ꠀꠟ꠆ꠟꠣꠞ ꠇꠣꠝ ꠇꠞꠣꠞ ꠟꠣꠉꠤ ꠢꠎꠞꠔ ꠁꠍꠣ ꠎꠥꠁꠔ ꠅꠁꠟꠣ (৩:১-৪:১৩)
ꠢꠎꠞꠔ ꠄꠢꠤꠀ ꠘꠛꠤꠞ ꠔꠛꠟꠤꠉ
৩
১ ꠞꠥꠝꠣꠘ ꠛꠣꠖꠡꠣ ꠔꠤꠛꠤꠞꠤꠅ ꠇꠂꠍꠞꠞ ꠛꠣꠖꠡꠣꠁꠞ ꠙꠘꠞꠅ ꠛꠍꠞ ꠌꠟꠦꠞ।
ꠅꠃ ꠡꠝꠄ ꠙꠘ꠆ꠔꠤꠅ ꠙꠤꠟꠣꠔ ꠀꠍꠟꠣ ꠔꠣꠘ ꠅꠗꠤꠘꠞ ꠄꠢꠥꠖꠤꠀ ꠎꠤꠟꠣꠞ ꠢꠣꠇꠤꠝ,
ꠀꠞ ꠢꠦꠞꠥꠖ ꠀꠍꠟꠣ ꠉꠣꠟꠤꠟ ꠎꠤꠟꠣꠞ ꠞꠣꠎꠣ,
ꠢꠦꠞꠥꠖꠞ ꠜꠣꠁ ꠚꠤꠟꠤꠚ ꠀꠍꠟꠣ ꠎꠤꠔꠥꠞꠤꠀ ꠀꠞ ꠔꠣꠈꠥꠘꠤꠔꠤ ꠎꠤꠟꠣꠞ ꠞꠣꠎꠣ,
ꠀꠞ ꠟꠥꠍꠣꠘꠤꠀꠍ ꠀꠍꠟꠣ ꠀꠛꠤꠟꠤꠘꠤ ꠎꠤꠟꠣꠞ ꠞꠣꠎꠣ।
ꠄꠞꠣ ꠢꠇꠟꠃ ꠀꠍꠟꠣ ꠞꠥꠝꠣꠘ ꠛꠣꠖꠡꠣꠞ ꠅꠗꠤꠘꠦ।
২ ꠅꠃ ꠀꠝꠟꠞ ꠁꠢꠥꠖꠤ ꠎꠣꠔꠤꠞ ꠙꠞꠗꠣꠘ ꠁꠝꠣꠝ ꠀꠍꠟꠣ,
ꠁꠝꠣꠝ ꠢꠣꠘꠘ ꠀꠞ ꠇꠣꠄꠀꠚꠣ।
ꠑꠤꠇ ꠅꠃ ꠡꠝꠄ ꠎꠣꠇꠣꠞꠤꠀꠞ ꠙꠥꠔ ꠄꠢꠤꠀꠞ ꠉꠦꠍꠦ ꠝꠞꠥꠜꠥꠝꠤ ꠄꠟꠣꠇꠣꠔ ꠀꠟ꠆ꠟꠣꠄ ꠔꠣꠘ ꠇꠣꠟꠣꠝ ꠘꠣꠎꠤꠟ ꠇꠞꠟꠣ।
৩ ꠔꠦꠃ ꠄꠢꠤꠀ ꠘꠛꠤꠄ ꠎꠞ꠆ꠖꠣꠘ ꠉꠣꠋꠉꠞ ꠇꠣꠘ꠆ꠖꠣ-ꠇꠣꠍꠣꠞ ꠢꠇꠟ ꠈꠣꠘꠅ ꠉꠤꠀ ꠔꠛꠟꠤꠉ ꠇꠞꠟꠣ।
ꠇꠁꠟꠣ,
