3 “Tumra to nizor souke deḳso, age Mabude Baal-Piyuror befare kita ḳorsoin. Tumrar mazor zoto zone Piyur elaḳar baal devtar fuza ḳorsil, Alla Mabude tumrar samne ita hokkolṭire binash ḳorsoin. 4 Oile tumra zera dile-zane Alla Mabudor ashik aslae, tumra hoḳolu oḳono zinda roiso.

5 “Oḳon huno, amar Mabud Allae amare zelaḳan hukum-ahkam disla, ami tumrare ṭik ou hukum-ahkam ar niom-ḳanun hikaisi. Zate tumra oḳon ze desh doḳol ḳorat zairae, hou desho ita ḳamo lagao. 6 Erlagi tumra kub hushiar oia ita manio, ar ḳamo lagaio. Teu bad-baki tamam zatir gese-u ita tumrar aḳol-buddi hishabe zair oibo. Ou hukum-ahkamor ḳota hunle tara ḳoiba, hasau era kub boṛo zati ar aḳol-buddi ala zati. 7 Ar amrar Mabud Alla zela amrar loge loge roin, tanre ḍaḳ zela daro fai, ou duniar bukut dusra kunu boṛo zati asoin ni, zetar devta ola loge loge roin? 8 Ba ami oḳon ze shoriotor ḳota ḳoiram, ita dusra kunu boṛo zatir ase ni? Ila niom-ḳanun ar nikut hukum-ahkam tarar ase ni?

9 “Oile tumra zotodin basia roibae, otodin nizor befare kub hushiar roio, nizor dilre shabdane rakio, arnae nizor sokur deḳa goṭona oḳol faurilibae, ita tumrar dil taki kuailibae. Ar ou hukum-ahkam tumrar fua-fuṛinre hikao, tarao ola tarar aoladre hikaiba. 10 Ar tumra hou dinor goṭona mono ḳoro, ze din tumra Tur faṛo afon Mabud Allar samne azir oislae. Zebla tain amare ḳoisla, amar kalam hunar lagi tumi hokkol manshore dola ḳoria amar samne ano, teu tara hikba, i zogoto tara zotodin zinda roiba, otodin amare ḍoraia roita, ar tarar huruttainreo ola solar talim dita. 11 Ou shomoe tumra ḳandat gia ou faṛor lamat ubaislae, ubaia deḳlae, asta faṛo dau dau ḳori nuror aguin zoler, aguine gia asman soilise, ar goin gono megor ḳalnie andair asil. 12 Hou nuror agunir bitre taki, Mabude tumrare tan kalam hunaila. Tumra tan mukor aoaz hunlae, oile tan kunu surot-aḳar deḳaisoin na, ḳali tan golar aoaz huncho. 13 Tain nize tumrare tan loge milonor usillar Allai apush-chuktir ḳas doshṭa hukum-ahkam dila, ar ḳoila oguin mania solar lagi. Tan kudroti ate dui ṭukra fattoror ufre ita leḳiao dila. 14 Hou shomoe Mabude amare hukum dila, ami tumrare tan shoriotor hukum-ahkam hikaitam, zate Zordan gangor hofaro tumra ze desh doḳolo zairae, hono gia harle ota mania solo.

15 “Mabude zebla nuror agunir maz taki Tur faṛo tumrar loge batchit ḳorsla, hou din to tumra tan kunu surot-aḳar deḳso na. Erlagi tumra nizor befare kub hushiar roio 16 zate kunu murti na banao, be-foti bonia fuza ḳorar kiale kunu beṭa ba beṭir surote murti banaio na. 17 Maṭir ufre solra kunu zib-zanuaror surote, asmano uṛra kunu fakir surote, 18 buk sesṛaia solra kunu zandaror surote, ba fanit roura kunu zandaror surote murti banaio na. 19 Asmanedi saia hari sand, shuruz, tera oḳol dekia ou namor deb-debi ba firistar fuza ḳorio na, erar ḳezmoto lagio na. Itare to tumrar Mabud Allae asmanor tolor hoḳol zatir lagi dan ḳorsoin. 20 Mono rakio, Mabude tumrare fosond ḳorsoin lua golanir gorom agunir gato taki, tain Mishor desh taki tumrare bar ḳori anchoin, zate tumra tan afon proza o, ar oḳon to hasau tan proza oiso.

21 “O Boni Israil, tumrar ḳarone Mabude amar ufreo gusa ḳorsoin. Tain ḳosom ḳaia ḳoisoin, amare Zordan gangor hofaro zaite dita nae, tumrar Mabud Allae tumrare ze deshor malikana dira, ou aramor desho amar zaoa nished. 22 Amar mout ono-u oibo. Zordan gang faronir hukum nai. Oile tumra gang far oia hou aramor desh doḳol ḳorat zairae. 23 Te tumra nizor befare hushiar roio, tumrar Mabud Allae tumrar loge ze apush-chukti ḳaim ḳorsoin, ita faurio na. Tumrar Mabud Allar nished omainno ḳoria kunu zinishor murti banaio na. 24 Mono rakio, tumrar Mabud Alla to moha dongshor agunir laḳan, tain tan nizor faona ebadot sainu sain.”

