ꠙꠣꠌ ꠀꠎꠣꠞ ꠝꠣꠘꠡꠞ ꠉꠣꠁꠛꠤ ꠈꠣꠘꠤ
৬
১ ꠄꠞꠛꠣꠖꠦ ꠢꠎꠞꠔ ꠁꠍꠣ ꠉꠣꠟꠤꠟ ꠀꠅꠞꠞ ꠢꠙꠣꠞꠅ ꠉꠦꠟꠣꠉꠤ,
ꠅꠃ ꠀꠅꠞꠞ ꠀꠞꠇ ꠘꠣꠝ ꠔꠤꠛꠤꠞꠤꠀ ꠀꠅꠞ।
২ ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠅꠁꠀ ꠎꠣꠅꠀꠔ ꠀꠍꠟꠣ,
ꠔꠣꠞꠣ ꠔ ꠖꠦꠈꠍꠤꠟꠣ,
ꠛꠦꠝꠣꠞꠤ ꠅꠇꠟꠞ ꠃꠙꠞꠦ ꠔꠣꠁꠘ ꠇꠤꠟꠣ ꠇꠦꠞꠣꠝꠔꠤ ꠇꠣꠝ ꠇꠞꠍꠂꠘ।
৩ ꠢꠘꠅ ꠉꠤꠀ ꠢꠣꠞꠤ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠄꠇ ꠙꠣꠠꠞ ꠃꠙꠞꠦ ꠛꠁꠟꠣ।
৪ ꠅꠃ ꠡꠝꠄ ꠁꠢꠥꠖꠤ ꠅꠇꠟꠞ ꠀꠎꠣꠖꠤ ꠁꠖ ꠊꠘꠣꠁ ꠀꠁꠍꠦ।
৫ ꠁꠍꠣꠄ ꠌꠣꠁꠀ ꠖꠦꠈꠟꠣ,
ꠛꠃꠔ ꠝꠣꠘꠥꠡ ꠔꠣꠘ ꠉꠦꠍꠦ ꠃꠑꠤꠀ ꠀꠁꠞꠣ,
ꠅꠃ ꠔꠣꠘ ꠍꠣꠢꠣꠛꠤ ꠚꠤꠟꠤꠚꠞꠦ ꠇꠁꠟꠣ,
“ꠁꠔꠣ ꠝꠣꠘꠡꠞꠦ ꠈꠣꠅꠀꠘꠤꠞ ꠟꠣꠉꠤ ꠀꠝꠞꠣ ꠞꠥꠐꠤ ꠙꠣꠁꠝꠥ ꠇꠥꠘ ꠎꠣꠉꠣꠔ?”
৬ ꠀꠍꠟꠦ ꠚꠤꠟꠤꠚꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠔꠣꠁꠘ ꠁꠈꠣꠘ ꠎꠤꠇꠣꠁꠟꠣ,
ꠅꠁꠟꠦ ꠇꠤꠟꠣ ꠇꠤꠔꠣ ꠇꠞꠛꠣ,
ꠁꠈꠣꠘ ꠔꠣꠁꠘ ꠀꠉꠦꠃ ꠎꠣꠘꠔꠣ।
৭ ꠚꠤꠟꠤꠚꠦ ꠎꠥꠀꠙ ꠖꠤꠟꠣ,
“ꠄꠞꠣꠞꠦ ꠕꠥꠠꠣ ꠕꠥꠠꠣ ꠈꠣꠘꠤ ꠖꠤꠟꠦꠅ ꠖꠥꠁꠡ ꠖꠤꠘꠣꠞꠞ ꠞꠥꠐꠤꠄ ꠇꠥꠟꠣꠁꠔ ꠘꠣꠄ।”
৮ ꠢꠘꠅ ꠀꠘ꠆ꠖ꠆ꠞꠤꠀꠍ ꠘꠣꠝꠦ ꠢꠎꠞꠔ ꠁꠍꠣꠞ ꠄꠇ ꠍꠣꠢꠣꠛꠤ ꠀꠍꠟꠣ।
ꠔꠣꠁꠘ ꠅꠁꠟꠣ ꠍꠣꠁꠝꠘ-ꠙꠤꠔꠞꠞ ꠜꠣꠁ।
৯ ꠔꠣꠁꠘ ꠁꠍꠣꠞꠦ ꠇꠁꠟꠣ,
“ꠢꠥꠎꠥꠞ,
ꠅꠘꠅ ꠢꠥꠞꠥ ꠄꠇ ꠙꠥꠀꠞ ꠉꠦꠍꠦ ꠙꠣꠌꠈꠣꠘ ꠀꠐꠣꠞ ꠞꠥꠐꠤ ꠀꠞ ꠖꠥꠁꠐꠣ ꠛꠤꠞꠣꠘ ꠝꠣꠍ ꠀꠍꠦ,
ꠅꠁꠟꠦ ꠅꠔ ꠝꠣꠘꠡꠞ ꠝꠣꠎꠦ ꠁꠔꠣꠄ ꠇꠤꠔꠣ ꠅꠁꠛ?”
