ꠢꠣꠇꠤꠝ ꠙꠤꠟꠣꠔꠞ ꠍꠣꠝꠘꠦ ꠢꠎꠞꠔ ꠁꠍꠣ
২৭
১ ꠛꠤꠀꠘꠦ ꠃꠑꠤꠀ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠢꠎꠞꠔ ꠁꠍꠣꠞꠦ ꠇꠣꠔꠟ ꠇꠞꠣꠞ ꠙꠞꠣꠝꠤꠡ ꠇꠞꠟꠣ।
২ ꠔꠣꠞꠣ ꠔꠣꠘꠞꠦ ꠛꠣꠘ꠆ꠖꠤꠀ ꠞꠥꠝꠣꠘ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠟꠁꠀ ꠉꠦꠟꠣ।
ꠁꠢꠥꠖꠣꠞ ꠝꠞꠘ
৩ ꠎꠦ ꠎꠘꠦ ꠢꠎꠞꠔ ꠁꠍꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠍꠤꠟ,
ꠢꠃ ꠁꠢꠥꠖꠣꠄ ꠎꠦꠛꠟꠣ ꠖꠦꠈꠟ ꠛꠤꠌꠣꠞꠅ ꠔꠣꠘꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠍꠦ,
ꠅꠃ ꠔꠣꠞ ꠜꠤꠔꠞꠦ ꠈꠥꠛ ꠖꠥꠈ ꠢꠣꠝꠣꠁꠟ।
ꠢꠦ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠢꠃ ꠞꠥꠙꠣꠞ ꠔꠤꠡ ꠐꠦꠇꠣ ꠟꠁꠀ ꠀꠁꠀ ꠇꠂꠟ,
৪ “ꠀꠝꠤ ꠔ ꠄꠇꠎꠘ ꠘꠤ-ꠅꠙꠞꠣꠗꠤ ꠝꠣꠘꠡꠞꠦ ꠇꠣꠔꠟ ꠇꠞꠣꠞ ꠟꠣꠉꠤ ꠗꠞꠣꠁ ꠖꠤꠀ ꠉꠥꠘꠣ ꠇꠞꠍꠤ।”
ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠁꠟꠣ,
“ꠔꠦꠃ ꠀꠝꠞꠣꠞ ꠇꠤꠔꠣ ꠅꠁꠟ?
ꠁꠔꠣ ꠔ ꠔꠥꠝꠣꠞ ꠛꠦꠙꠣꠞ।”
৫ ꠅꠃ ꠡꠝꠄ ꠁꠢꠥꠖꠣꠄ ꠢꠃ ꠔꠤꠡ ꠐꠦꠇꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠁꠐꠣ ꠝꠣꠞꠤ ꠚꠣꠟꠣꠁꠀ ꠉꠦꠟꠉꠤ,
ꠉꠤꠀ ꠘꠤꠎꠦ ꠘꠤꠎꠦꠃ ꠚꠣꠡ ꠟꠣꠉꠤꠀ ꠝꠞꠤꠉꠦꠟ।
৬ ꠛꠠ ꠁꠝꠣꠝ ꠅꠇꠟꠦ ꠁ ꠐꠦꠇꠣ ꠀꠔꠅ ꠟꠁꠀ ꠇꠁꠟꠣ,
“ꠁꠉꠥꠁꠘ ꠔ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠔꠢꠛꠤꠟꠅ ꠞꠣꠈꠣ ꠑꠤꠇ ꠘꠣꠄ,
ꠇꠣꠞꠘ ꠁꠐꠣ ꠅꠁꠟ ꠟꠃꠞ ꠖꠣꠝ।”
৭ ꠛꠣꠖꠦ ꠔꠣꠞꠣ ꠙꠞꠣꠝꠤꠡ ꠇꠞꠤꠀ ꠅꠃ ꠐꠦꠇꠣꠖꠤ ꠝꠥꠍꠣꠚꠤꠞ ꠝꠣꠘꠡꠞ ꠇꠛꠞꠡ꠆ꠕꠣꠘꠞ ꠟꠣꠉꠤ ꠄꠇ ꠇꠥꠝꠣꠞꠞ ꠉꠦꠍ ꠕꠣꠇꠤ ꠎꠣꠉꠣ ꠟꠁꠟꠣ।
৮ ꠄꠞꠟꠣꠉꠤ ꠅꠃ ꠎꠣꠉꠣꠞꠦ ꠅꠈꠘꠅ ‘ꠟꠃꠞ ꠎꠣꠉꠣ’ ꠇꠅꠀ ꠅꠄ।
৯ ꠁꠔꠣ ꠅꠀꠄ,
ꠁꠀꠞꠝꠤꠀ ꠘꠛꠤꠞ ꠝꠣꠎꠖꠤ ꠎꠦꠔꠣ ꠛꠣꠔꠣꠁꠟ ꠅꠁꠍꠤꠟ,
ꠅꠔꠣ ꠚꠟꠤꠉꠦꠟ।
ꠔꠣꠁꠘ ꠇꠁꠍꠟꠣ,
“ꠔꠣꠞꠣ ꠎꠦ ꠔꠤꠡ ꠐꠦꠇꠣ ꠘꠤꠟ,
ꠁꠇꠐꠣ ꠅꠁꠟ ꠔꠣꠘ ꠖꠣꠝ।
ꠛꠘꠤ ꠁꠍꠞꠣꠁꠟꠦ ꠔꠣꠘ ꠅꠃ ꠖꠣꠝ ꠡꠣꠁꠛꠡ꠆ꠔ ꠇꠞꠍꠤꠟ।
১০ ꠀꠟ꠆ꠟꠣꠄ ꠀꠝꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠂꠘ,
ꠅꠟꠣꠃ ꠔꠣꠞꠣ ꠇꠥꠝꠣꠞꠞ ꠎꠣꠉꠣ ꠟꠅꠀꠞ ꠟꠣꠉꠤ ꠐꠦꠇꠣ ꠉꠥꠁꠘ ꠖꠤꠟ।”
ꠢꠣꠇꠤꠝ ꠙꠤꠟꠣꠔꠞ ꠀꠖꠣꠟꠔꠅ ꠢꠎꠞꠔ ꠁꠍꠣ
১১ ꠢꠎꠞꠔ ꠁꠍꠣꠞꠦ ꠞꠥꠝꠣꠘ ꠙꠞꠗꠣꠘ ꠢꠣꠇꠤꠝ ꠙꠤꠟꠣꠔꠞ ꠀꠖꠣꠟꠔꠅ ꠀꠎꠤꠞ ꠇꠞꠣ ꠅꠁꠟ।
ꠢꠣꠇꠤꠝꠦ ꠔꠣꠘꠞꠦ ꠎꠤꠇꠣꠁꠟꠣ,
“ꠇꠤꠔꠣ ꠛꠣ,
ꠔꠥꠝꠤ ꠁꠢꠥꠖꠤ ꠅꠇꠟꠞ ꠛꠣꠖꠡꠣ ꠘꠤ?”
