¹ Mendadi minitaˈu dayun kig begu langit mukaˈ lumbang, puˈ mibeleng sug daan langit mukaˈ lumbang, sampay mialep sug dagat. ² Minitaˈu pa pagidi Syudad Pinaas nu Megbebayaˈ, kig begu Jerusalem, peglusad dig begu lumbang genat ditug langit, genat tu Megbebayaˈ, minuyaˈ na gupia, maˈniin nug libun piselukan pekayan puˈ sungu beliˈiay, minuyaˈ na mekitaˈ ditu menginsawa dun. ³ Midengegu dayuni mesekeg taluˈ ditu gingkudan gadiˈ, kaliˈ taluˈ, “Ki Megbebayaˈ, mekpungun na di nga kilawan megbenwa! Iin, sumala na dinilan megbenwa, mukaˈ ilan, mbaal ilan gegulingen piglegetawanen. Meksalabuuk gupia dinilan su Megbebayaˈ, mukaˈ iin, pektemuyen nilan na tuˈu. ⁴ Penguaˈenen dinilanig launan mekpaubaˈ di ginaa nilan. Genat itu ndaˈidun nai matay, ndaˈiduni melegenan, ndaˈ nai mengaduy atawaka mesaitan. Su miuna kebetang getaw, megelaˈ na mpalus.”

⁵ Mendadi su megingkud dia melengas gingkudan gadiˈ, kaliˈ taluˈ, “Bentayay pa daan, ki gikteb biwatu, gelaˈen ku sukliay begu!” Kaliˈ padun pektaluˈ dinaan, “Sulat mu ini, puˈ ki tinaluˈ kini, metuud mukaˈ meseligan gupia.” ⁶ Dayun dinugangen dun, laungen, “Migelaˈ na metubus! Naa naani miuna, naan dademai mbinayaˈ. Naan, su ndaˈidun pai mibaal, daan nau. Saˈ megelaˈ na mpapas sug launanen, kini pau gusay. Naa, adin su kuaun, painumen ku dun ki tubig kini genat di tebud nu ketubuˈ ndaˈi tamanen, di ndaˈig bayaden. ⁷ Adin su mekegdaag di melaat, iini petenged diniin, pektemuyenu niin mukaˈ iini mbaal bataˈu. ⁸ Laak dagid su nga mpiid sumakup dinaan, su nga tumipu di samatawen, su nga menggulaula mekepiidpiid, su nga memunuˈan, su nga meksumbang, su nga mensaled, su nga mektamuy tu sagya diwata sampay su taman belusen, iin sungkini gasal nilan, mpegbenwanan nilan sug linaw gapuy milemugan asupre, saˈitada su keduaˈ kepatayen.”

⁹ Naa mendadi, mikpesempel pelum dinaan su sala tawan di nga pitu tawan sesuguˈen nu Megbebayaˈ getaw langit kia piguidan nilan su pitu buuk gaalan mipenuˈ di katapusan pitu ginis pelabuˈ kia, kaliˈ taluˈ, “Diniin ka, puˈ paitaˈu diniˈa kig bimbeng nu Nati Karniru, su penginsuaanen.” ¹⁰ Saˈ maˈantu, pingepuˈanu nug Balakat nu Megbebayaˈ, mukaˈ iwitu nu getaw langit ditug dungus nu metaas bentud. Benaˈ minateng ami, pinitaˈen dayun dinaan su Jerusalem, ki Syudad Pinaas nu Megbebayaˈ. Ki syudad kini, peglusad genat ditug langit, ditu Megbebayaˈ. ¹¹ Mekesulaw puun tu kelengas nu Megbebayaˈ, tumiag daan maˈniin metinggas batu, maaˈ nu piningalan dun haspe, sala penenggiˈan duni pagalungan, sabaˈ ketinawen. ¹² Duuni gembagel dendingen, metaas dadema, sepuluˈ buˈ duaˈi gengaˈanen. Duun dademai sepuluˈ buˈ duaˈ tawan getaw langit megingat di ngag bisuanganen. Misulat dia ngag bisuangan kia su ngalan nu nga sepuluˈ buˈ duaˈ bansa nu getaw Israel. ¹³ Maˈantu, kada sepesagiˈ nu syudad, telu buukig bisuanganen, telu buuk diin dapit silangan, telu buuk dadema diin dapit gilidan gendaw dibaluy buˈ dibaluy, mukaˈ telu buuk pa pagid dia dapit sindepan. ¹⁴ Duun pa pagidi sepuluˈ buˈ duaˈ buuk gembagel bagabaga intudan nug dendingen. Ki ngag bagabaga kia, misulatan pelum tu nga ngalan nu sepuluˈ buˈ duaˈ tawan peneligan nu Nati Karniru.