১০ ꠁꠍꠣꠄ ꠢꠥꠇꠥꠝ ꠖꠤꠟꠣ,
“ꠔꠥꠝꠞꠣ ꠅꠔꠣ ꠝꠣꠘꠡꠞꠦ ꠊꠣꠡꠞ ꠃꠙꠞꠦ ꠛꠅꠀꠁ ꠖꠦꠅ।”
ꠔꠦꠃ ꠔꠣꠞꠣ ꠊꠣꠡꠞ ꠃꠙꠞꠦ ꠛꠁꠉꠦꠟꠣ।
ꠁꠘꠅ ꠈꠣꠟꠤ ꠛꠦꠐꠣ ꠝꠣꠘꠥꠡꠃ ꠀꠍꠟꠣ ꠅꠘꠥꠝꠣꠘ ꠙꠣꠌ ꠀꠎꠣꠞ ꠎꠘ।
১১ ꠛꠣꠖꠦ ꠔꠣꠁꠘ ꠅꠃ ꠙꠣꠌꠈꠣꠘ ꠞꠥꠐꠤ ꠀꠔꠅ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠄꠞꠣꠞꠦ ꠛꠣꠐꠤꠀ ꠖꠤꠟꠣ।
ꠅꠃꠟꠣ ꠛꠤꠞꠣꠘ ꠝꠣꠍꠅ ꠛꠣꠐꠤꠀ ꠖꠤꠟꠣ।
ꠎꠦ ꠎꠔ ꠌꠣꠁꠟ,
ꠢꠦ ꠅꠔꠈꠣꠘ ꠙꠣꠁꠟ।
১২ ꠢꠇꠟ ꠝꠣꠘꠡꠦ ꠙꠦꠐ ꠜꠞꠤ ꠈꠣꠁꠟ।
ꠈꠣꠁꠀ ꠢꠣꠞꠟꠦ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
“ꠈꠣꠘꠤꠞ ꠛꠣꠖꠦ ꠎꠦꠔꠣ ꠞꠁꠍꠦ,
ꠔꠥꠝꠞꠣ ꠅꠔꠣ ꠄꠇꠈꠣꠘꠅ ꠖꠟꠣ ꠇꠞꠅ,
ꠇꠥꠘ꠆ꠔꠣ ꠚꠣꠟꠣꠁꠅ ꠘꠣ।”
১৩ ꠄꠞꠣ ꠅꠃ ꠙꠣꠌꠈꠣꠘ ꠞꠥꠐꠤꠞ ꠛꠣꠠꠔꠤ ꠐꠥꠇꠞꠣꠁꠘ ꠖꠟꠣ ꠇꠞꠤꠀ ꠛꠣꠞꠅ ꠐꠥꠇꠞꠤ ꠜꠞꠟꠣ।
১৪ ꠢꠎꠞꠔ ꠁꠍꠣꠞ ꠁ ꠇꠦꠞꠣꠝꠔꠤ ꠖꠦꠈꠤꠀ ꠝꠣꠘꠡꠦ ꠝꠣꠔꠣ-ꠝꠣꠔꠤ ꠟꠣꠉꠣꠁꠟꠣ,
“ꠘꠤꠌ꠆ꠌꠄ ꠄꠁꠘꠃ ꠢꠃ ꠘꠛꠤ,
ꠎꠦꠁꠘ ꠖꠥꠘꠤꠀꠔ ꠔꠡꠞꠤꠚ ꠀꠘꠣꠞ ꠇꠕꠣ।”
১৫ ꠔꠦꠃ ꠁꠍꠣꠄ ꠛꠥꠎꠤꠟꠤꠟꠣ,
ꠝꠣꠘꠡꠦ ꠎꠥꠞ ꠇꠞꠤꠀ ꠔꠣꠘꠞꠦ ꠔꠣꠞꠣꠞ ꠛꠣꠖꠡꠣ ꠛꠣꠘꠣꠘꠤꠞ ꠟꠣꠉꠤ ꠗꠞꠔ ꠌꠣꠞ।
ꠅꠈꠣꠘ ꠛꠥꠎꠤꠀ ꠔꠣꠁꠘ ꠢꠤꠞꠛꠣꠞ ꠄꠇꠟꠣꠃ ꠙꠣꠠꠞ ꠃꠙꠞꠦ ꠉꠦꠟꠣꠉꠤ।
ꠀꠅꠞꠞ ꠙꠣꠘꠤꠞ ꠃꠙꠞꠦꠖꠤ ꠀꠐꠣ
১৬ ꠢꠣꠁꠘ꠆ꠎꠣꠛꠣꠟꠣ ꠁꠍꠣꠞ ꠍꠣꠢꠣꠛꠤ ꠅꠇꠟ ꠀꠅꠞꠞ ꠙꠣꠞꠅ ꠉꠦꠟꠣ।
১৭ ꠀꠞ ꠇꠚꠞꠘꠣꠃꠝ ꠐꠣꠃꠘꠅ ꠎꠣꠁꠔꠣ ꠇꠞꠤ ꠘꠣꠅ ꠟꠁꠀ ꠀꠅꠞ ꠙꠣꠠꠤ ꠖꠦꠅꠀꠔ ꠟꠣꠉꠟꠣ।
ꠁ ꠡꠝꠄ ꠀꠘ꠆ꠖꠣꠁꠞ ꠅꠁꠉꠦꠍꠤꠟ ꠀꠞ ꠁꠍꠣꠅ ꠔꠣꠞꠣꠞ ꠟꠉꠦ ꠀꠍꠟꠣ ꠘꠣ।
১৮ ꠀꠅꠞꠞ ꠝꠣꠎꠈꠣꠘꠅ ꠎꠣꠁꠔꠦꠃ ꠈꠥꠛ ꠔꠥꠚꠣꠘꠤ ꠛꠣꠔꠣꠡ ꠀꠞ ꠛꠠ ꠛꠠ ꠓꠦꠃ ꠡꠥꠞꠥ ꠅꠁꠟ।
১৯ ꠅꠘꠥꠝꠣꠘ ꠔꠤꠘ-ꠌꠣꠁꠞ ꠝꠣꠁꠟ ꠘꠣꠅ ꠛꠣꠁꠀ ꠎꠣꠅꠀꠞ ꠛꠣꠖꠦ ꠔꠣꠞꠣ ꠖꠦꠈꠟꠣ,
ꠢꠎꠞꠔ ꠁꠍꠣ ꠙꠣꠘꠤꠞ ꠃꠙꠞꠦꠖꠤ ꠀꠐꠤꠀ ꠔꠣꠞꠣꠞ ꠉꠦꠍꠦ ꠀꠁꠞꠣ।
