ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠎꠘꠝ
২
১ ꠅꠃ ꠡꠝꠄ ꠞꠥꠝꠣꠘ ꠛꠣꠖꠡꠣ ꠀꠉꠡ꠆ꠔ ꠇꠂꠍꠞꠦ ꠢꠥꠇꠥꠝ ꠖꠤꠟꠣ,
ꠔꠣꠘ ꠀꠡ꠆ꠔꠣ ꠛꠣꠖꠡꠣꠁꠞ ꠢꠇꠟ ꠙ꠆ꠞꠎꠣꠄ ꠎꠣꠞꠎꠤꠞ ꠘꠣꠝ ꠟꠦꠈꠣꠘꠤꠞ ꠟꠣꠉꠤ।
২ ꠡꠤꠞꠤꠀꠞ ꠢꠣꠇꠤꠝ ꠇꠥꠞꠤꠘꠤꠀꠍꠞ ꠀꠝꠟꠅ,
ꠅꠃ ꠙꠄꠟꠣ ꠛꠣꠞ ꠝꠣꠘꠥꠡ ꠉꠘꠣꠞ ꠟꠣꠉꠤ ꠘꠣꠝ ꠟꠦꠈꠣꠁꠟ ꠅꠁꠟ।
৩ ꠔꠦꠃ ꠘꠣꠝ ꠟꠦꠈꠣꠘꠤꠞ ꠟꠣꠉꠤ ꠢꠇꠟ ꠝꠣꠘꠥꠡ ꠎꠣꠞꠎꠤꠞ ꠛꠥꠘꠤꠀꠖꠤ ꠉꠣꠃꠔ ꠉꠦꠟꠣ।
৪ ꠅꠃ ꠟꠣꠈꠣꠘ ꠁꠃꠍꠥꠚꠅ ꠘꠣꠝ ꠟꠦꠈꠣꠘꠤꠞ ꠟꠣꠉꠤ ꠉꠣꠟꠤꠟ ꠎꠤꠟꠣꠞ ꠘꠣꠍꠣꠞꠔ ꠉꠣꠃ ꠕꠣꠇꠤ ꠛꠣꠖꠡꠣ ꠖꠣꠃꠖꠞ ꠉꠣꠃꠔ ꠀꠁꠟꠣ।
ꠔꠣꠁꠘ ꠔ ꠖꠣꠃꠖꠞ ꠈꠣꠘ꠆ꠖꠣꠘꠞ ꠝꠣꠘꠥꠡ।
ꠉꠣꠃꠞ ꠘꠣꠝ ꠛꠦꠕꠦꠟꠢꠣꠝ,
ꠁꠐꠣ ꠄꠢꠥꠖꠤꠀ ꠎꠤꠟꠣꠔ।
৫ ꠛꠤꠛꠤ ꠝꠞꠤꠅꠝꠅ ꠅꠃ ꠁꠃꠍꠥꠚꠞ ꠟꠉꠦ ꠅꠁꠀ ꠘꠣꠝ ꠟꠦꠈꠣꠘꠤꠔ ꠉꠦꠟꠣ।
ꠅꠃ ꠁꠃꠍꠥꠚꠞ ꠟꠉꠦꠃ ꠔꠣꠘ ꠡꠣꠖꠤ ꠑꠤꠇ ꠅꠁꠍꠤꠟ,
ꠀꠞ ꠔꠣꠘ ꠙꠦꠐꠅ ꠅꠃ ꠡꠝꠄ ꠢꠥꠞꠥꠔ꠆ꠔꠣ ꠀꠍꠤꠟ।
৬ ꠛꠦꠕꠦꠟꠢꠣꠝꠅ ꠕꠣꠇꠔꠦꠃ ꠝꠞꠤꠅꠝꠞ ꠢꠥꠞꠥꠔ꠆ꠔꠣ ꠅꠁꠛꠣꠞ ꠛꠤꠡꠦ ꠗꠞꠟ।
৭ ꠀꠞ ꠔꠣꠘ ꠙꠄꠟꠣ ꠙꠥꠀꠞ ꠎꠘꠝ ꠅꠁꠟ।
ꠅꠁꠟꠦ ꠢꠤꠘꠅ ꠇꠥꠘꠥ ꠝꠦꠝꠣꠘ ꠈꠣꠘꠣꠔ ꠕꠣꠇꠣꠞ ꠎꠣꠉꠣ ꠝꠤꠟꠟ ꠘꠣ,
ꠄꠞꠖꠣꠄ ꠝꠞꠤꠅꠝꠦ ꠅꠃ ꠢꠥꠞꠥꠔ꠆ꠔꠣꠞꠦ ꠔꠦꠘꠣꠖꠤ ꠛꠦꠞꠣꠁꠀ ꠉꠥꠀꠟ ꠊꠞꠞ ꠈꠦꠞꠞ ꠉꠣꠝꠟꠣꠔ ꠢꠥꠔꠣꠁ ꠕꠁꠟꠣ।
