22
1 “Tumrar zatir kunu bair goru-sagol zudi fot araia zaoat deḳo, te tumra nirai na takia, iṭare firaia ania tar malikor gese dio. 2 Ou malik zudi tumrar ari-forir ḳeu nao oe, ba osina kunu zon oe, te iṭa tumra nizor baṛit nibaegi, nia he zebla tukanit aibo, ou shomoe tare dibae. 3 Tumrar zatir kunu bair gada, tar finnor ḳafoṛ, ba tar arail zekunu samana faile tumra ola ḳorio, nirai horia zaio na.4 “Tumar zatir bair kunu goru-gada fotor maze foṛigese dekia tumi horia zaio na, iṭa ubanir lagi tumi doria shaijjo ḳorio.
5 “Beṭinte beṭaintor ḳafoṛ ar beṭainte beṭintor ḳafoṛ findio na. Zegie ila ḳam ḳore, tumrar Mabud Allae tare gin ḳoroin.
6 “Fotedi aṭia zaite shomoe kunu gasor ḍalo, ba maṭir ufre kunu fakir bada deḳle, badat kunu fakie ḍimo um der, ba tar baichchar loge ase, te baichchar loge tar maʼre doria nio na. 7 Shok oile baichcha niogi, oile tar maʼre nichchit saṛia zaio. Teu tumar balai oibo, tumar haeati baṛibo.
8 “Noea gor banaile tumra goror saṭor ufre sairo galabae beṛa dibae, arnae saṭor ufre taki ḳeu foṛia morigele tumra kunor dayi oibae.
9 “Tumrar anguror bagano dui zator bisi lagaio na, ila ḳorle angur fol ar dusra zator bisir folo tumrar lagi haram oizibo.
10 “Goru ar gadare eḳ zualo lagaia al-chash ḳorio na.
11 “Tumra dui zator sutadi banail ḳafoṛ findio na.
12 “Tumrar uṛibar saddoror sairo kunat sutagesa dio.
Bour loge mila-misha ḳorar niom
13 “Kunu beṭae bia ḳoria bashor gor ḳorar bade zudi boure fosond na oe, 14 he zudi bour name bodnam roṭaia tair gibot gaia ḳoe, ami to ou beṭire bia ḳorsi ṭiku, oile tair shotittor kunu sinnot faisi na. 15 Te ou ḳoinar ma-bafe tarar fuṛir shotittor sin lagail bisnar ḳafoṛ loia, honor gau ba ṭauno hamanir geiṭor muko murobbi-shalish oḳolor gese zaiba. 16 Gia ḳoinar bafe murobbi oḳolre ḳoiba, ami to ou damandor loge amar fuṛire shadi dislam, oḳon he amar fuṛire fosond ḳore na. 17 Ar he bodnam roṭaia ḳoise, he bule amar fuṛir shotittor sinnot faise na, oile afnara deḳoukka, amar fuṛir shotittor sinnot loia ami azir oisi. Oḳan ḳoia he ou bisnar ḳafoṛ melia murobbi oḳolre sinnot deḳaibo. 18 Teu hi murobbi oḳole ou damandre shaza diba. 19 Tar zorimana babot eḳ-sho tola rufa adae ḳoria ḳoinar bafore diba, ḳaron ou damande Boni Israili eḳ shoti ḳoinar bodnam roṭaise. Ar ou ḳoinare loia he shongshar ḳorte oibo, zindegie kunudin taire saṛar kunu fot nai.
20 “Ar damandor ḳota hasa oile, ou ḳoinar shotittor sinnot na faile, 21 ḳoinare tair bafor baṛir geiṭor gese nia, honor beṭainte fattor maria taire mariliba. Tai to bafor baṛit taḳar ḳalo zinar ḳam ḳoria, Boni Israilor maze zogoinno naformani ḳorse. Ou nomunae tumra nizor shomaz taki ola naformanire fusia falaibae.
22 “Kunu beṭae zudi aroḳ beṭar bour loge zina ḳorat dora ḳae, te ou beṭa-beṭi duio zonre marilite oibo. Boni Israil taki tumra i laḳan naformanir nam miṭaibae.
23 “Bia ṭik oigese ila kunu fuṛire ḳeu ṭaunor maze faia zudi tair loge zina ḳore, 24 te tara duiogure hou zagar mein geiṭor gese nia fattor maria marilibae. Fuṛire ḳatol ḳorar ḳaron oilo, tai to hono taki shaijjor lagi kunu sik-sillani dise na, ar beṭare ḳatolor ḳaron oilo, he aroḳ beṭar bour ijjot marse. Ou nomunae tumra Boni Israil taki ola naformani fusia falaibae.
25 “Bia ṭik oigese omon kunu fuṛire ḳeu kunu nirai zagat faia hari, zur ḳoria tair loge mila-misha ḳorle, tumra ḳali ou beṭare ḳatol ḳorbae. 26 Ar ou fuṛire saṛi dibae, tai to ḳatol oar zuka guna ḳorse na. Ita to eḳzone dusra zonre kun ḳorar laḳanu. 27 Ḳaron ou beṭae taire nirai zagat dorse, sik-sillani dileo taire basanir ḳeu to ino asil na.
28 “Bia-shadi ṭik oise na, omon kunu fuṛire faia ḳeu zudi zur ḳoria tair loge mila-misha ḳore, ar tara dora ḳae, 29 te ou beṭae fuṛir bafore foinchash tola rufa dibo, ar fuṛir ijjot marae taire bia ḳorte oibo. Zindegie kunudin taire talaḳ dito farto nae.
30 “Kunu beṭae tar haton maʼre bia ḳora zaiz nae, ila ḳorle he tar bafor bour loge zina ḳoria bafore beijjot ḳorbo.”