ꠁꠔꠣ ꠖꠦꠈꠤꠀ ꠍꠣꠢꠣꠛꠤ ꠅꠇꠟꠦ ꠈꠥꠛ ꠒꠞꠣꠁ ꠉꠦꠟꠣ।
২০ ꠅꠃ ꠡꠝꠄ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠒꠞꠣꠁꠅ ꠘꠣ,
ꠁ ꠔ ꠀꠝꠤ।”
২১ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠘꠣꠅꠅ ꠔꠥꠟꠔꠣ ꠌꠣꠁꠟꠣ,
ꠀꠞ ꠔꠣꠞꠣ ꠎꠦ ꠎꠣꠉꠣꠔ ꠎꠣꠅꠀꠞ ꠇꠕꠣ,
ꠟꠉꠦ ꠟꠉꠦ ꠘꠣꠅ ꠉꠤꠀ ꠢꠘꠅ ꠙꠃꠍꠤ ꠉꠦꠟ।
ꠎꠤꠘ꠆ꠖꠦꠉꠤ-ꠞꠥꠐꠤꠞ ꠛꠦꠙꠣꠞꠦ ꠛꠄꠀꠘ
২২ ꠀꠅꠞꠞ ꠢꠙꠣꠞꠅ ꠎꠦꠔꠣ ꠝꠣꠘꠥꠡ ꠃꠛꠣ ꠀꠍꠟꠣ,
ꠛꠣꠖꠞ ꠖꠤꠘ ꠔꠣꠞꠣ ꠛꠥꠎꠟꠣ,
ꠀꠉꠞ ꠖꠤꠘ ꠁꠘꠅ ꠄꠇꠈꠣꠘ ꠘꠣꠅ ꠍꠣꠠꠣ ꠖꠥꠍꠞꠣ ꠇꠥꠘꠥ ꠘꠣꠅ ꠀꠍꠤꠟ ꠘꠣ।
ꠔꠣꠞꠣ ꠄꠅꠈꠣꠘꠅ ꠛꠥꠎꠟꠣ,
ꠁꠍꠣ ꠔꠣꠘ ꠍꠣꠢꠣꠛꠤ ꠅꠇꠟꠞ ꠟꠉꠦ ꠘꠣꠅꠅ ꠃꠑꠍꠂꠘ ꠘꠣ,
ꠛꠞꠋ ꠔꠣꠞꠣ ꠄꠇꠟꠣꠃ ꠀꠅꠞ ꠙꠣꠞꠅꠁꠍꠂꠘ।
২৩ ꠅꠁꠟꠦ ꠎꠦ ꠎꠣꠉꠣꠔ ꠁꠍꠣꠄ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠢꠣꠞꠤ ꠝꠣꠘꠡꠞꠦ ꠞꠥꠐꠤ ꠈꠣꠅꠀꠁꠍꠟꠣ,
ꠅꠃ ꠎꠣꠉꠣꠞ ꠉꠦꠍꠦ ꠔꠤꠛꠤꠞꠤꠀ ꠐꠣꠃꠘ ꠕꠣꠇꠤ ꠇꠄꠈꠣꠘ ꠘꠣꠅ ꠀꠁꠟ।
২৪ ꠝꠣꠘꠡꠦ ꠎꠦꠛꠟꠣ ꠖꠦꠈꠟꠣ,
ꠁꠍꠣ ꠛꠣ ꠔꠣꠘ ꠍꠣꠢꠣꠛꠤ ꠅꠇꠟ ꠇꠦꠃ ꠁ ꠎꠣꠉꠣꠔ ꠘꠣꠁ,
ꠅꠃ ꠔꠣꠞꠣ ꠅꠔꠣ ꠘꠣꠅꠀꠁꠘ꠆ꠔꠅ ꠃꠑꠤꠀ ꠁꠍꠣꠞ ꠔꠣꠟ꠆ꠟꠣꠡꠦ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣꠉꠤ।
২৫ ꠢꠘꠅ ꠉꠤꠀ ꠔꠣꠞꠣ ꠁꠍꠣꠞꠦ ꠙꠣꠁꠀ ꠇꠁꠟꠣ,
“ꠢꠥꠎꠥꠞ,
ꠀꠙꠘꠦ ꠁꠘꠅ ꠇꠥꠘ ꠡꠝꠄ ꠀꠁꠟꠣ?”
২৬ ꠔꠣꠁꠘ ꠎꠥꠀꠙ ꠖꠤꠟꠣ,
“ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ,
ꠔꠥꠝꠞꠣ ꠀꠝꠣꠞ ꠇꠦꠞꠣꠝꠔꠤ ꠘꠤꠡꠣꠘꠣꠞ ꠝꠣꠘꠤ ꠛꠥꠎꠤꠀ ꠀꠝꠣꠞꠦ ꠔꠥꠇꠣꠁꠞꠣꠄ ꠘꠣ,
ꠛꠞꠋ ꠙꠦꠐ ꠜꠞꠤ ꠞꠥꠐꠤ ꠈꠣꠁꠍ ꠇꠞꠤꠃ ꠔꠥꠇꠣꠁꠞꠣꠄ।
২৭ ꠅꠈꠘ ꠢꠥꠘꠅ,
ꠖꠥꠘꠤꠀꠛꠤ ꠎꠦ ꠈꠣꠘꠤ ꠘꠡ꠆ꠐ ꠅꠁꠎꠣꠄ,
ꠔꠣꠞ ꠈꠞꠦ ꠊꠥꠞꠤꠀ ꠟꠣꠜ ꠇꠤꠔꠣ?