ꠉꠥꠘꠣ ꠕꠣꠇꠤ ꠝꠣꠚꠤ ꠙꠣꠅꠀꠞ ꠟꠣꠉꠤ ꠔꠃꠛꠣ ꠇꠞꠤꠀ ꠔꠞꠤꠇꠣꠞ ꠉꠥꠍꠟ ꠇꠞꠣ ꠎꠞꠥꠞ।
৪ ꠄꠢꠤꠀ ꠘꠛꠤꠞ ꠛꠦꠙꠣꠞꠦ ꠁꠡꠣꠄꠀ ꠘꠛꠤꠞ ꠇꠤꠔꠣꠛꠅ ꠎꠦꠟꠣ ꠟꠦꠈꠣ ꠀꠍꠤꠟ,
ꠔꠣꠁꠘ ꠅꠃꠟꠣ ꠇꠞꠟꠣ।
ꠟꠦꠈꠣ ꠀꠍꠦ,
ꠝꠞꠥꠜꠥꠝꠤꠞ ꠝꠣꠎꠦ ꠄꠇꠎꠘꠦ ꠄꠟꠣꠘ ꠇꠞꠞꠣ,
ꠔꠥꠝꠞꠣ ꠝꠣꠟꠤꠇꠞ ꠙꠕ ꠍꠢꠤ ꠇꠞꠅ,
ꠔꠣꠘ ꠌꠟꠣꠞ ꠞꠣꠡ꠆ꠔꠣ ꠅꠇꠟ ꠡꠤꠖꠣ ꠇꠞꠅ।
৫ ꠙꠣꠠꠤꠀ ꠢꠇ꠆ꠇꠟ ꠘꠤꠌꠣ ꠎꠣꠉꠣ ꠜꠞꠣꠐ ꠅꠁꠛ,
ꠃꠌꠣ-ꠘꠤꠌꠣ ꠐꠤꠟ꠆ꠟꠣꠁꠘ ꠢꠝꠣꠘ ꠇꠞꠣ ꠅꠁꠛ।
ꠔꠦꠠꠣ-ꠛꠦꠇꠣ ꠢꠇꠟ ꠙꠕ ꠡꠥꠎꠣ ꠅꠁꠛ,
ꠉꠣꠔ-ꠉꠣꠠꠣ ꠢꠇꠟꠔꠣ ꠢꠝꠣꠘ ꠇꠞꠣ ꠅꠁꠛ।
৬ ꠀꠞ ꠖꠥꠘꠤꠀꠞ ꠝꠣꠘꠡꠞꠦ ꠔꠞꠣꠘꠤꠞ ꠟꠣꠉꠤ
ꠀꠟ꠆ꠟꠣꠄ ꠘꠣꠎꠣꠔꠞ ꠎꠦ ꠃꠍꠤꠟ꠆ꠟꠣ ꠇꠞꠍꠂꠘ
ꠔꠣꠝꠣꠝ ꠝꠣꠘꠡꠦꠃ ꠁꠔꠣ ꠖꠦꠈꠛꠣ।
৭ ꠄꠢꠤꠀ ꠘꠛꠤꠞ ꠔꠛꠟꠤꠉ ꠢꠥꠘꠤꠀ ꠔꠃꠛꠣꠞ ꠉꠥꠍꠟ ꠇꠞꠣꠞ ꠘꠤꠅꠔꠦ ꠎꠦꠞꠣ ꠀꠁꠟ,
ꠔꠣꠁꠘ ꠄꠞꠣꠞꠦ ꠇꠁꠟꠣ,
“ꠅ ꠢꠣꠚꠞ ꠛꠣꠁꠌ꠆ꠌꠣꠁꠘ,
ꠀꠍꠝꠣꠘꠤ ꠉꠎꠛ ꠀꠁꠅꠞ ꠖꠦꠈꠤꠀ ꠎꠣꠘ ꠛꠣꠌꠣꠘꠤꠞ ꠙꠕ ꠔꠥꠝꠞꠣꠞꠦ ꠇꠦꠉꠤꠄ ꠛꠣꠔꠣꠁ ꠖꠤꠟ?
