ꠛꠦꠢꠦꠡ꠆ꠔꠤ ꠛꠣꠖꠡꠣ ꠇꠦꠝꠘꠦ ꠀꠁꠛꠣ
২৫
১ ꠄꠞꠛꠣꠖꠦ ꠁꠍꠣꠄ ꠇꠁꠟꠣ,
“ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠁꠟ ꠅꠟꠣ ꠖꠡꠉꠥ ꠙꠥꠠꠤꠞ ꠟꠣꠈꠣꠘ,
ꠎꠦꠔꠣ ꠙꠥꠠꠤꠘ꠆ꠔꠦ ꠛꠤꠀꠞ ꠖꠣꠝꠣꠘ꠆ꠖꠞꠦ ꠀꠉꠥꠀꠁꠀ ꠀꠘꠣꠞ ꠟꠣꠉꠤ ꠟꠦꠝ-ꠟꠦꠝꠐꠘ ꠟꠁꠀ ꠛꠣꠞꠅꠁꠟ।
২ ꠄꠞꠣꠞ ꠝꠣꠎꠦ ꠙꠣꠌ ꠎꠘ ꠀꠍꠤꠟ ꠀꠈꠟꠖꠣꠞ ꠀꠞ ꠙꠣꠌ ꠎꠘ ꠀꠍꠤꠟ ꠛꠦꠀꠈꠟ।
৩ ꠛꠦꠀꠈꠟ ꠙꠥꠠꠤꠘ꠆ꠔꠦ ꠈꠣꠟꠤ ꠟꠦꠝ ꠟꠁꠀ ꠛꠣꠞꠅꠁꠟ,
ꠟꠦꠝꠞ ꠇꠥꠘꠥ ꠔꠦꠟ ꠘꠤꠟ ꠘꠣ।
৪ ꠅꠁꠟꠦ ꠀꠈꠟꠖꠣꠞ ꠙꠥꠠꠤꠘ꠆ꠔꠦ ꠟꠦꠝꠞ ꠟꠉꠦ ꠚꠤꠚꠣꠔ ꠇꠞꠤ ꠔꠦꠟꠅ ꠘꠤꠟ।
৫ ꠖꠣꠝꠣꠘ꠆ꠖ ꠀꠁꠔꠦ ꠖꠦꠞꠤ ꠅꠀꠄ ꠔꠣꠞꠣ ꠢꠇꠟꠃ ꠃꠋꠉꠣꠁꠔꠦ ꠃꠋꠉꠣꠁꠔꠦ ꠊꠥꠝꠣꠁ ꠉꠦꠟ।
৬ “ꠛꠣꠖꠦ ꠀꠗꠣ-ꠞꠣꠁꠔꠇꠥꠞ ꠛꠣꠟꠣ ꠌꠤꠟ꠆ꠟꠣꠘꠤ ꠢꠥꠘꠣ ꠉꠦꠟ,
‘ꠖꠣꠝꠣꠘ꠆ꠖ ꠀꠁꠌ꠆ꠍꠂꠘ,
ꠖꠣꠝꠣꠘ꠆ꠖ ꠀꠁꠌ꠆ꠍꠂꠘ,
ꠎꠟꠖꠤ ꠛꠣꠞꠅ।’
৭ ꠌꠤꠟ꠆ꠟꠣꠘꠤ ꠢꠥꠘꠤꠀ ꠅꠃ ꠙꠥꠠꠤꠘ ꠃꠑꠤꠀ ꠟꠦꠝ-ꠟꠦꠝꠐꠘ ꠑꠤꠇ ꠇꠞꠣꠔ ꠟꠣꠉꠟꠣ।
৮ ꠢꠃ ꠛꠦꠀꠈꠟ ꠙꠥꠠꠤꠘ꠆ꠔꠦ ꠀꠈꠟꠖꠣꠞ ꠙꠥꠠꠤꠘꠞꠦ ꠇꠁꠟꠣ,
‘ꠀꠝꠞꠣꠞꠦ ꠕꠥꠠꠣ ꠔꠦꠟ ꠖꠦꠅ ꠘꠣ,
ꠀꠝꠞꠣꠞ ꠟꠦꠝ ꠟꠤꠝꠤꠎꠣꠞꠉꠤ।’