ꠔꠣꠁꠘ ꠇꠁꠟꠣ,
“ꠎꠤꠅꠄ,
ꠀꠙꠘꠦ ꠑꠤꠇꠃ ꠇꠁꠞꠣ।”
১২ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠔꠣꠘ ꠘꠣꠝꠦ ꠛꠃꠔ ꠘꠣꠟꠤꠡ ꠖꠤꠟꠣ।
ꠅꠁꠟꠦ ꠁꠍꠣꠄ ꠇꠥꠘꠥ ꠎꠥꠀꠙ ꠖꠤꠟꠣ ꠘꠣ।
১৩ ꠅꠃ ꠡꠝꠄ ꠙꠤꠟꠣꠔꠦ ꠎꠤꠇꠣꠁꠟꠣ,
“ꠔꠥꠝꠤ ꠇꠥꠘꠥ ꠎꠥꠀꠙ ꠖꠤꠔꠣꠄ ꠘꠣ ꠘꠤ?
ꠖꠦꠈꠞꠣꠄ ꠘꠤ,
ꠔꠣꠞꠣ ꠔꠥꠝꠣꠞ ꠛꠤꠞꠥꠖ꠆ꠖꠦ ꠇꠔ ꠘꠣꠟꠤꠡ ꠖꠤꠞꠣ।”
১৪ ꠅꠁꠟꠦ ꠁꠍꠣꠄ ꠁꠔꠣꠞ ꠄꠇꠈꠣꠘꠅ ꠎꠥꠀꠙ ꠘꠣ ꠖꠦꠅꠀꠄ ꠙꠤꠟꠣꠔ ꠈꠥꠛ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
১৫ ꠖꠦꠡꠞ ꠙꠞꠗꠣꠘ ꠢꠣꠇꠤꠝꠞ ꠘꠤꠅꠝ ꠀꠍꠤꠟ,
ꠀꠎꠣꠖꠤ ꠁꠖꠞ ꠡꠝꠄ ꠝꠣꠘꠡꠞ ꠙꠍꠘ꠆ꠖ ꠝꠣꠚꠤꠇ ꠄꠇꠎꠘ ꠀꠎꠔꠤꠞꠦ ꠈꠣꠟꠣꠍ ꠖꠤꠔꠣ।
১৬ ꠅꠃ ꠡꠝꠄ ꠁꠍꠣ-ꠛꠣꠞꠣꠛ꠆ꠛꠣ ꠘꠣꠝꠞ ꠄꠇ ꠘꠣꠝꠇꠞꠣ ꠀꠎꠔꠤ ꠎꠦꠟꠅ ꠀꠍꠤꠟ।
১৭ ꠢꠇꠟ ꠝꠣꠘꠥꠡ ꠄꠇꠈꠣꠘꠅ ꠖꠟꠣ ꠅꠀꠞ ꠛꠣꠖꠦ ꠢꠣꠇꠤꠝ ꠙꠤꠟꠣꠔꠦ ꠔꠣꠞꠣꠞꠦ ꠎꠤꠇꠣꠁꠟꠣ,
“ꠔꠥꠝꠞꠣ ꠇꠤꠔꠣ ꠇꠅ?
ꠀꠝꠤ ꠇꠣꠞꠦ ꠍꠣꠠꠔꠣꠝ,
ꠁꠍꠣ-ꠛꠣꠞꠣꠛ꠆ꠛꠣꠞꠦ,
ꠘꠣ ꠢꠃ ꠁꠍꠣꠞꠦ,
ꠎꠣꠞꠦ ꠀꠟ-ꠝꠍꠤ ꠇꠅꠀ ꠅꠄ?”