৮ ꠢꠣꠍꠣꠃ ꠎꠥꠖꠤ ꠔꠥꠝꠞꠣ ꠔꠃꠛꠣ ꠇꠞꠤꠀ ꠕꠣꠇꠅ,
ꠔꠦ ꠄꠞ ꠚꠟꠅ ꠖꠦꠈꠣꠅ।
ꠝꠘꠦ ꠝꠘꠦ ꠇꠁꠅ ꠘꠣ,
ꠔꠥꠝꠞꠣ ꠁꠛ꠆ꠞꠣꠢꠤꠝꠞ ꠀꠅꠟꠣꠖ।
ꠢꠥꠘꠅ,
ꠀꠝꠤ ꠇꠁꠞꠣꠝ,
ꠀꠟ꠆ꠟꠣꠄ ꠌꠣꠁꠟꠦ ꠔ ꠅꠃ ꠙꠣꠔ꠆ꠔꠞ ꠅꠇꠟ ꠕꠣꠇꠤꠃ ꠁꠛ꠆ꠞꠣꠢꠤꠝꠞ ꠀꠅꠟꠣꠖ ꠛꠣꠘꠣꠁꠔꠣ ꠙꠣꠞꠛꠣ।
৯ ꠉꠣꠍꠞ ꠉꠥꠠꠤꠔ ꠔ ꠇꠥꠠꠣꠟ ꠟꠣꠉꠣꠁꠟꠃ ꠀꠍꠦ।
ꠎꠦ ꠉꠣꠍꠅ ꠜꠣꠟꠣ ꠚꠟ ꠗꠞꠦ ꠘꠣ,
ꠁ ꠉꠣꠍ ꠇꠣꠐꠤꠀ ꠀꠉꠥꠘꠤꠔ ꠚꠣꠟꠣꠁꠟ ꠅꠁꠛ।”
১০ ꠁꠔꠣ ꠢꠥꠘꠤꠀ ꠝꠣꠘꠡꠦ ꠄꠢꠤꠀꠞꠦ ꠎꠤꠇꠣꠁꠟꠣ,
“ꠔꠦ ꠀꠝꠞꠣ ꠇꠤꠔꠣ ꠇꠞꠔꠣꠝ?”
১১ ꠔꠣꠁꠘ ꠇꠁꠟꠣ,
“ꠇꠦꠃꠞꠞ ꠎꠥꠖꠤ ꠖꠥꠁꠐꠣ ꠇꠥꠞ꠆ꠔꠣ ꠕꠣꠇꠦ,
ꠔꠦ ꠎꠣꠞ ꠘꠣꠁ ꠔꠣꠞꠦ ꠄꠇꠐꠣ ꠖꠦꠃꠇ।
ꠎꠣꠞ ꠊꠞꠅ ꠗꠣꠘ-ꠌꠣꠃꠟ ꠀꠍꠦ,
ꠢꠦ-ꠅ ꠅꠃꠟꠣ ꠛꠤꠟꠣꠃꠇ।”
১২ ꠈꠣꠎꠘꠣ ꠔꠥꠟꠞꠣ ꠇꠄꠎꠘ ꠔꠡꠤꠟꠖꠣꠞꠦ ꠔꠃꠛꠣꠞ ꠉꠥꠍꠟ ꠇꠞꠣꠔ ꠀꠁꠀ ꠎꠤꠇꠣꠁꠟꠣ,
“ꠝꠥꠞꠡꠤꠖ,
ꠀꠝꠞꠣ ꠇꠤꠔꠣ ꠇꠞꠔꠣꠝ?”
১৩ ꠔꠣꠁꠘ ꠇꠁꠟꠣ,
“ꠘꠤꠅꠝ ꠕꠣꠇꠤ ꠛꠦꠡꠤ ꠐꠦꠇꠣ ꠀꠖꠣꠄ ꠇꠞꠤꠅ ꠘꠣ।”
১৪ ꠇꠄꠎꠘ ꠍꠤꠙꠣꠁꠄꠅ ꠎꠤꠇꠣꠁꠟꠣ,
“ꠢꠥꠎꠥꠞ,
ꠔꠦ ꠀꠝꠞꠣ ꠇꠤꠔꠣ ꠇꠞꠔꠣꠝ?”
