Bibi Tamaror loge Ehudar ḳobisi ḳam
38
1 Ehudae tar baiaintore toia Odullom gaur Hira namor eḳ manshor loge roat gelo. 2 Hono roia Shua namor eḳ Kenani manshor fuṛir loge deḳa oilo, dekia he ou fuṛire bia ḳorlo. 3 Biar bade hou beṭir goro eḳ fua oilo, Ehudae tar nam raḳlo Eir. 4 Hirbar beṭir goro aroḳ fua oile, maʼe tar nam raḳlo Onon. 5 Heshe ou beṭir aroḳ fua oile, tar nam raḳlo Shela. I shomoe tara Koshib gaut roita. 6 Ar Ehudae tar boṛo fua Eiror loge Tamar namor eḳ fuṛire bia dilo. 7 Oile tar i fua Mabudor nozoro kub ḳobis asil gotike, Mabude tare marilaila. 8 Ou Ehudae Ononre ḳoilo, “Tumar babire bia ḳorilao. Tair deor oae tumar zeta ḳora zorur ase, ita adae ḳoro ar nizor bair oarish foeda ḳoro.” 9 Onone zanto, i oarish tar nizor oito nae, ar tar bair oarish raḳte tar kial asil na gotike, tair loge mila-mishar shomoe tar biz baire maṭit falai dito. 10 Mabude tar i ḳame naraz oila, tain Eirre-o marilaila. 11 Ou Ehudae tar fuar bou Tamarre ḳoilo, “Amar fua Shela zotodin boṛo na oe, otodin tumar bafor baṛit gia ṛaṛi oia-u ro.” Ehudae ḍorailo, Shela-o tar baiaintor laḳan morizibo. Ar Tamar bafor baṛit gelogi.12 Bakka ḳoedin bade Ehudar bou, Shuar fuṛi morigelo, teu ḳanda-ḳaṭi ḳorar bade Ehudae shanti oia Odullom gaur tar dust Hirar loge Timna gaut, tar meṛar falor ruma ḳaṭra manshor gese roana dilo. 13 Ar Tamarre gia ḳeu ḳobor dilo “Tumar houre tan meṛar ruma ḳaṭar lagi Timnat zaira.” 14 Tamare deḳlo, Shela boṛo oileo houre Shelar loge tair bia dira na, ou tai ṛaṛir ḳafoṛ bodlaia hazi-faṛi muko gumṭa dia, Aenaimor fotor muko gia boilo. Aenaim asil Timnat zaoar foto. 15 Ar tai muk lukaia raḳae, Ehudae mono ḳorlo igu silan beṭi. 16 Teu Ehudae fuar boure na sinae, fotor daro Tamaror gese gia ḳoilo, “Ao, tumar loge mila-misha ḳori.” Tamare ḳoilo, “Te amare kita dibae?” 17 He ḳoilo, “Amar fal tone sagolor baichcha egu faṭai dimu.” Tamare ḳoilo, “Iṭa faṭanir age amar gese kunta zimma toia zaukka.” 18 Ehudae ḳoilo, “Kita toitam?” Tai ḳoilo, “Afnar ou fita-ala sil ar afnar ator laṭi toia zaukka.” Teu Ehudae oguin zimma toia tair loge mila-misha ḳorlo ar Tamaror feṭo hurutta ailo. 19 Bade Tamar uṭia gelogi ar hi ḳafoṛ bodlaia hirbar ṛaṛir ḳafoṛ findilo.
20 Heshe ou beṭir ges taki zimmar mal firot nibar lagi, tar Odullomor dustre dia sagolor baichcha egu faṭailo. He aia taire tukaia failo na. 21 Ou he honor manshore zikailo, “Aenaimor fotor daro eḳ shebok beṭi asil, ogu ḳoi?” Tara ḳoila, “Ino to ila kunu beṭi nae.” 22 Teu he Ehudar gese gia ḳoilo, “Ami gia taire tukaia failam na. Honor mansheo ḳoila, ino to ila kunu beṭi aise na.” 23 Ehudae ḳoilo, “Te ita ar tair gese-u taḳouk. Naile amra shorminda oimu. Sagolor baichcha to faṭailam, ta-o tumi ere tukaia failae na.”
24 Onuman tin mash bade Ehudae hunlo, tar fuar bou Tamare zina ḳorse, erlagi tair hurutta oita. Ou Ehudae ḳoilo, “Ogure bare nia aguindi zalailao.” 25 Tamarre zebla bare nira, ou shomoe tair hourre ḳobor dilo zen, “Zar hurutta amar feṭo ase, ou mal-samana oḳol tar. Te deḳoukka, ou fita-ala sil ar laṭigu ḳar sinoin ni?” 26 Ehudae ita dekia ḳoilo, “Tai to ama taki bout boṛo forezgar. Amar fua Shelar loge taire bia ḳoraisi na.” Erbade Ehudae ar kunudin-o Tamaror gese hutise na.
27 Hurutta oibar bala deḳoin, Tamaror feṭo zuṛor hurutta. 28 Foela egue tar at bar ḳorlo ar dai beṭie lal shuta eḳsa tar ato bandia ḳoilo, “Igu foela foeda oilo.” 29 Oile he at ṭan dia bitre nilogi, teu tar bai foela baroilo ar dai beṭie ḳoilo, “Tumi kila fak koria baroilae?” Erlagi er nam oilo Firuz [mani, fak kora]. 30 Bade tar bai lal shuta ato banda loia baroilo, tar nam raḳla Zarah.