হিজরত ছিপারা অইলো হজরত মুছা (আঃ) অর উপরে নাজিল অওয়া পবিত্র তৌরাত শরিফর দুই নম্বর ছিপারা। আল্লা পাকর খাছ অউ ছিপারার মাজে তান পয়দা করা আশরাফুল মখলুকাতর (সৃষ্টির সেরা জাত) গেছে নিজর পরিচয় জাইর করছইন। আল্লার মুনশা-মর্জি, কুন কাম করলে তাইন খুশি আর কুন কামে তাইন বেজার অইন, আর তান বন্দা অকলরে তাইন কতো মায়া করইন, নাফরমান অকলরে তৌবা করার কতো বেশি সুযোগ দেইন, অউ ছিপারার মাজে ইতা জানা যায়।

ই ছিপারার মাজে আল্লার নবী হজরত মুছা (আঃ) অর ইতিহাস আছে। তান জনম অইলো কিলা, তাইন কিলা হুরু থাকি বড় অইলা, কেমনে দেশান্তরি অইলা, বিয়া-শাদি করলা, আর কুন হালতে আল্লা মাবুদর দিদার-দরশন পাইলা অতা জানা যায়।

মুছা (আঃ) অর জমানার ৪০০ বছর আগে, মিসরর বাদশা এক ফেরাউনে হজরত ইউছুফ (আঃ) রে খুব মায়া করতা, ইউছুফর বাবা হজরত ইয়াকুব (আঃ) অর বংশধর বনি ইছরাইলরেও খুব মায়া করতা। মিসরী অকলে এরারে বনি ইছরাইল না কইয়া, ইবরানি কইয়া ডাকিতা। ইবরানি শব্দর মানি অইলো, রিফুজি বা বৈতল। ইউছুফ (আঃ) মারা যাওয়ার বাদে, আরক ফেরাউন মিসরর বাদশা অইয়া বনি ইছরাইলর উপরে খুব জুর-জুলুম করিয়া তারারে গুলাম বানাইলো, অইলে আল্লায় হজরত মুছা (আঃ) রে পাঠাইলা বনি ইছরাইলরে আজাদ করার লাগি, আর তাইন তারারে ফেরাউনর গুলামি থাকি আজাদ করলা।

আল্লা পাকে হজরত মুছা (আঃ) অর গেছে বনি ইছরাইল জাতি আর তামাম আদম জাতির লাগি আল্লার শরিয়তর চিরকালিন দশটা হুকুম জানাইলা। অউ হুকুম হক্কল নবী, রছুল, পেগাম্বরে মানছইন। এর কুনু রদ-বদল নাই।

অউ ছিপারাত দেখা যায়, আল্লায় হজরত মুছারে হুকুম দিলা আল্লার লাগি তাইন একখান পবিত্র ঘর বানাইতা, অউ ঘরর নকশাও আল্লায় তানরে দেখাইলা। অউ ঘরর ভিতরে আছিল পবিত্র হেরেম শরিফ, মানষে ই ঘররে পবিত্র মিলন-তাম্বু কইয়া ডাকিতা। ইখান অইলো হউ আমলর কাবা শরিফ, আস্তা দুনিয়ার হকল মুমিনর কিবলা। অইলে বনি ইছরাইল জাতি অউ সময় মুছাফিরর লাখান জাগায় জাগায় গিয়া রইতা, এরলাগি অউ এবাদত খানারে তারার লগে করি বইয়া নিতা। হজরত মুছা (আঃ) অর হুকুম মাফিক বনি ইছরাইলে অউ ঘর বানাইলা।

হজরত ইছা আল-মসীর জন্মর অনুমান ১৪০০ বছর আগে অউ ছিপারা লেখা অয়।