৯ ꠔꠣꠞꠣ ꠇꠁꠟꠣ,
‘ꠀꠝꠞꠣꠞ ꠉꠦꠍꠦ ꠎꠦꠔꠣ ꠔꠦꠟ ꠀꠍꠦ,
ꠁꠔꠣ ꠔ ꠀꠝꠞꠣꠞꠃ ꠟꠣꠉꠛ।
ꠔꠦ ꠔꠥꠝꠞꠣ ꠖꠥꠇꠣꠘ ꠕꠣꠇꠤ ꠔꠦꠟ ꠀꠘꠣꠁꠟꠣꠅ।’
১০ ꠅꠃ ꠛꠦꠀꠈꠟ ꠙꠥꠠꠤꠘ ꠔꠦꠟ ꠀꠘꠣꠔ ꠉꠤꠀ ꠢꠣꠞꠟꠦꠃ ꠖꠣꠝꠣꠘ꠆ꠖ ꠀꠁꠟ꠆ꠟꠣ।
ꠅꠃ ꠡꠝꠄ ꠀꠈꠟꠖꠣꠞ ꠅꠃ ꠙꠥꠠꠤꠘ ꠎꠥꠁꠔ ꠀꠍꠟꠣ,
ꠔꠣꠞꠣ ꠖꠣꠝꠣꠘ꠆ꠖꠞꠦ ꠟꠁꠀ ꠛꠤꠀ ꠛꠣꠠꠤꠔ ꠢꠣꠝꠣꠁꠟ।
ꠔꠣꠞꠣ ꠢꠣꠝꠣꠘꠤꠞ ꠛꠣꠖꠦꠃ ꠖꠥꠀꠞ ꠛꠘ꠆ꠖ ꠇꠞꠣ ꠅꠁꠟ।
১১ ꠛꠣꠖꠦ ꠅꠃ ꠛꠦꠀꠈꠟ ꠙꠥꠠꠤꠘ꠆ꠔꠦ ꠀꠁꠀ ꠖꠥꠀꠞ ꠛꠘ꠆ꠖ ꠖꠦꠈꠤꠀ ꠇꠁꠟꠣ,
‘ꠢꠥꠘꠞꠣ ꠘꠤ,
ꠖꠥꠀꠞꠈꠣꠘ ꠈꠥꠟꠃꠇ꠆ꠇꠣ।’
১২ ꠖꠣꠝꠣꠘ꠆ꠖꠦ ꠎꠥꠀꠙ ꠖꠤꠟꠣ,
‘ꠀꠝꠤ ꠢꠣꠍꠣꠃ ꠇꠁꠞꠣꠝ,
ꠀꠝꠤ ꠔ ꠔꠥꠝꠞꠣꠞꠦ ꠌꠤꠘꠤ ꠘꠣ।’ ”
১৩ ꠅꠃ ꠇꠤꠌ꠆ꠍꠣꠞ ꠛꠣꠖꠦ ꠁꠍꠣꠄ ꠇꠁꠟꠣ,
“ꠄꠞꠖꠣꠄ ꠔꠥꠝꠞꠣ ꠢꠥꠡꠤꠀꠞ ꠞꠁꠅ,
ꠢꠤ ꠖꠤꠘ ꠀꠞ ꠢꠤ ꠡꠝꠄꠅꠞ ꠇꠕꠣ ꠔ ꠇꠦꠃꠞꠞ ꠎꠣꠘꠣ ꠘꠣꠁ।
ꠔꠤꠘ ꠌꠣꠇꠞꠞ ꠇꠤꠌ꠆ꠍꠣ
১৪ “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠟꠣ ꠄꠇꠎꠘ ꠝꠣꠘꠡꠞ ꠟꠣꠈꠣꠘ,
ꠄꠁꠘ ꠛꠤꠖꠦꠡ ꠎꠣꠅꠀꠞ ꠛꠣꠟꠣ ꠔꠣꠘ ꠌꠣꠇꠞ ꠅꠇꠟꠞ ꠀꠔꠅ ꠀꠡ꠆ꠔꠣ ꠡꠝ꠆ꠙꠔ꠆ꠔꠤꠞ ꠜꠣꠞ ꠡꠝꠎꠣꠁ ꠖꠤꠟꠣ।
