Sadum ṭaunor ufre Allar gozob
19
1 Bade hainjabala hou duizon firista Sadum ṭauno gela. I shomoe Lut ṭaunor mul geiṭor gese boat asla, erare dekia tain ubaila ar maṭit soizda ḳoria ḳoila, 2 “O amar malik oḳol, ami minoti ḳori ḳoiar, doya ḳori afnarar ou gulamor goro toshrif anilaukka ar at-fao doia raitḳan ḳaṭaukka. Biane hirbar roana oibane.” Era ḳoila, “Na, amra ou ṭaunor moedano rait kaṭaimu.” 3 Tain zebla kub minot-ḳajji ḳorra ou shomoe era tan baṛit hamaila. Bade Lute ruṭi banaia erar lagi ḳana-dana zuit korla, ar tara ḳaila. 4 Erar hutibar age-u Sadum ṭaunor hokkol zuan-buṛa beṭainte aia hi baṛire berilaila, 5 ar Lutre ḍakia ḳoila, “Aiz rait ze duizon manush tor ino aise, tara ḳoi? Otare bar ḳoria amrar gese an. Amra otar loge mouz ḳortam.” 6 Ou shomoe Lute dorzar bare gia tan ḳoror dorza bond ḳoria tarare ḳoila, 7 “Baiainre, ami minot koriar, tumra ila bod-ḳam ḳorio na. 8 Deḳo, amar duiṭa shoti fuṛi ase. Ami bar ḳoria tumrar gese loia aiar, tara kunu beṭaintor gese roisoin na, tumrar zeta mone sae ḳoro; ta-o, i manshor loge tumra kunta ḳorio na, era amar goro ashroe loisoin.” 9 Oile tara ḳoilo, “Za, za, fot taki hor!” Tara aro ḳoilo, “Oi beṭa, tui eḳla boitol oia aisos ar ḳali amrar ufre netagiri ḳorre. Oḳon erar saite tor loge aro beshi ḳobisi ḳormu.” Ḳoia-u tara Lutre ṭelia horaia dorza bangto sailo. 10 Ou shomoe hou duizone at baṛaia, Lutre goror bitre ṭania nia dorza bond ḳori dila. 11 Ar dorzar bare ubail huru-boṛo hoḳol aḳta-u anda oigelo, ar dorza tuḳaite tuḳaite heran oigelo.12 Bade hou duiozone Lutre zikaila, “Ino tumar ar ḳe ḳe ase? Tumar fua-fuṛi ar damandre loia in tone horia zaogi. 13 Ḳaron amra i zagare sarḳar ḳorilaiar. Inor manshor birudde Mabudor gese oula bezuita nalish oise zen, ikṭa binash ḳorar lagi tain amrare faṭaisoin.” 14 Ou Lute bare gia tan damand oḳolre ḳoila, “Ao, tumra i zaga saṛia baro ḳaron Mabude i ṭaunre binash ḳorar lagi tiar oiroisoin.” Oile tara mone ḳorlo, tain ita tamsha ḳorra.
15 Fotabala hou firistae Lutre tagda dia ḳoila, “Uṭo, zoldi ḳori tumar bou ar i duio fuṛire loia on tone zaogi. Naile ou gozobor maze foṛia binash oizibae.” 16 Lute zai-zairam oula ḳorra. Oile Mabudor maea tan ufre asil ḳori hou duiozone, tain ar tan bou ar tan duio fuṛintor ato dori ṭania ṭaunor bare loia aila. 17 Hoḳolre bar ḳoria anar bade tara ḳoila, “Baste saile bago, ḳoredi saio na, bagia faṛo zao, i tʼol zagar kunuḳano ubaio na arnae tumrao morbae.” 18 Ou Lute ḳoila, “O amar malik oḳol, ila ḳoroin na zen; 19 Deḳoukka, afnar i gulamre afne meherbani ḳorsoin, ar amar zan basaibar lagi afne amare moha doya deḳaisoin. Oile ami bagia faṛo zaitam fartam nae. Hoeto i bifod aia amare zata mari dorle, amio mormu. 20 Deḳoukka, bagia zaite to ou huru gauṭa ḳasat ase. Zan basaibar lagi amare ono faṭai deukka. Gauṭa huru-muru ase.” 21 Tain ḳoila, “Ṭiḳ ase, ami tumar i arzi manlam. Tumi ze gaur ḳota ḳoilae, iṭa ami dongsho ḳortam nae. 22 Zoldi ḳori hino zao. Tumi hono na fousani forzonto ami kunta ḳortam fariar na.” Lutor ḳotar lagi hou gaur nam oilo Shuar [mani, huru]. 23 Lute zebla Shuaro gia fousla i shomoe shuruz uṭigese.
24 Erbade-u Mabude asman taki Sadum ar Amurar ufre aguin ar gondoḳor gozob saṛila. 25 Tain hi ṭaun oḳol, hoḳol tʼol zaga, hokkol manush ar hi maṭir ufror hokkolta dongsho ḳorilaila. 26 Ermaze Lutor boue ḳoredi firia saoae, tain eḳṭa nunor sakka oigela.
27 Bador din Ibrahime biane uṭia hou zagat gela zeno agor din tain Mabudor gese ubaisla. 28 Tain tole Sadum, Amura ar hoḳol tʼol zagar bae saia deḳla, iṭ-baṭa taki zela duma baroe, ou laḳan hou elaḳa taki duma uṛer.
29 Ar Lute zeḳano boshot korta, hou tʼol zagar ṭaun oḳol dongsho ḳorar shomoe, Allae Ibrahimor ḳota mono ḳoria Lutre hinor gozobor maz taki horaia anla.
Muab ar Bin-Ommi zatir ḳobisi foeda
30 Shuar gaut roite ḍoraila ḳori, Lute tan duio fuṛire loia hin taki baroia faṛo aia, eḳ gator bitre roila. 31 Eḳdin tan boṛo fuṛie huru boinre ḳoilo, “Baba to murobbi oigesoin. Ar zogotor shomazor niom moto amrare bia ḳorar lagi ino kunu beṭaino nae. 32 Te ae, amra babare shorab ḳaoaia tan ḳasat roi. Teu babaredi amrar bongsho basaitam farmu.” 33 Ou tara duiozone raitor bala tanre shorab ḳaoaia ṭal banailo. Bade boṛo boin bafor gese hutito gelo, oile kun shomoe hutilo ar kun shomoe uṭilo, bafe kunta-u ṭer faila na. 34 Bador din boṛoguie hurugure ḳoilo, “Deḳ, ḳail rait ami babar gese hutislam. Ae, aiz raito tane oula shorab ḳaoaia ṭal banai, bade tuio gia tan gese hutis. Te babaredi amrar bongsho basaitam farmu.” 35 Ou laḳan tara hou raito tarar bafore shorab ḳaoaia ṭal banailo, ar huru fuṛi tair bafor gese hutilo. Tai kun shomoe hutilo ar kun shomoe uṭilo, ita tain kunta-u ṭer faila na. 36 Ou nomunae Lutor duio fuṛir feṭo bafredi hurutta ailo. 37 Bade boṛo fuṛir goro fua oile, er nam raḳlo Muab [mani, babar ges tone]. Ou Muabu oḳonkur Muabi oḳolor mul baf. 38 Ar huru fuṛiro eḳ fua oilo, er nam raḳlo Bin-Ommi [mani, amar mulluḳor fua]. He oḳonkur boni-Ammanor mul baf.