ꠔꠣꠁꠘ ꠇꠁꠟꠣ,
“ꠇꠦꠃꠞꠞꠦ ꠎꠥꠞ-ꠎꠥꠟꠥꠝ ꠇꠞꠤꠀ ꠛꠣ ꠚꠣꠘ꠆ꠖꠅ ꠚꠣꠟꠣꠁꠀ ꠇꠥꠘ꠆ꠔꠣ ꠀꠖꠣꠄ ꠇꠞꠤꠅ ꠘꠣ।
ꠎꠣꠞꠎꠤꠞ ꠛꠦꠔꠘꠦ ꠈꠥꠡꠤ ꠞꠁꠅ।”
১৫ ꠝꠣꠘꠡꠦ ꠝꠘꠦ ꠝꠘꠦ ꠀꠟ-ꠝꠍꠤꠞ ꠟꠣꠉꠤ ꠛꠣꠞ ꠌꠣꠅꠀꠔ ꠀꠍꠤꠟ,
ꠄꠢꠤꠀꠞꠦ ꠖꠦꠈꠤꠀ ꠔꠣꠞꠣ ꠈꠥꠛ ꠀꠡꠣ ꠇꠞꠟ,
ꠄꠁꠘꠃ ꠝꠘꠅ ꠟꠄ ꠀꠟ-ꠝꠍꠤ।
১৬ ꠅꠁꠟꠦ ꠄꠢꠤꠀꠄ ꠔꠣꠞꠣꠞꠦ ꠇꠁꠟꠣ,
“ꠀꠝꠤ ꠈꠣꠟꠤ ꠙꠣꠘꠤꠖꠤ ꠔꠃꠛꠣꠞ ꠉꠥꠍꠟ ꠇꠞꠣꠁꠀꠞ,
ꠔꠦ ꠀꠝꠣꠞ ꠛꠣꠖꠦ ꠎꠦꠁꠘ ꠔꠡꠞꠤꠚ ꠀꠘꠞꠣ,
ꠔꠣꠁꠘ ꠀꠝꠣ ꠕꠣꠇꠤꠅ ꠔꠣꠇ꠆ꠇꠔ ꠀꠟꠣ।
ꠔꠣꠘ ꠙꠣꠅꠞ ꠎꠥꠔꠣꠞ ꠚꠤꠔꠣ ꠉꠦꠍꠣ ꠈꠥꠟꠣꠞ ꠎꠥꠇꠣꠅ ꠀꠝꠤ ꠘꠣꠄ।
ꠔꠣꠁꠘ ꠀꠁꠟꠦ ꠙꠣꠇ ꠞꠥꠢꠥ ꠀꠞ ꠀꠉꠥꠁꠘ ꠖꠤꠀ ꠔꠥꠝꠞꠣꠞꠦ ꠉꠥꠍꠟ ꠇꠞꠣꠁꠛꠣ।
১৭ ꠔꠣꠘ ꠇꠥꠟꠣ ꠔ ꠔꠣꠘ ꠀꠔꠅꠃ ꠀꠍꠦ,
ꠝꠣꠠꠣ ꠖꠦꠅꠀ ꠗꠣꠘ ꠅꠃ ꠇꠥꠟꠣꠖꠤ ꠃꠀꠁꠀ ꠢꠣꠞꠤ ꠗꠣꠘ ꠘꠤꠀ ꠃꠉꠣꠞꠅ ꠔꠥꠟꠛꠣ,
ꠀꠞ ꠍꠥꠍꠣꠞꠦ ꠅꠝꠘ ꠀꠉꠥꠘꠤꠔ ꠚꠣꠟꠣꠁ ꠎꠣꠟꠣꠁꠛꠣ,
ꠎꠦ ꠀꠉꠥꠁꠘ ꠇꠥꠘꠥꠖꠤꠘ ꠘꠤꠜꠦ ꠘꠣ।”
১৮ ꠅꠃ ꠟꠣꠈꠣꠘ ꠀꠞꠅ ꠛꠃꠔ ꠘꠍꠤꠅꠔ ꠇꠞꠤꠀ ꠄꠢꠤꠀꠄ ꠝꠣꠘꠡꠞ ꠉꠦꠍꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ।
১৯ ꠅꠁꠟꠦ ꠞꠣꠎꠣ ꠢꠦꠞꠥꠖꠦ ꠛꠃꠔ ꠘꠝꠥꠘꠣꠞ ꠈꠣꠞꠣꠙ ꠇꠣꠝ ꠇꠞꠣꠄ,
