1 Bibi Saera eḳ-sho shataish boros basila; Allae tane otodinor haeati disla. 2 Bade Kenan deshor Kiriot-Orbo mani Hebrono inteḳal ḳorla. Ar Ibrahime tan lagi bout kanda-ḳaṭi ar ahazari ḳorla. 3 Heshe tan murda bibir ges tone horia gia hou deshor Hiṭṭi oḳolre ḳoila, 4 “Ami to bideshi musafir oia afnarar ono roiar. Meherbani ḳori ḳobrostan banaibar lagi amare tuṛa zomi deukka, ami amar samne tone amar murdare dafon ḳori.” 5 Hiṭṭi oḳole tane ḳoila, 6 “Huzur, amrar ḳota hunoukka. Afne to amrar maze Allar mohobbotor buzurg. Amrar gurustanor maze zeno fosond oe, ono-u afnar murdare dafon ḳoroukka. Tanre dafon ḳorar lagi amrar ḳeu-u nizor banail ḳoebor saṛte omot korto nae.” 7 Ou Ibrahime ubaia hinor Hiṭṭi oḳolor samne mata nuaia ijjot kori ḳoila, 8 “Amar bibire ino dafon ḳorat zudi afnarar kunu omot na taḳe, te doea ḳori amar arziḳan hunoukka. Afnara amar oia Shuhoror fua Ifrunre ḳoukka, 9 tan zominor hesh matat Moḳfela ze guha ase, oḳanta zenu ḳobrostan bananir lagi tain fura dam loia amar gese besilain.” 10 Aro Hiṭṭi oḳolor loge i shomoe Ifruno hono boat asla. Ibrahimor mator zuafe hou Hiṭṭi oḳolor samne Ifrune ḳoila, 11 “Na, na, afne doea ḳori amar matḳan hunoukka. Ami hoḳolor samne-u i zomi ar guha afnare dilailam, afnar murdare dafon ḳorilain.” 12 Teu Ibrahime hirbar hinor hoḳolor samne mata nuaia, 13 hi deshor hokkolre hunaia Ifrunre ḳoila, “Hunoukka, zomiḳanor dam ami dilai. Afne-o zomiḳanor dam neukkagi, bade amar murdare ono dafon ḳormu.” 14 Ifrune tanre zuaf dila, 15 “Huzur, amar ḳota hunoukka, ou zomiḳanor dam oilogi sair-sho tola rufa, te afnar-amar lagi ita kunta-u nae. Afnar murdare ḳoebor dilaukka.” 16 Ou Ibrahime Ifrunor ḳota mania Hiṭṭi oḳolor samne tain, Ifrunor saoa dam mafik, faiḳari mafe sair-sho tola rufa tanre mafia dila.