ꠝꠣꠘꠡꠞ ꠛꠣꠘꠣꠁꠟ ꠞꠍꠥꠝꠔ
১৫
১ ꠎꠦꠞꠥꠎꠣꠟꠦꠝ ꠐꠣꠃꠘ ꠕꠣꠇꠤ ꠇꠄꠎꠘ ꠝꠃꠟꠣꠘꠣ ꠀꠞ ꠚꠞꠤꠡꠤ ꠝꠎꠛꠞ ꠇꠤꠍꠥ ꠝꠣꠘꠥꠡ ꠁꠍꠣꠞ ꠉꠦꠍꠦ ꠀꠁꠟꠣ,
ꠀꠁꠀ ꠔꠣꠘꠞꠦ ꠎꠤꠇꠣꠁꠟꠣ,
২ “ꠀꠙꠘꠣꠞ ꠃꠝ꠆ꠝꠔ ꠅꠇꠟꠦ ꠀꠉꠞ ꠎꠝꠣꠘꠣꠞ ꠝꠃꠟꠣꠘꠣ ꠅꠇꠟꠞ ꠛꠣꠔꠣꠁꠟ ꠞꠍꠥꠝꠔ ꠝꠣꠘꠂꠘ ꠘꠣ ꠇꠦꠘꠦ?
ꠔꠣꠞꠣ ꠔ ꠅꠎꠥ ꠘꠣ ꠇꠞꠤꠀꠃ ꠈꠣꠘꠤ ꠈꠣꠁꠟꠣꠁꠘ।”
৩ ꠁꠍꠣꠄ ꠎꠥꠀꠙ ꠖꠤꠟꠣ,
“ꠅꠃ ꠝꠃꠟꠣꠘꠣ ꠅꠇꠟꠞ ꠞꠍꠥꠝꠔ ꠝꠣꠘꠣꠞ ꠟꠣꠉꠤ ꠀꠙꠘꠣꠞꠣ ꠇꠦꠘꠦ ꠀꠟ꠆ꠟꠣꠞ ꠢꠥꠇꠥꠝꠞ ꠛꠞꠈꠦꠟꠣꠚ ꠇꠞꠞꠣ?
৪ ꠀꠟ꠆ꠟꠣꠄ ꠢꠥꠇꠥꠝ ꠖꠤꠍꠂꠘ,
‘ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ,
ꠀꠞ ꠎꠦ ꠝꠣꠘꠡꠦ ꠔꠣꠞ ꠝꠣ-ꠛꠣꠚꠞ ꠛꠖꠘꠣꠝ ꠉꠣꠄ,
ꠔꠣꠞꠦ ꠘꠤꠌꠄ ꠝꠣꠞꠤꠟꠤꠔꠦ ꠅꠁꠛ।’
৫ ꠅꠁꠟꠦ ꠀꠙꠘꠣꠞꠣ ꠇꠂꠘ,
ꠇꠥꠘꠥ ꠝꠣꠘꠡꠦ ꠎꠥꠖꠤ ꠔꠣꠞ ꠝꠣ-ꠛꠣꠚꠞꠦ ꠇꠁꠟꠣꠄ,
‘ꠀꠝꠣꠞ ꠎꠦꠔꠣ ꠍꠣꠝꠣꠘꠣ ꠖꠤꠀ ꠀꠙꠘꠣꠁꠘ꠆ꠔꠞ ꠈꠦꠎꠝꠔ ꠇꠞꠔꠣꠝ ꠀꠍꠤꠟ,
ꠁꠔꠣ ꠀꠝꠤ ꠀꠟ꠆ꠟꠣꠞ ꠘꠣꠝꠦ ꠟꠤꠟ꠆ꠟꠣ ꠖꠤꠟꠣꠁꠍꠤ,’
৬ ꠔꠦ ꠔꠣꠞ ꠝꠣ-ꠛꠣꠚꠞꠦ ꠀꠞ ꠇꠥꠘ꠆ꠔꠣ ꠇꠞꠣ ꠟꠣꠉꠦ ꠘꠣ।
ꠅꠃ ꠟꠣꠈꠣꠘ ꠀꠙꠘꠣꠞꠣꠞ ꠛꠣꠚ-ꠖꠣꠖꠣꠞ ꠝꠘꠉꠠꠣ ꠘꠤꠅꠝ ꠖꠤꠀ ꠀꠟ꠆ꠟꠣꠞ ꠇꠣꠟꠣꠝ ꠛꠣꠔꠤꠟ ꠇꠞꠤꠟꠤꠍꠂꠘ।
৭ ꠅ ꠜꠘ꠆ꠒ ꠅꠇꠟ!