ꠎꠦ ꠈꠣꠘꠤ ꠇꠥꠘꠥꠖꠤꠘ ꠘꠡ꠆ꠐ ꠅꠄ ꠘꠣ,
ꠛꠞꠋ ꠀꠈꠦꠞꠤ ꠎꠤꠘ꠆ꠖꠦꠉꠤ ꠖꠣꠘ ꠇꠞꠦ,
ꠔꠣꠞ ꠈꠞꠦ ꠅꠁꠀ ꠊꠥꠞꠅ।
ꠁ ꠈꠣꠘꠤ ꠔ ꠀꠝꠤ ꠛꠤꠘ-ꠀꠖꠝꠦ ꠔꠥꠝꠞꠣꠞꠦ ꠖꠤꠝꠥ।
ꠅꠃ ꠄꠈꠔꠤꠀꠞ ꠈꠣꠟꠤ ꠀꠝꠣꠞ ꠀꠍꠦ,
ꠀꠝꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄꠃ ꠁꠔꠣꠞ ꠙꠞꠝꠣꠘ ꠖꠦꠈꠣꠁꠍꠂꠘ।”
২৮ ꠁꠈꠣꠘ ꠢꠥꠘꠤꠀ ꠔꠣꠞꠣ ꠁꠍꠣꠞꠦ ꠎꠤꠇꠣꠁꠟꠣ,
“ꠔꠦ ꠀꠟ꠆ꠟꠣꠞ ꠇꠣꠝ ꠇꠞꠣꠞ ꠟꠣꠉꠤ ꠀꠝꠞꠣ ꠇꠤꠔꠣ ꠇꠞꠔꠣꠝ?”
২৯ ꠔꠣꠁꠘ ꠇꠁꠟꠣ,
“ꠀꠟ꠆ꠟꠣꠄ ꠎꠣꠞꠦ ꠙꠣꠑꠣꠁꠍꠂꠘ,
ꠔꠣꠘ ꠃꠙꠞꠦ ꠁꠝꠣꠘ ꠀꠘꠣꠞ ꠅꠁꠟ ꠀꠟ꠆ꠟꠣꠞ ꠇꠣꠝ।”
৩০ ꠄꠞꠛꠣꠖꠦ ꠔꠣꠞꠣ ꠔꠣꠘꠞꠦ ꠎꠤꠇꠣꠁꠟ,
“ꠔꠦ ꠀꠙꠘꠦ ꠅꠝꠘ ꠇꠤꠔꠣ ꠘꠤꠡꠣꠘꠣ ꠖꠦꠈꠣꠁꠛꠣ,
ꠎꠦꠔꠣ ꠖꠦꠈꠤꠀ ꠀꠝꠞꠣ ꠀꠙꠘꠣꠞ ꠃꠙꠞꠦ ꠁꠝꠣꠘ ꠀꠘꠝꠥ?
ꠀꠙꠘꠦ ꠇꠥꠘ ꠇꠣꠝ ꠇꠞꠛꠣ?
৩১ ꠀꠝꠞꠣꠞ ꠛꠣꠚ-ꠖꠣꠖꠣꠄ ꠔ ꠝꠞꠥꠜꠥꠝꠤꠔ ꠝꠣꠘ꠆ꠘꠣ ꠈꠣꠁꠍꠟꠣ।
ꠙꠣꠇ ꠇꠤꠔꠣꠛꠅ ꠟꠦꠈꠣ ꠀꠍꠦ,
ꠀꠟ꠆ꠟꠣꠄ ꠔꠣꠞꠣꠞꠦ ꠛꠦꠢꠦꠡ꠆ꠔꠤ ꠈꠣꠘꠤ ꠈꠣꠅꠀꠁꠟꠣ।”
৩২ ꠁꠍꠣꠄ ꠎꠥꠀꠙ ꠖꠤꠟꠣ,
“ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ,
ꠛꠦꠢꠦꠡ꠆ꠔꠤ ꠎꠦ ꠞꠥꠐꠤ ꠔꠥꠝꠞꠣ ꠙꠣꠁꠍꠟꠣꠄ,
ꠁꠔꠣ ꠔ ꠝꠥꠍꠣ ꠘꠛꠤꠄ ꠖꠤꠍꠂꠘ ꠘꠣ,
ꠛꠞꠋ ꠀꠝꠣꠞ ꠉꠣꠁꠛꠤ ꠛꠣꠚꠦꠃ ꠔꠥꠝꠞꠣꠞꠦ ꠀꠍꠟ ꠛꠦꠢꠦꠡ꠆ꠔꠤ ꠞꠥꠐꠤ ꠖꠣꠘ ꠇꠞꠂꠘ।
৩৩ ꠀꠞ ꠀꠟ꠆ꠟꠣꠞ ꠖꠦꠅꠀ ꠢꠃ ꠞꠥꠐꠤ ꠅꠁꠟꠣ ꠅꠃ ꠎꠘ,
ꠎꠦꠁꠘ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠀ ꠢꠣꠞꠣ ꠎꠉꠔꠞꠦ ꠎꠤꠘ꠆ꠖꠦꠉꠤ ꠖꠦꠁꠘ।”
৩৪ ꠔꠦꠃ ꠔꠣꠞꠣ ꠇꠂꠟ,
“ꠢꠥꠎꠥꠞ,
ꠔꠦ ꠅꠃ ꠞꠥꠐꠤꠃ ꠀꠝꠞꠣꠞꠦ ꠢꠞ-ꠢꠣꠝꠦꠡꠣ ꠖꠦꠃꠇ꠆ꠇꠣ।”
৩৫ ꠁꠍꠣꠄ ꠇꠁꠟꠣ,
“ꠀꠝꠤꠃ ꠢꠃ ꠎꠤꠘ꠆ꠖꠦꠉꠤ-ꠞꠥꠐꠤ।
ꠎꠦ ꠎꠘ ꠀꠝꠣꠞ ꠉꠦꠍꠦ ꠀꠄ,
ꠔꠣꠞ ꠇꠥꠘꠥ ꠡꠝꠄ ꠜꠥꠈ ꠟꠣꠉꠦ ꠘꠣ,
ꠀꠞ ꠎꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ,