ꠚꠤꠞꠤꠡ꠆ꠔꠣ ꠀꠞ ꠞꠣꠈꠣꠟ ꠅꠇꠟ
৮ ꠅꠃ ꠛꠦꠕꠦꠟꠢꠣꠝ ꠉꠣꠃꠞ ꠇꠣꠘ꠆ꠖꠣꠔ ꠛꠘ꠆ꠖꠞ ꠝꠣꠎꠦ,
ꠝꠦꠠꠣꠞ ꠞꠣꠈꠣꠟ ꠅꠇꠟꠦ ꠞꠣꠁꠔꠇꠥꠞ ꠛꠣꠟꠣ ꠔꠣꠞꠣꠞ ꠝꠦꠠꠣ ꠙꠣꠞꠣ ꠖꠦꠅꠀꠔ ꠀꠍꠤꠟ।
৯ ꠀꠈꠔꠣꠃ ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣ ꠔꠣꠞꠣꠞ ꠍꠣꠝꠘꠦ ꠀꠁꠀ ꠖꠞꠡꠘ ꠖꠤꠟꠣ,
ꠀꠞ ꠝꠣꠛꠥꠖꠞ ꠘꠥꠞꠞ ꠔꠦꠎꠦ ꠔꠣꠞꠣꠞ ꠌꠣꠁꠞꠅꠛꠣꠄ ꠚꠞ ꠅꠁꠉꠦꠟ।
ꠁꠔꠣ ꠖꠦꠈꠤꠀ ꠞꠣꠈꠣꠟ ꠅꠇꠟ ꠒꠞꠞ ꠌꠥꠐꠦ ꠛꠦꠖꠤꠡꠣ ꠛꠘꠤꠉꠦꠟꠣ।
১০ ꠅꠁꠟꠦ ꠚꠤꠞꠤꠡ꠆ꠔꠣꠄ ꠔꠣꠞꠣꠞꠦ ꠇꠁꠟꠣ,
“ꠔꠥꠝꠞꠣ ꠒꠞꠣꠁꠅ ꠘꠣ।
ꠀꠝꠤ ꠔꠥꠝꠞꠣꠞ ꠟꠣꠉꠤ ꠈꠥꠛ ꠈꠥꠡꠤꠞ ꠈꠛꠞ ꠟꠁꠀ ꠀꠁꠍꠤ।
ꠁ ꠈꠥꠡ-ꠈꠛꠞꠤ ꠖꠥꠘꠤꠀꠞ ꠔꠣꠝꠣꠝ ꠝꠣꠘꠡꠞ ꠟꠣꠉꠤ।
১১ ꠢꠥꠘꠅ,
ꠔꠥꠝꠞꠣꠞ ꠔꠞꠣꠘꠦꠀꠟꠣ ꠀꠁꠎ ꠖꠣꠃꠖꠞ ꠉꠣꠃꠔ ꠎꠘꠝ ꠟꠁꠍꠂꠘ।
ꠔꠣꠁꠘꠃ ꠀꠟ-ꠝꠍꠤ,
ꠔꠣꠁꠘꠃ ꠝꠣꠟꠤꠇ।
১২ ꠔꠥꠝꠞꠣ ꠉꠤꠀ ꠄꠞ ꠙꠞꠝꠣꠘ ꠖꠦꠈꠛꠣꠄ,
ꠖꠦꠈꠛꠣꠄ ꠄꠇ ꠇꠣꠌꠣ ꠢꠥꠞꠥꠔ꠆ꠔꠣꠞꠦ ꠔꠦꠘꠣꠖꠤ ꠛꠦꠞꠣꠁꠀ,
ꠉꠥꠀꠟ ꠊꠞꠞ ꠈꠦꠞꠞ ꠉꠣꠝꠟꠣꠔ ꠢꠥꠔꠣꠁꠀ ꠕꠅꠀ ꠅꠁꠍꠦ।”
১৩ ꠅꠃ ꠡꠝꠄ ꠀꠈꠔꠣꠃ ꠢꠃ ꠚꠤꠞꠤꠡ꠆ꠔꠣꠞ ꠟꠉꠦ ꠀꠞꠅ ꠛꠃꠔ ꠚꠤꠞꠤꠡ꠆ꠔꠣꠞꠦ ꠖꠦꠈꠣ ꠉꠦꠟ।
ꠄꠞꠣ ꠀꠟ꠆ꠟꠣꠞ ꠎꠤꠇꠤꠞ-ꠀꠎꠇꠣꠞ ꠇꠞꠤ ꠇꠞꠤ ꠇꠁꠟꠣ,
১৪ “ꠀꠍꠝꠣꠘꠅ ꠀꠟ꠆ꠟꠣꠞ ꠟꠤꠟꠣ-ꠈꠦꠟꠣ ꠖꠦꠈꠣ ꠎꠣꠃꠇ,