১৮ ꠙꠤꠟꠣꠔꠦ ꠎꠣꠘꠔꠣ,
ꠛꠠ ꠁꠝꠣꠝ ꠅꠇꠟꠦ ꠁꠋꠡꠣ ꠇꠞꠤꠀ ꠢꠎꠞꠔ ꠁꠍꠣꠞꠦ ꠘꠤꠀ ꠔꠣꠘ ꠀꠔꠅ ꠖꠤꠍꠂꠘ।
১৯ ꠙꠤꠟꠣꠔ ꠎꠦꠛꠟꠣ ꠢꠣꠇꠤꠝꠞ ꠀꠡꠘꠅ ꠛꠅꠀꠔ,
ꠅꠃ ꠡꠝꠄ ꠔꠣꠘ ꠛꠤꠛꠤꠄ ꠈꠛꠞ ꠙꠣꠑꠣꠁꠀ ꠎꠣꠘꠣꠁꠟꠣ,
“ꠅꠃ ꠘꠤ-ꠅꠙꠞꠣꠗ ꠝꠣꠘꠡꠞꠦ ꠔꠥꠝꠤ ꠇꠥꠘ꠆ꠔꠣ ꠇꠞꠤꠅ ꠘꠣ,
ꠔꠣꠘ ꠛꠦꠙꠣꠞꠦ ꠀꠝꠤ ꠀꠁꠎ ꠄꠇꠐꠣ ꠈꠥꠀꠛ ꠖꠦꠈꠤꠀ ꠛꠠ ꠖꠥꠈ ꠟꠣꠉꠍꠦ।”
২০ ꠅꠁꠟꠦ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠝꠣꠘꠡꠞꠦ ꠃꠍꠇꠣꠁꠀ ꠖꠤꠟꠣ,
ꠔꠣꠞꠣ ꠎꠣꠘꠥ ꠛꠣꠞꠣꠛ꠆ꠛꠣꠞ ꠝꠥꠇ꠆ꠔꠤ ꠌꠣꠁꠘ ꠀꠞ ꠁꠍꠣꠞꠦ ꠇꠣꠔꠟ ꠇꠞꠣꠞ ꠇꠕꠣ ꠇꠂꠘ।
২১ ꠛꠣꠖꠦ ꠙꠞꠗꠣꠘ ꠢꠣꠇꠤꠝ ꠙꠤꠟꠣꠔꠦ ꠅꠘꠞ ꠝꠣꠘꠡꠞꠦ ꠎꠤꠇꠣꠁꠟꠣ,
“ꠅꠃ ꠖꠥꠁꠅꠎꠘꠞ ꠝꠣꠎꠦ ꠀꠝꠤ ꠇꠣꠞꠦ ꠍꠣꠠꠔꠣꠝ?”
ꠔꠣꠞꠣ ꠇꠁꠟꠣ,
“ꠛꠣꠞꠣꠛ꠆ꠛꠣꠞꠦ।”
২২ ꠔꠦꠃ ꠙꠤꠟꠣꠔꠦ ꠔꠣꠞꠣꠞꠦ ꠎꠤꠇꠣꠁꠟꠣ,
“ꠔꠦ ꠔꠥꠝꠞꠣ ꠎꠣꠞꠦ ꠀꠟ-ꠝꠍꠤ ꠇꠅ,
ꠢꠃ ꠁꠍꠣꠞꠦ ꠇꠤꠔꠣ ꠇꠞꠔꠣꠝ?”
ꠔꠣꠞꠣ ꠢꠇꠟꠦ ꠌꠤꠟ꠆ꠟꠣꠘꠤ ꠟꠣꠉꠣꠁꠟ,
“ꠔꠣꠞꠦ ꠍꠟꠤꠛꠅ ꠉꠣꠕꠤꠀ ꠝꠣꠞꠅ।”
২৩ ꠔꠣꠁꠘ ꠇꠁꠟꠣ,
“ꠇꠦꠘꠦ,
ꠢꠦ ꠇꠤꠔꠣ ꠖꠥꠡ ꠇꠞꠍꠦ?”
ꠅꠁꠟꠦ ꠝꠣꠘꠡꠦ ꠀꠞꠅ ꠎꠥꠞꠦ ꠎꠥꠞꠦ ꠝꠤꠍꠤꠟ ꠟꠣꠉꠣꠁꠟ,
“ꠍꠟꠤꠛꠅ ꠖꠦꠅ,
ꠍꠟꠤꠛꠅ ꠖꠦꠅ।”
২৪ ꠙꠤꠟꠣꠔꠦ ꠎꠦꠛꠟꠣ ꠖꠦꠈꠟꠣ,
ꠔꠣꠁꠘ ꠇꠥꠘꠥꠝꠘ꠆ꠔꠦꠃ ꠁꠍꠣꠞꠦ ꠛꠣꠌꠣꠁꠔꠣ ꠙꠣꠞꠞꠣ ꠘꠣ,
ꠛꠞꠋ ꠉꠘ꠆ꠒꠉꠥꠟ ꠀꠞꠅ ꠛꠣꠠꠦꠞ,
ꠅꠃ ꠔꠣꠁꠘ ꠙꠣꠘꠤ ꠖꠤꠀ ꠢꠇꠟꠞ ꠍꠣꠝꠘꠦ ꠔꠣꠘ ꠀꠔ ꠗꠁꠀ ꠇꠁꠟꠣ,
“ꠁ ꠝꠣꠘꠡꠞ ꠟꠃꠞ ꠖꠣꠄꠁ ꠀꠝꠤ ꠘꠣꠄ,
ꠔꠥꠝꠞꠣꠃ ꠄꠞ ꠎꠥꠀꠙ ꠖꠤꠛꠣꠄ।”
২৫ ꠔꠦꠃ ꠢꠇꠟ ꠝꠣꠘꠡꠦ ꠇꠁꠟꠣ,
“ꠑꠤꠇ ꠀꠍꠦ,
