2 “Tumrar Mabud Allae tumrare ze gau ar ṭaun oḳol dan ḳorba, ou zagat zudi ilaḳan kunu beṭa ba beṭi mile, zegue tumrar Mabud Allar apush-chuktir ulṭa gia tain zeta ḳam gin ḳoroin ota ḳam ḳore, 3 ogue zudi Alla saṛa dusra kunu deb-debir fuza ḳore, sand, shuruz, terar fuza ḳore, 4 ar ita tumrare zanail oe, te tumra kub shabdane tallash ḳoria dekio ita hasa na misa. Hasa oile Boni Israilor bitre ila lannoti ḳam ḳorae, 5 hou beṭa ba beṭire shaza dio. Ogure doria gau ba ṭaunor fainchaiti boiṭok ḳanat anio, ania fattor maria marilio. 6 Oile morar zuka oforad formanor lagi dui ba tin zonor shakki lagbo, eḳla eḳ zonor shakkie mara zaito nae. 7 Tare marar bala foela shakki oḳole fattor marba, bade hoḳol manshe marba. Ou nomunae tumrar shomazor bitor taki olaḳan naformanire ḳedaibae.

8 “Tumrar gese zudi ilaḳan ḳoṭin kunu nalish ae, zetar bisar ḳorar ḳemota tumrar adalotor nai, te ita loia Alla Mabudor fosond ḳora zagat zaio. Dorilao, kunu kun-ḳarafi, mara-mari, zobor-doḳoldari forman-todontor bisar-asar. 9 Gia Lebi ḳandanor imam oḳol ar hou amolor fordan hakim sabor dorbaro nalish hunaio, hunaile tara tumrare bisaror rae batai diba. 10 Ar Mabudor fosond ḳora zagat tara ze rae zanaiba, ou rayor mormo buzia tumra ḳam ḳorbae, tara zeta hikai diba, kub kial ḳoria ita manio. 11 Allai shoriotor hukumor befare tara zela talim diba, tara zelaḳan bisaror rae diba, otar mormo buzia tumra ḳam ḳorio, tarar ḳota taki unnish-bish kichchu ḳorio na. 12 Kunu manshe beṭagiri deḳaia zudi hou hakimor rae na mane, ba Alla Mabudor ḳadim ou imam sabor hukum na mane, te tare nichchit zane marilio. Boni Israilor bitre taki ou nomunae naformani ḳedaio. 13 Teu ita hunia hoḳol manshe ḍoraiba, tara ar beṭagiri deḳanir shaosh faita nae.

14 “Tumrar Mabud Allae tumrare ze deshor doḳoldari dira, hono gia boshot ḳoria harle tumra ḳoibae, ao, amrar ash-fashor zati oḳolor laḳan amrar nizor zatir lagio eḳzon bashsha banai. 15 Hou shomoe tumrar Mabud Allae zare fosond ḳorba, tareu tumrar bashsha banaio. He zanu tumrar nizor zatir bai oe, kunu bin zatir manshore tumrar bashsha banaio na. 16 I bashshae tar nizor lagi bout guṛa zanu na zomae, guṛa zuganir niote he zanu Boni Israilor manshore Mishor desho na faṭae. Mono rakio, Mabude age hukum disoin, tumra ar kunudin hi fotedi zaio na. 17 I bashshae zanu bout bia-shadi na ḳore, arnae tar dil be-fote zaibogi. He zanu nizor lagi besh ḳori shuna-rufa na zomae.

18 “Tare raz-godit boanir ḳalo Lebi ḳandanor imam sab oḳolor gese ze Tourat kitab taḳbo, ou kitabor aro eḳ kopi lekia tar nizor lagi nite oibo. 19 Ikan tar nizor gese roibo, tar dilo Alla Mabudor ḍor-ḳof raḳar lagi ou Tourat ar er bitoror hoḳol hukum-ahkam furafur mania solar niote, he zindegibor ou kitab tilaot ḳorbo. 20 Teu tar zatir baiain taki nizore boṛo mono ḳorto nae, he Tourator hukum-ahkamor unish-bish ḳorto nae. Teu he ar tar aolad oḳolor godi staei oibo, tara bout din Boni Israilor ufre bashshai ḳorba.