¹⁵ Naa su getaw langit migyaga dinaan, duuni sekuden, bulawan, iini pektepengen tu syudad kini, tu ngag bisuanganen sampay ditug dendingen. ¹⁶ Memesagiˈi syudad kini, miksamaig beklanganen mukaˈ yebaˈanen. Naa tipeng tuˈu nu getaw langit ki syudad kini. Sug yebaˈanen, selaksaˈ buˈ duaˈ ngibu istagya (saˈitada, duaˈ ngibu buˈ paat gatus kilumitru), beklanganen mukaˈ taasen miksama dig yebaˈanen. ¹⁷ Tipeng dadema nu getaw langit sug dending, megatus buˈ paat puluˈ buˈ paat kubita (saˈitada, telu puluˈ buˈ enem depa su) taasen mekatag dig betad kilawan mektepeng, puˈ kiai ginamit nu sesuguˈen kia nu Megbebayaˈ. ¹⁸ Sug dendingen, binaal bagabaga piningalan dun haspe. Su syudad, iini pengimbaalanen, lungkan bulawan, kaas metinggas maˈniin metinaw pagalungan. ¹⁹ Su nga sepuluˈ buˈ duaˈ buuk batu gintudan diag dending nu syudad kia, pimulakmulakan sibaˈ ngag bagabaga. Sug bekna gintudanen, binaal haspe, su keduaˈ gintudanen, binaal sapiro, su ketelunen, agata, su kepaaten, esmeralda, ²⁰ su kelimanen, onise, su keˈenemen, kornalina, su kepitunen, krisolito, su kewalunen, birilo, su kesiamen, topasyo, su kesepuluˈen, krisopraso, su kesepuluˈ buˈ salanen, hasinto, sampay su kesepuluˈ buˈ duaˈen, amatista.+\fr 21:20 \ft Kig batu kini, lumbus metinggas batu, pigininisani patiken, metegas dadema gupia. ²¹ Ki sepuluˈ buˈ duaˈ buuk bisuanganen kini, lumbus perlasi pengimbaalanen, piksalabuuk binaal salabuuk tibuuk perlas. Sug dalan kumitas dia syudad, binaal tibuuk metinggas bulawan maˈniin metinaw pagalungan.

²² Naa mendadi, ki syudad kini, ndaˈu maitaˈig Balay Pengedapan tu Megbebayaˈ dia, puˈ dia na gupia su Kaunutan ta Megbebayaˈ, su Tampusan Ginuungan, mukaˈ su Nati Karniru. ²³ Ndiˈ na kambat tuiagi gendaw dia, mesama daig bulan, ndiˈ dadema kambat tuiag dia, puˈ medelagan gupia su syudad nu kelengas nu Megbebayaˈ, su Nati Karnirui suluˈ mekpedelag dun. ²⁴ Sug bianan nu nga getaw di kelaun nasud dinig lumbang kini, medelagan nu tiag nu syudad. Su nga gadiˈ pa pagid dinig lumbang, penguiten nilan dia su nga gimu nilan. ²⁵ Sug bisuangan, mipukaˈan gebii gendaw, ndiˈ na puliˈ tekepen. Puˈ ndiˈ na meglegebii dia. ²⁶ Adin su migdedengeg di nga nasud sampay su gaˈus nilan, penguiten gelaˈ dia syudad bian pegbasa tu Megbebayaˈ. ²⁷ Laak dagid, taman taluˈu diniu, ndaˈiduni milemuˈan mekeseled dia syudad, saˈ su minggulaula mekepiidpiid sampay sug belusen. Iin laaki mekeseled dia, su nga getaw milista nai ngalan nilan dig linulun sinulat nu Nati Karniru, ki sinulat tandaˈ milista su ngalan nu nga getaw mpeduma di ketubuˈ di ndaˈi tamanen.