Hozrot Adom (a:)-or ḳandan-nama
5
1 Ita oilo Adomor ḳandanor ḳolombondi boean. Manush foeda ḳorar shomoe Allae tan nizor surote foeda ḳorla. 2 Foeda ḳorla beṭa ar beṭi, ar tarare Mabude boroḳot dila, foeda ḳoria nam raḳla Adom.3 Adomor eḳ-sho tish boros boeosho tan loge mil rakia tan surote eḳ fua oilo. Tain er nam raḳla Shish. 4 Shishor zonmor bade Adom aro aṭ sho boros basla, ermaze tan aro fua-fuṛin oisil. 5 Muṭ noe-sho tish boros zinda taḳar bade Adom mara gela.
6 Shishor eḳ-sho fas boros boeosho tan fua Anushor zonom oilo. 7 Anushor zonmor bade Shish aro aṭ-sho shat boros basla. Er maze tan aro fua-fuṛi oisil. 8 Muṭ noe-sho baro boros basar bade Shish mara gela.
9 Anushor nobboi boros boeosho tan fua Kinanor zonom oilo. 10 Kinanor zonmor bade Anush aro aṭ-sho fonro boros basla. Er maze tan aro fua-fuṛi oisil. 11 Muṭ noe-sho fas boros basar bade Anush mara gela.
12 Kinanor shottoir boros boeosho tan fua Maholailor zonom oilo. 13 Maholailor zonmor bade Kinan aro aṭ-sho sallish boros basla. Er maze tan aro fua-fuṛi oisil. 14 Muṭ noe-sho dosh boros basar bade Kinan mara gela.
15 Maholailor foeshoṭṭi boros boeosho tan fua Iaredor zonom oilo. 16 Iaredor zonmor bade Maholail aro aṭ-sho tish boros basla. Er maze tan aro fua-fuṛi oisil. 17 Muṭ aṭ-sho fosanobboi boros basar bade Maholail mara gela.
18 Iaredor eḳ-sho bashoṭṭi boros boeosho tan fua Idrisor zonom oilo. 19 Idrisor zonmor bade Iared aro aṭ-sho boros basla, ermaze tan aro fua-fuṛi oisil. 20 Muṭ noe-sho bashoṭṭi boros basar bade Iared mara gela.
21 Idrisor foeshoṭṭi boros boeosho tan fua Matushalaḳor zonom oilo. 22 Matushalaḳor zonmor bade tin-sho boros forzonto, Allar loge Idrisor ḳas didar asil. Er maze tan aro fua-fuṛi oisil. 23 Idris muṭ tin-sho foeshoṭṭi boros duniait asla. 24 Erbade tane ar deḳa gelo na. Allar loge tan ḳas didar asil gotiḳe Allae tanre zinda halote nizor gese nilagi.
25 Matushalaḳor eḳ-sho shatashi boros boeosho tan fua Lamaḳor zonom oilo. 26 Lamaḳor zonmor bade Matushalaḳ aro shat-sho birashi boros basla. Er maze tan aro fua-fuṛi oisil. 27 Muṭ noe-sho unushottoir boros basar bade Matushalaḳ mara gela.
28 Lamaḳor eḳ-sho birashi boros boeosho tan eḳ fua oilo. 29 Tain er nam raḳla Nuha ar ḳoila, “He amrar ator i lezaroti ḳam taki, Mabudor lannoti zomin taki oḳon aram dibo.” 30 Nuhor zonmor bade Lamaḳ aro fas-sho fosanobboi boros basla, ermaze tan aro fua-fuṛi oisil. 31 Muṭ shat-sho shatottoir boros basar bade Lamaḳ mara gela.
32 Nuhor fas-sho boros boeoshor bade tan fuain Sham, Ham ar Iafetor zonom oilo.