ꠔꠣꠞ ꠇꠥꠘꠥ ꠡꠝꠄ ꠙꠤꠀꠍꠦꠅ ꠗꠞꠦ ꠘꠣ।
৩৬ ꠀꠝꠤ ꠔ ꠔꠥꠝꠞꠣꠞꠦ ꠝꠥꠈꠖꠤ ꠇꠁꠍꠤꠅ,
ꠀꠞ ꠔꠥꠝꠞꠣ ꠀꠝꠣꠞꠦ ꠖꠦꠈꠤꠀꠅ ꠁꠝꠣꠘ ꠀꠘꠟꠣꠄ ꠘꠣ।
৩৭ ꠀꠝꠣꠞ ꠉꠣꠁꠛꠤ ꠛꠣꠚꠦ ꠎꠦꠞꠣꠞꠦ ꠀꠝꠣꠞ ꠀꠔꠅ ꠖꠦꠁꠘ,
ꠔꠣꠞꠣ ꠢꠇꠟꠃ ꠀꠝꠣꠞ ꠉꠦꠍꠦ ꠀꠁꠛ।
ꠎꠦ ꠎꠘ ꠀꠝꠣꠞ ꠉꠦꠍꠦ ꠀꠄ,
ꠀꠝꠤ ꠇꠥꠘꠥꠝꠘ꠆ꠔꠦꠃ ꠔꠣꠞꠦ ꠛꠣꠞꠦ ꠚꠣꠟꠣꠁꠔꠣꠝ ꠘꠣꠄ।
৩৮ ꠀꠝꠤ ꠇꠥꠘꠥ ꠀꠝꠣꠞ ꠝꠞ꠆ꠎꠤ ꠝꠣꠚꠤꠇ ꠇꠣꠝ ꠇꠞꠣꠔ ꠀꠁꠍꠤ ꠘꠤ?
ꠘꠣ,
ꠛꠞꠋ ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ,
ꠔꠣꠘ ꠝꠞ꠆ꠎꠤ ꠎꠥꠉꠣꠁꠀ ꠇꠣꠝ ꠇꠞꠣꠞ ꠟꠣꠉꠤꠃ ꠀꠝꠤ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠍꠤ।
৩৯ ꠢꠥꠘꠅ,
ꠎꠦ ꠛꠣꠚꠦ ꠀꠝꠣꠞꠦ ꠙꠣꠑꠣꠁꠍꠂꠘ,
ꠔꠣꠘ ꠝꠥꠘꠡꠣ ꠅꠁꠟ,
ꠔꠣꠁꠘ ꠎꠦꠞꠣꠞꠦ ꠀꠝꠣꠞ ꠀꠔꠅ ꠖꠤꠍꠂꠘ,
ꠀꠝꠤ ꠎꠣꠘꠥ ꠄꠞꠣ ꠄꠇꠎꠘꠞꠦꠅ ꠘꠣ ꠀꠞꠣꠁ ꠛꠞꠋ ꠞꠥꠎ ꠢꠣꠡꠞꠅ ꠄꠞꠣꠞꠦ ꠎꠤꠘ꠆ꠖꠣ ꠢꠣꠟꠔꠦ ꠔꠥꠟꠤ।
৪০ ꠀꠝꠣꠞ ꠛꠣꠚꠞ ꠝꠥꠘꠡꠣ ꠅꠁꠟ,
ꠎꠣꠞꠣ ꠔꠣꠘ ꠙꠥꠔꠞꠦ ꠖꠦꠈꠤꠀ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ,
ꠔꠣꠞꠣ ꠎꠣꠘꠥ ꠀꠈꠦꠞ ꠙꠣꠄ।
ꠀꠞ ꠀꠝꠤꠃ ꠔꠣꠞꠣꠞꠦ ꠞꠥꠎ ꠢꠣꠡꠞꠅ ꠎꠤꠘ꠆ꠖꠣ ꠇꠞꠤ ꠔꠥꠟꠝꠥ।”
৪১ ꠁꠈꠣꠘ ꠢꠥꠘꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠦ ꠁꠍꠣꠞꠦ ꠟꠁꠀ ꠇꠣꠘꠣ-ꠊꠥꠡꠣ ꠟꠣꠉꠣꠁꠟꠣ।
ꠇꠣꠞꠘ ꠔꠣꠁꠘ ꠀꠉꠦ ꠇꠁꠍꠟꠣ,
“ꠛꠦꠢꠦꠡ꠆ꠔ ꠕꠣꠇꠤ ꠎꠦ ꠞꠥꠐꠤ ꠟꠣꠝꠤꠀ ꠀꠁꠍꠦ,
ꠀꠝꠤꠃ ꠢꠃ ꠞꠥꠐꠤ।”
৪২ ꠄꠞꠟꠣꠉꠤ ꠔꠣꠞꠣ ꠘꠤꠎꠦ ꠘꠤꠎꠦ ꠇꠁꠟꠣ,
“ꠅꠉꠥ ꠔ ꠁꠃꠍꠥꠚꠞ ꠙꠥꠀ ꠁꠍꠣ ꠘꠣꠄ ꠘꠤ ꠛꠣ?
ꠀꠝꠞꠣ ꠔ ꠔꠣꠞ ꠝꠣ-ꠛꠣꠚꠞꠦꠅ ꠌꠤꠘꠤ।
ꠔꠦ ꠢꠦ ꠇꠦꠝꠘꠦ ꠇꠄ,
ꠢꠦ ꠛꠥꠟꠦ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠍꠦ?”
