3 Iakube tan age ḳori Seir ba Idum desho, tan boṛo bai Ishor gese ḳoezon ḳobria faṭaila. 4 Tain erare hikai dila, “Tumra amar munib Ishre ḳoio, tan gulam Iakube ḳoise, ami otodin tone amrar mamu Labonor gese musafirit aslam. 5 Amar goru-gada, sagol-meṛa ar gulam-bandi hoḳolta-u ase. Amar munibor gese doea faoar ashae tumrare faṭailam.”

6 Ḳobria oḳole firia aia Iakubre ḳoila, “Amra afnar bai Ishor gese geslam. Tain sair-sho manshore loia afnar loge mulaḳat korat aira.” 7 Ou Iakube ḍoraia kub ostir oigela. Tain logor hoḳol manshore, goru-sagol, meṛa-meṛi ar uṭ-gada oḳolre dui dole algaila. 8 Tain ḳoila, baie aia eḳ dolre hamla ḳorle-o aroḳ dol nirafode roibo.

9 Ar Iakube dua ḳorla, “O Mabud, amar dada Ibrahimor Alla ar amar baba Isʼhakor Alla, tumi-u amare hukum ḳorso zen, ‘Tumar desho tumar nizor manshor gese firia zao, teu ami tumare rohom ḳormu.’ 10 Tumar i gulamor bae ze rohom ar imandari deḳaiso, ami ita kuntar-u laḳ nae. Ami to egu laṭi loia i Zordan gang far oislam, ar oḳon dui dol oigesi. 11 Mabud, ami aroz ḳoriar, amar bai Ishor at tone amare basao. Amar ḍor ḳorer, he aia bou fua-fuṛir loge amare-o kun ḳorbo. 12 Tumi-u to oada ḳorso, ‘Ami oboshsho-u tumar balai ḳormu, tumar oarish oḳolre doriar faror balur laḳan behishab ḳormu, zela gonia fuṛae na.’”

13 Iakube i rait hono roila ar tan zotota asil er maz taki ḳotoḳan loia tan bai Ishor lagi eḳ ufohar toiar ḳorla. 14 Ita oilo dui-sho sagi, kuṛiṭa sagol, dui-sho meṛi, kuṛiṭa meṛa, 15 tishgu baichcha-ala dudor uṭ, dui kuṛi gai, doshgu bisal, ek kuṛi gadi ar doshgu gada, 16 bade tain eḳ eḳ gulamor ato eḳ eḳ fal shomzai dia ḳoila, “Tumra amar age oia zao ar eḳ fal taki aroḳ falor maze faḳ rakio.” 17 Foela dolor gulamre tain hikai dila, “Amar bai Ishor loge deḳa oar bade zebla zikaiba, ‘Ḳoi zaitae ba? Tumi ḳar manush? Tumar homḳor foshuin ḳar?’ 18 Tumi zuaf dio, ‘Ita afnar gulam Iakubor. Tain amar munib Ishor lagi, ita ufohar faṭaisoin. Ar tain amrar ḳore oia aira.’ ” 19 Ou laḳan tain dui nombor, tin nombor dolor gulam oḳolre-o hikai dila zen, “Ishor loge deḳa oile tumra-o oula ḳoio. 20 Ar heshe ḳoio, afnar gulam Iakub-o amrar ḳore oia aira.” Iakube mono ḳorla, “Age ufohar oḳol faṭaia tane ṭanḍa ḳormu, bade tan loge deḳa-shakkat kormu, te tain amare maea ḳorilita faroin.” 21 Tan age oia ufohar oḳol gelogi, oile tain rait tan ḍerat roila.

22 Heshe rait uṭia tan duio bibin, duio bandi ar egarogu fuare loia faoe aṭia, Zabbuk ḳalor hofaro toia aila. 23 Tain erare ḳal far ḳoraia tan hoḳol mal-samana-o hono faṭai dila. 24 Ar tain eḳla ono roila, teu gaibi eḳzon manush aia tan loge raitbor kusta-kusti ḳorla. 25 Oile tain Iakubre ḳabu ḳorta na farae en urator zuṛat marla ar Iakubor urator aṛ zaga tone ḍuli gelo. 26 Heshe hi manshe ḳoila, “Fozor oizar, oḳon tumi amare saṛi deo.” Iakube ḳoila, “Afne amare dua na ḳorle saṛtam nae.” 27 Hi manshe zikaila, “Tumar nam kita?” Tain ḳoila, “Iakub.” 28 Ou hein ḳoila, “Tumi Alla ar manshor loge laṛai ḳoria zitso ḳori, tumar nam ar Iakub roito nae, tumar nam oilo Israil [mani, Allar loge kusti ḳorra].” 29 Iakube tanre ḳoila, “Afnar namḳan kita ḳoukka.” Tain ḳoila, “Tumi kitar lagi amar nam zikairae?” Heshe tain Iakubre dua ḳorla. 30 Ou Iakube i zagar nam raḳla Ponuel [mani, Allar surot]. Tain ḳoila, “Ami Alla Pakre mukamuki dekia-o zinda roisi.” 31 Ar Iakube Ponuel faronir bade shuruz uṭigelo. Tan urator mairor lagi lengṛaita lagla. 32 Erlagi Boni Israile oḳono ranor zuṛar gust kain na, ḳaron tain urator zuṛar rogor maze Iakubre marsla.