Alla Pakor nazil ḳora asmani fobitro kitab oḳolor mazor hoḳol foela kitab oilo, Hozrot Musa (a:)-or ufre nazil oa Tourat shorif ba Tourat kitab. I kitab Ibrani bashae najil oise. Ibrani bashae ‘Torah’ mani ‘bidir bidan’. Ou Tourat kitab nazil oise onuman 3500 bosor age. Asmani kitab oḳolor maze ikṭa oilo hoḳol taki furan kitab, ar Injil shorif forzonto bad-baki hoḳol asmani kitabe ou Tourat kitab takiu talim dey.

Ermaze fasḳan sifara ase, foela sifara oilo ‘Foeda nama’. Ou sifarar foela aeato ase “Foela-u Alla,” ar hesh aeato ase Hozrot Iusuf (a:)-or mout. Ar hasau amra dunia foeda tone Hozrot Iusuf (a:) forzonto bout nobir boeani i sifarat fai. Foeda namar mul bishoe oilo, Adom zatie Iblis-shoetanor bul foramish hunia hari naforman bonigela. Bade Alla Pake ou naformani taki mukti faoar lagi eḳ fot deḳaila, zate Adom zati hirbar tan didar-doroshon faita faroin.

Ou fotre dui nomunae deḳail oise. Foela, Allae nanan nobir loge tan didar faoar oada-chukti ḳorla, ar hou nobir ummote-o er niamot-fozilot faila. Ar dusra nomuna oilo, Alla Pake oada ḳorla, tan faṭail hou nobir silsila taki ola eḳ fobitro zon i duniat aiba, aile en usillae duniar hoḳol zatie Allai doea ar rohom-borḳot faiba, manshe dunia ar aḳerato nazat faiba. Zemon, Adom-Haoar samne tain shoetanre ḳoila, “Beṭi manshor bongshe tumar ḳolla guṛa ḳorbo” (3 ruku 15 aeat deḳoukka). Mani, hou fobitro zone shoetanor hoḳol ḳemota ar bol-shoktire binash ḳorba, ein zonom loiba eḳ beṭi manshor goro, bade aroḳ kitabo Allae zanaisoin en zonom oibo abiati eḳ shoti narir goro. Ar Hozrot Ibrahim (a:)-re ḳoila, “Tumar bongshor usillae duniar hoḳol zatie borḳot hasil ḳorba” (22:18 aeat). Bade tain Hozrot Ibrahimre zanaisoin, hou fobitro aolad aiba tan huru fua Hozrot Isʼhak (a:)-or huru fua Iakub nobir ḳandano.

Allae Hozrot Iakub (a:)-re noea nam disla Hozrot Israil, erlagi Iakubor bongshodorre ḳoa oe ‘Boni Israil’, mani Hozrot Israilor aolad oḳol. Foeda nama sifarar hesh ongshot ase, Hozrot Iusuf (a:) kila Mishor desho gulam bonla ar bade Mishor deshor raza bonia nidanor at taki zan basanir lagi, tan nizor baba ar baiainre-o ou Mishoro anchoin. Ou nomunae Boni Israil Mishoro boshot ḳora shuru oilo.

Tourat shorifor baki sair sifarat ase, Boni Israil zati kila Mishoror badsha Feraunor gulam bonigela ar bade hozrot Musa (a:)-or zoriae Alla Pake tarare Mishor taki azad ḳoria tan nizor ḳas proza banaisla. Zate Allar hou oada-chuktir shoṭik shomoe aia azile, Boni Israilor maz taki hou oada ḳora fobitro zonor zonom oito, ar tain duniare rohom-borḳot dia Alla Pakor loge hoḳoltar milon goṭaiba.

Hozrot Isa al-Mosir zonmor onuman 1400 bosor age Tourat shorif leḳa oe.