ꠢꠎꠞꠔ ꠁꠡꠣꠄꠀ ꠘꠛꠤꠄ ꠔꠥꠝꠞꠣꠞ ꠛꠦꠙꠣꠞꠦ ꠑꠤꠇꠃ ꠇꠁꠍꠂꠘ,
৮ ꠁꠔꠣ ꠝꠣꠘꠡꠦ ꠝꠥꠈ ꠖꠤꠀ ꠈꠣꠟꠤ ꠀꠝꠣꠞꠦ ꠁꠎ꠆ꠎꠔ ꠇꠞꠦ,
ꠅꠁꠟꠦ ꠔꠣꠞꠣꠞ ꠖꠤꠟ ꠀꠝꠣ ꠕꠣꠇꠤ ꠛꠃꠔ ꠖꠥꠞꠁ।
৯ ꠔꠣꠞꠣ ꠢꠥꠖꠣꠞ ꠈꠣꠝꠈꠣ ꠀꠝꠣꠞ ꠄꠛꠣꠖꠔ ꠇꠞꠦ,
ꠔꠣꠞꠣꠞ ꠔꠣꠟꠤꠝ ꠅꠇꠟ ꠔ ꠝꠣꠘꠡꠞ ꠛꠣꠘꠣꠁꠟ ꠝꠘꠉꠠꠣ ꠞꠍꠥꠝꠔ।”
ꠝꠣꠘꠥꠡ ꠇꠤꠟꠣ ꠘꠣꠙꠣꠇ ꠅꠄ
১০ ꠛꠣꠖꠦ ꠁꠍꠣꠄ ꠝꠣꠘꠡꠞꠦ ꠒꠣꠇꠤꠀ ꠇꠁꠟꠣ,
“ꠀꠝꠣꠞ ꠔꠣꠟꠤꠝꠈꠣꠘꠣꠂꠘ ꠈꠤꠀꠟ ꠇꠞꠤ ꠢꠥꠘꠃꠇ꠆ꠇꠣ।
১১ ꠛꠣꠁꠞꠦ ꠕꠣꠇꠤ ꠎꠦꠔꠣ ꠎꠤꠘꠤꠡ ꠝꠣꠘꠡꠞ ꠝꠥꠈꠞ ꠜꠤꠔꠞꠦ ꠢꠣꠝꠣꠄ,
ꠁꠔꠣꠄ ꠔ ꠔꠣꠞꠦ ꠘꠣꠙꠣꠇ ꠛꠣꠘꠣꠄ ꠘꠣ।
ꠛꠞꠋ ꠝꠣꠘꠡꠞ ꠝꠥꠈ ꠕꠣꠇꠤ ꠎꠦꠔꠣ ꠛꠣꠞꠅꠄ,
ꠅꠔꠣꠄꠃ ꠔꠣꠞꠦ ꠘꠣꠙꠣꠇ ꠛꠣꠘꠣꠄ।”
১২ ꠔꠦꠃ ꠔꠣꠘ ꠡꠣꠉꠞꠤꠖ ꠅꠇꠟꠦ ꠇꠁꠟꠣ,
“ꠢꠥꠎꠥꠞ,
ꠀꠙꠘꠦ ꠛꠥꠎꠍꠂꠘ ꠘꠤ,
ꠚꠞꠤꠡꠤ ꠅꠇꠟꠦ ꠝꠘꠅ ꠇꠞꠞꠣ,
ꠅꠃ ꠔꠣꠟꠤꠝ ꠖꠤꠀ ꠀꠙꠘꠦ ꠔꠣꠞꠣꠞꠦ ꠛꠦꠁꠎ꠆ꠎꠔ ꠇꠞꠍꠂꠘ?”
