Hozrot Lut (a:) bondi oila
14
1 Babil deshor bashsha Omrafel, Illashoror bashsha Ariaḳ, Ilamor bashsha Ḳodor-laumor ar Goimor bashsha Tidiol, era sairozone eḳ oia 2 Sadumor bashsha Bira, Amurar bashsha Birsha, Odmar bashsha Shinab, Soboimor bashsha Shimebor ar Bilar ba Shuaror bashshar birudde zuddo ḳorat gela. 3 Ou faszon bashshae tarar sifai oḳolre ekḳano ḳoria Siddimor tol zagat loia gela. I zagare Luna Shagor ḳoin. 4 Hi bashsha oḳole baro boros bashsha Ḳodor-laumoror gulami ḳoria tero bosoror shomoe bidruho ḳorla. 5 Er bador boros bashsha Ḳodor-laumor ar tan logor bashsha oḳle gia Ostorut-Ḳornoimo Rofayi oḳolre, Homo gia Zuzi oḳolre, ar Shabi-Kiriataimo gia Eimi oḳolre araila. 6 Bade morubumir ḳasar El-Faron forzonto Seir faṛor Hurio oḳolreo araila. 7 Heshe ou bashsha oḳole guria gia Oin-Mishfoṭo ba Ḳadesh gela. Tara Amaleki oḳolor asta desh doḳol ḳorla ar Hazazon-Tamar ṭauno ze Amuri oḳol asil tarareo doḳol ḳorla. 8 Bade Sadum, Amura, Odma, Soboim ar Bilar ba Shuaror bashsha oḳole 9 Ilamor bashsha Ḳodor-laumor, Goimor bashsha Tidiol, Babilor bashsha Omrafel ar Illashoror bashsha Ariaḳor loge zuddo ḳorar lagi Siddim namor tol zagat tarar sifai oḳol hazaila. Sair bashshar birudde fas bashshae lagla. 10 Siddimor tol zagat tartelor bout gat-gaṛa asil. Sadum ar Amurar bashshain zebla bagia zaira, i shomoe tarar logor ḳeu ḳeu ou tartelor gato foṛi gela, ar baki oḳole bagia faṛo gela. 11 Teu tarar dushmon oḳole Sadum-Amurar hoḳol don-samana ar ḳani-danir hoḳolta luṭia loia gelogi. 12 Ar tara Abramor batiza Lutor hoḳol mal-samana shudda hou Lutreu doria loia gelagi, ḳaron eineu Sadum ṭauno roita.13 Teu eḳzone bagia aia Ibrani Abramre ou ḳobor dilo. Abram i shomoe Amuri Momrir elon bonor ḳasat taḳta. I Momri asla Ashkul ar Aneror bai, Abramor loge erar zuddor shaijjor chukti asil. 14 Tan batizare doria loia gesoingi hunia Abrame laṛai zanra nizor tin-sho aṭaro zon gulamre loia Dan ṭaun forzonto dushmonor ḳore ḳore gela. Ou gulam hoḳol tan baṛit-u zonmisil. 15 Raitor bala dushmonor dolor lagal faia era hamla ḳoria herare arai dila, ar ḳedaite ḳedaite Damesk ṭaunor utore Hoba forzonto gela. 16 Luṭ ḳora hokkol zinish tain firaia anla, mal-samana shudda tan batiza Lutreo uddar ḳorla. Erloge hoḳol beṭintore ar hoḳol manshoreo uddar ḳori anla.
Bashsha Malki-Siddike dua dila
17 Ḳodor-laumor ar tar logor bashsha oḳolre araia Abram firia aoar shomoe Sadumor bashshae tan loge deḳa ḳorar lagi Shabi ba Bashsha namor tol zagat baroia aila. 18 Ar Shalemor bashsha Malki-Siddike Abramor lagi ruṭi ar anguror shorbot loia aila, tain oila Allatalar imam. 19 Tain Abramre dua ḳoria ḳoila, “Zein asman ar zomin foeda ḳorsoin, hou Allatala Abramre boroḳot dan ḳoroukka. 20 Afnar dushmon oḳolre zein afnar ato shofisoin, tan nam doinno ouk.” Ou Abrame tan hokkoltar doshbaṭor eḳbaṭ Malki-Siddikre dilaila. 21 Ar Sadumor bashshae Abramre ḳoila, “Afne mal-samana hoḳolta raki deukka, ḳali manush guin amare firot dilain.” 22 Abrame Sadumor bashshare ḳoila, “Zein asman-zomin foeda ḳorsoin hou Mabud Allatalar name ami at tulia ḳosom ḳorsi, 23 afnar kunu zinish-u, eḳsa shuta-u ba faor zutar eḳsa fitao ami nitam nae. Arnae bade afne ḳoiba, amar done-u Abram doni oise. 24 Amar manshe zeta ḳailisoin ita saṛa ami ar kichchu nitam nae. Ḳali Aner, Ashkul ar Momri zera amar loge gesla, tarar faona baṭ tara neukkagi.”