1 Bosor guzoria bador bosor ailo. Ar huknar dino bashsha oḳol zebla zuddo ḳorar lagi bar oin, ou shomoe Daude-o tan fordan sifai Zuabor loge aro komanḍar oḳol dia, Boni Israilor hoḳol sifaire zuddot faṭaila. Oile tain Zeruzalemo roila. Sifai dol gia Boni-Ammanre binash ḳoria, tarar Rabba ṭaunre berilila. 2 Ermaze eḳdin biali bala gum taki uṭia, Daude tan razbaṛir sador ufre uṭia aṭa-uṭi ḳorra. On taki aḳta saia deḳla, eḳzon beṭi manshe naira. I beṭi manush deḳte kub shundori. 3 Ou tain beṭir nam-ṭiḳana zanat guia faṭaila. Teu eḳzone tane ḳoilo, “I beṭir nam Batseba, bafor nam Iliam. Zamai oila Hiṭṭi ḳandanor Uria.” 4 Hoḳolta hunia beṭire anar lagi Daude manush faṭaila. Beṭire ania harle tain ou beṭir loge mila-misha ḳorla. Ou shomoe beṭi ḳali tair mashik beṭiara bemar taki pak-saf oise. Mila-mishar bade beṭi tair baṛit gelogi. 5 Bade zebla beṭie buzililo, beṭir feṭo hurutta aise, ou beṭie Daudre ḳobor zanailo. 6 Daude i ḳobor faia tan fordan sifai Zuabre hukum dila, “Tumi Hiṭṭi Uriare amar gese faṭai deo.” Hukum faia Zuabe tare bashshar gese faṭai dila. 7 Uria aia harle Daude tare zuddor ḳobor-ator zikaila. Zuab ar baki sifai oḳolor bala-bura hunla. 8 Bade tare ḳoila, “Tumi tumar baṛit zaogi, gia muk-at doia zirao.” He bar oia gelogi, teu bashshae tar baṛit tuṛa ufohar faṭaila. 9 Oile he baraia tar nizor baṛit na gia, bashshar baṛir saḳor-baḳoror loge razbaṛir barindat huti roilo. 10 Daude i ḳobor faia Uriare zikaila, “Tumi to zuddo taki firot aiso, te aram ḳorar lagi tumar baṛit gelae na ḳene?” 11 He zuaf dilo “Huzur, Allar shahadot shondukre loia Boni Israil ar Ehudar sifai oḳol tambur tole roira. Amar shenapoti sab ar afnar hoḳol manush bondor maze ṭerar tole asoin. Te ou haloto ami ḳemne nizor baṛit gia ḳana-dana ḳaia, bour loge furti ḳortam?” 12 Ou Daude tare ḳoila, “Aichcha, aizkur din tumi ono ro, ḳail ami tumare firot faṭai dimu.” Teu he ou din ar er bador dino Zeruzalemo roilo. 13 Daude tare tan goro daot ḳaoaila, ḳaia harle tare kub nisha ala mod ḳaoaia ṭal banaila. Oile rait oile he bashshar saḳor-baḳoror loge roilo, tar nizor baṛit gelo na. 14 Bador din biane bashshae tan fordan sifai Zuabor gese eḳ siṭi lekia, Uriar ato dia tare bidae dilaila. 15 Siṭir maze tain leḳla, “Ze zagat kub bezuita zuddo soler, ou Uriare hou zagat sifai oḳolor samnor ḳataro zuddot lagao, bade tumra ḳore taki hori zaio, zate he hono mara zae.” 16 Erdae dushmonor ṭaunre berar shomoe, Zuabe zani-huni Uriare oula eḳ zagat zuddot lagaila, ze zagat dushmonor foeluan sifai oḳol laṛait asil. 17 Bade ṭaunor manush bar oi aia zebla Zuabor loge laṛai lagaila, ou shomoe Daudor ḳoezon sifai mara gela, erar loge ou Hiṭṭi Uriaro mout oigelo. 18 Zuabe ḳobria faṭaia zuddor hoḳol ḳobor Daudre zanaila. 