ꠖꠥꠘꠤꠀꠞ ꠛꠥꠇꠥꠔ ꠔꠣꠘ ꠙꠤꠀꠞꠣ ꠛꠘ꠆ꠖꠣꠞ ꠡꠣꠘ꠆ꠔꠤ ꠅꠃꠇ।”
১৫ ꠛꠣꠖꠦ ꠚꠤꠞꠤꠡ꠆ꠔꠣ ꠅꠇꠟ ꠔꠣꠞꠣꠞ ꠉꠦꠍ ꠕꠣꠇꠤ ꠀꠍꠝꠣꠘꠅ ꠉꠤꠀ ꠢꠣꠞꠟꠦ,
ꠞꠣꠈꠣꠟ ꠅꠇꠟꠦ ꠄꠇꠦ-ꠅꠁꠘ꠆ꠘꠞꠦ ꠇꠂꠟ,
“ꠀꠅ,
ꠀꠝꠞꠣ ꠛꠦꠕꠦꠟꠢꠣꠝꠅ ꠎꠣꠁ।
ꠝꠣꠛꠥꠖꠦ ꠀꠝꠞꠣꠞꠦ ꠎꠦ ꠈꠛꠞ ꠎꠣꠘꠣꠁꠟꠣ,
ꠅꠔꠣ ꠖꠦꠈꠤꠀ ꠀꠁ।”
১৬ ꠝꠣꠔꠤ ꠝꠣꠔꠤ ꠔꠣꠞꠣ ꠎꠟꠖꠤ ꠇꠞꠤ ꠉꠦꠟꠣ,
ꠉꠤꠀ ꠝꠞꠤꠅꠝ,
ꠁꠃꠍꠥꠚ ꠀꠞ ꠈꠦꠞꠞ ꠉꠣꠝꠟꠣꠔ ꠢꠥꠔꠣꠁꠟ ꠅꠃ ꠢꠥꠞꠥꠔ꠆ꠔꠣꠞꠦ ꠙꠣꠁꠟꠣ।
১৭ ꠙꠣꠁꠀ ꠅꠃ ꠢꠥꠞꠥꠔ꠆ꠔꠣꠞ ꠛꠦꠙꠣꠞꠦ ꠔꠣꠞꠣꠞꠦ ꠎꠦ ꠈꠛꠞ ꠎꠣꠘꠣꠁꠟ ꠅꠁꠍꠤꠟ,
ꠁꠔꠣ ꠔꠣꠞꠣ ꠢꠇꠟꠞꠦ ꠇꠁꠟꠣ।
১৮ ꠔꠣꠞꠣꠞ ꠝꠣꠔ ꠢꠥꠘꠤꠀ ꠢꠇꠟꠦꠃ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
১৯ ꠅꠁꠟꠦ ꠝꠞꠤꠅꠝꠦ ꠢꠇꠟꠔꠣ ꠖꠤꠟꠞ ꠝꠣꠎꠦ ꠉꠣꠕꠤꠀ ꠞꠣꠈꠟꠣ,
ꠀꠞ ꠝꠘꠦ ꠝꠘꠦ ꠌꠤꠘ꠆ꠔꠣꠔ ꠞꠁꠟꠣ।
২০ ꠚꠤꠞꠤꠡ꠆ꠔꠣ ꠅꠇꠟꠦ ꠞꠣꠈꠣꠟ ꠅꠇꠟꠞꠦ ꠎꠦꠟꠣ ꠇꠁꠍꠟꠣ,
ꠄꠞꠣ ꠁꠔꠣ ꠖꠦꠈꠤꠀ ꠢꠥꠘꠤꠀ ꠀꠟ꠆ꠟꠣꠞ ꠎꠤꠇꠤꠞ ꠔꠣꠞꠤꠚ ꠇꠞꠤ ꠇꠞꠤ ꠚꠤꠞꠔ ꠉꠦꠟꠣꠉꠤ।
২১ ꠛꠣꠖꠦ ꠎꠘꠝꠞ ꠀꠐ ꠖꠤꠘꠞ ꠖꠤꠘ ꠀꠇꠤꠇꠣ ꠀꠞ ꠝꠍꠟꠝꠣꠘꠤ ꠇꠞꠣꠘꠤꠞ ꠛꠣꠟꠣ,
ꠔꠣꠘ ꠘꠣꠝ ꠞꠣꠈꠣ ꠅꠁꠟ ꠁꠍꠣ।
ꠝꠣʼꠞ ꠙꠦꠐꠅ ꠀꠁꠛꠣꠞ ꠀꠉꠦꠃ ꠚꠤꠞꠤꠡ꠆ꠔꠣꠄ ꠅꠃ ꠘꠣꠝ ꠕꠁꠍꠟꠣ।