১৫ ꠄꠞꠣꠞ ꠎꠁꠉ꠆ꠉꠔꠣ ꠝꠣꠚꠤꠇ ꠔꠣꠁꠘ ꠄꠇꠎꠘꠞꠦ ꠙꠣꠌ ꠀꠎꠣꠞ ꠐꠦꠇꠣ,
ꠖꠥꠍꠞꠣ ꠎꠘꠞꠦ ꠖꠥꠁ ꠀꠎꠣꠞ ꠀꠞ ꠀꠞꠇ ꠎꠘꠞꠦ ꠄꠇ ꠀꠎꠣꠞ ꠐꠦꠇꠣ ꠖꠤꠟꠣ।
১৬ ꠙꠣꠌ ꠀꠎꠣꠞ ꠐꠦꠇꠣ ꠎꠦ ꠙꠣꠁꠍꠤꠟ,
ꠢꠦ ꠅꠃ ꠐꠦꠇꠣꠖꠤ ꠇꠣꠞꠛꠣꠞ ꠇꠞꠤꠀ ꠀꠞꠅ ꠙꠣꠌ ꠀꠎꠣꠞ ꠟꠣꠜ ꠇꠞꠟ।
১৭ ꠖꠥꠁ ꠀꠎꠣꠞ ꠐꠦꠇꠣ ꠎꠦ ꠙꠣꠁꠍꠤꠟ,
ꠢꠦ-ꠅ ꠀꠞꠅ ꠖꠥꠁ ꠀꠎꠣꠞ ꠟꠣꠜ ꠇꠞꠟ।
১৮ ꠅꠁꠟꠦ ꠄꠇ ꠀꠎꠣꠞ ꠐꠦꠇꠣ ꠎꠦ ꠙꠣꠁꠍꠤꠟ,
ꠢꠦ ꠔꠣꠞ ꠝꠣꠟꠤꠇꠞ ꠁ ꠐꠦꠇꠣ ꠇꠣꠝꠅ ꠘꠣ ꠟꠣꠉꠣꠁꠀ ꠉꠣꠔ ꠈꠥꠖꠤꠀ ꠝꠣꠐꠤꠞ ꠔꠟꠦ ꠕꠁꠟ।
১৯ “ꠛꠃꠔ ꠖꠤꠘ ꠛꠣꠖꠦ ꠢꠃ ꠝꠣꠟꠤꠇ ꠖꠦꠡꠅ ꠀꠁꠀ ꠔꠣꠞꠣꠞ ꠢꠤꠡꠣꠛ-ꠘꠤꠇꠣꠡ ꠌꠣꠁꠟꠣ।
২০ ꠔꠦꠃ ꠙꠣꠌ ꠀꠎꠣꠞ ꠐꠦꠇꠣ ꠎꠦ ꠙꠣꠁꠍꠤꠟ,
ꠢꠦ ꠀꠞꠅ ꠙꠣꠌ ꠀꠎꠣꠞ ꠟꠁꠀ ꠀꠁꠀ ꠝꠣꠟꠤꠇꠞꠦ ꠇꠂꠟ,
‘ꠍꠣꠛ,
ꠀꠙꠘꠦ ꠀꠝꠣꠞꠦ ꠙꠣꠌ ꠀꠎꠣꠞ ꠐꠦꠇꠣ ꠖꠤꠍꠟꠣ,
ꠅꠃ ꠐꠦꠇꠣꠖꠤ ꠀꠝꠤ ꠀꠞꠅ ꠙꠣꠌ ꠀꠎꠣꠞ ꠟꠣꠜ ꠇꠞꠍꠤ।’
২১ ꠁꠈꠣꠘ ꠢꠥꠘꠤꠀ ꠝꠣꠟꠤꠇꠦ ꠇꠁꠟꠣ,
‘ꠡꠣꠛ꠆ꠛꠣꠡ,
ꠔꠥꠝꠤ ꠈꠥꠛ ꠢꠇ-ꠢꠣꠟꠣꠟꠤ ꠝꠣꠘꠥꠡ।
ꠔꠥꠝꠤ ꠢꠥꠞꠥ-ꠝꠥꠞꠥ ꠛꠦꠙꠣꠞꠦꠃ ꠢꠇ-ꠢꠣꠟꠣꠟ ꠞꠁꠍ,