৪৩ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠔꠥꠝꠞꠣ ꠘꠤꠎꠞ ꠝꠣꠎꠦ ꠇꠣꠘꠣ-ꠊꠥꠡꠣ ꠇꠞꠤꠅ ꠘꠣ।
৪৪ ꠀꠝꠣꠞ ꠎꠦ ꠉꠣꠁꠛꠤ ꠛꠣꠚꠦ ꠀꠝꠣꠞꠦ ꠙꠣꠑꠣꠁꠍꠂꠘ,
ꠔꠣꠁꠘ ꠀꠡꠤꠇ ꠘꠣ ꠛꠣꠘꠣꠁꠟꠦ ꠇꠥꠘꠥ ꠝꠣꠘꠥꠡꠃ ꠀꠝꠣꠞ ꠉꠦꠍꠦ ꠀꠁꠔ ꠙꠣꠞꠦ ꠘꠣ।
ꠀꠞ ꠀꠝꠤꠃ ꠔꠣꠞꠦ ꠞꠥꠎ ꠢꠣꠡꠞꠅ ꠎꠤꠘ꠆ꠖꠣ ꠢꠣꠟꠔꠦ ꠔꠥꠟꠝꠥ।
৪৫ ꠎꠣꠘꠅ ꠘꠤ,
ꠘꠛꠤ ꠅꠇꠟꠞ ꠇꠤꠔꠣꠛꠅ ꠟꠦꠈꠣ ꠀꠍꠦ,
‘ꠔꠣꠞꠣ ꠢꠇꠟꠦ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠔꠣꠟꠤꠝ ꠟꠁꠛꠣ।’
ꠀꠞ ꠎꠦ ꠎꠘꠦ ꠉꠣꠁꠛꠤ ꠛꠣꠚꠞ ꠉꠦꠍ ꠕꠣꠇꠤ ꠔꠣꠟꠤꠝ ꠙꠣꠁꠍꠦ,
ꠢꠃ ꠎꠘꠃ ꠀꠝꠣꠞ ꠉꠦꠍꠦ ꠀꠄ।
৪৬ “ꠅꠃ ꠛꠣꠚꠞꠦ ꠔ ꠇꠥꠘꠥ ꠝꠣꠘꠡꠦ ꠖꠦꠈꠍꠦ ꠘꠣ,
ꠈꠣꠟꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠎꠦꠁꠘ ꠀꠁꠍꠂꠘ,
ꠔꠣꠁꠘꠃ ꠁ ꠛꠣꠚꠞꠦ ꠖꠦꠈꠍꠂꠘ।
৪৭ ꠀꠝꠤ ꠔꠥꠝꠞꠣꠞꠦ ꠘꠤꠌ꠆ꠌꠤꠔ ꠢꠣꠍꠣ ꠇꠕꠣ ꠇꠁꠞꠣꠝ,
ꠎꠦ ꠎꠘꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠍꠦ,
ꠢꠦ ꠟꠉꠦ ꠟꠉꠦꠃ ꠀꠈꠦꠞ ꠙꠣꠁꠟꠤꠍꠦ।
৪৮ ꠀꠝꠤꠃ ꠎꠤꠘ꠆ꠖꠦꠉꠤ-ꠞꠥꠐꠤ।
৪৯ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠔ ꠝꠞꠥꠜꠥꠝꠤꠔ ꠝꠣꠘ꠆ꠘꠣ ꠈꠣꠁꠍꠟꠣ,
ꠔꠣ-ꠅ ꠔꠣꠞꠣꠞ ꠝꠃꠔ ꠅꠁꠍꠦ।
৫০ ꠅꠁꠟꠦ ꠁꠈꠣꠘ ꠅꠁꠟ ꠢꠃ ꠞꠥꠐꠤ,
ꠎꠦ ꠞꠥꠐꠤ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠍꠦ,
ꠎꠣꠔꠦ ꠅꠃ ꠞꠥꠐꠤ ꠈꠣꠁꠀ ꠝꠣꠘꠥꠡ ꠝꠞꠘ ꠕꠣꠇꠤ ꠞꠦꠢꠣꠁ ꠙꠣꠄ।
৫১ ꠢꠥꠘꠅ,
ꠀꠝꠤꠃ ꠅꠁꠟꠣꠝ ꠢꠃ ꠎꠤꠘ꠆ꠖꠣ ꠞꠥꠐꠤ,
ꠎꠦ ꠞꠥꠐꠤ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠍꠦ।
ꠎꠦ ꠎꠘꠦ ꠁ ꠞꠥꠐꠤ ꠈꠣꠁꠛ,
ꠢꠦ ꠌꠤꠞꠇꠣꠟꠤꠘ ꠎꠤꠘ꠆ꠖꠦꠉꠤ ꠙꠣꠁꠛ।
ꠀꠝꠣꠞ ꠇꠣꠄꠀꠃ ꠅꠁꠟ ꠅꠃ ꠞꠥꠐꠤ।
ꠝꠣꠘꠡꠞꠦ ꠌꠤꠞꠇꠣꠟꠤꠘ ꠎꠤꠘ꠆ꠖꠦꠉꠤ ꠖꠤꠛꠣꠞ ꠘꠤꠅꠔꠦ ꠀꠝꠤ ꠀꠝꠣꠞ ꠖꠦꠢ-ꠇꠣꠄꠀ ꠛꠤꠟꠣꠁ ꠖꠤꠝꠥ।”
৫২ ꠁꠈꠣꠘ ꠢꠥꠘꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠞ ꠝꠣꠎꠦ ꠔꠞ꠆ꠇꠣ-ꠔꠞ꠆ꠇꠤ ꠟꠣꠉꠤꠉꠦꠟ।
ꠔꠣꠞꠣ ꠄꠇꠦ-ꠅꠁꠘ꠆ꠘꠦ ꠇꠂꠟ,
“ꠁ ꠛꠦꠐꠣꠄ ꠇꠦꠝꠘꠦ ꠔꠣꠞ ꠡꠞꠤꠟꠞ ꠉꠥꠡ꠆ꠔ ꠀꠝꠞꠣꠞꠦ ꠈꠣꠅꠀꠁꠛ?”