১৩-১৪ ꠔꠣꠁꠘ ꠇꠁꠟꠣ,
“ꠁꠔꠣꠞ ꠝꠣꠔ ꠚꠣꠟꠣꠅ।
ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄ ꠎꠦ ꠉꠣꠍ ꠟꠣꠉꠣꠁꠍꠂꠘ ꠘꠣ,
ꠁ ꠉꠣꠍ ꠔꠣꠘ ꠛꠣꠉꠣꠘ ꠕꠣꠇꠤ ꠢꠥꠞꠤꠀ ꠚꠣꠟꠣꠁꠟ ꠅꠁꠛ।
ꠔꠣꠞꠣꠞ ꠖꠣꠄꠁꠔ꠆ꠔ ꠀꠍꠤꠟ ꠀꠘ꠆ꠖꠣ ꠝꠣꠘꠡꠞꠦ ꠙꠕ ꠖꠦꠈꠣꠁꠔ,
ꠅꠁꠟꠦ ꠔꠣꠞꠣ ꠘꠤꠎꠦꠃ ꠀꠘ꠆ꠖꠣ ꠛꠘꠤꠉꠦꠍꠦ।
ꠇꠥꠘꠥ ꠀꠘ꠆ꠖꠣꠄ ꠀꠞꠇ ꠀꠘ꠆ꠖꠣꠞꠦ ꠙꠕ ꠖꠦꠈꠣꠘꠤꠔ ꠉꠦꠟꠦ,
ꠖꠥꠁꠅ ꠀꠘ꠆ꠖꠣꠃ ꠉꠣꠔꠅ ꠙꠠꠤ ꠝꠞꠛ।”
১৫ ꠔꠦꠃ ꠍꠣꠢꠣꠛꠤ ꠙꠤꠔꠞꠦ ꠇꠁꠟꠣ,
“ꠀꠙꠘꠦ ꠎꠦꠔꠣ ꠛꠣꠔꠣꠁꠞꠣ,
ꠅꠔꠣ ꠀꠝꠞꠣꠞꠦ ꠛꠥꠎꠣꠁ ꠖꠦꠃꠇ꠆ꠇꠣ।”
১৬ ꠁꠍꠣꠄ ꠇꠁꠟꠣ,
“ꠔꠥꠝꠞꠣ ꠅꠈꠘꠅ ꠛꠦꠛꠥꠎ ꠞꠁꠍ ꠘꠤ?