ꠄꠞꠟꠣꠉꠤ ꠀꠝꠤ ꠔꠥꠝꠣꠞꠦ ꠀꠞꠅ ꠛꠃꠔ ꠛꠠ ꠖꠣꠄꠁꠔ꠆ꠔ ꠖꠤꠝꠥ।
ꠀꠅ,
ꠀꠝꠣꠞ ꠈꠥꠡꠤꠞ ꠜꠣꠉꠤ ꠅꠅ।’
২২ ꠛꠣꠖꠦ ꠖꠥꠁ ꠀꠎꠣꠞ ꠐꠦꠇꠣ ꠎꠦ ꠙꠣꠁꠍꠤꠟ,
ꠢꠦ ꠀꠁꠀ ꠇꠂꠟ,
‘ꠍꠣꠛ,
ꠀꠙꠘꠦ ꠀꠝꠣꠞꠦ ꠖꠥꠁ ꠀꠎꠣꠞ ꠐꠦꠇꠣ ꠖꠤꠍꠟꠣ।
ꠀꠝꠤ ꠔ ꠀꠞꠅ ꠖꠥꠁ ꠀꠎꠣꠞ ꠟꠣꠜ ꠇꠞꠍꠤ।’
২৩ ꠔꠦꠃ ꠝꠣꠟꠤꠇꠦ ꠇꠁꠟꠣ,
‘ꠡꠣꠛ꠆ꠛꠣꠡ,
ꠔꠥꠝꠤ ꠈꠥꠛ ꠢꠇ-ꠢꠣꠟꠣꠟꠤ ꠝꠣꠘꠥꠡ।
ꠔꠥꠝꠤ ꠕꠥꠠꠣ ꠛꠦꠙꠣꠞꠦꠃ ꠢꠇ-ꠢꠣꠟꠣꠟ ꠞꠁꠍ,
ꠄꠞꠟꠣꠉꠤ ꠀꠝꠤ ꠔꠥꠝꠣꠞꠦ ꠀꠞꠅ ꠛꠃꠔ ꠛꠠ ꠖꠣꠄꠁꠔ꠆ꠔ ꠖꠤꠝꠥ।
ꠀꠅ,
ꠀꠝꠣꠞ ꠈꠥꠡꠤꠞ ꠜꠣꠉꠤ ꠅꠅ।’
২৪ ꠅꠁꠟꠦ ꠄꠇ ꠀꠎꠣꠞ ꠐꠦꠇꠣ ꠎꠣꠞꠦ ꠖꠤꠍꠟꠣ,
ꠢꠦ ꠀꠁꠀ ꠇꠂꠟ,
‘ꠍꠣꠛ,
ꠀꠝꠤ ꠎꠣꠘꠤ ꠀꠙꠘꠦ ꠈꠥꠛ ꠇꠠꠣ ꠝꠣꠘꠥꠡ।
ꠀꠙꠘꠦ ꠈꠦꠔ ꠘꠣ ꠇꠞꠤꠀꠅ ꠗꠣꠘ ꠇꠣꠐꠂꠘ ꠀꠞ ꠛꠣꠁꠘ ꠘꠣ ꠖꠤꠟꠦꠅ ꠀꠟꠤ ꠢꠥꠞꠂꠘ।
২৫ ꠄꠞꠖꠣꠄ ꠀꠝꠤ ꠒꠞꠣꠁꠀ ꠀꠙꠘꠣꠞ ꠐꠦꠇꠣ ꠝꠣꠐꠤꠞ ꠔꠟꠦ ꠟꠥꠇꠣꠁꠀ ꠕꠁꠍꠟꠣꠝ।
ꠅꠃ ꠘꠦꠃꠇ꠆ꠇꠣ ꠀꠙꠘꠣꠞ ꠐꠦꠇꠣ।’
২৬ ꠝꠣꠟꠤꠇꠦ ꠇꠁꠟꠣ,
‘ꠢꠣꠄꠞꠦ ꠈꠛꠤꠍ,
ꠔꠥꠁꠘ ꠔ ꠇꠥꠠꠤꠀ।
ꠔꠥꠁ ꠎꠥꠖꠤ ꠁꠈꠣꠘ ꠝꠘꠅ ꠇꠞꠟꠦ,
ꠀꠝꠤ ꠈꠦꠔ ꠘꠣ ꠇꠞꠟꠦꠅ ꠗꠣꠘ ꠇꠣꠐꠤ ꠀꠞ ꠛꠣꠁꠘ ꠘꠣ ꠖꠤꠟꠦꠅ ꠀꠟꠤ ꠢꠥꠞꠤ,