৫৩ ꠁꠍꠣꠄ ꠇꠁꠟꠣ,
“ꠔꠦ ꠢꠥꠘꠅ,
ꠀꠝꠤ ꠘꠤꠌ꠆ꠌꠤꠔ ꠢꠇ ꠇꠕꠣ ꠇꠁꠞꠣꠝ,
ꠔꠥꠝꠞꠣ ꠀꠝꠤ ꠛꠤꠘ-ꠀꠖꠝꠞ ꠟꠃ ꠀꠞ ꠉꠥꠡ꠆ꠔ ꠘꠣ ꠈꠣꠁꠟꠦ ꠔ ꠔꠥꠝꠞꠣꠞ ꠝꠣꠎꠦ ꠎꠤꠘ꠆ꠖꠦꠉꠤꠃ ꠘꠣꠁ।
৫৪ ꠇꠦꠃ ꠎꠥꠖꠤ ꠀꠝꠣꠞ ꠟꠃ ꠀꠞ ꠉꠥꠡ꠆ꠔ ꠈꠣꠄ,
ꠔꠦ ꠢꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠟꠤꠍꠦ,
ꠀꠞ ꠞꠥꠎ ꠢꠣꠡꠞꠞ ꠖꠤꠘꠅ ꠀꠝꠤ ꠔꠣꠞꠦ ꠎꠤꠘ꠆ꠖꠣ ꠇꠞꠤ ꠔꠥꠟꠝꠥ।
৫৫ ꠀꠝꠣꠞ ꠉꠥꠡ꠆ꠔꠃ ꠅꠁꠟ ꠀꠍꠟ ꠈꠣꠘꠤ ꠀꠞ ꠀꠝꠣꠞ ꠟꠃꠃ ꠅꠁꠟ ꠀꠍꠟ ꠙꠣꠘꠤ।
৫৬ ꠎꠦ ꠎꠘꠦ ꠀꠝꠣꠞ ꠟꠃ ꠀꠞ ꠉꠥꠡ꠆ꠔ ꠈꠣꠄ,
ꠢꠦ ꠀꠝꠣꠞ ꠜꠤꠔꠞꠦ ꠕꠣꠇꠦ ꠀꠞ ꠀꠝꠤꠅ ꠔꠣꠞ ꠜꠤꠔꠞꠦ ꠕꠣꠇꠤ।
৫৭ ꠎꠦꠟꠣ ꠀꠝꠣꠞ ꠉꠣꠁꠛꠤ ꠎꠤꠘ꠆ꠖꠣ ꠛꠣꠚꠦ ꠀꠝꠣꠞꠦ ꠙꠣꠑꠣꠁꠍꠂꠘ,
ꠄꠞꠟꠣꠉꠤꠃ ꠀꠝꠤꠅ ꠎꠤꠘ꠆ꠖꠣ ꠀꠍꠤ।
ꠅꠃꠟꠣ ꠎꠦ ꠎꠘꠦ ꠀꠝꠣꠞꠦ ꠈꠣꠄ,
ꠢꠦ-ꠅ ꠀꠝꠣꠞ ꠟꠣꠉꠤ ꠎꠤꠘ꠆ꠖꠣ ꠞꠁꠛ।
৫৮ ꠖꠦꠈꠞꠣꠄ ꠘꠤ,
ꠅꠃ ꠞꠥꠐꠤ ꠔ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠍꠦ।
ꠎꠦ ꠞꠥꠐꠤ ꠈꠣꠁꠀ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ ꠝꠣꠞꠣ ꠉꠦꠍꠂꠘ,
ꠁ ꠞꠥꠐꠤ ꠔ ꠀꠝꠣꠞ ꠟꠣꠈꠣꠘ ꠘꠣꠄ।
ꠀꠝꠣꠞ ꠅꠃ ꠞꠥꠐꠤ ꠎꠦ ꠎꠘꠦ ꠈꠣꠁꠛ,
ꠢꠦ ꠌꠤꠞꠇꠣꠟ ꠎꠤꠘ꠆ꠖꠣ ꠞꠁꠛ।”
৫৯ ꠢꠎꠞꠔ ꠁꠍꠣꠄ ꠇꠚꠞꠘꠣꠃꠝ ꠐꠣꠃꠘꠞ ꠝꠍꠤꠖꠅ ꠔꠣꠟꠤꠝ ꠖꠦꠅꠀꠞ ꠡꠝꠄ ꠁꠔꠣ ꠢꠇꠟꠔꠣ ꠇꠁꠟꠣ।
ꠛꠃꠔ ꠃꠝ꠆ꠝꠔꠞ ꠝꠘꠅ ꠝꠔ-ꠛꠤꠞꠥꠗ
৬০ ꠔꠣꠟꠤꠝ ꠢꠥꠘꠤꠀ ꠢꠣꠞꠤ ꠔꠣꠘ ꠃꠝ꠆ꠝꠔꠞ ꠝꠣꠎꠞ ꠛꠃꠔꠦ ꠇꠁꠟꠣ,
“ꠁꠔꠣ ꠔ ꠛꠠ ꠉꠞꠝ ꠔꠣꠟꠤꠝ।
ꠁꠔꠣ ꠇꠦꠉꠤꠄ ꠝꠣꠘꠛ?”