১৭ ꠔꠥꠝꠞꠣ ꠛꠥꠎꠅ ꠘꠣ ꠘꠤ,
ꠛꠣꠁꠞꠦ ꠕꠣꠇꠤ ꠎꠦꠔꠣ ꠎꠤꠘꠤꠡ ꠝꠣꠘꠡꠞ ꠝꠥꠈꠅ ꠢꠣꠝꠣꠄ,
ꠁꠔꠣ ꠔ ꠈꠣꠟꠤ ꠙꠦꠐꠅ ꠢꠣꠝꠣꠄ,
ꠀꠞ ꠙꠦꠐ ꠕꠣꠇꠤ ꠢꠤꠞꠛꠣꠞ ꠛꠣꠞꠅꠁ ꠎꠣꠄ।
১৮ ꠅꠁꠟꠦ ꠝꠣꠘꠡꠞ ꠝꠥꠈ ꠕꠣꠇꠤ ꠎꠦꠔꠣ ꠛꠣꠞꠅꠄ,
ꠁꠔꠣ ꠖꠤꠟꠅ ꠕꠣꠇꠤ ꠀꠄ,
ꠀꠞ ꠅꠔꠣꠄꠃ ꠝꠣꠘꠡꠞꠦ ꠘꠣꠙꠣꠇ ꠛꠣꠘꠣꠄ।
১৯ ꠝꠣꠘꠡꠞ ꠖꠤꠟ ꠕꠣꠇꠤꠃ ꠔ ꠢꠇꠟ ꠘꠝꠥꠘꠣꠞ ꠇꠥ-ꠌꠤꠘ꠆ꠔꠣ ꠛꠣꠞꠅꠄ,
ꠎꠦꠝꠘ ꠈꠥꠘ,
ꠎꠤꠘꠣ,
ꠌꠥꠞꠤ,
ꠝꠤꠍꠣ ꠡꠣꠇ꠆ꠇꠤ,
ꠀꠞ ꠁꠋꠡꠣ-ꠘꠤꠘ꠆ꠖꠣ ꠛꠣꠞꠅꠄ।
২০ ꠅꠔꠣꠄꠃ ꠝꠣꠘꠡꠞꠦ ꠘꠣꠙꠣꠇ ꠛꠣꠘꠣꠄ,
ꠅꠁꠟꠦ ꠅꠎꠥ ꠍꠣꠠꠣ ꠈꠣꠘꠤ ꠈꠣꠁꠟꠦ ꠇꠦꠃ ꠘꠣꠙꠣꠇ ꠅꠄ ꠘꠣ।”
ꠛꠤꠗꠞ꠆ꠝꠤ ꠛꠦꠐꠤꠞ ꠁꠝꠣꠘꠞ ꠛꠟ
২১ ꠛꠣꠖꠦ ꠢꠎꠞꠔ ꠁꠍꠣ ꠘꠤꠎꠞ ꠖꠦꠡ ꠍꠣꠠꠤꠀ ꠡꠥꠞ ꠀꠞ ꠍꠤꠖꠘ ꠖꠦꠡꠅ ꠉꠦꠟꠣꠉꠤ।
২২ ꠢꠘꠅ ꠉꠤꠀ ꠢꠣꠞꠟꠦ ꠇꠦꠘꠣꠘꠤ ꠎꠣꠔꠤꠞ ꠄꠇ ꠛꠤꠗꠞ꠆ꠝꠤ ꠛꠦꠐꠤ ꠔꠣꠘ ꠉꠦꠍꠦ ꠀꠁꠀ ꠎꠥꠞꠦ ꠎꠥꠞꠦ ꠇꠂꠟ,
“ꠅ ꠢꠥꠎꠥꠞ,
ꠖꠣꠃꠖꠞ ꠀꠅꠟꠣꠖ,
ꠀꠝꠣꠞꠦ ꠞꠢꠝ ꠇꠞꠂꠘ।
ꠀꠝꠣꠞ ꠙꠥꠠꠤꠉꠥꠞꠦ ꠎꠤꠘꠦ ꠗꠞꠣꠄ ꠔꠣꠁ ꠛꠠ ꠇꠡ꠆ꠐ ꠇꠞꠦꠞ।”
২৩ ꠅꠁꠟꠦ ꠁꠍꠣꠄ ꠇꠥꠘ꠆ꠔꠣ ꠝꠣꠔꠤꠟꠣ ꠘꠣ।
ꠔꠦꠃ ꠔꠣꠘ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠝꠤꠘꠔ ꠇꠞꠤ ꠇꠁꠟꠣ,