২৭ ꠔꠦ ꠀꠝꠣꠞ ꠐꠦꠇꠣ ꠔꠥꠁ ꠛꠦꠙꠣꠞꠤꠞ ꠉꠦꠍꠦ ꠖꠤꠟꠦ ꠘꠣ ꠇꠦꠘꠦ?
ꠔꠦ ꠔ ꠀꠝꠤ ꠀꠁꠀ ꠝꠥꠟ ꠐꠦꠇꠣꠞ ꠟꠉꠦ ꠇꠤꠍꠥ ꠟꠣꠜ ꠙꠣꠁꠟꠣꠝ ꠅꠘꠦ।’
২৮ ꠛꠣꠖꠦ ꠔꠣꠁꠘ ꠅꠁꠘ꠆ꠘ ꠌꠣꠇꠞ ꠅꠇꠟꠞꠦ ꠇꠁꠟꠣ,
‘ꠔꠥꠝꠞꠣ ꠅꠉꠥꠞ ꠉꠦꠍ ꠕꠣꠇꠤ ꠅꠃ ꠐꠦꠇꠣ ꠘꠤꠀ,
ꠖꠡ ꠀꠎꠣꠞ ꠎꠣꠞ ꠉꠦꠍꠦ ꠀꠍꠦ ꠔꠣꠞꠦ ꠖꠦꠅ।
২৯ ꠢꠥꠘꠅ,
ꠎꠣꠞ ꠀꠍꠦ ꠔꠣꠞꠦ ꠀꠞꠅ ꠖꠦꠅꠀ ꠅꠁꠛ,
ꠔꠣꠞ ꠀꠞꠅ ꠛꠣꠠꠤꠛ।
ꠅꠁꠟꠦ ꠎꠣꠞ ꠘꠣꠁ,
ꠔꠣꠞ ꠎꠦꠔꠣ ꠀꠍꠦ ꠅꠔꠣꠅ ꠇꠣꠠꠤꠀ ꠘꠦꠅꠀ ꠅꠁꠛ।
৩০ ꠅꠃ ꠛꠎ꠆ꠎꠣꠔ ꠌꠣꠇꠞꠞꠦ ꠘꠤꠀ ꠔꠥꠝꠞꠣ ꠀꠘ꠆ꠖꠣꠁꠞ ꠉꠣꠔꠅ ꠚꠣꠟꠣꠁ ꠖꠦꠅ।
ꠢꠃ ꠉꠣꠔꠅ ꠝꠣꠘꠡꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠛ ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠖꠣꠔ ꠇꠤꠠꠤꠝꠤꠠꠤ ꠖꠤꠛ।’
ꠀꠈꠦꠞꠣꠔꠞ ꠛꠤꠌꠣꠞꠞ ꠛꠄꠀꠘ
৩১ “ꠛꠤꠘ-ꠀꠖꠝꠦ ꠎꠦꠛꠟꠣ ꠚꠤꠞꠤꠡ꠆ꠔꠣ ꠅꠇꠟꠞꠦ ꠟꠁꠀ ꠘꠤꠎꠞ ꠝꠢꠤꠝꠣꠄ ꠢꠤꠞꠛꠣꠞ ꠀꠁꠛꠣ,
ꠀꠁꠀ ꠘꠤꠎꠞ ꠛꠣꠖꠡꠣꠁꠞ ꠉꠖꠤꠔ ꠛꠁꠛꠣ।
৩২ ꠅꠃ ꠡꠝꠄ ꠖꠥꠘꠤꠀꠞ ꠔꠣꠝꠣꠝ ꠎꠣꠔꠤꠞ ꠝꠣꠘꠡꠞꠦ ꠔꠣꠘ ꠍꠣꠝꠘꠦ ꠀꠘꠣ ꠅꠁꠛ।
