2 Musa nobie hoḳol Boni Israilre anaia ḳoila, “Alla Mabude Mishoror Feraunor loge, tar uzir-naziror loge, ar Mishoror hokkoltar loge zeta ḳorsila, ita to tumra deḳso. 3 Boṛo boṛo azob goṭonat zoyi oa, Mabudor nanan lila-ḳela, ar kudroti ḳam to tumra nizor souke deḳso. 4 Oile itar mormo buzar moto mon, deḳar moto souk, hunar moto ḳan, Mabude oḳono tumrare disoin na. 5 Ami sallish bosor dori tumrare ou morubumir maze sofor ḳoraisi, ermaze tumrar finnor ḳafoṛ nosṭo oise na, faor zutao siṛse na. 6 Kunu bat-ruṭio ḳaiso na, anguror shorbot ba kunuzat shorab tumra ḳaitae faiso na. Ita hoḳolta to tainu ḳorsoin, zate tumra buzo, tainu tumrar Mabud Alla.

7 “Tumra hou zagat zaoar bade, Hishbonor bashsha Sihun ar Bashonor bashsha Uze amrar loge laṛai ḳorat aisla, aile amra tarare arai dilam. 8 Tarar deshre doḳolo ania amra asta Ruben ḳandan, asta Sadu ḳandan ar Manosha ḳandanor ordeḳ manshore baṭia dilam. 9 Erlagi tumra ou apush-chuktir hoḳol hukum-ahkam kub kiali oia manio, manle hoḳol ḳam-ḳazo tumrar faeda oibo.

10 “Tumrar Mabud Allar samne aiz tumra hoḳol aia azir oiso, tumrar ḳandanor amir oḳol, moe-murobbi oḳol, ofisar oḳol, ar Boni Israilor hoḳol beṭain. 11 Tumrar loge oia tumrar bou, fua-fuṛin, ar bin zatir hou manush oḳol zetae tumrar daru faṛoin ar fani boia anoin tarao aisoin. 12 Tumra hoḳol ono aia azir oiso, tumrar Mabud Allae ḳosom ḳaia ze apush-chukti aiz boail ḳorra, ou apush-chuktit tumra nize nize aiz hamaira. 13 Ar Mabude agor amolor tumrar moe-murobbi Ibrahim, Isʼhak, ar Iakub nobir loge ḳosom ḳaia ze oada ḳorsla, hou oada mafik oḳon taki tain tumrar Alla, ar tumra tan ḳas proza bonia roite razi aso, oḳan mana aiso. 14 Te ami oḳon ze apush-chukti ar oada boail ḳorram, ita ḳali tumrar loge nae, 15 borong tumra zoto zon oḳon amrar Mabud Allar samne azir aso, tumrar loge, ar tumrar zeta aolador zonom oḳono oise na, tarar logeo ou apush-chukti zari roibo.

16 “Tumra nizeu to zano, Mishor desho amra kila din ḳaṭaisi, bade ḳoto desh ar ḳoto fot-gaṭ far oia ono aia azisi. 17 Tumra to ota deshor manshore shuna, rufa, fattor ar laḳṛidi banail zogoinno deb-debir murti oḳolor fuza ḳorte deḳso. 18 Tumra kuz-ḳobor loia deḳo, tumrar maze zanu ou laḳan kunu beṭa ba beṭi, kunu bongsho ba ḳandan na taḳe, zetae tumrar Mabud Allare bad dia hota deb-debir fuza ḳorar lagi kiali oizae. Zudi ila kunugu taḳe, te ogu oilo ola bishakto gasor zoṛ, ze zoṛor ḍem ou bishakto titta gas bonbo. 19 Zeta manshe ou ḳosom ḳaoar ḳota huniao zudi tar nizore kub ḳofali mono ḳore, ar beforua oia solleo kunu shomoshsha nai ila mono ḳore, te tumrar bala-bura duioṭar ufre ota manshe shorbonash ḍakia anbo. 20 Mabude kunumonte-u erare mafi dita nae, erar ufre tan gusar aguin dau dau ḳori zolia uṭbo. Ar ou kitabor maze zoto laḳan lannotor ḳota leḳa ase, ita hokkolta erar ufre ḍaliba, Mabude asta dunia taki tarar nam miṭailiba. 21 Tain duk-mosiboto falanir lagi hokkol Boni Israil taki tarare basia alog ḳorba, ou Tourat kitabor hukum-ahkamor maze zoto laḳan lannotor ḳota leḳa ase, ita ota manshor ufre saṛiba.

22 “Ar Mabude ou deshor ufre zoto nomunar lannoti gozob ar bemar-azar ḍaliba, ita dekia tumrar aolad oḳole ar bin desh taki aoa musafir oḳole tumrar i dosha dekia ḳaron zikaiba. 23 Nun ar gondoḳe asta deshor maṭi zolizibo, i maṭit kunta folito nae, kunta lagaile oito nae, maṭir ufre kunuzator gash, lota-fata zonmito nae. Ikan hou lannoti desh Sadum, Amura, Odma ar Soboyimor laḳan bonizibo, Mabudor gusar aguin zolia uṭae tain to itare binash ḳorilisla. 24 Ota dekia hoḳol zatir manshe zikaiba, Mabude i deshor halot ḳene ila ḳorla? Tain ḳene oto boṛo gusa ḳorla?

25 “Teu manshe zuaf diba, ou zatir manshe tarar moe-murobbir Mabud Allar boail ḳora hou apush-chukti bad dilaise, Mishor desh taki tarare bar ḳori anar bade ze chukti boail ḳora oisil. 26 Tara hou Mabudre bad dia tarar gese noea, ota deb-debir fuzat lagse, zeta deb-debir ḳota Mabude ḳoisoin na, otar gese mata nuaia soizda ḳorat lagse. 27 Erlagi ou deshor ufre Mabudor gusar aguin zolia uṭse, tain ou kitabo leḳa hoḳol nomunar lannoti gozob i desho nazil ḳorsoin. 28 Gusar aguine zolia, tarar ufre bezuita gozob ḍalia tarare ou desh taki zoṛe-foṛe tulia tarare bin desho nia asaṛ mari falaisoin, ar oḳono tara hono asoin.

29 “Batuni hoḳolta-u to amrar Mabud Allar ato, oile zair ḳora hoḳolta siroḳalor lagi amra ar amrar aolad oḳolor ato, zate amra ou shoriotor hoḳol hukum-ahkam amol ḳortam fari.”