“ꠢꠥꠎꠥꠞ,
ꠅꠃ ꠛꠦꠐꠤꠉꠥꠞꠦ ꠛꠤꠖꠣꠄ ꠖꠤꠟꠣꠃꠇ꠆ꠇꠣ,
ꠔꠣꠁ ꠀꠝꠞꠣꠞ ꠈꠞꠦ ꠅꠁꠀ ꠌꠤꠟ꠆ꠟꠣꠞ।”
২৪ ꠁꠍꠣꠄ ꠇꠁꠟꠣ,
“ꠀꠝꠣꠞꠦ ꠔ ꠙꠣꠑꠣꠁꠟ ꠅꠁꠍꠦ,
ꠈꠣꠟꠤ ꠛꠘꠤ ꠁꠍꠞꠣꠁꠟꠞ ꠀꠞꠣꠁꠟ ꠝꠦꠠꠣ ꠅꠇꠟꠞ ꠟꠣꠉꠤ।”
২৫ ꠅꠁꠟꠦ ꠅꠃ ꠛꠦꠐꠤ ꠔꠣꠘ ꠇꠣꠘ꠆ꠖꠣꠔ ꠀꠁꠀ ꠇꠖꠝꠛꠥꠍꠤ ꠇꠞꠤꠀ ꠇꠂꠟ,
“ꠢꠥꠎꠥꠞ,
ꠀꠝꠣꠞꠦ ꠅꠃ ꠀꠍꠣꠘꠈꠣꠘ ꠇꠞꠃꠇ꠆ꠇꠣ।”
২৬ ꠔꠣꠁꠘ ꠇꠁꠟꠣ,
“ꠘꠤꠎꠞ ꠢꠥꠞꠥꠔ꠆ꠔꠣꠞ ꠞꠤꠎꠦꠇ ꠇꠥꠔ꠆ꠔꠣꠞ ꠍꠣꠝꠘꠦ ꠖꠦꠅꠀ ꠑꠤꠇ ꠘꠣꠄ।”
২৭ ꠛꠦꠐꠤꠄ ꠇꠂꠟ,
“ꠎꠤꠅꠄ ꠢꠥꠎꠥꠞ,
ꠀꠙꠘꠣꠞ ꠇꠕꠣꠃ ꠑꠤꠇ,
ꠅꠁꠟꠦ ꠝꠥꠘꠤꠛꠞ ꠈꠣꠘꠤ ꠕꠣꠇꠤ ꠎꠦꠔꠣ ꠉꠥꠠꠣ-ꠉꠣꠠꠣ ꠉꠣꠟꠣꠛꠣꠄ ꠙꠠꠦ,
ꠁꠔꠣ ꠔ ꠇꠥꠇꠞꠦ ꠈꠣꠄ।”
২৮ ꠔꠦꠃ ꠔꠣꠁꠘ ꠛꠦꠐꠤꠞꠦ ꠇꠁꠟꠣ,
“ꠀꠍꠟꠦ ꠉ ꠝꠣꠁ,
ꠔꠥꠝꠣꠞ ꠁꠝꠣꠘ ꠛꠠ ꠝꠎꠛꠥꠔ।
ꠀꠁꠌ꠆ꠍꠣ,
ꠔꠥꠝꠤ ꠎꠦꠟꠣ ꠌꠣꠁꠞꠣꠄ,
ꠅꠟꠣꠃ ꠅꠃꠇ।”
ꠅꠈꠣꠘ ꠇꠅꠀꠞ ꠟꠉꠦ ꠟꠉꠦꠃ ꠙꠥꠠꠤ ꠜꠣꠟꠣ ꠅꠁꠉꠦꠟ।
ꠌꠣꠁꠞ ꠀꠎꠣꠞ ꠝꠣꠘꠡꠞ ꠉꠣꠁꠛꠤ ꠈꠣꠘꠤ
২৯ ꠛꠣꠖꠦ ꠁꠍꠣ ꠢꠘ ꠕꠘꠦ ꠉꠣꠟꠤꠟ ꠀꠅꠞꠞ ꠙꠣꠞꠦꠖꠤ ꠀꠐꠤꠀ ꠉꠦꠟꠣ,
ꠉꠤꠀ ꠄꠇ ꠙꠣꠠꠞ ꠃꠙꠞꠦ ꠃꠑꠤꠀ ꠛꠁꠟꠣ।
৩০ ꠛꠁꠀ ꠢꠣꠞꠟꠦ ꠝꠣꠘꠡꠦ ꠟꠥꠟꠣ-ꠟꠦꠋꠠꠣ,