ꠀꠝꠞꠣ ꠀꠞ ꠀꠝꠞꠣꠞ ꠀꠅꠟꠣꠖ ꠅꠇꠟ ꠁ ꠟꠃꠞ ꠖꠣꠄꠁ ꠅꠁꠝꠥ।”
২৬ ꠔꠦꠃ ꠙꠤꠟꠣꠔꠦ ꠔꠣꠞꠣꠞꠦ ꠈꠥꠡꠤ ꠇꠞꠔꠣ ꠇꠞꠤ ꠛꠣꠞꠣꠛ꠆ꠛꠣꠞꠦ ꠈꠣꠟꠣꠍ ꠖꠤꠟꠣꠁꠟꠣ।
ꠀꠞ ꠁꠍꠣꠞꠦ ꠛꠦꠡ ꠇꠞꠤ ꠌꠣꠛꠥꠇ ꠝꠣꠞꠤꠀ,
ꠍꠟꠤꠛꠅ ꠖꠦꠅꠀꠞ ꠢꠥꠇꠥꠝ ꠖꠤꠟꠣ।
(ꠍꠟꠤꠛ ꠅꠁꠟ ꠟꠣꠇꠠꠤꠖꠤ ꠛꠣꠘꠣꠁꠟ ꠝꠣꠘꠡꠞꠦ ꠟꠐꠇꠣꠁꠀ ꠝꠣꠞꠣꠞ ꠄꠇ ꠎꠤꠘꠤꠡ।)
ꠍꠤꠙꠣꠁ ꠅꠇꠟꠞ ꠑꠣꠐ꠆ꠐꠣ-ꠝꠡꠇꠞꠣ
২৭ ꠛꠣꠖꠦ ꠙꠤꠟꠣꠔꠞ ꠍꠤꠙꠣꠁ ꠅꠇꠟꠦ ꠁꠍꠣꠞꠦ ꠗꠞꠤꠀ ꠔꠣꠞꠣꠞ ꠇꠦꠝ꠆ꠙꠞ ꠜꠤꠔꠞꠦ ꠟꠁꠀ ꠉꠦꠟ।
ꠢꠘꠅ ꠀꠡ꠆ꠔꠣ ꠍꠤꠙꠣꠁ ꠖꠟ ꠖꠤꠀ ꠔꠣꠘꠞꠦ ꠛꠦꠞ ꠇꠞꠤ ꠞꠣꠈꠟ।
২৮ ꠔꠣꠞꠣ ꠔꠣꠘ ꠚꠤꠘ꠆ꠘꠞ ꠇꠣꠙꠠ-ꠌꠥꠙꠠ ꠈꠥꠟꠤꠀ,
ꠟꠣꠟ-ꠛꠣꠁꠋꠉꠘꠤ ꠞꠋꠉꠞ ꠛꠣꠖꠡꠣꠁ ꠟꠦꠛꠣꠍ ꠚꠤꠘ꠆ꠖꠣꠁꠟ।
২৯ ꠀꠞ ꠉꠍꠣ-ꠇꠣꠐꠣ ꠖꠤꠀ ꠞꠣꠎ-ꠝꠥꠇꠥꠐ ꠛꠣꠘꠣꠁꠀ ꠔꠣꠘ ꠝꠣꠕꠣꠔ ꠖꠤꠟ।
ꠔꠣꠘ ꠒꠣꠁꠘ ꠀꠔꠅ ꠖꠤꠟ ꠄꠇꠐꠣ ꠞꠣꠎ-ꠟꠣꠑꠤ।
ꠔꠣꠘꠦ ꠁꠎ꠆ꠎꠔ ꠖꠦꠈꠣꠘꠤꠞ ꠜꠣꠘ ꠇꠞꠤꠀ ꠔꠣꠘ ꠍꠣꠝꠘꠦ ꠀꠐꠥ ꠉꠣꠠꠤꠀ ꠛꠁꠀ ꠇꠂꠟ,
“ꠁꠢꠥꠖꠤꠞ ꠛꠣꠖꠡꠣ,
ꠝꠣꠞꠢꠣꠛꠣ।”
৩০ ꠅꠃ ꠡꠝꠄ ꠔꠣꠞꠣ ꠔꠣꠘ ꠃꠙꠞꠦ ꠍꠦꠚ ꠖꠤꠟ ꠀꠞ ꠅꠃ ꠟꠣꠑꠤ ꠖꠤꠀ ꠛꠣꠞꠦ ꠛꠣꠞꠦ ꠔꠣꠘ ꠝꠣꠕꠣꠔ ꠝꠣꠞꠟ।
৩১ ꠅꠃ ꠟꠣꠈꠣꠘ ꠑꠣꠐ꠆ꠐꠣ-ꠝꠡꠇꠞꠣ ꠀꠞ ꠛꠦꠔ꠆ꠔꠝꠤꠎꠤ ꠇꠞꠣꠞ ꠛꠣꠖꠦ ꠔꠣꠘ ꠚꠤꠘ꠆ꠘꠞ ꠛꠣꠁꠋꠉꠘꠤ ꠟꠦꠛꠣꠍ ꠈꠥꠟꠤꠀ,
ꠔꠣꠘ ꠘꠤꠎꠞ ꠇꠣꠙꠠ ꠚꠤꠘ꠆ꠖꠣꠁꠟ।
ꠔꠣꠘꠞꠦ ꠍꠟꠤꠛꠅ ꠘꠤꠀ ꠇꠣꠔꠟ ꠇꠞꠣꠞ ꠟꠣꠉꠤ ꠞꠅꠀꠘꠣ ꠖꠤꠟ।
ꠍꠟꠤꠛꠞ ꠃꠙꠞꠦ ꠢꠎꠞꠔ ꠁꠍꠣ
৩২ ꠍꠤꠙꠣꠁ ꠖꠟꠦ ꠁꠍꠣꠞꠦ ꠟꠁꠀ ꠎꠣꠁꠞꠣ,
ꠅꠃ ꠡꠝꠄ ꠔꠣꠞꠣ ꠇꠥꠞꠤꠘꠤ ꠄꠟꠣꠇꠣꠞ ꠍꠣꠁꠝꠘ ꠘꠣꠝꠞ ꠄꠇꠎꠘ ꠝꠣꠘꠡꠞꠦ ꠖꠦꠈꠟ।