ꠉꠦꠖꠣ ꠁꠍꠣꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠘꠟꠣ
২২ ꠄꠞꠝꠣꠎꠦ ꠝꠥꠍꠣ ꠘꠛꠤꠞ ꠡꠞꠤꠅꠔ ꠝꠣꠚꠤꠇ ꠔꠣꠞꠣꠞ ꠙꠣꠇ-ꠍꠣꠚ ꠅꠀꠞ ꠡꠝꠄ ꠅꠁꠟ।
ꠔꠦꠃ ꠁꠍꠣꠞꠦ ꠝꠣꠛꠥꠖꠞ ꠀꠔꠅ ꠡꠙꠤꠀ ꠖꠤꠛꠣꠞ ꠘꠤꠅꠔꠦ,
ꠁꠃꠍꠥꠚ ꠀꠞ ꠝꠞꠤꠅꠝꠦ ꠔꠣꠘꠦ ꠟꠁꠀ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠁꠟꠣ।
২৩ ꠝꠣꠛꠥꠖꠞ ꠡꠞꠤꠅꠔꠞ ꠢꠥꠇꠥꠝ ꠀꠍꠤꠟ,
ꠙꠞꠔꠦꠇ ꠎꠣꠘꠖꠣꠞꠞ ꠙꠄꠟꠣ ꠙꠥꠀꠞꠦ ꠀꠟ꠆ꠟꠣꠞ ꠘꠣꠝꠦ ꠡꠙꠤꠀ ꠖꠤꠔꠦ ꠅꠁꠛ।
২৪ ꠄꠞꠟꠉꠦ,
ꠄꠇ ꠎꠥꠠꠣ ꠒꠥꠙꠤ ꠙꠣꠈꠤ ꠛꠣ ꠙꠣꠞꠅꠞ ꠖꠥꠁꠐꠣ ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠔꠦ ꠅꠁꠛ,
ꠡꠞꠤꠅꠔꠞ ꠅꠃ ꠢꠥꠇꠥꠝ ꠝꠣꠚꠤꠇ ꠔꠣꠞꠣ ꠇꠥꠞꠛꠣꠘꠤ ꠖꠦꠅꠀꠔ ꠀꠁꠟꠣ।
২৫ ꠅꠃ ꠡꠝꠄ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠍꠣꠝꠣꠃꠘ ꠘꠣꠝꠞ ꠄꠇꠎꠘ ꠀꠟ꠆ꠟꠣꠞꠣꠁꠀ ꠛꠥꠎꠥꠞ꠆ꠉ ꠀꠍꠟꠣ,
ꠔꠣꠁꠘ ꠙꠣꠇ ꠞꠥꠢꠦ ꠇꠣꠝꠤꠟ।
ꠔꠣꠁꠘ ꠝꠘꠦ ꠝꠘꠦ ꠛꠣꠞ ꠌꠣꠅꠀꠔ ꠀꠍꠟꠣ,
ꠀꠟ꠆ꠟꠣꠄ ꠇꠥꠘ ꠡꠝꠄ ꠛꠘꠤ ꠁꠍꠞꠣꠁꠟꠞꠦ ꠡꠣꠘ꠆ꠔꠤ ꠖꠤꠛꠣ।
২৬ ꠙꠣꠇ ꠞꠥꠢꠥ ꠔꠣꠘ ꠟꠉꠦ ꠀꠍꠟꠣ,
ꠅꠃ ꠞꠥꠢꠦ ꠔꠣꠘꠞꠦ ꠛꠣꠔꠣꠁꠍꠟꠣ,
ꠔꠣꠘ ꠝꠃꠔꠞ ꠀꠉꠦꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠀꠟ-ꠝꠍꠤꠞꠦ ꠔꠣꠁꠘ ꠖꠦꠈꠛꠣ।