ꠞꠣꠈꠣꠟꠦ ꠎꠦꠟꠣ ꠝꠦꠠꠣ ꠀꠞ ꠍꠣꠉꠟꠞꠦ ꠀꠟꠣꠖꠣ ꠇꠞꠦ,
ꠔꠣꠁꠘꠅ ꠅꠃꠟꠣ ꠢꠇꠟ ꠝꠣꠘꠡꠞꠦ ꠀꠟꠉꠣꠁꠀ ꠖꠥꠁ ꠜꠣꠉ ꠇꠞꠛꠣ।
৩৩ ꠔꠣꠘ ꠒꠣꠁꠘ ꠉꠣꠟꠣꠛꠣꠄ ꠝꠦꠠꠣ ꠀꠞ ꠛꠣꠃ ꠉꠣꠟꠣꠛꠣꠄ ꠍꠣꠉꠟꠞꠦ ꠞꠣꠈꠛꠣ।
৩৪ “ꠄꠞꠛꠣꠖꠦ ꠛꠣꠖꠡꠣꠄ ꠔꠣꠘ ꠒꠣꠁꠘ ꠉꠣꠟꠣꠞ ꠝꠣꠘꠡꠞꠦ ꠇꠁꠛꠣ,
‘ꠔꠥꠝꠞꠣ ꠎꠣꠞꠣ ꠀꠝꠣꠞ ꠛꠣꠔꠥꠘꠤ ꠛꠣꠚꠞ ꠞꠢꠝ ꠙꠣꠁꠍ,
ꠔꠥꠝꠞꠣ ꠀꠅ।
ꠀꠞ ꠖꠥꠘꠤꠀꠞ ꠙꠄꠟꠣ ꠕꠣꠇꠤ ꠔꠥꠝꠞꠣꠞ ꠟꠣꠉꠤ ꠎꠦ ꠛꠣꠖꠡꠣꠁ ꠔꠤꠀꠞ ꠇꠞꠤ ꠞꠣꠈꠣ ꠅꠁꠍꠦ,
ꠅꠃ ꠛꠣꠖꠡꠣꠁꠞ ꠖꠈꠟ ꠡꠝꠎꠤꠀ ꠘꠦꠅ।
৩৫ ꠝꠘꠅ ꠀꠍꠦ ꠘꠤ,
ꠀꠝꠣꠞ ꠎꠦꠛꠟꠣ ꠙꠦꠐꠅ ꠜꠥꠈ ꠟꠣꠉꠍꠤꠟ,
ꠔꠥꠝꠞꠣ ꠀꠝꠣꠞꠦ ꠈꠣꠘꠤ ꠖꠤꠍꠟꠣꠄ,
ꠙꠤꠀꠍꠞ ꠡꠝꠄ ꠙꠣꠘꠤ ꠖꠤꠍꠟꠣꠄ,
ꠀꠞ ꠝꠥꠍꠣꠚꠤꠞ ꠢꠣꠟꠔꠦ ꠀꠝꠣꠞꠦ ꠀꠡꠞꠄ ꠖꠤꠍꠟꠣꠄ।
৩৬ ꠀꠝꠤ ꠎꠦꠛꠟꠣ ꠃꠖꠟꠣ ꠀꠍꠟꠣꠝ,
ꠔꠥꠝꠞꠣ ꠇꠣꠙꠠ ꠖꠤꠍꠟꠣꠄ,
ꠛꠦꠝꠣꠞꠞ ꠡꠝꠄ ꠈꠦꠎꠝꠔ ꠇꠞꠍꠟꠣꠄ,
ꠀꠞ ꠎꠦꠟ ꠈꠣꠘꠣꠔ ꠀꠝꠣꠞꠦ ꠖꠦꠈꠣꠔ ꠉꠦꠍꠟꠣꠄ।’
৩৭ “ꠅꠃ ꠡꠝꠄ ꠢꠃ ꠀꠟ꠆ꠟꠣꠅꠀꠟꠣ ꠝꠣꠘꠡꠦ ꠇꠁꠛꠣ,
‘ꠝꠣꠟꠤꠇ,
ꠀꠙꠘꠣꠞ ꠜꠥꠈ ꠟꠣꠉꠣꠄ ꠀꠝꠞꠣ ꠇꠥꠘ ꠡꠝꠄ ꠀꠙꠘꠣꠞꠦ ꠈꠣꠅꠀꠁꠟꠣꠝ?