ꠍꠤꠙꠣꠁ ꠅꠇꠟꠦ ꠎꠥꠞ ꠇꠞꠤꠀ ꠄꠘꠦꠖꠤ ꠢꠃ ꠍꠟꠤꠛ ꠛꠅꠀꠁꠀ ꠘꠦꠅꠀꠁꠟ।
৩৩ ꠔꠣꠞꠣ ꠁꠍꠣꠞꠦ ꠟꠁꠀ ꠉꠟꠉꠣꠕꠣ,
ꠝꠣꠘꠤ ꠇꠟ꠆ꠟꠣꠞ ꠌꠣꠠ ꠘꠣꠝꠞ ꠎꠣꠉꠣꠔ ꠉꠦꠟ।
৩৪ ꠢꠘꠅ ꠘꠤꠀ ꠢꠣꠞꠤ ꠝꠥꠞꠣ ꠘꠣꠝꠞ ꠅꠡꠥꠗ ꠙꠥꠞꠣꠁꠟ ꠀꠋꠉꠥꠞꠞ ꠡꠞꠛꠔ ꠔꠣꠘ ꠝꠥꠈꠅ ꠖꠤꠟ,
ꠅꠁꠟꠦ ꠔꠣꠁꠘ ꠁꠔꠣ ꠈꠣꠁꠟꠣ ꠘꠣ।
৩৫ ꠛꠣꠖꠦ ꠔꠣꠞꠣ ꠁꠍꠣꠞꠦ ꠘꠤꠀ ꠅꠃ ꠍꠟꠤꠛꠅ ꠉꠣꠕꠤꠟ।
ꠍꠤꠙꠣꠁ ꠅꠇꠟꠦ ꠔꠣꠘ ꠇꠣꠙꠠ-ꠌꠥꠙꠠ ꠛꠣꠐꠤꠀ ꠘꠦꠅꠀꠞ ꠟꠣꠉꠤ ꠟꠐꠣꠞꠤ ꠝꠣꠞꠤꠀ ꠜꠣꠁꠉ꠆ꠉ ꠙꠞꠤꠇ꠆ꠇꠣ ꠇꠞꠟ।
৩৬ ꠀꠞ ꠔꠣꠞꠣ ꠅꠘꠅ ꠛꠁꠀ ꠔꠣꠘꠞꠦ ꠙꠣꠞꠣ ꠖꠤꠟ।
৩৭ ꠍꠟꠤꠛꠅ ꠔꠣꠘ ꠝꠣꠕꠣꠞ ꠃꠙꠞꠦ ꠅꠙꠞꠣꠗ-ꠘꠣꠝꠣꠞ ꠝꠣꠎꠦ ꠟꠦꠈꠟ,
“ꠄꠘ ꠘꠣꠝ ꠁꠍꠣ,
ꠁꠢꠥꠖꠤꠞ ꠛꠣꠖꠡꠣ।”
৩৮ ꠖꠥꠁꠎꠘ ꠒꠣꠇꠣꠁꠔꠞꠦꠅ ꠔꠣꠘ ꠟꠉꠦ ꠟꠐꠇꠣꠁꠟ ꠅꠁꠟ,
ꠄꠇꠎꠘ ꠒꠣꠁꠘ ꠉꠣꠟꠣꠔ,
ꠅꠁꠘ꠆ꠘꠎꠘ ꠛꠣꠃ ꠉꠣꠟꠣꠔ।
৩৯ ꠙꠕꠦꠖꠤ ꠎꠦꠞꠣ ꠎꠣꠅꠀꠔ ꠀꠍꠤꠟ ꠔꠣꠞꠣ ꠝꠣꠕꠣ ꠟꠣꠠꠣꠁꠀ ꠁꠍꠣꠞꠦ ꠍꠤꠠꠣꠁꠀ ꠇꠂꠟ,
৪০ “ꠅꠂ ꠝꠤꠀ,
ꠔꠥꠝꠤ ꠛꠥꠟꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠊꠞ ꠜꠣꠋꠉꠤꠀ ꠔꠤꠘ ꠖꠤꠘꠞ ꠝꠣꠎꠦ ꠢꠤꠞꠛꠣꠞ ꠛꠣꠘꠣꠁꠟꠤꠛꠣꠄ!
ꠔꠦ ꠅꠈꠘ ꠘꠤꠎꠞ ꠎꠣꠘ ꠛꠣꠌꠣꠅ ꠘꠣ।
ꠔꠥꠝꠤ ꠛꠥꠟꠦ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ,
ꠔꠦ ꠍꠟꠤꠛ ꠕꠣꠇꠤ ꠟꠣꠝꠤꠀ ꠀꠅ ꠘꠣ।”
৪১ ꠛꠠ ꠁꠝꠣꠝ,
ꠝꠃꠟꠣꠘꠣ ꠀꠞ ꠝꠥꠞꠛ꠆ꠛꠤ ꠅꠇꠟꠦꠅ ꠔꠣꠘꠞꠦ ꠍꠤꠠꠣꠁꠀ ꠇꠁꠟꠣ,
৪২ “ꠢꠦ ꠛꠥꠟꠦ ꠝꠣꠘꠡꠞ ꠎꠣꠘ ꠛꠣꠌꠣꠁꠔ,
ꠅꠈꠘ ꠔ ꠘꠤꠎꠞ ꠎꠣꠘꠃ ꠛꠣꠌꠣꠁꠔ ꠙꠣꠞꠦꠞ ꠘꠣ।
ꠢꠤꠞꠛꠣꠞ ꠛꠘꠤ ꠁꠍꠞꠣꠁꠟꠞ ꠛꠣꠖꠡꠣꠅ ꠛꠥꠟꠦ ꠢꠦ!