২৭ ꠙꠣꠇ ꠞꠥꠢꠥꠞ ꠁꠡꠣꠞꠣꠄ ꠍꠣꠝꠣꠃꠘ ꠅꠃ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠎꠤꠞ ꠅꠁꠟꠣ।
ꠁꠍꠣꠞ ꠝꠣ ꠛꠣꠚꠦꠅ ꠡꠞꠤꠅꠔꠞ ꠢꠥꠇꠥꠝ ꠀꠖꠣꠄ ꠇꠞꠣꠞ ꠘꠤꠅꠔꠦ,
ꠉꠦꠖꠣ ꠁꠍꠣꠞꠦ ꠟꠁꠀ ꠅꠘꠅ ꠀꠁꠟꠣ।
২৮ ꠅꠃ ꠇꠣꠝꠤꠟ ꠛꠥꠎꠥꠞ꠆ꠉ ꠍꠣꠝꠣꠃꠘꠦ ꠁꠍꠣꠞꠦ ꠇꠥꠟꠅ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ।
ꠔꠣꠁꠘ ꠇꠁꠟꠣ,
২৯ “ꠅ ꠝꠣꠟꠤꠇ,
ꠔꠥꠝꠣꠞ ꠎꠛꠣꠘ ꠝꠣꠚꠤꠇ
ꠔꠥꠝꠣꠞ ꠁ ꠉꠥꠟꠣꠝꠞꠦ ꠅꠈꠘ ꠡꠣꠘ꠆ꠔꠤꠄ ꠛꠤꠖꠣꠄ ꠖꠦꠅ।
৩০-৩১ ꠀꠖꠝ ꠎꠣꠔꠤꠞꠦ ꠔꠞꠣꠘꠤꠞ ꠟꠣꠉꠤ,
ꠔꠣꠝꠣꠝ ꠝꠣꠘꠡꠞ ꠌꠃꠈꠞ ꠍꠣꠝꠘꠦ
ꠔꠥꠝꠤ ꠎꠦ ꠃꠍꠤꠟ꠆ꠟꠣ ꠇꠣꠁꠝ ꠇꠞꠍ ꠢꠃ ꠀꠟ-ꠝꠍꠤꠞꠦ
ꠀꠝꠣꠞ ꠘꠤꠎ ꠌꠃꠈꠦ ꠖꠦꠈꠤꠀ ꠉꠦꠟꠣꠝ।
৩২ ꠔꠥꠝꠣꠞ ꠈꠣꠍ ꠙ꠆ꠞꠎꠣ ꠛꠘꠤ ꠁꠍꠞꠣꠁꠟꠞ ꠉꠃꠞꠛ ꠔ ꠄꠁꠘꠃ,
ꠛꠣꠖ-ꠛꠣꠇꠤ ꠔꠣꠝꠣꠝ ꠎꠣꠔꠤꠞꠦꠅ ꠙꠕ ꠖꠦꠈꠣꠘꠤꠞ ꠘꠥꠞ।”
৩৩ ꠍꠣꠝꠣꠃꠘꠦ ꠁꠍꠣꠞ ꠛꠦꠙꠣꠞꠦ ꠅꠃ ꠎꠦꠔꠣ ꠇꠁꠟꠣ,
ꠁꠔꠣ ꠢꠥꠘꠤꠀ ꠁꠍꠣꠞ ꠝꠣ-ꠛꠣꠚ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
৩৪ ꠍꠣꠝꠣꠃꠘꠦ ꠔꠣꠞꠣꠞꠦ ꠖꠥꠀ ꠖꠤꠟꠣ,
ꠔꠣꠁꠘ ꠁꠍꠣꠞ ꠝꠣ ꠝꠞꠤꠅꠝꠞꠦ ꠇꠁꠟꠣ,
“ꠢꠥꠘꠅ,