ꠇꠥꠘ ꠡꠝꠄ ꠀꠙꠘꠣꠞꠦ ꠙꠣꠘꠤ ꠖꠤꠟꠣꠝ?
৩৮ ꠀꠞ ꠇꠥꠘ ꠡꠝꠄ ꠝꠥꠍꠣꠚꠤꠞ ꠢꠣꠟꠔꠦ ꠀꠙꠘꠣꠞꠦ ꠀꠡꠞꠄ ꠖꠤꠟꠣꠝ,
ꠈꠣꠟꠤ ꠉꠣ ꠖꠦꠈꠤꠀ ꠇꠥꠘ ꠡꠝꠄ ꠇꠣꠙꠠ ꠖꠤꠟꠣꠝ?
৩৯ ꠀꠞ ꠇꠥꠘ ꠡꠝꠄꠃ ꠛꠣ ꠛꠦꠝꠣꠞꠤ ꠢꠣꠟꠔꠅ ꠀꠙꠘꠣꠞ ꠈꠦꠎꠝꠔ ꠇꠞꠟꠣꠝ,
ꠛꠣ ꠎꠦꠟ ꠈꠣꠘꠣꠔ ꠖꠦꠈꠣꠔ ꠉꠦꠟꠣꠝ?’
৪০ ꠅꠃ ꠡꠝꠄ ꠛꠣꠖꠡꠣꠄ ꠔꠣꠞꠣꠞꠦ ꠇꠁꠛꠣ,
‘ꠀꠝꠤ ꠢꠇ ꠇꠕꠣ ꠇꠁꠞꠣꠝ,
ꠀꠝꠣꠞ ꠅꠃ ꠢꠥꠞꠥ-ꠝꠥꠞꠥ ꠄꠇꠎꠘ ꠝꠣꠘꠡꠞ ꠟꠣꠉꠤ ꠔꠥꠝꠞꠣ ꠎꠦꠛꠟꠣ ꠁꠔꠣ ꠇꠞꠍ,
ꠄꠞ ꠝꠣꠘꠤ ꠀꠝꠣꠞꠦꠃ ꠇꠞꠍ।’
৪১ ꠛꠣꠖꠦ ꠛꠣꠖꠡꠣꠄ ꠔꠣꠘ ꠛꠣꠃ ꠉꠣꠟꠣꠞ ꠝꠣꠘꠡꠞꠦ ꠇꠁꠛꠣ,
‘ꠅ ꠟꠣꠘ꠆ꠘꠔꠤꠞ ꠖꠟ,
ꠀꠝꠣꠞ ꠍꠣꠝꠘ ꠕꠣꠇꠤ ꠜꠣꠉꠅ।
ꠁꠛꠟꠤꠍ-ꠡꠄꠔꠣꠘ ꠀꠞ ꠔꠣꠞ ꠌꠣꠝꠍꠣ ꠎꠤꠘ꠆ꠘꠣꠔ ꠅꠇꠟꠞ ꠟꠣꠉꠤ ꠖꠥꠎꠈꠞ ꠎꠦ ꠀꠉꠥꠁꠘ ꠔꠤꠀꠞ ꠇꠞꠣ ꠅꠁꠍꠦ,
ꠢꠘꠅ ꠎꠣꠅ।
৪২ ꠀꠝꠣꠞ ꠙꠦꠐꠅ ꠜꠥꠈꠞ ꠇꠣꠟꠅ ꠔꠥꠝꠞꠣ ꠀꠝꠣꠞꠦ ꠈꠣꠅꠀꠁꠍ ꠘꠣ,
ꠙꠤꠀꠍꠞ ꠡꠝꠄ ꠙꠣꠘꠤ ꠖꠤꠍ ꠘꠣ।
