Allar hukum-ahkam manar lagi minoti
6
1 “Tumrare hikanir niote tumrar Mabud Allae amare ou hukum-ahkam, shoriot ar ain-kanun disoin, zate hou ze desh doḳol ḳorar niote tumra Zordan gang far oia zairae, hono gia hari tumra ita amol ḳoro. 2 Teu tumra, tumrar huruttain ar tarar aolad oḳole hara zindegi Alla Mabudre ḍoraia tan deoa niom ar hukum oḳol amol ḳorio. Ola ḳorle tumra bout din basia roibae. 3 O Boni Israil, tumra amar ḳota huno ar hushiar oia ita amol ḳoro, teu tumrar baf-dada oḳolor Mabud Allar oada mafik, hou dud ar mour banḍar ala desho tumrar balai oibo ar tumra bout baṛibae.4 “O Boni Israil, huno, Alla amrar Mabud, tainu eḳ. 5 Tumra forteḳe tumrar asta dil, asta zan ar hoḳol bol-shokti dia tumrar Mabud Allare mohobbot ḳorio. 6 Aiz ami tumrare ze hukum diar, ita tumrar dilo gatia rakio. 7 Tumra hoḳole tumrar huruttainre ita kial ḳori hikaio. Ar goro boia, fote-gaṭe solar shomoe, gumanir shomoe, gum taki uṭar badeo ota befare mata-mati ḳorio. 8 Mono raḳar nishana hishabe ita ato bandia rakio ar ḳofalor maze lagaio. 9 Tumrar duaror soukaṭo ar mul geiṭo lekia rakio.
10 “Tumrar baf-dada Ibrahim, Isʼhak ar Iakubor gese tumrar Mabud Allae ḳosom ḳaia ze desh deoar oada ḳorsoin, hou desh tain tumrare niba. Hino shundor shundor ar boṛo boṛo ṭaun oḳol ase, zeta tumra banaiso na, ḳali emneu faibae. 11 Ar mal-samanae bora hazail-faṛail gor-duar faibae, zeta tumra zugaiso na, fanir kua faibae zeta tumra kudiso na, anguror bagan ar zoetunor bagan faibae zeta tumra lagaiso na. 12 Oile tumra hushiar roio, ita hoḳolta faia hari maldar bonia tumrar hou Alla Mabudre faurio na, zein tumrare Mishor deshor gulami taki ḳalas ḳoria anchoin.
13 “Tumrar Mabud Allare ḍoraia solio, ḳali tan ebadot ḳorio, ar tan name ḳosom ḳaio. 14 Tumra ari-fori zatir deb-debir fuza ḳorio na. 15 Zano to, tumrar Mabud Alla zein tumrar loge asoin, tain nizor faona ebadot faita sainu sain. Erlagi hushiar roio, itar fuza ḳorle tain gusae aguin oia tumrare dunia taki fusiliba. 16 Tumrar Mabud Allare forikka ḳorat lagio na, zela age hou Masa namor zagat ḳorslae. 17 Tumrar Mabud Allae tumrare zoto hukum-ahkam, hushiari ar niom-ḳanun disoin, ita tumra kial ḳori manio. 18-19 Ar Mabudor nozoro zeta shoṭik, tain zeta bala fain, tumra otau ḳorio, teu tumrar balai oibo. Mabude tumrar baf-dadar gese ze desh dibar ḳosom ḳorsoin, hou desh taki tumrar dushmonre tain ḳedaia diba. Ar Mabudor oada mafik hou aramor deshor doḳoldario tumra faibae.
20 “Bobishote zebla tumrar aolad oḳole tumrare zikaiba, amrar Mabud Allae ou zeta hukum-ahkam, niom-ḳanun, ar hushiari disoin itar mani kita? 21 Ou shomoe zuaf dio, Mishor desho amra Feraunor gulam aslam, oile Allae tan bolala kudroti at dia amrare bar ḳoria anchoin. 22 Mabude amrar sokur samne Feraun ar tar baṛir hoḳolor ufre, asta Mishor deshor ufre boṛo boṛo gozobi nishana, bezuita bala-mosibot ar kudroti ḳam deḳaila. 23 Oile amrare tain hou desh taki bar ḳoria anla, zate ze desh dibar lagi amrar baf-dada oḳolor gese ḳosom ḳaisla, hou desho amrare far ḳoria doḳoldari dein. 24 Ar tain hukum dila, amra zanu tan hoḳol hukum-ahkam mani, tanre ḍoraia soli, teu amrar balai oibo ar amra oḳonkur laḳan hamesha basia roimu. 25 Oḳon amra zudi amrar Mabud Allar hukum mafik tan deoa niom-ḳanun kial ḳoria mani, te itau oilo amrar forezgari.”