Ngai arî gûntû kunthe na naiyî mantû monthe
Kîrî mûtongoria wa wini. Sabuuri ya Ndaundi.
139
1 Woû Mwathani nûnthûûrimîtena wammenya bwega!
2 Nûmenyaga rîra ngûkara nthîgûrû na kinya ngîûkîîra,
ûmenyaga mathûgaania maakwa ûrî kûraaya.
3 Ûmbonaga rionthe nthiîte na kinya mmaami,
woû nwiyî mantû maakwa monthe.
4 Wana kinya mbere mbaria,
Mwathani, nwîthagîrwa wiyî bûra nkauga.
5 Woû ûnthiûrûkîrîte mbarî cionthe mbere na nyuma,
na wambigîîra njara yaku.
6 Kîrî niû ûmenyo bûbu i bwa kûrigaria,
i bwa îgûrû mûno ntibumenya.
7 I kû mbûmba kûthi nkaumauma kîrî Kîrundu waku?
I kû mbûmba kwîbitha nkauma ûthiûni bwaku?
8 Ndeetia bwa îgûrû, i noogo ûrî,
ndeerûthîra kîmaamo mborokerooni naara akuû bakaraga, i noogo ûrî!
9 Nkabuurûûka nkatherekeria mbere ya naara riûa riumaga,
ngatûûra ntherekerio mûthia wa îria,
10 wana kinya noogo njara yaku n'yo îgantongoria,
na njara yaku ya ûrîo îngwatîîre.
11 Nkaaya kuuga, “Ûmma mwindu ûgankunîkîra,
na werû bûra bûrî akubî naani bûkare ta ûtugû,
12 îndî wana kinya mwindu ûtiîgua ûrî mwindu kîrî woû.
Ûtugû bûkaatharara ta mûthenya,
n'ûntû mwindu kîrî woû ûkari ta werû.”
13 N'ûntû i woû wambûmbîîre mainto maakwa ma ndeeni,
wantumania nnda ya maitû.
14 Ingûgûkumia n'ûntû mbûmbîîtwe na mûûmbîre wa kûrigarania na wa gûkuthûkwa.
Ngûgî ciaku i cia kûrigaria,
inkûmenya ûgu bwega.
15 Ûtaithwa maîndî maakwa,
rîra ndaûmbagîrwa withooni,
rîra ndaatumanagua amwe mborokerooni cia nthî,
16 Meetho maaku i mambonire rîra ndaarî kîmumungwa.
Wandîka îbukuuni rîaku ntugû ira ûmpete cia gûtûûra,
kinya mbere nwa îmwe yacio îkinya.
17 Naata mathûgaania maaku woû Ngai marî gîtûmi kîrî niû!
N'ata marî maariî monthe marî maringanîre amwe!
18 Nkaaya kûmatara
i maingî nkûrûki ya mûthanga.
Wa rîra ndaûkîîra
mbîgagua ndî amwe naawe.
19 Yîî, ûkeegua wenda ûkaûraga antû bara bathûûku itû Ngai,
Umaani aaga ndî, biû bara baûraganaga.
20 Baaragia mantû maathûûku îgûrû rîaku,
na bakaaragia kîînyume na riîtwa rîaku.
21 Mwathani, ga ntathwîre bara bakûthwîre?
Kana meneeria bara bakûthwîre?
22 Mbameneete na nkoro yakwa yonthe,
mbataraga barî anthû baakwa.
23 Ncûnkûûna Mwathani ûmenye nkoro yakwa!
Ngeria ûmenye mathûgaania maakwa!
24 Raitha wone wegua kûrî na njîra înthûûku ndeeni yakwa,
ûntongoreerie njîraani ya mwoyo wa tene na tene.