ꠀꠟ꠆ꠟꠣ ꠙꠣꠇꠞ ꠈꠤꠀꠟ ꠅꠁꠟ,
ꠅꠃ ꠢꠥꠞꠥꠔ꠆ꠔꠣꠞ ꠖꠞꠥꠘ ꠛꠘꠤ ꠁꠍꠞꠣꠁꠟꠞ ꠛꠃꠔ ꠎꠘꠦ ꠘꠣꠎꠣꠔ ꠢꠣꠍꠤꠟ ꠇꠞꠛꠣ,
ꠀꠞ ꠛꠃꠔ ꠎꠘ ꠟꠣꠘ꠆ꠘꠔꠤ ꠅꠁꠛꠣ।
ꠔꠣꠁꠘ ꠅꠃ ꠟꠣꠈꠣꠘ ꠄꠇ ꠘꠤꠡꠣꠘꠣ,
ꠔꠣꠘ ꠛꠤꠙꠇ꠆ꠇꠦ ꠛꠃꠔꠦꠃ ꠝꠣꠔꠤꠛ।
৩৫ ꠅꠔꠣ ꠕꠣꠇꠤ ꠔꠣꠞꠣꠞ ꠖꠤꠟꠞ ꠢꠣꠟ-ꠢꠇꠤꠇꠔ ꠛꠥꠎꠣ ꠎꠣꠁꠛ।
ꠀꠞ ꠢꠥꠘꠅ,
ꠔꠟꠥꠀꠞꠦ ꠇꠣꠐꠤꠟꠦ ꠎꠦꠟꠣ ꠅꠄ,
ꠔꠥꠝꠣꠞ ꠖꠤꠟꠅ-ꠅ ꠅꠟꠣ ꠖꠥꠈꠞ ꠡꠦꠟ ꠢꠣꠝꠣꠁꠛ।”
৩৬ ꠅꠃ ꠡꠝꠄ ꠢꠣꠘ꠆ꠘꠣ ꠘꠣꠝꠞ ꠄꠇꠎꠘ ꠛꠦꠐꠤ ꠝꠣꠘꠥꠡꠅ ꠀꠍꠟꠣ,
ꠔꠣꠁꠘ ꠀꠟ꠆ꠟꠣꠞ ꠘꠛꠤ।
ꠔꠣꠘ ꠛꠣꠚꠞ ꠘꠣꠝ ꠙꠣꠘꠥꠄꠟ,
ꠀꠞ ꠈꠣꠘ꠆ꠖꠣꠘꠞ ꠘꠣꠝ ꠀꠡꠤꠞ।
ꠔꠣꠘ ꠛꠃꠔ ꠛꠄꠅꠡ ꠅꠁꠉꠦꠍꠦ,
ꠡꠣꠔ ꠛꠍꠞ ꠎꠣꠝꠣꠁꠞ ꠊꠞ ꠇꠞꠤꠀ ꠢꠣꠞꠤ,
৩৭ ꠌꠃꠞꠣꠡꠤ ꠛꠍꠞ ꠙꠞ꠆ꠎꠘ꠆ꠔ ꠠꠣꠠꠤ ꠢꠣꠟꠔꠦ ꠀꠍꠟꠣ।
ꠔꠣꠁꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠜꠤꠔꠞꠦ ꠞꠥꠎꠣ ꠞꠣꠈꠔꠣ ꠀꠞ ꠖꠥꠀ ꠇꠞꠔꠣ।
ꠄꠛꠣꠖꠔ-ꠛꠘ꠆ꠖꠦꠉꠤꠞ ꠝꠣꠎꠦ ꠞꠣꠁꠔ-ꠖꠤꠘ ꠇꠣꠐꠣꠁꠔꠣ,
ꠛꠣꠞꠦ ꠛꠣꠞꠅꠁꠔꠣ ꠘꠣ।
৩৮ ꠑꠤꠇ ꠅꠃ ꠡꠝꠄ ꠔꠣꠁꠘꠅ ꠅꠘꠅ ꠀꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ।
ꠀꠞ ꠎꠦꠞꠣꠞ ꠖꠤꠟꠅ ꠅꠃ ꠀꠡꠣ ꠀꠍꠤꠟ,
ꠀꠟ꠆ꠟꠣ ꠙꠣꠇꠦ ꠎꠦꠞꠥꠎꠣꠟꠦꠝꠞꠦ ꠀꠎꠣꠖ ꠇꠞꠛꠣ,