ꠀꠞ ꠔꠣꠞ ꠜꠣꠁꠞ ꠛꠃ ꠢꠦꠞꠥꠖꠤꠀꠞꠦ ꠢꠣꠋꠉꠣ ꠇꠞꠣꠄ,
ꠄꠢꠤꠀꠄ ꠔꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠟꠣ।
২০ ꠄꠞꠖꠣꠄ ꠢꠦ ꠔꠣꠞ ꠢꠇꠟ ꠇꠥ-ꠇꠣꠝꠞ ꠟꠉꠦ ꠄꠅꠈꠣꠘꠅ ꠛꠣꠠꠣꠁꠟ,
ꠢꠦ ꠘꠛꠤ ꠄꠢꠤꠀꠞꠦ ꠎꠦꠟꠅ ꠢꠣꠞꠣꠁꠟꠤꠟ।
ꠢꠎꠞꠔ ꠁꠍꠣꠄ ꠙꠣꠇ ꠉꠥꠍꠟ ꠇꠞꠟꠣ
২১ ꠄꠢꠤꠀ ꠘꠛꠤ ꠎꠦꠟꠅ ꠢꠣꠝꠣꠘꠤꠞ ꠀꠉꠦ,
ꠔꠣꠘ ꠉꠦꠍꠦ ꠀꠁꠀ ꠎꠦꠛꠟꠣ ꠛꠃꠔ ꠝꠣꠘꠡꠦ ꠔꠃꠛꠣꠞ ꠉꠥꠍꠟ ꠇꠞꠞꠣ,
ꠅꠃ ꠡꠝꠄ ꠁꠍꠣꠅ ꠅꠘꠅ ꠀꠁꠀ ꠔꠣꠞꠣꠞ ꠟꠉꠦ ꠉꠥꠍꠟ ꠇꠞꠟꠣ।
ꠉꠥꠍꠟꠞ ꠛꠣꠖꠦ ꠁꠍꠣꠄ ꠎꠦꠛꠟꠣ ꠖꠥꠀ ꠇꠞꠞꠣ,
ꠀꠈꠔꠣꠃ ꠀꠟ꠆ꠟꠣꠞ ꠀꠞꠡꠞ ꠖꠥꠀꠞ ꠈꠥꠟꠤꠉꠦꠟ,
২২ ꠀꠞ ꠙꠣꠇ ꠞꠥꠢꠥ ꠙꠣꠞꠅꠞ ꠍꠥꠞꠔ ꠗꠞꠤꠀ ꠔꠣꠘ ꠃꠙꠞꠦ ꠘꠣꠎꠤꠟ ꠅꠁꠟꠣ।
ꠟꠉꠦ ꠟꠉꠦ ꠛꠦꠢꠦꠡ꠆ꠔꠤ ꠅꠃ ꠀꠅꠀꠎꠅ ꠢꠥꠘꠣ ꠉꠦꠟ,
“ꠔꠥꠝꠤꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ,
ꠔꠥꠝꠣꠞ ꠃꠙꠞꠦ ꠀꠝꠤ ꠈꠥꠛ ꠈꠥꠡꠤ।”
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠈꠣꠘ꠆ꠖꠣꠘꠞ ꠙꠞꠤꠌꠄ
২৩ ꠅꠘꠥꠝꠣꠘ ꠔꠤꠡ ꠛꠍꠞ ꠛꠄꠅꠡꠞ ꠇꠣꠟꠅ ꠁꠍꠣꠄ ꠔꠛꠟꠤꠉ ꠇꠣꠝ ꠡꠥꠞꠥ ꠇꠞꠟꠣ।
