Îromba n'ûntû bwa kûrigîîrua
Kîrî mûtongoria wa wini. Sabuuri ya Ndaundi.
140
1 Ntunyûkia Mwathani kîrî antû bara bathûûku,ûndigîîrie kîrî antû bara barî bitina.
2 Bara babaangaga mantû maathûûku nkorooni ciao rionthe,
na bagaûkagia ndûa rîonthe.
3 Ndîme ciao ciûgîîte ta mîromo ya njoka
mîromo yao îrî cûmû ta ya mpuua.
4 Nkaragia Mwathani ntikaagwe njaraani cia antû bara bathûûku,
ndigagîîria kîrî antû ba bitina,
bara babaangaga kûngwîthia.
5 Eekûmia i bambithîîte mûtego,
bakeranagia ndigi ta neeti
na baiga mîtego njîraani.
6 Woû Mwathani, ndiuga, “I woû Ngai wakwa.”
Îgua kayû ga kwerencana gwakwa, woû Mwathani.
7 Yîî Mwathani, Mwene inya mûntuunyûkia ûrî inya,
i woû wankunîkîîre ntikaûragwe ntugû ya ndûa.
8 Mwathani menya ûûya kûûyûria mawîrirîîria ma bara bathûûku,
ûtikaareke mîbango yao înu mîthûûku yûmbana,
n'ûntû i bageekumia.
9 Ûtikaareke anthû bara banthiûrûkîrîte bambûmba,
îndî tûma moothûûku mara bambangîrîîte mabacookere barî bongwa!
10 Barogwîrwa i makara marî mwanki!
Barogerwa mwankiini,
bakagerwa marinyaani maariku kûra batakiuma kaîrî!
11 Bara barongoagîra bara bangî batigaakare bwega nthîgûrû îno,
kînyamaara kîroogwata antû ba bitina.
12 Imbiyî Mwathani namenyagîîra bara bakûnyamaara,
na akagambîra nkîa bwega.
13 Ûmma bara baagîru bagaakumia riîtwa rîaku,
na bara barî njîra indûngaru bagaatûûraga amwe nawe.