ꠔꠣꠞꠣꠞ ꠟꠉꠦꠅ ꠔꠣꠁꠘ ꠁꠍꠣꠞ ꠛꠦꠙꠣꠞꠦ ꠛꠣꠔꠌꠤꠔ ꠇꠞꠟꠣ।
৩৯ ꠝꠞꠤꠅꠝ ꠀꠞ ꠁꠃꠍꠥꠚꠦ ꠝꠣꠛꠥꠖꠞ ꠡꠞꠤꠅꠔ ꠝꠣꠚꠤꠇ ꠢꠇꠟ ꠇꠣꠝ ꠡꠦꠡ ꠇꠞꠤꠀ ꠢꠣꠞꠟꠦ,
ꠔꠣꠞꠣꠞ ꠛꠡꠔ ꠛꠣꠠꠤ ꠉꠣꠟꠤꠟ ꠎꠤꠟꠣꠞ ꠘꠣꠍꠣꠞꠔ ꠉꠣꠃꠔ ꠉꠦꠟꠣꠉꠤ।
৪০ ꠘꠣꠛꠣꠟꠤꠇ ꠁꠍꠣꠞ ꠛꠄꠅꠡ ꠛꠣꠠꠤꠟ,
ꠄꠞꠟꠉꠦ ꠔꠣꠁꠘ ꠡꠞꠤꠟꠞ ꠛꠟ ꠀꠞ ꠁꠟꠤꠝ-ꠀꠈꠟꠦꠅ ꠝꠎꠛꠥꠔ ꠅꠁꠟꠣ।
ꠀꠟ꠆ꠟꠣꠞ ꠞꠢꠝꠔ ꠔ ꠔꠣꠘ ꠟꠉꠦ ꠀꠍꠤꠟ।
ꠛꠣꠞꠅ ꠛꠍꠞꠞ ꠢꠎꠞꠔ ꠁꠍꠣ ꠎꠦꠞꠥꠎꠣꠟꠦꠝ ꠇꠣꠛꠣ ꠡꠞꠤꠚꠅ
৪১ ꠁꠢꠥꠖꠤ ꠅꠇꠟꠞ ꠀꠎꠣꠖꠤ ꠁꠖꠞ ꠡꠝꠄ ꠀꠁꠟꠦ ꠁꠍꠣꠞ ꠝꠣ-ꠛꠣꠚ ꠙꠞꠔꠤ ꠛꠍꠞꠃ ꠎꠦꠞꠥꠎꠣꠟꠦꠝꠅ ꠎꠣꠁꠔꠣ।
৪২ ꠁꠍꠣꠞ ꠛꠄꠅꠡ ꠎꠦꠛꠟꠣ ꠛꠣꠞꠅ ꠛꠍꠞ,
ꠅꠃ ꠡꠝꠄꠅ ꠢꠃ ꠞꠦꠅꠀꠎ ꠝꠣꠚꠤꠇ ꠔꠣꠞꠣ ꠎꠦꠞꠥꠎꠣꠟꠦꠝꠅ ꠀꠁꠟꠣ।
৪৩ ꠁꠖ ꠡꠦꠡ ꠅꠁꠀ ꠢꠣꠞꠟꠦ ꠔꠣꠞꠣ ꠛꠣꠠꠤꠔ ꠞꠅꠀꠘꠣ ꠖꠤꠟꠣ,
ꠅꠁꠟꠦ ꠁꠍꠣ ꠅꠃ ꠡꠝꠄ ꠁ ꠖꠟꠞ ꠟꠉꠦ ꠘꠣ ꠉꠤꠀ ꠎꠦꠞꠥꠎꠣꠟꠦꠝꠅ ꠞꠁꠉꠦꠟꠣ।
ꠔꠣꠘ ꠝꠣ-ꠛꠣꠚꠦ ꠁꠈꠣꠘ ꠐꠦꠞ ꠙꠣꠁꠟꠣ ꠘꠣ।
৪৪ ꠁꠍꠣꠅ ꠖꠟꠞ ꠜꠤꠔꠞꠦ ꠀꠍꠂꠘ ꠝꠘꠅ ꠇꠞꠤꠀ ꠔꠣꠞꠣ ꠄꠇꠖꠤꠘꠞ ꠙꠕ ꠀꠉꠥꠀꠁ ꠉꠦꠟꠣ।
ꠉꠤꠀ ꠔꠣꠞꠣꠞ ꠈꠦꠡ-ꠇꠥꠐꠥꠝ ꠀꠞ ꠟꠉꠞ ꠝꠣꠘꠡꠞ ꠉꠦꠍꠦ ꠔꠣꠟ꠆ꠟꠣꠡ ꠇꠞꠤꠀ ꠔꠣꠘꠞꠦ ꠙꠣꠁꠟꠣ ꠘꠣ।
৪৫ ꠘꠣ ꠙꠣꠁꠀ ꠔꠣꠘꠞꠦ ꠔꠥꠇꠣꠁ ꠔꠥꠇꠣꠁ ꠢꠤꠞꠛꠣꠞ ꠎꠦꠞꠥꠎꠣꠟꠦꠝꠅ ꠀꠁꠟꠣ।