ꠔꠦ ꠅꠈꠘ ꠙꠣꠞꠟꠦ ꠍꠟꠤꠛ ꠕꠣꠇꠤ ꠟꠣꠝꠤꠀ ꠀꠃꠇ,
ꠔꠦꠃ ꠀꠝꠞꠣꠅ ꠅꠔꠣ ꠖꠦꠈꠤꠀ ꠔꠣꠞ ꠃꠙꠞꠦ ꠁꠝꠣꠘ ꠀꠘꠝꠥ।
৪৩ ꠢꠦ ꠔ ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠇꠞꠦ।
ꠅꠈꠘ ꠀꠟ꠆ꠟꠣ ꠎꠥꠖꠤ ꠔꠣꠞ ꠃꠙꠞꠦ ꠈꠥꠡꠤ ꠕꠣꠇꠂꠘ,
ꠔꠦ ꠔꠣꠞꠦ ꠛꠣꠌꠣꠃꠇ꠆ꠇꠣ।
ꠢꠦ ꠔ ꠖꠣꠛꠤ ꠇꠞꠔ,
ꠢꠦ ꠁꠛꠘꠥꠟ꠆ꠟꠣ,
ꠀꠟ꠆ꠟꠣ ꠙꠣꠇꠞ ꠈꠣꠍ ꠝꠣꠄꠀꠞ ꠎꠘ।”
৪৪ ꠔꠣꠘ ꠒꠣꠁꠘꠦ-ꠛꠣꠃꠄ ꠎꠦ ꠖꠥꠁ ꠒꠣꠇꠣꠁꠔꠞꠦ ꠍꠟꠤꠛꠅ ꠟꠐꠇꠣꠁꠟ ꠅꠁꠍꠤꠟ,
ꠔꠣꠞꠣꠅ ꠔꠣꠘꠞꠦ ꠅꠔꠣ ꠇꠁꠀ ꠍꠤꠠꠣꠁꠟ।
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠚꠣꠔ
৪৫ ꠅꠃ ꠖꠤꠘ ꠖꠥꠁꠚꠞ ꠕꠣꠇꠤ ꠎꠥꠢꠞꠞ ꠛꠣꠖ ꠙꠞ꠆ꠎꠘ꠆ꠔ ꠔꠤꠘ ꠊꠘ꠆ꠐꠣ ꠀꠡ꠆ꠔꠣ ꠖꠦꠡ ꠀꠘ꠆ꠖꠣꠁꠞ ꠅꠁꠉꠦꠟ।
৪৬ ꠀꠞ ꠁꠍꠣꠄ ꠈꠥꠛ ꠎꠥꠞꠦ ꠎꠥꠞꠦ ꠇꠁꠟꠣ,
“ꠄꠟꠥꠁ,
ꠄꠟꠥꠁ,
ꠟꠣꠝꠣ ꠡꠣꠛꠣꠇ꠆ꠔꠣꠘꠤ?”
ꠝꠣꠘꠤ,
“ꠅ ꠀꠝꠣꠞ ꠀꠟ꠆ꠟꠣ,
ꠀꠝꠣꠞ ꠝꠃꠟꠣ,
ꠔꠥꠝꠤ ꠇꠦꠘꠦ ꠀꠝꠣꠞ ꠟꠉ ꠍꠣꠠꠤ ꠖꠤꠟꠣꠄ?”
৪৭ ꠅꠃ ꠡꠝꠄ ꠔꠣꠘ ꠗꠣꠞꠅ ꠎꠣꠞꠣ ꠃꠛꠣ ꠀꠍꠤꠟ,
ꠔꠣꠞꠣ ꠁꠈꠣꠘ ꠢꠥꠘꠤꠀ ꠇꠁꠟꠣ,
“ꠢꠥꠘꠅ,
ꠢꠥꠘꠅ,
ꠢꠦ ꠢꠎꠞꠔ ꠁꠟꠤꠀꠍꠞꠦ ꠒꠣꠇꠦꠞ।”
৪৮ ꠔꠣꠞꠣ ꠄꠇꠎꠘꠦ ꠖꠃꠠꠣꠁꠀ ꠉꠤꠀ ꠄꠇꠈꠣꠘ ꠔꠦꠘꠣ ꠀꠘꠤꠀ ꠐꠦꠋꠉꠣ ꠀꠋꠉꠥꠞꠞ ꠡꠞꠛꠔꠞ ꠝꠣꠎꠦ ꠜꠤꠎꠣꠁꠀ,
ꠄꠇ ꠟꠣꠑꠤꠞ ꠝꠣꠕꠣꠔ ꠛꠣꠘ꠆ꠖꠤꠀ ꠃꠌꠣ ꠇꠞꠤ ꠔꠣꠘꠞꠦ ꠈꠣꠁꠔꠦ ꠖꠤꠟ।
৪৯ ꠛꠣꠇꠤ ꠢꠇꠟꠦ ꠇꠂꠟ,
“ꠀꠁꠌ꠆ꠍꠣ,
ꠖꠦꠈꠤ ꠘꠣ,
ꠁꠟꠤꠀꠍ ꠘꠛꠤ ꠔꠣꠞꠦ ꠛꠣꠌꠣꠘꠤꠔ ꠀꠁꠘ ꠘꠤ।”
৫০ ꠢꠦꠡꠦ ꠁꠍꠣꠄ ꠢꠤꠞꠛꠣꠞ ꠎꠥꠞꠦ ꠀꠅꠀꠎ ꠇꠞꠤꠀ ꠀꠈꠦꠞꠤ ꠖꠝ ꠚꠣꠟꠣꠁꠀ ꠁꠘ꠆ꠔꠦꠇꠣꠟ ꠇꠞꠟꠣ।