৪৩ ꠀꠝꠣꠞ ꠝꠥꠍꠣꠚꠤꠞ ꠢꠣꠟꠔꠅ ꠞꠁꠛꠣꠞ ꠀꠡꠞꠄ ꠖꠤꠍ ꠘꠣ,
ꠀꠝꠤ ꠎꠦꠛꠟꠣ ꠃꠖꠟꠣ ꠀꠍꠟꠣꠝ,
ꠇꠣꠙꠠ ꠖꠤꠍ ꠘꠣ,
ꠛꠦꠝꠣꠞꠞ ꠡꠝꠄ ꠌꠣꠁꠍ ꠘꠣ,
ꠀꠝꠣꠞꠦ ꠖꠦꠈꠣꠞ ꠟꠣꠉꠤ ꠎꠦꠟꠈꠣꠘꠣꠔꠅ ꠉꠦꠍ ꠘꠣ।’
৪৪ “ꠅꠃ ꠡꠝꠄ ꠔꠣꠞꠣ ꠇꠁꠛꠣ,
‘ꠢꠥꠎꠥꠞ,
ꠀꠝꠞꠣ ꠇꠥꠘ ꠡꠝꠄ ꠁꠔꠣ ꠇꠞꠟꠣꠝ?
ꠀꠙꠘꠣꠞꠦ ꠜꠥꠇꠣꠡꠤ,
ꠙꠤꠀꠍꠤ,
ꠝꠥꠍꠣꠚꠤꠞ,
ꠃꠖꠟꠣ ꠉꠔꠞ,
ꠛꠦꠝꠣꠞꠤ ꠀꠞ ꠎꠦꠟ ꠈꠣꠘꠣꠔ ꠖꠦꠈꠤꠀꠅ ꠡꠣꠁꠎ꠆ꠎ ꠇꠞꠟꠣꠝ ꠘꠣ?’
৪৫ ꠛꠣꠖꠡꠣꠄ ꠔꠣꠞꠣꠞꠦ ꠇꠁꠛꠣ,
‘ꠀꠝꠤ ꠢꠇ ꠇꠕꠣ ꠇꠁꠞꠣꠝ,
ꠀꠝꠣꠞ ꠅꠃ ꠢꠥꠞꠥ-ꠝꠥꠞꠥ ꠄꠇꠎꠘ ꠝꠣꠘꠡꠞ ꠟꠣꠉꠤꠃ ꠔꠥꠝꠞꠣ ꠎꠦꠛꠟꠣ ꠁꠔꠣ ꠇꠞꠍ ꠘꠣ,
ꠄꠞ ꠝꠣꠘꠤ ꠀꠝꠣꠞꠦꠃ ꠇꠞꠍ ꠘꠣ।’ ”
৪৬ ꠢꠦꠡꠦ ꠁꠍꠣꠄ ꠇꠁꠟꠣ,
“ꠅꠃ ꠘꠣꠚꠞꠝꠣꠘ ꠅꠇꠟꠦ ꠀꠈꠦꠞꠣꠔꠅ ꠌꠤꠞꠇꠣꠟ ꠡꠣꠎꠣ ꠙꠣꠁꠛꠣ,
ꠅꠁꠟꠦ ꠀꠟ꠆ꠟꠣꠅꠀꠟꠣ ꠝꠣꠘꠡꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠛꠣ।”