ꠀꠔꠥꠞ,
ꠀꠘ꠆ꠖꠣ,
ꠛꠥꠛꠣ,
ꠅꠟꠣꠈꠣꠘ ꠀꠞꠅ ꠛꠃꠔ ꠎꠣꠔꠞ ꠛꠦꠝꠣꠞꠤꠞꠦ ꠖꠟꠦ ꠖꠟꠦ ꠔꠣꠘ ꠉꠦꠍꠦ ꠟꠁꠀ ꠀꠁꠟ।
ꠀꠘꠤꠀ ꠔꠣꠘ ꠙꠣꠅꠞ ꠇꠣꠘ꠆ꠖꠣꠔ ꠕꠁꠟ,
ꠔꠣꠁꠘ ꠄꠞꠣ ꠢꠇꠟꠞꠦ ꠜꠣꠟꠣ ꠇꠞꠟꠣ।
৩১ ꠝꠣꠘꠡꠦ ꠎꠦꠛꠟꠣ ꠖꠦꠈꠟꠣ,
ꠟꠥꠟꠣ-ꠟꠦꠋꠠꠣ ꠜꠣꠟꠣ ꠅꠁꠎꠤꠞꠣ,
ꠛꠥꠛꠣ ꠅꠇꠟꠦ ꠝꠣꠔꠤꠞꠣ,
ꠀꠔꠥꠞ ꠝꠣꠘꠡꠦ ꠀꠐꠤꠞꠣ,
ꠀꠘ꠆ꠖꠣꠄ ꠌꠃꠈꠦ ꠖꠦꠈꠞꠣ,
ꠖꠦꠈꠤꠀ ꠔꠣꠞꠣ ꠢꠇꠟ ꠔꠣꠁꠎ꠆ꠎꠥꠛ ꠅꠁꠉꠦꠟꠣ,
ꠀꠞ ꠛꠘꠤ ꠁꠍꠞꠣꠁꠟꠞ ꠝꠣꠛꠥꠖ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ।
৩২ ꠄꠞꠛꠣꠖꠦ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠣꠘ꠆ꠖꠣꠔ ꠀꠘꠤꠀ ꠇꠁꠟꠣ,
“ꠁꠔꠣ ꠝꠣꠘꠡꠞ ꠟꠣꠉꠤ ꠀꠝꠣꠞ ꠛꠠ ꠖꠞꠖ ꠟꠣꠉꠦꠞ,
ꠀꠁꠎ ꠔꠤꠘ ꠖꠤꠘ ꠗꠞꠤ ꠔꠣꠞꠣ ꠀꠝꠣꠞ ꠈꠞꠦ ꠈꠞꠦ ꠊꠥꠞꠤꠞꠣ,
ꠅꠁꠟꠦ ꠔꠣꠞꠣꠞ ꠟꠉꠦ ꠈꠣꠘꠤꠞ ꠇꠥꠘ꠆ꠔꠣ ꠘꠣꠁ।
ꠔꠦ ꠅꠃ ꠢꠣꠟꠔꠦ ꠄꠞꠣꠞꠦ ꠛꠤꠖꠣꠄ ꠖꠤꠔꠣꠝ ꠌꠣꠁ ꠘꠣ,
ꠀꠞꠘꠣꠄ ꠁꠔꠣ ꠙꠕꠅꠃ ꠛꠦꠃꠡ ꠅꠁꠎꠤꠛꠣ।”
৩৩ ꠍꠣꠢꠣꠛꠤ ꠅꠇꠟꠦ ꠇꠁꠟꠣ,
“ꠢꠥꠎꠥꠞ,
ꠁ ꠘꠤꠞꠣꠁ ꠝꠞꠥꠜꠥꠝꠤꠞ ꠝꠣꠎꠦ ꠅꠔ ꠝꠣꠘꠡꠞꠦ ꠈꠣꠅꠀꠘꠤꠞ ꠟꠣꠉꠤ ꠞꠥꠐꠤ ꠀꠝꠞꠣ ꠇꠥꠀꠁ ꠙꠣꠁꠝꠥ?”