৫১ ꠟꠉꠦ ꠟꠉꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠝꠣꠘꠤ ꠇꠣꠛꠣ ꠊꠞꠞ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠈꠣꠘ,
ꠃꠙꠞꠦ ꠕꠣꠇꠤ ꠔꠟ ꠙꠞ꠆ꠎꠘ꠆ꠔ ꠍꠤꠠꠤꠀ ꠖꠥꠁ ꠐꠥꠇꠞꠣ ꠅꠁꠉꠦꠟ।
ꠀꠞ ꠜꠂꠍꠣꠟꠞ ꠟꠉꠦ ꠛꠠ ꠛꠠ ꠙꠣꠔ꠆ꠔꠞ ꠅꠇꠟ ꠚꠣꠐꠤ ꠉꠦꠟ।
৫২ ꠛꠃꠔ ꠇꠄꠛꠞꠞ ꠝꠥꠈ ꠈꠥꠟꠤꠉꠦꠟ,
ꠀꠞ ꠀꠟ꠆ꠟꠣꠞ ꠝꠣꠄꠀꠞ ꠎꠦ ꠛꠘ꠆ꠖꠣ ꠅꠇꠟ ꠝꠣꠞꠣ ꠉꠦꠍꠟꠣ,
ꠄꠞꠣ ꠛꠃꠔ ꠎꠘ ꠎꠤꠘ꠆ꠖꠣ ꠅꠁꠀ ꠃꠑꠟꠣ।
৫৩ ꠔꠣꠞꠣ ꠇꠄꠛꠞ ꠕꠣꠇꠤ ꠛꠣꠞꠅꠁꠀ ꠀꠁꠟꠣ।
ꠁꠍꠣ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠢꠣꠞꠟꠦ,
ꠔꠣꠞꠣ ꠙꠛꠤꠔ꠆ꠞ ꠐꠣꠃꠘꠅ ꠉꠤꠀ ꠢꠣꠝꠣꠁꠟꠣ,
ꠀꠞ ꠛꠃꠔ ꠎꠘꠞꠦ ꠖꠦꠈꠣ ꠖꠤꠟꠣ।
৫৪ ꠙꠞꠗꠣꠘ ꠍꠤꠙꠣꠁꠞ ꠟꠉꠦ ꠀꠞꠅ ꠎꠦꠔꠣ ꠍꠤꠙꠣꠁ ꠅꠇꠟꠦ ꠁꠍꠣꠞꠦ ꠙꠣꠞꠣ ꠖꠦꠅꠀꠔ ꠀꠍꠟꠣ,
ꠔꠣꠞꠣ ꠅꠃ ꠜꠂꠍꠣꠟ ꠀꠞ ꠢꠇꠟ ꠢꠣꠟꠔ ꠖꠦꠈꠤꠀ ꠈꠥꠛ ꠒꠞꠣꠁꠀ ꠇꠁꠟꠣ,
“ꠘꠤꠌ꠆ꠌꠄ,
ꠄꠁꠘꠃ ꠀꠍꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ,
ꠁꠛꠘꠥꠟ꠆ꠟꠣ।”
৫৫ ꠉꠣꠟꠤꠟ ꠎꠤꠟꠣ ꠕꠣꠇꠤ ꠎꠦꠔꠣ ꠛꠦꠐꠤꠘ꠆ꠔꠦ ꠁꠍꠣꠞ ꠈꠦꠎꠝꠔ ꠇꠞꠣꠞ ꠟꠣꠉꠤ ꠔꠣꠘ ꠟꠉꠦ ꠅꠁꠀ ꠀꠁꠍꠟꠣ,
ꠔꠣꠞꠣꠅ ꠖꠥꠞꠁ ꠃꠛꠣꠁꠀ ꠁꠔꠣ ꠖꠦꠈꠟꠣ।
৫৬ ꠄꠞꠣꠞ ꠝꠣꠎꠦ ꠀꠍꠟꠣ ꠝꠉꠖꠤꠟꠤꠘꠤ ꠝꠞꠤꠅꠝ,
ꠁꠃꠍꠤ ꠀꠞ ꠁꠀꠇꠥꠛꠞ ꠝꠣ ꠝꠞꠤꠅꠝ,
ꠀꠞ ꠎꠤꠛꠥꠖꠤꠀꠞ ꠛꠃ।
ꠢꠎꠞꠔ ꠁꠍꠣꠞ ꠞꠅꠎꠣ ꠝꠥꠛꠣꠞꠇ
৫৭ ꠅꠃ ꠖꠤꠘ ꠢꠣꠁꠘ꠆ꠎꠣꠛꠣꠟꠣ ꠀꠞꠤꠝꠣꠕꠤꠀ ꠉꠣꠃꠞ ꠁꠃꠍꠥꠚ ꠘꠣꠝꠞ ꠄꠇꠎꠘ ꠗꠘꠤ ꠝꠣꠘꠥꠡ ꠢꠘꠅ ꠀꠁꠟꠣ।
ꠔꠣꠁꠘ ꠁꠍꠣꠞ ꠄꠇ ꠡꠣꠉꠞꠤꠖ ꠀꠍꠟꠣ।
৫৮ ꠔꠣꠁꠘ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠀꠁꠀ,