19-20 Ar ḳobriare hikai dila, “Zuddor i ḳobor hunia bashsha namdare gusae gorom oia zudi tumare zikain, laṛai ḳorar lagi tumra ṭaunor oto ḳandat gelae ḳene? Oalor ufre taki hitae tir-donuḳ marba, ikan tumra buz na ni? 21 Zano na ni, Zirubbeshotor fua Abimalikre ḳegie kun ḳorsil? Tebosh elaḳar eḳ beṭie oalor ufre taki, tair faṭar hildi iṭa marsil, ar tan mout oise. Te tumra oto ḳandat gelae ḳene? Tain zudi tumare oula zikain, te tumi ḳoio, tan gulam Hiṭṭi Uriao mara gese.” 22 Hou ḳobria roana oilo, ar Daudor dorbaro gia harle, Zuabe zela hikai disla oula ḳoilo. 23 He Daudre zanailo, “Dushmonor dol foela kub shobol oia bondor maze amrar loge laṛait aisil, oile amra tarare ḳedai ḳedai ṭaunor geiṭ forzonto geslam. 24 Ete tarar tir-donuḳ alainte oalor ufre taki tir marla. Ou tire bashsha namdaror ḳoezon sifai mara gesoin. Afnar gulam Hiṭṭi Uriaro mout oigese.” 25 Ḳobor hunia Daude tare ḳoila, “Tumi gia Zuabre ḳoio, itar lagi mon ḳaraf ḳorto na, zuddor shomoe toluare to kunu afon-for sine na. Te he zanu ṭaunor birudde aro shobol oia zuddo ḳoria ṭaunre ekkere binash ḳorilae. Tumi Zuabre oḳan ḳoia tar bitre bol baṛaio.” 26 Ibae Uriar boue zamai morar ḳobor hunia ḳanda-ḳaṭi, ar mattom ḳorlo. 27 Beṭir ḳanda-ḳaṭi hoḳolta shesh oia harle, Daude taire tan razbaṛit anaila. Tain beṭire hanga ḳorla, bade beṭir goro eḳ fua foeda oilo. Oile Daudor i ḳamor lagi Mabud tan ufre naraz oigela.

1 Bade Mabude hou zomanar nobi Natanre Daudor gese faṭaila. Tain aia Daudre ḳoila, “Bashsha namdar, kunu eḳ ṭauno duizon manush asil, erar eḳzon kub doni, oinno zon kub gorib. 2 Doni zonor bout goru-sagol asil. 3 Oile i gorib beṭar ḳali egu sagi baichcha saṛa, ar kuntau asil na. Beṭae ou baichchagure loia ania falito. Baichchagu beṭa ar tar hurutta-muruttar loge loge roia aste aste boṛo oa dorlo. I gorib beṭae zeta ḳaito, tar sagi baichchae-o ota ḳaito, beṭar ḳaoar mog taki baichchae-o fani ḳaito. Ar beṭar ḳandat hutito. Baichchagure beṭae nizor fuṛir laḳan ador ḳorto. 4 Erbade kita oilo, eḳdin hou doni beṭar baṛit eḳ meman ailo. Ete doni beṭae tar memanor ḳanir lagi nizor kunu goru ba sagol zobo na ḳoria, he ou gorib beṭar bokrir baichchagu ania memanor ḳani zuit ḳorlo.” 5 Ikan hunia Daude hou doni beṭar ufre gusae zoli-fuṛi uṭla. Tain Natan nobire ḳoila, “Ami Allar ḳosom ḳaia ḳoiar, i ḳam zegie ḳorse tare ḳatol ḳora zorur. 6 He i fashani ḳam ḳorse ḳori, tare sair bokrir dam dite oibo.” 7 Ougi Natan nobie Daudre ḳoila, “Afneu to hou zon. Boni Israilor Mabud Allae bataisoin, ami Israil deshor raz-godit tumare ḳelafoti disi. Bashsha Talutor at taki tumare basaisi. 