25 Hozrot Musae tarare eoḳan ḳoila, “Hou aramor desho gia hari, tumra fua-fuṛin, nati-futir zonom dia bout din boshot ḳorar badeo zudi ku-fote zaogi, ar kunu zinishor surote murti banao, tumrar Mabud Allae zetare ginna ḳoroin, tumra ota ḳoro, 26 te ami oḳon asman-zomin shakki rakia tumrar birudde ḳoiar, Zordan gang far oia ze desh doḳol ḳorat zairae, hino kub zoldi tumrar nam miṭizibo. Beshi din ṭiktae fartae nae, nichchit binash oibae. 27 Mabude tumrare nanan zatir maze sitrai diba, tain ḳedai dia zeḳano faṭaiba, hono tumrar kub ḳom manush zinda roiba. 28 Ou halote tumra manush-ate banail murtir fuza ḳorbae, zetae souke deḳe na, ḳane hune na, ḳaito fare na, kunuzat gerano hungito fare na, laḳṛir ar fattoror ota murtir fuza ḳorbae. 29 Ta-o hono roia zudi tumra nizor Mabud Allar tallash ḳoro, te tain tumrare didar diba. Ḳota oilo, dile-zane ḳator oia tane ḍaḳite oibo. 30 Hesh-mesh tumra mosiboto foṛia hirbar touba ḳoria, tumrar Mabud Allar nam loibae, ar tan kushi mafik solbae. 31 Mono rakio, tumrar Mabud Alla Rohmanur Rohim, tain tumrare falaita nae ba binash ḳorta nae. Ar tain ḳosom ḳaia tumrar moe-murobbir loge ze oada ar chukti ḳorsoin, itao faurita nae.”

32 Hozrot Musae tarare eoḳan ḳoira, “Alla Pake zomino manush foeda ḳorar bad taki oḳon forzonto, tumrar agor hokkol zomanar itihash tukao, asta asman-zominor eḳ mata taki aroḳ mata tukaia deḳo, Boni Israilor ufre zoto azob goṭona goṭise, ita laḳan dusra kunu goṭona goṭse ni? Ba ila kunta kunudin huna gese ni? 33 Ar nuror aguin taki Alla Pakor buli hunar bade, ḳali tumra saṛa dusra kunu zati zinda roise ni? 34 Tumra tallash ḳori deḳo, tumrar Mabud Allae tumrar sokur samne Mishor desho tumrar lagi zotota ḳorsoin, asta zogotor kunu deb-debie ila ḳorto farse ni? Ila forikka loa, kudroti nishana deḳani, laṛai-zuddo ḳora, mozbut ator bol deḳani, boṛo boṛo taijjubi lila-ḳela ar ḍor-ḳof deḳaia, zekunu zatire oinno zatir bitre taki bar ḳori ania nizor proza banaito farse ni?

35 “Te tumra zate furafur buzo, ou Allau oila Mabud, tain saṛa ar kunu Mabud nai, oḳan buzanir lagiu tumrare otota deḳani oisil. 36 Tumrare hedaeot ḳorar kiale tain behestor arosh taki tan nizor buli hunaila, ar zominor ufre deḳaila nuror agunir kunḍoli. Ou agunir maz taki bar oilo Allai buli tumra huncho. 37 Tain tumrar moe-murobbi oḳolre mohobbot ḳorta, erlagi erar moutor bade tarar aolad oḳolreo fosond ḳorsoin. Ar tain shoeong azir oia tan moha kudroti ḳemota ḳaṭaia tumrare Mishor desh taki bar ḳori anchoin. 38 Tan kial asil, tumatan taki boṛo ar boloban zati oḳolre tumrar samnor taki ḳedaia hari, tarar desho nia hou hoḳol deshor malikana tumrare dita. Oḳon deḳrae ni, tain to ita ḳorsoin.

39 “Te oḳonkur ou talim mono rakio, dilor maze gatia toio, huno, ḳali ou Allau ufre asman ar tole zominor malik, tain saṛa dusra kunu Mabud nai. 40 Erlagi ami oḳon ze shoriot ar hukum-ahkam zanairam, tumra ita mania solio, teu tumra ar tumrar aolad oḳolor balai oibo. Tumrar Mabud Allae siroḳalor lagi tumrare ze desh dan ḳorra, ou desho tumrar haeati lamba oibo.”

41 Bade Musa nobie Zordan gangor fub-faror tinḳan ṭaun algaila, 42 zate kunu kuni manush bagia gia ou ṭauno zan basaito fare. Ze manshe kun ḳorar kunu sinta ba dushmoni bab asil na, ḳali aḳta onichchae ḳeurore marilae, he bagia bonobashi bonia ono roito farbo. 43 Tino ṭaun oilo, Ruben ḳandanor lagi morubumir kinarar faṛia tʼol zagar Basir namor ṭaun. Sadu ḳandanor lagi Giliod elaḳar Ramut ṭaun. Manosha ḳandanor lagi Bashon deshor Gulan ṭaun.

44 Musa nobie Boni Israilor samne shoriotor ou hukum boean ḳorla, 45 Mishor desh taki bar oia aoar bade, hoḳol hushiarir ḳota, shoriotor niom-ḳanun ar hukum-ahkam Boni Israilre zanaila. 46 Tain Zordan gangor fubor faro, Hishbon elaḳar Amuri zatir raza Sihunor deshor Baet-Piuror samnor tol zagat ita ḳoila. Mishor taki bar oia aia harle Musa nobie ar Boni Israile zuddo ḳori ou bashsha Sihunre araisla. 47 Tara bashsha Sihunor desh ar Bashonor bashsha Uzor desh doḳol ḳorsla. Amuri zatir ou duio bashshar bashshai asil Zordan gangor fubor faro. 48 Ornon ḳalor faror Aroar ṭaun taki Sirion faṛ, mani Hormun faṛ forzonto ou duio razar shimana asil. 49 Er bitre ase Zordan gangor fubor faror asta elaḳa. Ikṭa Fisga faṛor ṭillar toledi Araba shagoror kinara forzonto gese.