ꠢꠎꠞꠔ ꠁꠍꠣꠞ ꠟꠣꠡ ꠘꠤꠔꠣ ꠌꠣꠁꠟꠣ।
ꠔꠦꠃ ꠙꠤꠟꠣꠔꠦ ꠔꠣꠘꠞꠦ ꠟꠣꠡ ꠘꠦꠅꠀꠞ ꠁꠎꠣꠎꠔ ꠖꠤꠟꠣ।
৫৯ ꠁꠃꠍꠥꠚꠦ ꠁꠍꠣꠞ ꠟꠣꠡ ꠍꠟꠤꠛ ꠕꠣꠇꠤ ꠟꠣꠝꠣꠁꠀ ꠇꠣꠚꠘ ꠚꠤꠘ꠆ꠖꠣꠁꠟꠣ।
৬০ ꠔꠣꠁꠘ ꠙꠣꠠ ꠇꠣꠐꠤꠀ ꠘꠤꠎꠞ ꠟꠣꠉꠤ ꠎꠦ ꠇꠄꠛꠞ ꠈꠥꠖꠤꠍꠟꠣ,
ꠅꠃ ꠇꠄꠛꠞꠞ ꠝꠣꠎꠦ ꠁꠍꠣꠞꠦ ꠖꠣꠚꠘ ꠇꠞꠟꠣ।
ꠛꠣꠖꠦ ꠛꠠ ꠄꠇ ꠙꠣꠔ꠆ꠔꠞ ꠑꠦꠟꠤꠀ ꠀꠘꠤꠀ ꠇꠄꠛꠞꠞ ꠝꠥꠈꠅ ꠖꠤꠀ ꠉꠦꠟꠣꠉꠤ।
৬১ ꠅꠁꠟꠦ ꠝꠉꠖꠤꠟꠤꠘꠤ ꠝꠞꠤꠅꠝ ꠀꠞ ꠀꠞꠇ ꠝꠞꠤꠅꠝ ꠅꠃ ꠇꠄꠛꠞꠞ ꠗꠣꠞꠅ ꠛꠁ ꠞꠁꠟꠣ।
৬২ ꠛꠣꠖꠞ ꠖꠤꠘ ꠎꠥꠝ꠆ꠝꠣꠛꠣꠞꠦ ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟ ꠀꠁꠀ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠇꠁꠟꠣ,
৬৩ “ꠢꠥꠎꠥꠞ,
ꠀꠝꠞꠣꠞ ꠝꠘꠅ ꠀꠍꠦ,
ꠅꠃ ꠐꠉꠦ ꠎꠤꠘ꠆ꠖꠣ ꠕꠣꠇꠔꠦ ꠇꠁꠍꠤꠟ,
ꠢꠦ ꠛꠥꠟꠦ ꠝꠞꠣꠞ ꠔꠤꠘ ꠖꠤꠘ ꠛꠣꠖꠦ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠛ।
৬৪ ꠄꠞꠟꠣꠉꠤ ꠀꠙꠘꠦ ꠢꠥꠇꠥꠝ ꠖꠦꠃꠇ꠆ꠇꠣ,
ꠇꠄꠛꠞꠐꠣ ꠎꠣꠘꠥ ꠔꠤꠘ ꠖꠤꠘ ꠙꠞ꠆ꠎꠘ꠆ꠔ ꠇꠠꠣ ꠙꠣꠞꠣ ꠖꠤꠀ ꠞꠣꠈꠣ ꠅꠄ।
ꠀꠞꠘꠣꠄ ꠔꠣꠞ ꠃꠝ꠆ꠝꠔ ꠅꠇꠟꠦ ꠔꠣꠞ ꠟꠣꠡ ꠌꠥꠞꠤ ꠇꠞꠤ ꠘꠤꠀ ꠝꠣꠘꠡꠞꠦ ꠇꠁꠔ ꠙꠣꠞꠦ,
ꠔꠣꠁꠘ ꠔ ꠎꠤꠘ꠆ꠖꠣ ꠅꠁꠉꠦꠍꠂꠘ।
ꠔꠣꠁꠟꠦ ꠀꠉꠦ ꠎꠦꠔꠣ ꠇꠁꠀ ꠗꠥꠇꠣ ꠖꠤꠍꠦ,
ꠅꠈꠘ ꠀꠞꠅ ꠛꠦꠡꠤ ꠗꠥꠇꠣ ꠖꠤꠛ।”
৬৫ ꠙꠤꠟꠣꠔꠦ ꠇꠁꠟꠣ,
“ꠔꠥꠝꠞꠣ ꠙꠣꠞꠣꠖꠣꠞ ꠅꠇꠟꠞꠦ ꠘꠦꠅ,
ꠘꠤꠀ ꠎꠦꠟꠣ ꠙꠣꠞ,
ꠅꠟꠣ ꠙꠣꠞꠣ ꠖꠦꠅꠀꠞ ꠛꠦꠛꠡ꠆ꠔꠣ ꠇꠞꠅ।”
৬৬ ꠅꠃ ꠔꠣꠞꠣ ꠉꠤꠀ ꠇꠄꠛꠞꠞ ꠝꠥꠈꠅ ꠎꠦ ꠙꠣꠔ꠆ꠔꠞ ꠀꠍꠤꠟ,
ꠅꠃ ꠙꠣꠔ꠆ꠔꠞꠞ ꠃꠙꠞꠦ ꠡꠤꠟ-ꠌꠣꠙ꠆ꠙꠠ ꠝꠣꠞꠤ ꠕꠁꠟꠣ ꠀꠞ ꠇꠠꠣꠇꠠꠤ ꠙꠣꠞꠣ ꠖꠦꠅꠀꠞ ꠛꠦꠛꠡ꠆ꠔꠣ ꠇꠞꠟꠣ।