Hozrot Iakub (a:) hirbar Betelo
35
1 Erbade Alla Pake Iakubre ḳoila, “Tumi hirbar Betelo zaogi. Tumar bai Ishor ges tone bagibar bala, zein tumare doroshon disla, hou Alla Pakor name tumi hono ekkan kurbani ḳana banao.” 2 Teu Iakube tan afon manshore ar logor hoḳolre ḳoila, “Tumrar gese devtar zeta murtin ase, ita hokkolṭi falao; ar hoḳole pak-saf oia, saf-sutra lebas findo. 3 Ar solo, amra Betelo zaitamgi. Hono ami Allar name ekkan kurbani ḳana banaimu, zein mosibotor dino amar dua ḳobul ḳorsla, ar amar soforor logi oisla.” 4 Teu tarar zoto laḳan devtar murtin ar ḳanor zeorat asil, hoḳolta Iakubor ato dilaila. Tain ita nia Shikim ṭaunor ḳandat elon gasor tole gaṛilaila.5 Bade tara hon tone roana oila ar Allae sairobae, hoḳol gau-geramo eḳ ḍor foeda ḳorla, teu hinor kunu manshe Iakubor fuaintore ḳedanit gelo na. 6 Heshe Iakub ar tan logor hoḳole Kenan deshor Luz namor zaga, mani Betelo aia fousla. 7 Ono tain ek kurbani ḳana banaia, ou zagar nam dila El-Betel [mani, Betelor Alla], ḳaron bair ges taki bagibar bala Allae ono-u tanre didar-doroshon disla. 8 Ar Rebekar daima Dobura mara gela. Tane Betelor lamat eḳ elon gasor tole maṭi dila, teu i zagar nam oilo Elon-Bakut [mani, ḳandonor gas].
9 Iakube Foddon-Iram taki aoar bade, Allae hirbar tanre didar dia boroḳot nazil ḳorla. 10 Allae ḳoila, “Tumar nam to Iakub; oile manshe tumare ar Iakub ḳoia ḍakta nae, tumare Israil ḳoiba.” Teu tan nam oilo Israil. 11 Allae tanre ḳoila, “Ami-u shorbo-shoktiman Alla. Tumi folala oia baṛo. Tuma tone eḳ zati foeda oibo, iṭa oibo bout gusṭiala zati, ar tumar ḳandano bashsha oḳol foeda oiba. 12 Ami Ibrahim ar Isʼhakre ze desh dan ḳorsi, hou desh oḳon tumare ar tumar bador oarishre dimu.” 13 Allae hono Iakubor loge batchit koria harle asmano toshrif nilagi. 14 Iakube hou batchitor zagat fattoror ek kuṭi gaṛia, er ufre tain Allar name shorbot-fanir sodga ḍalila, heshe tel-o ḍalila. 15 Allae zeḳano tanre didar disla, Iakube i zagar nam raḳsla Betel.
16 Bade Iakub ar tan logor hoḳole Betel taki roana ḳoria Ifrato fousar bakka age, Rahelar hurutta oar bishe dorlo, tan kub toklif oilo. 17 Hurutta oar bish aro baṛlo, teu dai beṭie ḳoilo, “Ḍoraio na go, i bar-o tumar goro fua oibo.” 18 Oile Rahela mara gela. Morar bela tain fuar nam raḳla Bin-Oni [mani, amar toklifor fua] oile bafe tar nam raḳla Bin-Iamin [mani, amar bolor fua]. 19 Rahelar moutor bade Ifrat, mani Betelham, zaoar fotor ḳandat tanre maṭi deoa oilo. 20 Maṭi dia harle Iakube tan ḳoeboror ufre eḳ fattoror kuṭi gaṛla, i kuṭi aizo ono ase. 21 On tone Israile hirbar roana dila, ar Edor minar falaia aia tan tambu gaṛila.
22 Israil zebla hono roira, ou faḳo Rubene gia tar bafor bador biar bou Bilhar loge zina ḳorlo ar ita Israilor ḳano gelo.
23 Iakubor barozon fua asla, Lear torofa tan boṛo fua Ruben, bade Shimion, Lebi, Ehuda, Isaḳor ar Sobulon. 24 Rahelar torofa Iusuf ar Bin-Iamin. 25 Rahelar bandi Bilhar torofa, Dan ar Noftali. 26 Lear bandi Zilpar torofa, Sadu ar Ashir. Tan ou hurutta oḳol Foddon-Iramo oisla.
Hozrot Isʼhak (a:)-or inteḳal
27 Heshe Iakub Kiriot-Orbor, mani Hebronor ḳasat Momri namor zagat, tan baf Isʼhakor gese aila. Ou zagat Ibrahim ar Isʼhake-o boshot korta. 28 Isʼhakor boeosh eḳ-sho ashi boros oisil. 29 ar Isʼhak furafur buṛa oia, murobbi boeosho mara gia tan baf-dadar gese gia azila. Tan fua Ish ar Iakube tanre dafon ḳorla.