8 Tumar munibor hoḳol samana ami tumare disi, tar bibintore-o ami tumar ato disi. Israil ar Ehudar hoḳol gusṭir zimma ami tumare shomzaisi. Ar ita hoḳoltae-o zudi tumar mon na borto, te ami tumare aro besh ḳori dilam one. 9 Oile Mabudor nozoro ze zinish ḳaraf, tumi ḳene i ḳam ḳoria tan hukumre tuchcho ḳorlae? Tumi to Hiṭṭi Uriare kun ḳorso, tar bibire nizor bou banaiso, ar Boni-Ammanor atane tumi tare maraiso. 10 Tumi to amare tuchcho ḳorso. Hiṭṭi Uriar bibire nizor bou banaiso. Erdae tumar foribaro kunudin kun-ḳarafi taki rehai faito nae. 11 Mabude aro ḳoisoin, ami tumar foribar takiu, tumar lagi mosibot foeda ḳormu. Tumar sokur samne tumar bibintore nia, tumar afon manshor ato dimu. He hokkolor samne tumar bibin loia hutibo. 12 Tumi to ita ḳorso lukaia, oile ami ḳormu hoḳolor samne, tamam Boni Israilor soukor samne. 13 Ou Daude Natan nobire ḳoila, “Ami to Mabudor dorbaro naformani ḳorilisi.” Teu Natane ḳoila, “Aichcha, Mabude afnar gunar mafi disoin, afne oḳon morta nae. 14 Oile afne i ḳam ḳoria Mabudor dushmon oḳolre, kufuri ḳorar bout boṛo shuzug ḳori disoin. Erdae afnar ze fua foeda oise, he nichchit mara zaibo.” 15 Oḳan ḳoia Natan nobi nizor baṛit gelagi. Uriar bour goro Daudor ze fua foeda oisil, Mabudor gozobe tar bezuita bemar oilo. 16 Teu Daude fuar lagi Allar dorbaro foriad ḳorla. Tain ruza raḳla, nizor goror maṭit hutia fura rait ḳaṭaila. 17 Tan uzir-nazir oḳole tane maṭi taki uṭar lagi minot-ḳajji ḳorla, oile tain ita manla na. Tarar loge kunu ḳana-finao ḳaila na. 18 Bemaror shat dinor din fuagu mara gelo. Oile tar morar ḳobor uzir-nazir oḳole bashshare zanaite shaosh faila na. Tara mata-mati ḳorla, “Fuagu zita taḳteu tain amrar ḳota hunchoin na. Te oḳon amra kila morar ḳobor zanaitam? Ikan hunia tain zudi nizor kunu ḳeti ḳorilain?” 19 Tarar i ḳana-ḳanir bab dekia Daude buzilila, fuagu mori gese. Tain zikaila, “Kita ba, he nai ni?” Tara ḳoila, “Ji-oe huzur, tain dunia taki gesoingi.” 20 Ou Daud maṭi taki uṭia naia-doia tel-fani makila. Ar ḳafoṛ-sufoṛ bodlaia, Mabudor goro gia soizdat foṛia ebadot-bondegi ḳorla. Bade nizor goro aia ḳani anar hukum dila. Ar ḳani deoa oile ḳana-dana ḳaila. 21 Ou tan uzir-nazire aia zikaila, “Bashsha namdar, afon ita ḳorla ḳene? Fuagu zita taḳte afne ruza rakia ḳanda-ḳaṭi ḳorla, oile he morar bade afne uṭia ḳana-dana ḳaila.” 22 Tain zuaf dila, “He zita taḳte ami ruza roia ḳanda-ḳaṭi ḳorlam, mono ḳorlam, Mabude zudi amare rohom ḳoroin, ar he haeate base. 23 Oile oḳon zebla deḳlam he mara-u gese, te ar ḳene ruza raḳtam? Ami ar tare firai antam farmu ni? Borong amare-u tar gese zaite oibo. He to ar firot aito nae.” 24-25 Daude tan bibi Batsebare shomuz dila, tain hirbar bibir loge mila-misha ḳorla. Teu tan aroḳ fua oilo. Tain i fuar nam toila Sulaiman. Oile Mabude Sulaimanre mohobbot ḳoria, tain Natan nobire faṭaia ḳoaila, i fuar nam to, Iadidia.