Abram taki noea nam Ibrahim
17
1 Abramor nirannobboi borosor shomoe Mabude hirbar tanre didar ḳoila, “Ami shorbo-shoktiman Alla. Tumi amar deoa foto takia kamil o. 2 Ami tumar-amar maze chukti ḳaim ḳormu ar tumar oarish kub beshi baṛai dimu.” 3 Teu Abram soizdat foṛla, ar Allae tan loge batchit kori ḳoila, 4 “Tumar loge ami oada ḳaim ḳoriar, tumi bout zatir mul baf oibae. 5 Tumare ar Abram [mani, boṛo baf] ḳoia ḍaḳa oito nae, oḳon taki tumar nam oilo Ibrahim [mani, bout zatir baf], ami tumare bout zatir mul baf banailam. 6 Ami tumare bout folala ḳormu, ar tumar maz tone bout zati ar bashsha oḳol foeda ḳormu. 7 Ami tumar ar tumar oarishor for oarish oḳolor loge ze chukti ḳaim ḳormu, ikṭa hor-hamesha boail taḳbo, er zoriae ami tumar ar tumar oarishor for oarish oḳolor Alla oimu. 8 Ar ze Kenan desho tumi oḳon musafir oia taḳrae, i furaṭa-u ami tumare ar tumar oarish oḳolre hor-hameshakur doḳolor lagi dimu. Ami tarar Alla oimu.”Mosolmani ḳamor chukti
9 Allae Ibrahimre ḳoila, “Tumi amar ḳaim ḳora chukti manio, tumi ar tumar oarishor for oarish oḳoleo mania solio. 10 Tumrar loge ar tumrar oarishor loge amar oula chukti ḳaim oilo, tumrar hoḳol beṭaintor mosolmani ḳam ḳoraite oibo. 11 Tumra hoḳole nizor furush-ongor mukar samṛa ḳaṭbae. Oḳṭa-u tumrar ar amar maze boail ḳora chuktir nishana. 12 Oarishor for oarish doria tumrar hoḳol fuaintore zonmor aṭ dinor din mosolmani ḳoraibae. Zara tumar oarish nae, ḳali tumrar baṛit zonmise ba tumrar ḳorida gulam, tararo mosolmani ḳorani lagbo. 13 Tumrar goro zonmise ba ḳorida gulam oḳolre nichoe mosolmani ḳoraibae. Tumrar shorilo zari ḳora amar i chukti hor-hameshakur chukti oibo. 14 Ze beṭae furush ongor mukar samṛa ḳaṭto nae, tare tar zatir maz taki fusia falail oibo. He to amar chuktir borḳelaf ḳorse.”
15 Allae Ibrahimre ḳoila, “Tumar bibire ar Sara ḳoia ḍakio na. En nam oibo Saera [mani, rani]. 16 Ami taire boroḳot nazil ḳormu, tair goro tumar eḳ fua dimu. Ar boroḳot nazil ḳoria bout zatir mul ma banaimu, ar bout mulluḳor bashsha oḳolo foeda oiba.” 17 Ou Ibrahime maṭit soizdat foṛi ashia mone mone ḳoila, “Hasa-u eḳ-sho bosoror buṛar hurutta oito ni! Ta-o nobboi bosoror buṛi Saerar feṭo?” 18 Tain Allare ḳoila, “Ah! Ismailgu zanu tumar rohomote basia taḳe.” 19 Ou Allae formaila, “Ṭik ase. Oile tumar bibi Saerar feṭo hasa-u tumar fua oibo, tumi tar nam raḳbae Isʼhak [mani, he ashe]. Tar loge amar chukti ḳaim ḳormu, tar oarishor loge ikṭa amar hor-hameshakur chukti oibo. 20 Ar Ismailor lagio tumar dua hunchi. Huno, ami tareo boroḳot nazil ḳormu ar tare folala ḳoria bout baṛai dimu. He barozon razar baf oibo ar tar mazedi ami biraṭ zati foeda ḳormu. 21 Samnor boros i sando Saerar goro tumar ze hurutta oibo, hou Isʼhakor loge ami amar chukti ḳaim ḳormu.” 22 Ibrahimor loge batchit shesh ḳoria Allae tan ges taki uṭia toshrif nilagi.
23 Allar hukum moto Ibrahime hou dinu Ismailre mosolmani ḳoraila. Erloge ḳorida gulam oḳol ar tan baṛit zonmise ila hoḳol gulamre, baṛir hokkol beṭaintore mosolmani ḳoraila. 24 Ibrahimor nizor mosolmani ḳam ḳoranir shomoe tan boeosh asil nirannobboi boros, 25 ar tan fua Ismailor boeosh tero. 26 Eḳ dine-u Ibrahim ar tan fua Ismailor mosolmani ḳorail oilo. 27 Hidin baṛir hoḳol beṭaintor, zara tan baṛit zonmisil ar zerare bidesh taki loia anchoin, ita hoḳolor-u mosolmani ḳam ekloge ḳorail oilo.