৪৬ ꠔꠤꠘ ꠖꠤꠘ ꠔꠣꠟ꠆ꠟꠣꠡ ꠇꠞꠤꠀ ꠔꠣꠘꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠙꠣꠁꠟꠣ।
ꠔꠣꠞꠣ ꠖꠦꠈꠟꠣ,
ꠔꠣꠁꠘ ꠝꠃꠟꠣꠘꠣ ꠅꠇꠟꠞ ꠟꠉꠦ ꠛꠁꠀ ꠔꠣꠞꠣꠞ ꠛꠄꠀꠘ ꠢꠥꠘꠞꠣ,
ꠀꠞ ꠘꠣꠘꠣꠘ ꠝꠥꠍꠟꠣ ꠎꠤꠇꠣꠁꠞꠣ।
৪৭ ꠀꠞ ꠎꠔ ꠝꠣꠘꠡꠦ ꠔꠣꠘ ꠝꠣꠔ ꠢꠥꠘꠟꠣ,
ꠔꠣꠞꠣ ꠢꠇꠟꠦꠃ ꠔꠣꠘ ꠀꠈꠟꠖꠣꠞꠤ ꠛꠣꠔꠌꠤꠔ ꠢꠥꠘꠤꠀ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ।
৪৮ ꠔꠣꠘ ꠝꠣ-ꠛꠣꠚꠦꠅ ꠔꠣꠘꠞꠦ ꠖꠦꠈꠤꠀ ꠄꠇ꠆ꠇꠦꠞꠦ ꠌꠝꠇꠤꠉꠦꠟꠣ।
ꠝꠣʼꠄ ꠔꠣꠘꠞꠦ ꠎꠤꠇꠣꠁꠟꠣ,
“ꠙꠥꠔꠞꠦ,
ꠔꠥꠝꠤ ꠀꠝꠞꠣꠞ ꠟꠉꠦ ꠁꠔꠣ ꠇꠞꠟꠣꠄ ꠇꠦꠘꠦ?
ꠀꠝꠤ ꠀꠞ ꠔꠥꠝꠣꠞ ꠛꠣꠚꠦ ꠇꠔ ꠙꠦꠞꠦꠡꠣꠘ ꠅꠁꠀ ꠔꠥꠝꠣꠞꠦ ꠔꠥꠇꠣꠁꠞꠣꠝ।”
৪৯ ꠁꠍꠣꠄ ꠎꠥꠀꠙ ꠖꠤꠟꠣ,
“ꠔꠥꠝꠤꠔꠣꠁꠘ ꠇꠦꠘꠦ ꠀꠝꠣꠞꠦ ꠔꠥꠇꠣꠁꠞꠣꠄ?
ꠎꠣꠘꠅ ꠘꠣ ꠘꠤ,
ꠀꠝꠤ ꠔ ꠀꠝꠣꠞ ꠉꠣꠁꠛꠤ ꠛꠣꠚꠞ ꠊꠞꠅꠃ ꠞꠁꠔꠦ ꠅꠁꠛ?”
৫০ ꠔꠣꠘ ꠝꠣ-ꠛꠣꠚꠦ ꠁ ꠝꠣꠔꠞ ꠇꠥꠘꠥ ꠜꠦꠖ ꠛꠥꠎꠟꠣ ꠘꠣ।
৫১ ꠛꠣꠖꠦ ꠔꠣꠁꠘ ꠛꠣꠞꠅꠁꠀ ꠝꠣ-ꠛꠣꠚꠞ ꠟꠉꠦ ꠅꠁꠀ ꠘꠣꠍꠣꠞꠔꠅ ꠉꠦꠟꠣ,
ꠀꠞ ꠔꠣꠞꠣꠞ ꠇꠕꠣꠝꠔ ꠌꠟꠟꠣ।
ꠅꠁꠟꠦ ꠔꠣꠘ ꠝꠣʼꠄ ꠁꠔꠣ ꠢꠇ꠆ꠇꠟꠔꠣ ꠖꠤꠟꠅ ꠉꠣꠕꠤꠀ ꠞꠣꠈꠟꠣ।
৫২ ꠄꠞꠝꠣꠎꠦ ꠀꠟ꠆ꠟꠣꠞ ꠝꠢꠛ꠆ꠛꠔ,
ꠝꠣꠘꠡꠞ ꠝꠣꠄꠀ,
ꠛꠄꠅꠡ ꠀꠞ ꠁꠟꠤꠝ-ꠀꠈꠟꠦ ꠔꠣꠁꠘ ꠀꠡ꠆ꠔꠦ ꠀꠡ꠆ꠔꠦ ꠛꠠ ꠅꠁꠟꠣ।