ꠝꠣꠘꠡꠦ ꠎꠣꠘꠔꠣ ꠔꠣꠁꠘ ꠁꠃꠍꠥꠚꠞ ꠙꠥꠀ।
ꠁꠃꠍꠥꠚꠞ ꠝꠄ-ꠝꠥꠞꠛ꠆ꠛꠤ ꠅꠁꠟꠣ,
২৪ ꠀꠟꠤ,
ꠝꠣꠔ꠆ꠕꠣꠔ,
ꠟꠦꠛꠤ,
ꠝꠣꠟꠇꠤ,
ꠁꠀꠘ꠆ꠘꠣꠁ,
ꠁꠃꠍꠥꠚ,
২৫ ꠝꠣꠔ꠆ꠕꠣꠔꠤꠀ,
ꠀꠝꠥꠎ,
ꠘꠣꠃꠝ,
ꠁꠍꠟꠤ,
ꠘꠣꠉ꠆ꠉꠣꠁ,
২৬ ꠝꠣꠢꠣꠔ,
ꠝꠣꠔ꠆ꠕꠣꠔꠤꠀ,
ꠡꠤꠝꠤꠅ,
ꠁꠃꠡꠦꠈ,
ꠁꠅꠖꠣ,
২৭ ꠁꠃꠢꠣꠘ꠆ꠘꠣꠘ,
ꠞꠤꠡꠣ,
ꠎꠦꠞꠛꠣꠛꠤꠟ,
ꠍꠣꠟꠔꠤꠄꠟ,
ꠘꠤꠞꠤ,
২৮ ꠝꠣꠟꠇꠤ,
ꠀꠖ꠆ꠖꠤ,
ꠇꠣꠍꠣꠝ,
ꠁꠟꠝꠣꠖꠣꠝ,
ꠁꠄꠞ,
২৯ ꠁꠃꠍꠣ,
ꠄꠟꠤꠄꠎꠦꠞ,
ꠁꠃꠞꠤꠝ,
ꠝꠣꠔ꠆ꠕꠣꠔ,
ꠟꠦꠛꠤ,
৩০ ꠍꠣꠝꠣꠃꠘ,
ꠄꠢꠥꠖꠣ,
ꠁꠃꠍꠥꠚ,
ꠁꠃꠘꠣꠘ,
ꠁꠟꠤꠀꠇꠤꠝ,
৩১ ꠝꠣꠟꠤꠀ,
ꠝꠣꠘ꠆ꠘꠣ,
ꠝꠣꠔ꠆ꠕꠣꠔꠣ,
ꠘꠣꠕꠣꠘ,
ꠖꠣꠃꠖ ꠘꠛꠤ,
৩২ ꠁꠀꠍ,
ꠃꠛꠣꠄꠖ,
ꠛꠥꠀꠎ,
ꠡꠦꠟꠤꠝ,
ꠘꠣꠢꠤꠡ,
৩৩ ꠀꠝꠤꠘꠣꠖꠣꠛ,
ꠀꠖꠝꠤꠘ,
ꠀꠞꠘꠤ,
ꠢꠣꠍꠤꠞ,
ꠚꠤꠞꠥꠎ,
ꠄꠢꠥꠖꠣ,
৩৪ ꠁꠀꠇꠥꠛ ꠘꠛꠤ,
ꠁꠍꠢꠣꠇ ꠘꠛꠤ,
ꠁꠛ꠆ꠞꠣꠢꠤꠝ ꠘꠛꠤ,
ꠔꠣꠞꠦꠈ,
ꠘꠣꠢꠥꠞ,
৩৫ ꠍꠣꠞꠥꠎ,
ꠞꠣꠃ,
ꠚꠣꠟꠦꠎ,
ꠀꠛꠦꠞ,
ꠡꠣꠟꠦꠈ,
৩৬ ꠇꠤꠘꠣꠘ,
ꠀꠞ꠆ꠚꠣꠇꠍꠣꠖ,
ꠡꠣꠝ,
ꠘꠥꠢ ꠘꠛꠤ,
ꠟꠣꠝꠣꠇ,
৩৭ ꠝꠣꠔꠥꠡꠣꠟꠣꠈ,
ꠁꠖ꠆ꠞꠤꠍ ꠘꠛꠤ,
ꠁꠀꠞꠦꠖ,
ꠝꠣꠢꠟꠣꠁꠟ,
ꠇꠦꠘꠣꠘ,
৩৮ ꠁꠘꠥꠡ,
ꠡꠤꠡ ꠘꠛꠤ,
ꠀꠖꠝ,
ꠀꠟ꠆ꠟꠣ ꠙꠣꠇ।