig megbegay ketubuˈ ndaˈi tamanen. Metinggasi tubig kini maˈniin pagalungan. Su gulunen, iin su gingkudan kia nu Megbebayaˈ mukaˈ nu Nati Karniru, 2 dayun dia menelegan titengaˈ nu karsada di syudad. Miktimpang di tubig kia ki gayu megbegay ketubuˈ ndaˈi tamanen. Betad nu gayu kini, tauntaun sepuluˈ buˈ duaˈ deksuˈ memunga, saˈitada, mainsan sebulan. Sug daunen, gempia bulung peneguliˈ di getaw tu kelaun nasud. 3 Ndaˈiduni getaw maitaˈ dia syudad kia tinuyudan nu Megbebayaˈ, pia sala tawan.
Naa, su Megbebayaˈ mukaˈ su Nati Karniru, dia syudad kia su melengas gingkudanen. Dia mektamuy diniin su nga sesuguˈenen, su nga getaw langit, saˈ su nga kilawan. 4 Su muluˈen, maitaˈ gupia nu ginsekupanen kia, sulaten dadema dia gangas nilan su ngalanen. 5 Ndaˈ nai gebii. Ndiˈ na dema kambat gemiteni suluˈ dia sampay ndiˈ na kambat medelagan nu mata gendaw, puˈ su Kaunutan Megbebayaˈi mekpedelag di syudad. Su nga sesuguˈenen, getaw langit saˈ kilawan, meglekaunutan ilan di ndaˈi gikteben.
Su Kelusad puliˈ ni Isukristu
6 Naa mendadi, su sesuguˈen nu Megbebayaˈ, kaliˈ pektaluˈ dinaan, “Ki nga tinaluˈ kini, metuud tantu mukaˈ meseligan gupia. Su Kaunutan Megbebayaˈ, su mikpepengapuˈ Balakaten ditu nga pimuunanen, iin, sinuguˈen su sesuguˈenen getaw langit adun buasanen di nga sesuguˈenen kilawan su sungu mpenggulaula.”
7 Kaliˈ taluˈ si Isus, “Pektalentenay niu ini! Ndiˈ maiben matengu! Su nga mekpetuud tu sinulat pedaan dig libru kini mpenggulaula lemaˈ denlag, naa leliagen ilan!”
8 Naa, naan si Juan, mikedengegu gupia mukaˈ mikaitaˈu di kelaun mipenggulaula kini. Naa benaˈ mitubusu medengeg mukaˈ maitaˈ sug launanen kini, mikeglaubu dayun di gedapan nu getaw langit kia, su mikpaitaˈ dinaan di kelaunen kini, puˈ pektemuyen ku sia iin. 9 Laak dagid laungen dinaan, “Paa, ndiˈa dema tuˈu pengmaˈniin, puˈ sama mau sesuguˈen, sama sesuguˈen dau dema nu nga mimated diniˈa pimuunan nu Megbebayaˈ, sampay su tibaˈan mekpetuud tu sinulat dinig libru kini. Tamuy mu sungkin su Megbebayaˈ!” 10 Laungen padun dinaan, “Kini nga sinulat pedaan mekatag di mpenggulaula lemaˈ denlag, ndiˈ mu pegbuniay, puˈ sungu na menuud kig launanen kini. 11 Mendadi, adin su getaw menggulaula melaat, iin na gusayi penggulaulaanen. Adin su menggulaula mekepiidpiid, iin nai penemalanen. Su mekesuun dema, mekenamal dadema meksikesuun, sampay su pinaas nu Megbebayaˈ, ki pigbetaden su laak mauyaˈan nu Megbebayaˈ, naa pediunen gusay su kepaas dun.”
12 Kaliˈ pektaluˈ si Isus, “Pektalentenay niu ini! Ndiˈ maiben matengu puliˈ! Uiten ku su nga sugda tu nga getaw, diadia mbantang tu pinggulaulanen. 13 Naa naan, su ndaˈidun pai mibaal, daan nau. Saˈ megelaˈ na mpapas sug launanen, naan, kini pau gusay. Naani pikpuunan nug launan, naan dademai katapusanen. Naani miuna, naan dademai mbinayaˈ.”
14 Penleliagen su nga getaw pengekdakan nilan gupia su suub nilan, kaas buangen dinilan, mbantang nailan maan tug bunga nu gayu megbegay ketubuˈ ndaˈi tamanen, mbantang dailan dema mian dig bisuanganen, adun suled ilan tu syudad. 15 Dagid su nga menggulaula mekepiidpiid, su nga mensaled, su meksumbang, su memunuˈan, su mektamuy tug ledawan sampay su meglimbung mukaˈ sug belusen, ditu laak ilan liu nu syudad.
16 “Naa, naan kini si Isus, sinuguˈu su sesuguˈen ku, adun su gempenggulaula kini, ukitenen diniu nga pikumpungan nu suminakup dinaan. Naan su sapuˈ ni David paingalan dinaan su pemulaw, ki tampusan mekesulaw bitun.”
17 Mendadi, sug Balakat nu Megbebayaˈ mukaˈ su penginsuaan kia nu Nati Karniru, kaliˈ ilan taluˈ, “Naa, diniin ka na tuˈu!”
Naa, adini mekedengeg dun ini, subay teluˈenen dadema, “Diniin ka tuˈu, uu Kaunutan!”
Diadia, adin diniui kuaun, diaan ka niin, alap mu tuˈu ki tubig megbegay ketubuˈ ndaˈi tamanen, kig begay diniˈa di ndaˈig bayad dun. Pia adin su meliag dun, malap dun.
Deksuˈanen
18 Naan si Juan, pegaden ku daan su kelaun mekedengeg di mpenggulaula lemaˈ denlag, ki sinulat pedaan dig libru kini. Saˈ duuni getaw dumugang dun dini, pia sektaang taluˈ, dugang nu Megbebayaˈ di ginukuman dun su nga pelabuˈ sinulat dig libru kini. 19 Mesama saˈ duuni getaw kulanganen ki sinulat pedaan di mpenggulaula kini lemaˈ denlag, pia sektaang taluˈ laak, naa, uiˈen dadema diniin nu Megbebayaˈ su gilasen dig bunga nu gayu kia megbegay ketubuˈ ndaˈi tamanen, sampay sug bentanganen suled dia Pinaas Syudad sinulat dig libru kini.
20 Mendadi si Isus, su meglegintuud dun kig launanen kini, kaliˈ taluˈ, “Metuud! Sungu nau tuˈu metuaˈ!”
Maˈantu! Uu Kaunutan Isus, diniin ka na!
21 Naa penenebiin ku, kig launan getaw, diadia tulungen lelayun nu Kaunutan ta si Isus.