৬১ ꠅꠁꠟꠦ ꠁꠍꠣꠄ ꠔꠣꠘ ꠉꠣꠁꠛꠤ ꠛꠟꠦ ꠛꠥꠎꠤꠟꠤꠟꠣ,
ꠇꠤꠔꠣ ꠟꠁꠀ ꠄꠞꠣ ꠇꠣꠘꠣ-ꠊꠥꠡꠣ ꠇꠞꠞꠣ।
ꠛꠥꠎꠤꠀ ꠄꠞꠣꠞꠦ ꠇꠁꠟꠣ,
“ꠅꠃ ꠔꠣꠟꠤꠝ ꠢꠥꠘꠤꠀ ꠔꠥꠝꠞꠣ ꠊꠣꠛꠠꠤ ꠉꠦꠟꠣꠄ ꠘꠤ?
৬২ ꠔꠦ ꠀꠝꠤ ꠛꠤꠘ-ꠀꠖꠝ ꠀꠉꠦ ꠎꠦ ꠎꠣꠉꠣꠔ ꠀꠍꠟꠣꠝ,
ꠀꠝꠣꠞꠦ ꠎꠦꠛꠟꠣ ꠢꠘꠅ ꠃꠑꠤ ꠎꠣꠅꠀꠔ ꠖꠦꠈꠛꠣꠄ,
ꠅꠃ ꠡꠝꠄ ꠔꠥꠝꠞꠣ ꠇꠤꠔꠣ ꠇꠁꠛꠣꠄ?
৬৩ ꠔꠥꠝꠞꠣ ꠛꠥꠎꠞꠣꠄ ꠘꠤ,
ꠝꠣꠘꠡꠞ ꠡꠞꠤꠟ ꠔ ꠛꠦꠇꠣꠝꠣ,
ꠀꠍꠟꠦ ꠞꠥꠢꠥ ꠅꠁꠟꠉꠤ ꠎꠤꠘ꠆ꠖꠦꠉꠤ।
ꠀꠝꠤ ꠔꠥꠝꠞꠣꠞꠦ ꠎꠦ ꠛꠄꠀꠘꠤ ꠇꠁꠟꠣꠝ,
ꠁꠔꠣ ꠅꠁꠟꠉꠤ ꠝꠣꠘꠡꠞ ꠞꠥꠢꠥ ꠀꠞ ꠎꠤꠘ꠆ꠖꠦꠉꠤꠞ ꠛꠦꠙꠣꠞ।
৬৪ ꠅꠁꠟꠦ ꠔꠥꠝꠞꠣꠞ ꠝꠣꠎꠦ ꠇꠦꠃ ꠇꠦꠃ ꠅꠈꠘꠅ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠍꠦ ꠘꠣ।”
ꠇꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠍꠦ ꠘꠣ,
ꠀꠞ ꠇꠦ ꠔꠣꠘꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛ,
ꠁꠍꠣꠄ ꠙꠄꠟꠣ ꠕꠣꠇꠤꠃ ꠁꠔꠣ ꠎꠣꠘꠔꠣ।
৬৫ ꠅꠃ ꠔꠣꠁꠘ ꠇꠁꠟꠣ,
“ꠅꠃ ꠇꠣꠞꠘꠦ ꠀꠝꠤ ꠔꠥꠝꠞꠣꠞꠦ ꠇꠁꠍꠤ,
ꠉꠣꠁꠛꠤ ꠛꠣꠚꠦ ꠛꠟ ꠘꠣ ꠖꠤꠟꠦ,
ꠇꠥꠘꠥꠎꠘꠃ ꠀꠝꠣꠞ ꠉꠦꠍꠦ ꠀꠁꠔ ꠙꠣꠞꠦ ꠘꠣ।”
ꠢꠎꠞꠔ ꠙꠤꠔꠞꠞ ꠡꠣꠇ꠆ꠇꠤ
৬৬ ꠁꠍꠣꠞ ꠁꠔꠣ ꠔꠣꠟꠤꠝ ꠢꠥꠘꠤꠀ ꠔꠣꠘ ꠛꠃꠔ ꠃꠝ꠆ꠝꠔ ꠚꠤꠞꠤꠀ ꠉꠦꠟꠣꠉꠤ,
ꠔꠣꠞꠣ ꠔꠣꠘ ꠟꠉꠦ ꠌꠟꠣ-ꠚꠤꠞꠣ ꠛꠣꠖ ꠖꠤꠟꠣꠁꠟꠣ।
৬৭ ꠄꠞꠟꠣꠉꠤ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠎꠤꠇꠣꠁꠟꠣ,
“ꠇꠤꠔꠣ ꠛꠣ,
ꠔꠥꠝꠤꠔꠣꠁꠘꠅ ꠎꠣꠁꠔꠣꠄꠉꠤ ꠘꠤ?”
৬৮ ꠍꠣꠁꠝꠘ-ꠙꠤꠔꠞꠦ ꠎꠥꠀꠙ ꠖꠤꠟꠣ,
“ꠢꠥꠎꠥꠞ,
ꠀꠝꠞꠣ ꠀꠞ ꠇꠣꠞ ꠉꠦꠍꠦ ꠎꠣꠁꠔꠣꠝ?
ꠀꠈꠦꠞꠤ ꠎꠤꠘ꠆ꠖꠦꠉꠣꠘꠤꠞ ꠔꠣꠟꠤꠝ ꠔ ꠈꠣꠟꠤ ꠀꠙꠘꠣꠞ ꠉꠦꠍꠦꠃ ꠀꠍꠦ।
৬৯ ꠀꠝꠞꠣ ꠔ ꠎꠣꠘꠍꠤ ꠀꠞ ꠀꠙꠘꠣꠞ ꠃꠙꠞꠦ ꠁꠝꠣꠘꠅ ꠀꠘꠍꠤ,
ꠀꠙꠘꠦꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠙꠛꠤꠔ꠆ꠞ ꠎꠘ।”