৩৪ ꠔꠣꠁꠘ ꠇꠁꠟꠣ,
“ꠔꠥꠝꠞꠣꠞ ꠉꠦꠍꠦ ꠇꠄꠈꠣꠘ ꠀꠍꠦ?”
ꠄꠞꠣ ꠇꠁꠟꠣ,
“ꠡꠣꠔꠈꠣꠘ ꠞꠥꠐꠤ ꠀꠞ ꠛꠤꠞꠣꠘ ꠇꠞꠣ ꠇꠄꠐꠣ ꠢꠥꠞꠥ ꠝꠣꠍ ꠀꠍꠦ।”
৩৫ ꠔꠦꠃ ꠁꠍꠣꠄ ꠝꠣꠘꠡꠞꠦ ꠝꠣꠐꠤꠔ ꠛꠅꠀꠞ ꠟꠣꠉꠤ ꠇꠁꠟꠣ।
৩৬ ꠇꠁꠀ ꠔꠣꠁꠘ ꠅꠃ ꠡꠣꠔꠅꠈꠣꠘ ꠞꠥꠐꠤ ꠀꠞ ꠛꠤꠞꠣꠘ ꠝꠣꠍ ꠀꠔꠅ ꠟꠁꠀ,
ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠅꠈꠘꠣꠁꠘ ꠐꠥꠇꠞꠣꠁꠟꠣ,
ꠛꠣꠖꠦ ꠍꠣꠢꠣꠛꠤ ꠅꠇꠟꠞꠦꠖꠤ ꠛꠣꠐꠣꠁꠟꠣ।
৩৭ ꠢꠇ꠆ꠇꠟ ꠝꠣꠘꠡꠦ ꠙꠦꠐ ꠜꠞꠤ ꠈꠣꠁꠟꠣ।
ꠈꠣꠁꠀ ꠎꠦꠔꠣ ꠞꠁꠍꠤꠟ,
ꠍꠣꠢꠣꠛꠤ ꠅꠇꠟꠦ ꠅꠔꠣ ꠖꠟꠣ ꠇꠞꠣꠞ ꠛꠣꠖꠦ ꠡꠣꠔ ꠐꠥꠇꠞꠤ ꠜꠞꠤꠉꠦꠟ।
৩৮ ꠅꠘꠥꠝꠣꠘ ꠌꠣꠁꠞ ꠀꠎꠣꠞ ꠛꠦꠐꠣ ꠝꠣꠘꠡꠦ ꠅꠃ ꠈꠣꠘꠣ ꠈꠣꠁꠟꠣ,
ꠄꠞꠣꠞ ꠟꠉꠦ ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠂꠘꠅ ꠀꠍꠟꠣ।
৩৯ ꠛꠣꠖꠦ ꠔꠣꠁꠘ ꠄꠞꠣꠞꠦ ꠛꠤꠖꠣꠄ ꠖꠤꠀ ꠘꠣꠅꠅ ꠃꠑꠤꠀ ꠝꠉꠖꠘ ꠄꠟꠣꠇꠣꠔ ꠉꠦꠟꠣꠉꠤ।